Ko Te Kau Faka Mafola ʼo Te Puleʼaga ʼe Nātou Fakamatala

ʼE Fakaaʼu Te Moʼoni Ki Te ʼu Faʼahiga Hahaʼi Kehekehe

KO TE ʼapositolo ko Paulo neʼe ko he kaugā fai faka mafola faiva ʼo te Puleʼaga ʼo te ʼAtua. Neʼe mole ina tuku te ʼu fakafeagai ke ina fakagata tana gāue ʼaē neʼe fakatotonu age ke ina fai, ʼaē ko te faka mafola ʼo “te logo lelei.” (1 Kolonito 9:​16; Gāue 13:50-​52) Neʼe uga e Paulo te hahaʼi ke nātou mulimuli ki tana faʼifaʼitaki.​—1 Kolonito 11:1.

ʼE ʼiloa te kau Fakamoʼoni ʼa Sehova ʼi te malamanei ʼi tanatou ʼu faiga mālohi ʼi te fai faka mafola. Koia, ʼe nātou palalau ki te hahaʼi ʼi “te temi faigamālie” pea ʼi “te ʼu temi faigataʼa,” moʼo fakahoko tanatou gāue ʼaē neʼe fakatotonu age e te ʼAtua, ʼaē ko te “fai ʼo ni ʼu tisipulo.” (2 Timoteo 4:2; Mateo 28:19, 20) Māʼiape la ʼi te ʼu fenua ʼaē ʼe fai ai te ʼu fakafeagai kia nātou, ʼe fakaaʼu te logo maʼuhiga ʼo te Puleʼaga ʼo te ʼAtua ki te hahaʼi fakamalotoloto, ohage ko tona fakahā e te ʼu faʼifaʼitaki ʼaenī.

◻ ʼI te motu ʼi te potu hihifo ʼo te Pasifika, ʼaē ʼe tapuʼi ai te gāue ʼa te kau Fakamoʼoni ʼa Sehova, neʼe fakatokagaʼi e te tūpulaga ʼe taʼu 12 neʼe mole lelei tana ʼu fakakaugā ʼi te faleako. Tokolahi ʼi tana ʼu kaugā ako neʼe nātou suluka, mo nātou lau te ʼu tohi ʼaē ʼe hā ai te ʼu felāveʼi fakasino heʼeʼaoga, mo nātou fakakinakinaʼi te hahaʼi faiako, pea mo nātou fuhu. Neʼe fakaʼaluʼalu ʼo kovi ʼosi te ʼu aga ʼaia, koia neʼe kole ai e te tūpulaga ki tana tāmai ke ʼalu ki he tahi faleako. Kae neʼe vakaʼi e te tāmai mo tona foha te manatu ʼaia, koteʼuhi neʼe ina ʼiloʼi ʼe toe feiā pe mo te aga ʼa te tamaliki ʼi te ʼu faleako ʼaē. Kae neʼe tokoni feafeaʼi ki tona foha?

Neʼe manatuʼi e te tāmai ʼe ʼi ai ʼi tona ʼapi te tohi ʼe talanoa ʼo ʼuhiga mo te kau tūpulaga. Neʼe ko te meʼa ʼofa mai tona kāiga ʼaē ʼe ko te Fakamoʼoni ʼa Sehova. Neʼe ina kumi ai te tohi, pea ʼi tana maʼu te tohi ʼaia, neʼe ina foaki ki tona foha. Ko tona kupu tāfito ʼaenī Les jeunes sʼinterrogent — Réponses pratiques.a Neʼe ʼaoga tāfito ki te tūpulaga te kapite ʼaē ʼe ʼui fēnei ai “ ʼE lava feafeaʼi haku tauʼi te ʼu fakaneke ʼo toku ʼu kaumeʼa?” Neʼe ina ako ai te maʼuhiga ʼo te taupau he fakaʼapaʼapa kia kita, pea neʼe ina ako ai pe neʼe lava feafeaʼi kia ia hana fakafisi fakalelei, mokā fakaneke ia ia e ʼihi ke ina fai he aga ʼe kovi. ʼI tana maʼuliʼi te ʼu pelesepeto faka Tohi-Tapu ʼaē neʼe ina maʼu ʼi te tohi, neʼe ako ai e te tūpulaga te ʼu meʼa ʼaē neʼe ʼaoga kia ia moʼo tauʼi ʼo te ʼu fakaneke ʼo tona ʼu kaugā ako.

ʼI tana fakatokagaʼi te faʼahi ʼaia pea mo te ʼu fetogi lelei ʼo tona foha, neʼe fakatotonu e te tāmai ke ina lau te tohi. ʼI tana punamaʼuli ki te ʼu tokoni ʼaoga ʼaē ʼe maʼu ʼi te tohi ʼaia, neʼe kole e te tāmai ki te kau Fakamoʼoni ʼa Sehova ke fai hana ako Tohi-Tapu. Ki muli age, ko te tahi ʼu hahaʼi ʼo tona famili neʼe nātou ako mo nātou. Koteā tona ʼu fua? Ko te tūpulaga, mo tona tēhina veliveli, mo tana tāmai, mo te ʼu kui ʼa te tūpulaga ʼaia, kua nātou liliu ʼi te temi nei ko te kau Fakamoʼoni ʼa Sehova.

◻ ʼI te motu pe ʼaia, neʼe pilisoniʼi te ʼu Fakamoʼoni ʼa Sehova e lua, ʼuhi ko tanā mulimuli lelei ki te ʼu pelesepeto ʼa te Tohi-Tapu. Kae neʼe mole nā tuku te ʼaluʼaga ʼaia ke ina tāʼofi nāua ke nā palalau ʼaki he lototoʼa ʼo ʼuhiga mo te Puleʼaga ʼo te ʼAtua. Neʼe nā palalau mo te tagata ofisie ʼo te fale pilisoni, pea neʼe fakagafua age ke nā fai te fakamanatu ʼo te Taumafa ʼo te ʼAliki ʼi te fale pilisoni. Neʼe nā fiafia lahi ʼi te temi ʼaē neʼe fakahā ai e te ʼu hahaʼi pilisoni e 14 tanatou fia ako ia te Tohi-Tapu, pea mo nātou fakatahi mo te ʼu Fakamoʼoni ʼa Sehova ʼaia ki te fakamanatu maʼuhiga ʼaia. ʼI tanatou mavae mai te fale pilisoni, ko ʼihi ia nātou neʼe hoko atu tanatou ako te Tohi-Tapu, pea mo nātou fakatahi mo te kau Fakamoʼoni ʼa Sehova.

Ia fenua e 25 tupu, ʼe lotomamahi te kau Fakamoʼoni ʼa Sehova ʼuhi ko te tapuʼi ʼo tanatou gāue, pe ko te ʼu faʼahiga fakafeagai kehekehe peʼe ko te ʼu fakataga ʼaē ʼe hoko kia nātou. Kae, ohage pe ko te ʼu ʼapositolo, ʼe “nātou haga akoʼi pea mo tala te logo lelei ʼo ʼuhiga mo Kilisito, Sesu.”​—Gāue 5:​42.

[Nota ʼi te lalo pasina]