Ko Te Kau Fakamoʼoni Kilisitiano Maʼa Te Pule Faʼitaliha Fakaʼatua
“ ‘Ke koutou faka mafola te ʼu kalitate’ ʼo ia ʼaē neʼe ina pāui koutou mai te fakapōʼuli ki tona mālama taulekaleka.”—1 Petelo 2:9.
1. ʼI te temi ʼi muʼa ʼo Kilisito, koteā te fakamoʼoni lelei neʼe foaki ʼo ʼuhiga mo Sehova?
ʼI TE temi ʼi muʼa ʼo Kilisito, ko te lisi loaloaga ʼo te kau fakamoʼoni neʼe nātou fakahā ʼaki he lototoʼa ko Sehova ko te ʼAtua moʼoni pe e tahi. (Hepeleo 11:4–12:1) ʼI tanatou mālohi ʼi tanatou tui, neʼe nātou fakalogo ki te ʼu lao ʼa Sehova ʼo mole nātou matataku pea neʼe nātou fakafisi ke nātou fakamālaloʼi te ʼu meʼa ʼa te ʼAtua ʼi te faʼahi ʼo te tauhi. Neʼe nātou foaki he fakamoʼoni mālohi ʼo ʼuhiga mo te pule faʼifaʼitaliha ʼa Sehova ʼi te ʼatulaulau.—Pesalemo 18:21-23; 47:1, 2.
2. (a) Ko ai te Fakamoʼoni ʼaē ʼe lahi tokotahi ʼa Sehova? (b) Ko ai ʼaē neʼe ina fetogi te puleʼaga ʼa Iselaele ʼi tona ʼuhiga fakamoʼoni ʼa Sehova? E feafeaʼi hatatou ʼiloʼi te faʼahi ʼaia?
2 Ko te fakamoʼoni fakamuli pea mo lahi ʼi muʼa ʼo Kilisito neʼe ko Soane Patita. (Mateo 11:11) Neʼe ina maʼu te pilivilesio ke ina tala te haʼu ʼo Ia ʼaē neʼe Fili, pea neʼe ina fakahā ia Sesu ohage ko te Mesia ʼaē neʼe fakapapau. (Soane 1:29-34) Ko Sesu ko te Fakamoʼoni lahi ʼa Sehova, “te fakamoʼoni agatonu pea mo moʼoni.” (Fakahā 3:14) ʼUhi he neʼe līaki e te Iselaele ʼo te kakano ia Sesu, neʼe līaki nātou e Sehova pea neʼe ina fili he puleʼaga foʼou, te Iselaele fakalaumālie ʼa te ʼAtua, ke liliu ko hana fakamoʼoni. (Isaia 42:8-12; Soane 1:11, 12; Kalate 6:16) Neʼe tohi e Petelo te lea faka polofeta ʼo ʼuhiga mo Iselaele pea mo ina fakahā ʼe faka ʼuhiga ki “te Iselaele ʼo te ʼAtua,” te kokelekasio faka Kilisitiano, ʼi tana ʼui fēnei: “Ko koutou, ko te ‘hahaʼi kua fili, ko he kau pelepitelo faka hau, ko he puleʼaga maʼoniʼoni, ko he hahaʼi kua tuku ke liliu ko hana meʼa makehe ke koutou faka mafola te ʼu kalitate’ ʼo ia ʼaē neʼe ina pāui koutou mai te fakapōʼuli ki tona mālama taulekaleka.”—1 Petelo 2:9; Ekesote 19:5, 6; Isaia 43:21; 60:2.
3. Koteā te ʼuluaki maʼua ʼo te Iselaele ʼa te ʼAtua pea mo te “toe hahaʼi tokolahi”?
3 ʼE fakahā e te ʼu palalau ʼa Petelo ko te ʼuluaki maʼua ʼo te Iselaele ʼa te ʼAtua ko te foaki ʼo he fakamoʼoni ia muʼa ʼo te hahaʼi ʼo ʼuhiga mo te kolōlia ʼa Sehova. Ia ʼaho nei neʼe fakatahi mai ki te puleʼaga fakalaumālie ʼaia te “toe hahaʼi tokolahi” ʼo te kau fakamoʼoni ʼaē ʼe nātou faka kolōliaʼi foki mo nātou te ʼAtua. ʼE nātou kalaga leʼolahi ke logoʼi e te hahaʼi fuli: “Ko te fakamaʼuli ʼe tou maʼu mai totatou ʼAtua ʼaē ʼe ʼafio ʼi te hekaʼaga faka hau, pea mo te Akeno.” (Fakahā 7:9, 10; Isaia 60:8-10) ʼE feala feafeaʼi ki te Iselaele ʼo te ʼAtua pea mo tana kau kaugā fagona ke nātou fakahoko tanatou fakamoʼoni? ʼAki tanatou tui pea mo tanatou fakalogo.
Ko Te Kau Fakamoʼoni Loi
4. He koe ko te kau Sutea ʼo te temi ʼa Sesu neʼe ko te ʼu fakamoʼoni loi?
4 ʼE kau ki te tui pea mo te fakalogo he maʼuli ʼe mulimuli ki te ʼu pelesepeto fakaʼatua. Ko te maʼuhiga ʼo te faʼahi ʼaia neʼe hā ʼi te meʼa ʼaē neʼe ʼui e Sesu ʼo ʼuhiga mo te kau takitaki lotu Sutea ʼo tona temi. Ko nātou ʼaia neʼe nātou “heheka ʼi te hekaʼaga ʼo Moisese” ohage ko ni ʼu faiako ʼo te Lao. Neʼe nātou toe fekauʼi pe foki te kau misionea ke nātou fakatafoki ia nātou ʼaē ʼe mole tui. Koia, neʼe ʼui fēnei e Sesu kia nātou: “ ʼE koutou fetuʼulaki ʼi te tai pea mo te kele moʼo fai ʼo he poloselite, pea ka liliu ʼo poloselite, ʼe koutou faka fealagia ia ia ki te Seʼeni ʼo lahi tuʼa lua ake ia koutou.” Ko te ʼu hahaʼi lotu ʼaia neʼe ko te kau fakamoʼoni loi—fiatuʼu, malualoi, pea mo heʼeʼofa. (Mateo 23:1-12, 15) ʼI te tahi lakaga neʼe ʼui e Sesu ki ʼihi kau Sutea: “ ʼE koutou ʼōmai koutou mai takotou tāmai, te Tevolo, pea ʼe koutou fia fakahoko te ʼu meʼa ʼaē ʼe holi kiai takotou tāmai.” He koʼe neʼe ina ʼui te ʼu faʼahiga meʼa ʼaia kia nātou ʼaē ʼe kau ki te puleʼaga ʼaē neʼe fili e Sehova? Koteʼuhi neʼe mole nātou fakalogo ki te Fakamoʼoni ʼaē ʼe lahi tokotahi ʼa Sehova.—Soane 8:41, 44, 47.
5. E feafeaʼi hatatou ʼiloʼi neʼe foaki e te Keletiate he fakamoʼoni loi ʼo ʼuhiga mo te ʼAtua?
5 ʼO toe feiā aipe, lolotoga te ʼu sēkulō talu mai te temi ʼo Sesu, ko te lauʼi teau miliona hahaʼi ʼo te Keletiate ʼe nātou lau ko nātou ko ʼana ʼu tisipulo. Kae, ʼe mole nātou fai te finegalo ʼo te ʼAtua pea ʼe mole ʼiloʼi nātou e Sesu. (Mateo 7:21-23; 1 Kolonito 13:1-3) Neʼe fekauʼi e te Keletiate te kau misionea, tokolahi ia nātou ʼe mahino ia neʼe nātou fakamalotoloto. Koia, neʼe nātou akoʼi ki te hahaʼi te atolasioʼi ʼa he ʼatua faka tahitolu ʼe ina tutu te hahaʼi agahala ʼi he ʼifeli kakaha, pea tokolahi ia nātou ʼaē ʼe tafoki ʼe mole lahi he ʼu fakamoʼoni ʼe nātou fakahā ai ko nātou ko te ʼu Kilisitiano moʼoni. Ohage la, ʼi Rwanda, te fenua ʼo Afelika neʼe ko te gāueʼaga lelei maʼa te kau misionea Katolika Loma. Logope la te faʼahi ʼaia, neʼe kau te ʼu Katolika ʼo Rwanda ʼaki tonatou loto katoa ki te ʼu tau fakalanu ʼaenī neʼe hoko ʼi te fenua ʼaia. Ko te fua ʼo te gāueʼaga faka misionea ʼaia ʼe ina fakahā tana mole maʼu he fakamoʼoni faka Kilisitiano ʼe moʼoni mai te Keletiate.—Mateo 7:15-20.
Ko He Maʼuli ʼe Mulimuli Ki Te ʼu Pelesepeto Fakaʼatua
6. ʼE feala feafeaʼi ki he aga ʼe lelei ke liliu ʼo maʼuhiga ʼi te foaki ʼaē ʼo he fakamoʼoni?
6 Ko te ʼu aga ʼaē ʼe kovi ʼo nātou ʼaē ʼe nātou lau ko he kau Kilisitiano, ʼe ina fakatupu meo ʼo ʼuhiga mo te “ala ʼo te moʼoni.” (2 Petelo 2:2) Ko he Kilisitiano fakamalotoloto ʼe maʼuli ʼo mulimuli ki te ʼu pelesepeto fakaʼatua. ʼE mole kaihaʼa, mole loi, mole gāue fakakākā, peʼe mole ina fai he aga heʼeʼaoga. (Loma 2:22) ʼE mahino papau ia ʼe mole ina fakapogi tona kāiga. ʼE fakahā e te ʼu tagata ʼohoana Kilisitiano he leʼoleʼo ʼofa ki tonatou famili. ʼE tali e te ʼu fafine ʼohoana ʼaki he fakaʼapaʼapa te leʼoleʼo ʼaia. ʼE taupau te ʼu fānau e tanatou ʼu mātuʼa pea ʼe teuteuʼi nātou ke nātou liliu ko he kau tagata Kilisitiano ʼe nātou fakahoko tonatou maʼua. (Efesi 5:21–6:4) ʼE moʼoni ʼe tou heʼe haohaoa fuli pea ʼe tou fai fuli he ʼu hala. Kae ko he Kilisitiano moʼoni ʼe fakaʼapaʼapa ki te ʼu lekula ʼo te Tohi-Tapu pea ʼe faiga moʼoni ke ina maʼuliʼi te ʼu lekula ʼaia. ʼE feala ke fakatokagaʼi te faʼahi ʼaia e niʼihi pea ke fakatupu ʼaki ai he fakamoʼoni lelei. ʼI ʼihi temi, neʼe fakatokagaʼi e nātou ʼaē neʼe fakafeagai ʼi muʼa atu ki te moʼoni, te agalelei ʼa he Kilisitiano pea neʼe nātou tafoki mai.—1 Petelo 2:12, 15; 3:1.
7. E feafeaʼi te maʼuhiga ʼaē ke feʼofaʼofaniʼaki te kau Kilisitiano?
7 Neʼe fakahā e Sesu te faʼahiga meʼa maʼuhiga ʼo ʼuhiga mo te aga faka Kilisitiano ʼi tana ʼui fēnei: “ ʼAki te meʼa ʼaenī ʼe ʼiloʼi anai e te hahaʼi fuli ko koutou ko taku ʼu tisipulo, mo kapau ʼe koutou femaʼuʼaki te ʼofa.” (Soane 13:35) ʼE fakaʼiloga te mālama ʼa Satana ʼaki te “heʼe faitotonu, te agakovi, te mānumānu, te aga fakakākā, fonu ʼi te holi, te fai fakapō, te ʼu kē, te fai ʼaē ʼo te meʼa kovi, te kākā, te muhumuhu ʼo ni ʼu palalau kafokona, te fatufatu, te fehiʼa ki te ʼAtua, fialahi, fiatuʼu, fia māʼoluga, poto ʼi te fai ʼo te meʼa ʼaē ʼe kovi, talagataʼa ki te ʼu mātuʼa.” (Loma 1:29, 30) ʼI te taʼi maʼuli ʼaia, ko he kautahi ʼi te malamanei katoa ʼe ʼiloga ʼaki te ʼofa ʼe ko he fakamoʼoni mālohi ʼo te gāue ʼo te laumālie ʼa te ʼAtua ʼi ai—ko he fakamoʼoni ʼe fua manuʼia. Ko te faʼahiga kautahi ʼaia ʼa te kau Fakamoʼoni ʼa Sehova.—1 Petelo 2:17.
Ko Te Kau Fakamoʼoni ʼe Ko He Kau Ako ʼo Te Tohi-Tapu
8, 9. (a) Neʼe feafeaʼi te fakaloto mālohiʼi e te tagata fai pesalemo ʼaki te ako ʼo te Lao ʼa te ʼAtua pea mo tana metitasioʼi? (b) ʼE feala feafeaʼi ki te ako faka Tohi-Tapu pea mo te metitasio hana fakaloto mālohiʼi tatou ke tou haga foaki te fakamoʼoni?
8 Ke lava foaki he fakamoʼoni ʼe lelei, ʼe tonu ke ʼiloʼi pea mo ʼofa te Kilisitiano ki te ʼu fakatuʼutuʼu faitotonu ʼa Sehova pea ke fehiʼa moʼoni ki te aga fakahehema ʼo te mālama. (Pesalemo 97:10) ʼE mālohi te mālama ʼi te ʼeke tana manatu, pea ʼe feala ke faigataʼa te tauʼi ʼo tana laumālie. (Efesi 2:1-3; 1 Soane 2:15, 16) Koteā ʼaē ʼe feala ke tokoni kia tatou ke tou taupau te manatu ʼaē ʼe lelei? Ko te ako tuʼumaʼu pea mo loloto ʼo te Tohi-Tapu. Neʼe liuliuga te ʼui ʼa te tagata fai pesalemo tona ʼofa ki te ʼu Lao ʼa Sehova. Neʼe ina lau pea mo metitasioʼi tuʼumaʼu, “ ʼi te ʼaho katoa.” (Pesalemo 119:92, 93, 97-105) Ko tona fua, neʼe feala ke ina tohi fēnei: “Neʼe ʼau fehiʼa ki te loi, pea ʼe kei ʼau fehiʼa moʼoni kiai. Neʼe ʼau ʼofa ki tau lao.” ʼO toe hilifaki atu kiai, ko tona ʼofa loloto neʼe ina uga ia ia ke gāue. ʼE ina ʼui fēnei: “Tuʼa fitu ʼi te ʼaho neʼe ʼau vikiʼi koe ʼuhi ko tau ʼu tonu fai fakamāu faitotonu.”—Pesalemo 119:163, 164.
9 ʼO toe feiā aipe, ko tatatou ako tuʼumaʼu ia te Folafola ʼa te ʼAtua pea mo tatatou metitasioʼi, ʼe malave anai ki totatou loto pea ʼe ina uga anai tatou ke tou ‘vikiʼi ia ia’—ke tou fakamoʼoni kia Sehova—ʼo fai tuʼa lahi, peʼe “tuʼa fitu ʼi te ʼaho.” (Loma 10:10) ʼO ʼalutahi mo te faʼahi ʼaia, neʼe ʼui e te tagata faitohi ʼo te ʼuluaki pesalemo ko ia ʼaē ʼe metitasio ki te folafola ʼa Sehova “ ʼe liliu anai ko he fuʼu ʼakau ʼe to ōvi ki te vaitafe, ʼe fua ʼi tona temi tonu pea ʼe mole fefe tona ʼu lau, pea ko meʼa fuli ʼe ina fai ʼe fua anai.” (Pesalemo 1:3) Neʼe toe fakahā foki e te ʼapositolo ko Paulo te mālohi ʼa te Folafola ʼa te ʼAtua ʼi tana tohi fēnei: “Ko te Tohi-Tapu katoa ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu, koteʼuhi ke faiva katoa te tagata ʼa te ʼAtua, ke ina maʼu lelei ia meʼa fuli ʼe ʼaoga ki te gāue lelei fuli pe.”—2 Timoteo 3:16, 17.
10. Koteā ʼaē ʼe moʼoni ʼo ʼuhiga mo te hahaʼi ʼa Sehova ʼi te ʼu ʼaho fakamuli ʼaenī?
10 Ko te tuputupu vave ʼa te kau atolasio moʼoni ʼi te ʼuafulu sēkulō ʼe ina fakahā te tapuakina ʼa Sehova. ʼE mahino papau ia, ʼi tonatou ʼuhiga hahaʼi, ko te kau fakamoʼoni ʼo te temi ʼaenī ʼaē ʼe nātou lagolago ki te pule faʼitaliha ʼa te ʼAtua neʼe nātou maʼuliʼi te ʼofa ki te lao ʼa Sehova ʼi tonatou loto. Ohage pe ko te tagata fai pesalemo, ʼe uga nātou ke nātou fakalogo ki Tana lao pea ke nātou fakamoʼoni agatonu “ ʼi te ʼaho mo te po” ʼo ʼuhiga mo te kolōlia ʼo Sehova.—Fakahā 7:15.
Ko Te ʼu Gāue Mālohi ʼa Sehova
11, 12. Koteā ʼaē neʼe fakahoko e te ʼu milakulo neʼe fai e Sesu pea mo tana kau tisipulo?
11 ʼI te ʼuluaki sēkulō, neʼe foaki e te laumālie maʼoniʼoni ki te ʼu fakamoʼoni Kilisitiano agatonu te fealagia ʼaē ke nātou fakahoko he ʼu milakulo, ko te faʼahi ʼaia neʼe ina foaki he fakamoʼoni mālohi ko te meʼa ʼaē neʼe nātou ʼui ʼe moʼoni. ʼI te temi ʼaē neʼe nofo ia Soane Patita ʼi te fale pilisoni, neʼe ina fekauʼi tana kau tisipulo ke nātou fehuʼi age kia Sesu: “ ʼE ko koe koa ʼAē ʼe Haʼu, peʼe tonu koa ia ke mātou talitali ki he tahi age?” Neʼe mole tali age e Sesu ei peʼe kailoa ia. Kae, neʼe ina ʼui fēnei: “Koutou ʼolo ʼo fakamatala kia Soane te ʼu meʼa ʼaē ʼe koutou fagono pea mo mamata kiai: Kua toe sio te kivi, pea kua haʼele te ketu, kua fakamaʼa te kilia, pea kua logo te tuli, pea kua fakatuʼuake te kau mate, pea ko te logo lelei kua fakahā ki te kau māsisiva; pea manuʼia ia ia ʼaē ʼe mole ina maʼu ia te ʼau he meʼa fakatupu tūkia.” (Mateo 11:3-6) Neʼe fakaʼaogaʼi te ʼu gāue ʼaia ohage ko he fakamoʼoni kia Soane ko Sesu totonu “ia ia ʼAē ʼe Haʼu.”—Gāue 2:22.
12 ʼO toe feiā aipe, ko ʼihi ʼi te ʼu tisipulo ʼa Sesu neʼe nātou fakamālōlō te kau mahaki pea mo nātou fakatuʼuake mo te kau mate. (Gāue 5:15, 16; 20:9-12) Ko te ʼu milakulo ʼaia neʼe ko te fakamoʼoni mai te ʼAtua totonu kia nātou. (Hepeleo 2:4) Pea neʼe fakahā e te ʼu faʼahiga gāue ʼaia te mālohi māfimāfi ʼa Sehova. Ohage la, ʼe moʼoni ko Satana, “te pule ʼo te malamanei,” ko ia ʼaē ʼe tupu mai ai te mate. (Soane 14:30; Hepeleo 2:14) Kae ʼi te temi ʼaē neʼe fakatuʼuake e Petelo te fafine agatonu ko Tolokasi mai te mate, neʼe feala ke ina fakahoko te faʼahi ʼaia ʼaki pe te mālohi ʼa Sehova, koteʼuhi ko Ia tokotahi pe ʼe feala hana toe fakamaʼuli.—Pesalemo 16:10; 36:9; Gāue 2:25-27; 9:36-43.
13. (a) E feafeaʼi te kei fakamoʼoni e te ʼu milakulo ʼo te Tohi-Tapu te mālohi ʼa Sehova? (b) E feafeaʼi te liliu ʼo maʼuhiga te fakahoko ʼo te ʼu lea faka polofeta ʼi te fakamoʼoni ki te ʼuhiga ʼAtua ʼo Sehova?
13 Ia ʼaho nei, ʼe mole kei hoko te ʼu milakulo ʼaia. Neʼe kua iku tanatou fakatuʼutuʼu. (1 Kolonito 13:8) Kae, ʼe kei tou maʼu pe te ʼu fakamatalatala ʼo ʼuhiga mo te ʼu milakulo ʼaia ʼi te Tohi-Tapu, ʼo fakamoʼoni e te tokolahi ʼaē neʼe nātou sisio kiai. Ia ʼaho nei, mokā fakatokagaʼi e te kau Kilisitiano te ʼu fakamatala faka hisitolia ʼaia, ʼe kei foaki e te ʼu gāue ʼaia he fakamoʼoni lelei ʼo ʼuhiga mo te mālohi ʼa Sehova. (1 Kolonito 15:3-6) ʼO hilifaki kiai, tou toe liliu ki te temi ʼo Isaia, neʼe tala e Sehova te ʼu lea faka polofeta moʼoni ohage ko he fakamoʼoni makehe ko Ia te ʼAtua moʼoni. (Isaia 46:8-11) ʼE lahi te ʼu lea faka polofeta ʼaē mai te ʼAtua ʼe lolotoga fakahoko ia ʼaho nei—ko ʼihi ʼe fakahoko ʼi te kokelekasio faka Kilisitiano. (Isaia 60:8-10; Taniela 12:6-12; Malakia 3:17, 18; Mateo 24:9; Fakahā 11:1-13) ʼI tana fakahā ʼaē ʼe tou maʼuʼuli ʼi te ʼu “ ʼaho fakamuli,” ko te fakahoko ʼo te ʼu lea faka polofeta ʼaia ʼe lagolago ki te ʼui ʼaē ko Sehova te ʼAtua moʼoni pe e tahi.—2 Timoteo 3:1.
14. ʼE feala feafeaʼi ke liliu te hisitolia ʼo totatou temi ʼo te kau Fakamoʼoni ʼa Sehova ko he fakamoʼoni mālohi ki te ʼuhiga Tui ʼAliki ʼo Sehova?
14 Moʼo fakaʼosi, ʼe kei fai e Sehova te ʼu meʼa lalahi, te ʼu meʼa matalelei maʼa tana hahaʼi. ʼE takitaki e te laumālie ʼo te ʼAtua te tuputupu ʼo te mālama ʼo te moʼoni ʼo te Tohi-Tapu. (Pesalemo 86:10; Fakahā 4:5, 6) Ko te ʼu tuputupu makehe ʼaē ʼe hoko ʼi te malamanei ʼe ko he fakamoʼoni ia ko Sehova ʼe ina ‘faka gaholo te faʼahi ʼaia mokā hoko tona temi.’ (Isaia 60:22) ʼI te temi ʼaē neʼe hoko ai te fakataga fakamataku ʼi he fenua ki he tahi fenua lolotoga te ʼu ʼaho fakamuli, neʼe feala ke kātakiʼi e te hahaʼi ʼa Sehova ʼaki he lototoʼa ʼuhi ko te tokoni mālohi ʼa te laumālie maʼoniʼoni. (Pesalemo 18:1, 2, 17, 18; 2 Kolonito 1:8-10) Ei, ko te hisitolia ʼa te kau Fakamoʼoni ʼa Sehova ʼo totatou temi ʼe ko he fakamoʼoni mālohi ʼe ko Sehova te Tui ʼAliki.—Sakalia 4:6.
ʼE Tonu Ke Faka Mafola Te Logo Lelei
15. Koteā te fakamoʼoni lahi neʼe tonu ke foaki e te kokelekasio faka Kilisitiano?
15 Neʼe hinoʼi e Sehova ia Iselaele ke liliu ko hana fakamoʼoni ki te ʼu puleʼaga. (Isaia 43:10) Kae, neʼe ko te tokosiʼi pe ʼi te kau Iselaelite ʼaē neʼe fekauʼi e te ʼAtua ke nātou ʼolo pea ke nātou faka mafola kia nātou ʼaē neʼe mole Iselaelite, pea ʼi te agamāhani neʼe fai te faʼahi ʼaia moʼo tala te ʼu fakamāu ʼa Sehova. (Selemia 1:5; Sonasi 1:1, 2) Kae, ko te ʼu lea faka polofeta ʼo te Tohi Faka Hepeleo, ʼe fakahā ai ʼe faka fālahi anai e Sehova tana tokaga ki te ʼu puleʼaga, pea neʼe ina fai te faʼahi ʼaia ʼaki te Iselaele fakalaumālie ʼa te ʼAtua. (Isaia 2:2-4; 62:2) ʼI muʼa ʼo tana hake ki te lagi, neʼe fakatotonu e Sesu ki tana ʼu tisipulo: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe.” (Mateo 28:19) ʼI te lolotoga fakatokagaʼi e Sesu “te ʼu ōvi ʼaē kua hēhē ʼo te ʼapi ʼo Iselaele,” neʼe ina fekauʼi tana kau tisipulo ke nātou ʼolo ki “te ʼu fenua fuli,” māʼia mo “te potu ʼaē ʼe mamaʼo ʼo te kele.” (Mateo 15:24; Gāue 1:8) Neʼe tonu ke fagono te hahaʼi fuli ki te fakamoʼoni faka Kilisitiano.
16. Koteā te fekau neʼe fakahoko e te kokelekasio faka Kilisitiano ʼo te ʼuluaki sēkulō, ʼo lahi feafeaʼi?
16 Neʼe fakahā e Paulo neʼe mahino lelei ki te faʼahi ʼaia. ʼI te taʼu 61 ʼo totatou temi, neʼe feala ke ina ʼui ko te logo lelei neʼe “fua pea mo tuputupu ʼi te mālama katoa.” Neʼe mole faka tuʼakoi pe te faka mafola ʼo te logo lelei ki he fenua peʼe ki he magaʼi lotu, ohage ko te magaʼi lotu ʼaē ʼe fai ai “te tauhi ki te kau ʼaselo.” Kae “neʼe faka mafola ʼi te ʼu meʼa katoa ʼaē neʼe fakatupu ʼaē ʼe ʼi te lalo lagi.” (Kolose 1:6, 23; 2:13, 14, 16-18) Koia neʼe fakahoko e te Iselaele ʼa te ʼAtua ʼo te ʼuluaki sēkulō tana gāue ʼaē “ ‘ke faka mafola te ʼu kalitate’ ʼo ia ʼaē neʼe ina pāui [nātou] mai te fakapōʼuli ki tona mālama taulekaleka.”
17. E feafeaʼi te toe hoko atu pe ʼo te vaega ʼo Mateo 24:14 ʼi hona ʼaluʼaga lahi?
17 Kae, ko te gāue fai faka mafola ʼaia ʼo te ʼuluaki sēkulō neʼe ko te fakahā fakatomuʼa ia ʼo te meʼa ʼaē ka hoko anai lolotoga te ʼu ʼaho fakamuli. ʼAki hana manatu tāfito ki totatou temi, neʼe ʼui fēnei e Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (Mateo 24:14; Maleko 13:10) ʼE kua hoko koa te lea faka polofeta ʼaia? ʼE mahino papau ia kua hoko. Mai tona kamata māmālie ʼi te taʼu 1919, ko te gāue fai faka mafola ʼo te logo lelei kua mafola ʼo laka ia fenua e 230. ʼI te ʼu fenua momoko ʼaē ʼe ōvi ki te Arctique pea mo te ʼu fenua ʼaē ʼe vevela mo māhūhū ʼe logo ʼi ai ia te fakamoʼoni. ʼE fakahoko te fakamoʼoni ʼi te ʼu fenua lalahi, pea ʼe nātou aʼu ki te ʼu motu mamaʼo ke maʼu e te ʼu hahaʼi ʼaē ʼe nonofo ʼi ai te fakamoʼoni. Māʼiape la ʼi te lotolotoiga ʼo te ʼu fihifihia, ohage la ko te tau ʼi Bosnie pea mo Herzégovine, ʼe kei hoko atu pe te faka mafola ʼo te logo lelei. Ohage ko te ʼuluaki sēkulō, ko te fakahā ʼo te moʼoni ʼe fua “ ʼi te mālama katoa.” Ko te logo lelei ʼe tala “ ʼi te ʼu meʼa katoa ʼaē neʼe fakatupu ʼaē ʼe ʼi te lalo lagi.” Koteā tona ʼu fua? ʼUluaki, ko te toe ʼo te Iselaele ʼa te ʼAtua neʼe fakatahiʼi “mai te ʼu telepi kehekehe pea mo te ʼu lea kehekehe pea mo te ʼu hahaʼi kehekehe pea mo te ʼu puleʼaga kehekehe.” Lua, ko te toko miliona ʼo te “toe hahaʼi tokolahi” neʼe kamata ʼōmai mai “te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli pe.” (Fakahā 5:9; 7:9) Ko te vaega ʼo Mateo 24:14 ʼe kei fakahoko atu pe ʼi he ʼaluʼaga lahi.
18. Koteā te ʼu meʼa ʼe lolotoga fakahoko ʼaki te faka mafola ʼo te logo lelei ʼi te malamanei katoa?
18 Ko te fai faka mafola ʼi te malamanei katoa ʼe ina lagolago ki te fakamoʼoni ʼaē kua kamata te ʼafio faka hau ʼa Sesu. (Mateo 24:3) Pea tahi ʼaē, ko te meʼa gāue tāfito ʼaē ʼe fakahoko ʼaki ai “te taʼukai ʼo te kele,” heʼe ina taki te hahaʼi ki te ʼamanaki moʼoni pe e tahi maʼa te malamanei, te Puleʼaga ʼo Sehova. (Fakahā 14:15, 16) ʼUhi ko te kau Kilisitiano moʼoni pe ʼaē ʼe kau ki te fai faka mafola ʼo te logo lelei, ko te gāue maʼuhiga ʼaia ʼe tokoni ki te fakakeheʼi ʼo te kau Kilisitiano moʼoni mai te kau Kilisitiano loi. (Malakia 3:18) ʼI te faʼahiga fai ʼaia, ʼe iku te gāue ʼaia ki te hāofaki ʼo nātou ʼaē ʼe fai faka mafola pea mo nātou ʼaē ʼe nātou tali. (1 Timoteo 4:16) Ko te faʼahi ʼaē ʼe maʼuhiga age, ko te faka mafola ʼo te logo lelei ʼe ina foaki te fakavikiviki pea mo te faka maʼuhiga kia Sehova ʼAtua, ia ia ʼaē ʼe ina takitaki te meʼa ʼaē ʼe fai, ia ia ʼaē ʼe tokoni kia nātou ʼaē ʼe nātou fai te gāue ʼaia, pea ko ia ʼaē ʼe ina faka fua lelei.—2 Kolonito 4:7.
19. Koteā te fakatotonu ʼe ina fakaloto mālohiʼi te kau Kilisitiano fuli ke nātou maʼu ʼi tanatou hū ʼaē ki te taʼu gāue foʼou?
19 ʼE mole fakapunamaʼuli te uga ʼaē ʼa te ʼapositolo ko Paulo ke ina ʼui fēnei: “Malaʼia kia te ʼau mo kapau ʼe mole ʼau tala te logo lelei!” (1 Kolonito 9:16) Ia ʼaho nei, ʼe logoʼi e te ʼu Kilisitiano te faʼahi ʼaia. ʼE ko he pilivilesio pea mo he maʼua lahi ke tou liliu ko he ʼu “kaugā gāue ʼa te ʼAtua,” ʼo fakagigila te mālama ʼo te moʼoni ʼi te mālama fakapōʼuli ʼaenī. (1 Kolonito 3:9; Isaia 60:2, 3) Ko te gāue ʼaē neʼe kamata māmālie ʼi te taʼu 1919 kua liliu ʼo fakaofoofo tona lahi. Ko te teitei toko nima miliona kau Kilisitiano ʼe nātou fakamoʼoni maʼa te pule faʼitaliha fakaʼatua, pea ʼe nātou fakaʼaogaʼi ia hola e tahi miliale tupu moʼo foaki te logo ʼo te fakamaʼuli ki niʼihi. ʼI toe fiafia leva te kau ʼaē ki te gāue ʼaia ʼo te tāpuhā ʼo te huafa ʼa Sehova! ʼI tatatou hū ʼaē ki te taʼu gāue 1996, tou fakatotonu ke ʼaua naʼa tou fakatumetume. Kae, ʼe tou fakatokagaʼi anai ʼo lahi age te ʼu palalau ʼo te ʼapositolo ko Paulo kia Timoteo: “Faka mafola te folafola, fai ʼaki te loto mālohi.” (2 Timoteo 4:2) ʼAki tatatou faʼahiga fai ʼaia, ʼe tou faikole ʼaki totatou loto katoa ke haga tapuakina aipe e Sehova tatatou ʼu faiga.
ʼE Kei Koutou Manatuʼi Koa?
◻ Ko ai ʼaē ʼe ina fetogi ia Iselaele ʼi te ʼuhiga “fakamoʼoni” ʼa Sehova ki te ʼu puleʼaga?
◻ E feafeaʼi te kau ʼo te aga faka Kilisitiano ki te foaki ʼo he fakamoʼoni?
◻ He koʼe ʼe maʼuhiga ki te Fakamoʼoni Kilisitiano te ako ʼo te Tohi-Tapu pea mo te metitasio?
◻ ʼE fakahā feafeaʼi e te hisitolia ʼa te kau Fakamoʼoni ʼa Sehova ʼo totatou temi, ko Sehova te ʼAtua moʼoni?
◻ Koteā ʼaē ʼe fakahoko e te faka mafola ʼo te logo lelei?
[Paki ʼo te pasina 15]
ʼO mole hana faka tuʼakoi, ko te logo lelei ʼi te temi nei ʼe fakahā “ ʼi te ʼu meʼa katoa ʼaē neʼe fakatupu ʼaē ʼe ʼi te lalo lagi”