Te ʼu Fakaneke Pea Mo Te Pilivilesio Ke Kita Fai Faka Mafola
1 ʼE mālohi te ʼu fakaneke—ke kita fai te meʼa ʼaē ʼe lelei peʼe ko te meʼa ʼaē ʼe kovi. ʼE fakaneke tatou e te ʼu kaugana ʼa Sehova ke tou fai he ʼu gāue faka Kilisitiano lelei. (Hep. 10:24) Kae ko ʼihi ʼi totatou famili ʼaē ʼe mole ʼi te moʼoni, peʼe ko he ʼu kaugā gāue, he ʼu kaugā ako, he ʼu vāhaʼa fale peʼe ko totatou ʼu feʼilo ʼe feala ke nātou fakaneke tatou, ke tou fai he ʼu meʼa ʼe fakafeagai ki te ʼu pelesepeto faka Kilisitiano. ʼE feala ke nātou “laukovi ki te lelei o [totatou] aga ia Kilisito.” (1 Pet. 3:16) ʼE tou lava taupau feafeaʼi tatatou fakatotonu ʼaē ke tou fai faka mafola logola te ʼu fakaneke ʼaē ʼe lava fai mai kia tatou?
2 Totatou Famili: ʼI ʼihi temi, ko he tāmai ʼe mole ko he Fakamoʼoni ʼa Sehova, ʼe mole lagi ina tali ke fai faka mafola tona ʼohoana pea mo tana fānau. Neʼe hoko te faʼahi ʼaia ʼi te famili ʼi Mekesike. Ko te fafine pea mo tana ʼu toe e toko fitu neʼe nātou tali te moʼoni. ʼI te kamata, neʼe fakafeagai tona ʼohoana koteʼuhi neʼe mole ina loto ke fai faka mafola tana famili pea mo nātou tufa te ʼu tohi faka Tohi-Tapu ʼi te ʼu ʼapi. Neʼe manatu ia ʼe ko he meʼa fakaufiufi. Kae neʼe lotomālohi tona ʼohoana pea mo tana ʼu toe ke nātou tauhi kia Sehova pea mo kau tuʼumaʼu ki te minisitelio. ʼAki te temi, neʼe kamata sio te tagata ʼe maʼuhiga ke ina tali te ʼu fakatuʼutuʼu ʼa te ʼAtua ʼo ʼuhiga mo te gāue fai faka mafola, pea neʼe ina toe foaki mo ia tona maʼuli kia Sehova. Neʼe ina tali te moʼoni hili kiai taʼu e 15, kae neʼe feala koa ke ina fai te faʼahi ʼaia mo kanapaula neʼe mole faʼa kātaki tana famili ʼi tanatou pilivilesio ʼaē ke nātou fai faka mafola?—Luka 1:74; 1 Ko. 7:16.
3 Te ʼu Kaugā Gāue: ʼE mole lagi tali lelei e ʼihi ʼi takotou ʼu kaugā gāue takotou faiga ʼaē ke koutou fai faka mafola kia nātou. Neʼe fakamatala e te tuagaʼane, neʼe hoko te fai palalau ʼi te pilō ʼo ʼuhiga mo te fakaʼosi ʼo te malamanei, pea neʼe vāʼi ia ia he neʼe ina ʼui age ke nātou lau ia Mateo kapite 24. Kae hili kiai ni ʼu ʼaho, neʼe ʼui age e tana kaugā gāue fafine neʼe ina lau te kapite ʼaia pea neʼe punamaʼuli ai. Neʼe tuku age e te tuagaʼane tana tohi, pea neʼe fakatuʼutuʼu ai ke fai hana ako mo tona ʼohoana. Neʼe fai te ʼuluaki ako ʼo aʼu ki te hola lua māfoatā. Hili te fai tuʼa tolu ʼo tanā ako, neʼe nā kau ki te ʼu fono, pea mole tuai pea nā tuku tanā suluka pea nā fai faka mafola. Neʼe lava koa ke hoko te faʼahi ʼaia mo kanapaula neʼe mole faiga totatou tuagaʼane ke ina vaevae mo ʼihi tana ʼamanaki?
4 Te ʼu Kaugā Ako: ʼE fakaneke tuʼumaʼu te kau tūpulaga Fakamoʼoni ʼi te faleako, pea ʼe nātou matataku naʼa fakalainoaʼi nātou e te tahi kau tūpulaga ʼi tanatou kau ki te gāue fai faka mafola. Neʼe ʼui fēnei e te finemui Kilisitiano ʼi Amelika: “Neʼe ʼau mataku ʼi te faka mafola ki te tahi kau tūpulaga naʼa nātou vāʼi ʼau.” Koia neʼe mole ina fakaʼaogaʼi te ʼu faigamālie ke ina faka mafola ki tana ʼu kaugā ako pea mo te telituale. ʼE koutou lava tauʼi feafeaʼi te ʼu fakaneke? Koutou falala kia Sehova, ʼo koutou kumi ke ina leleiʼia koutou. (Taag. 29:25) Koutou faka maʼuhigaʼi takotou lava fakaʼaogaʼi te Folafola ʼa te ʼAtua ʼi takotou minisitelio. (2 Tim. 2:15) Ko te finemui ʼaē neʼe tou talanoa ki ai, neʼe faikole kia Sehova, ʼo ina kole ke tokoni age kia ia ke ina maʼu te holi ʼaē ke palalau ki tana ʼu kaugā ako. Neʼe kamata fai fagonogono faigamālie ʼi te faleako, ʼo maʼu ai tana ʼu fua lelei, pea neʼe fai palalau ai mo tana ʼu feʼilo fuli. Neʼe ina ʼui fakamuli fēnei: “Neʼe ʼaoga pea neʼe fia maʼu e te kau tūpulaga ʼaia he ʼamanaki ki te ka haʼu, pea ʼe fakaʼaogaʼi tatou e Sehova ke tou tokoni kia nātou.”
5 Te ʼu Vāhaʼa Fale: ʼE lagi ʼiʼita kia tatou tatatou ʼu vāhaʼa fale peʼe ko totatou ʼu feʼilo, ʼuhi ko totatou ʼuhiga kau Fakamoʼoni ʼa Sehova pea mo te ʼu meʼa ʼaē ʼe tou tui kiai. Kapau ʼe koutou matataku ʼo ʼuhiga mo tanatou ʼu manatu, pea koutou fai te ʼu fehuʼi ʼaenī: ‘ʼE nātou ʼiloʼi koa te moʼoni ʼaē ʼe ina taki ki te maʼuli heʼegata? Koteā ʼaē ʼe feala ke ʼau fai moʼo malave ki tonatou loto?’ Neʼe fakatokagaʼi e te taupau faka silikosikilipisio ʼe maʼu te ʼu fua lelei mokā tou fakaʼaluʼalu māmālie tatatou fai faka mafola ki tatatou ʼu vāhaʼa fale. Koutou kole mamahi kia Sehova te mālohi, pea mo te poto ʼaē ʼe ʼaoga kia koutou ke hoko atu takotou kumi ia te ʼu hahaʼi ʼaē ʼe loto agatonu.—Filp. 4:13.
6 Kapau ʼe tou mulimuli ki te ʼu fakaneke kovi pea ʼe fiafia ai te kau fakafeagai, kae ʼe fua lelei anai koa kia nātou—peʼe kia tatou? Neʼe fakafeagai kia Sesu te hahaʼi ʼo tona kolo. Neʼe ina kātakiʼi mo te ʼu palalau kovi ʼaē neʼe fai e tona ʼu tēhina. Kae neʼe ina ʼiloʼi neʼe feala ke tokoni kia nātou mo kapau ʼe haga mulimuli ki te ala ʼaē neʼe tofa e te ʼAtua maʼa te ia. Koia, “neʼe ina kātakiʼi te ʼu palalau fakafeagai ʼa te kau agahala, ʼaē neʼe ko he meʼa kovi kia nātou.” (Hep. 12:2, 3, MN ) ʼE tonu ke tou fai feiā mo tatou. Koutou fakatotonu ke koutou fakaʼaogaʼi lahi takotou pilivilesio ʼaē ko te faka mafola ʼo te logo ʼo te Puleʼaga. Kapau ʼe koutou fai feiā, pea ‘e koutou hāofaki anai ia koutou, pea mo nātou ʼe fakalogo kia koutou.’—1 Tim. 4:16.