FEHUʼI 6
ʼE Feafeaʼi Haku Tauʼi Te ʼu Fakaneke ʼo ʼOku Kaugā Ako?
KOTEA ʼAE KA KE FAI ANAI?
Fakakaukauʼi te aluʼaga ʼaeni: Kua kamata mataku ia Brian ʼi te fakaoviovi age ʼo ʼona kaugā ako ʼe toko lua. Neʼe kua tuʼa lua ʼi te vahaʼa ʼaeni ia tanā faigaʼi ke suluka ia Brian. Pea ko tona tuʼa tolu leva ʼaeni.
ʼE ui fenei e te ʼuluaki tama:
“ ʼE kei ke taka tokotahi pe? Sio mai, koʼeni toku kaumeʼa.”
Neʼe kivi mata ʼi te temi ʼae neʼe ina ui ai “kaumeʼa” pea ʼe ina fakatoʼo te meʼa kia Brian.
Pea ʼe sio ia Brian ko te foʼi suluka. ʼO toe ʼaʼasili ai siʼona mataku.
ʼE ui fenei e Brian: “Silou age, kaʼe neʼe kua au fakaha atu pe ʼe mole au . . . ”
Kaʼe tuʼusi mai e te lua tama ia te palalau ʼa Brian: “ ʼE ke fula?”
ʼAki he lototoʼa, ʼe tali age Brian: “ ʼE noa ia.”
Ko te lua tama ʼe ina hili ʼona nima ki te ʼu fuga ʼuma ʼo Brian pea mo fanafana fenei: “Toʼo foki.”
Kaʼe ko te ʼuluaki tama ʼe ina fakakinakinaʼi ia Brian ʼaki te foʼi suluka ʼi ʼona mata, pea mo fanafana fenei: “ ʼE mole ma fakaha anai ki he tahi. Pea ʼe mole iloʼi anai e he tahi.”
Ka na ko koe la ia Brian, kotea ʼae ka ke fai anai?
FAKAKAUKAUʼI MUʼA
Neʼe fakakaukauʼi moʼoni koa e te ʼu kaugā ako ʼo Brian ia te meʼa ʼaia neʼe nā fai? Neʼe nā mulimuli pe koa ki ʼanā tonu? Kailoa ia. ʼI tona fakahagatonu, neʼe nā mulimuli naua ki tonā fakaneke e ʼihi. ʼE nā loto ke leleiʼia naua, koia ʼae neʼe nā tuku ai ke takitaki naua e niʼihi.
Kapau ʼe ke tau mo he fihifihia feia, kotea anai he puleʼaki ka ke fai ke feala ai hau teteke te ʼu fakaneke ʼo ʼou kaugā ako?
KE KE ILOʼI FAKATOMUʼA TE FIHIFIHIA
ʼE ui fenei ʼi te Tohi-Tapu: “E sio te tagata poto ki te kovi pea e nono ia ia; kae e fakaovi ki ai te kau vale pea e tauteai ai natou.”—Taaga Lea 22:3.
ʼE feala pe ke ke iloʼi fakatomuʼa te fihifihia ʼae ka hoko. Ohage la, ʼe ke sio ki ʼou kaugā ako ʼe natou lolotoga suluka. Kaʼe kapau ʼe ke iloʼi fakatomuʼa pe kotea ʼae ka hoko anai, ʼe feala ke ke iloʼi pe kotea ʼae ka ke fai anai.
FAKAKAUKAU
ʼE ui fenei ʼi te Tohi-Tapu: “Ke kotou taupau he leʼo ʼo loto ʼe lelei.”—1 Petelo 3:16, MN.
Fai te fehuʼi ʼaeni kia koe, ‘Kotea ʼae ʼe au logoʼi anai moka ʼe au muliʼi pe te loto ʼo te kaugā malie?’ ʼE moʼoni, ʼe lagi leleiʼia anai koe e ʼou kaugā ako lolotoga he temi. Kaʼe kotea anai ʼae ka ke logoʼi ki muli age? ʼE ke fia maumauʼi koa tou ʼuhiga moʼoni ʼuhi pe ko tau loto ʼae ke leleiʼia koe e ʼou kaugā ako?—Ekesote 23:2.
FILIFILI
ʼE ui fenei ʼi te Tohi-Tapu: “Ko te tagata poto ʼe manavasiʼi.”—Taʼaga Lea 14:16, MN.
ʼE tonu kia tatou fuli ke tou toʼo he ʼu tonu pea ke tou tali ʼona nunuʼa. ʼE talanoa ʼi te Tohi-Tapu ki te ʼu tagata ohage ko Sosefo, mo Sopo pea mo Sesu, neʼe natou toʼo te ʼu tonu neʼe lelei. ʼE toe ui ai foki, ko Kaino, mo Esau pea mo Sutasi neʼe natou toʼo te ʼu tonu neʼe mole lelei. Kaʼe ʼe feafeaʼi anai kia koe?
ʼE ui fenei ʼi te Tohi-Tapu: “Nofo agatonu.” (Pesalemo 37:3, MN) Kapau neʼe kua ke toʼo he tonu pea mo ke fakakaukauʼi ʼona nunuʼa, ʼe feala leva ke faigafua mo iku lelei moka ke fakaha fakahagatonu ʼe mole ke loto ki ai.
ʼAua tau tuʼania, ʼe mole ke fai anai he akonaki Fakatohi-tapu ki ʼou kaugā ako. ʼE feala pe ke ke FAKAFISI fakahagatonu pea gata ai. Pea ke natou mahino neʼe ke fakafisi moʼoni, ʼe lagi feala ke ke ui fenei age:
“ ʼE mole au fai anai te meʼa ʼaia.”
“ ʼE mole au kau au ʼi ʼakotou meʼa.”
“Kua kotou mahino pe kia au.”
Ko te faʼahi ʼae ʼe maʼuhiga, ʼe tonu ke ke tali fakavilivili mo he lotofalala. Kapau ʼe ke fai feia, ʼe lagi ke punamaʼuli anai, koteʼuhi ʼe haganoa atu anai ʼou kaugā ako.
KA FAKALAINOAʼI KITA
Kapau ʼe ke mulimuli ki tou fakaneke e ʼou kaugā ako, ʼe ke hage pe anai ko hanatou meʼa gaoʼi
ʼE feafeaʼi mo kapau ʼe vaʼi koe e ʼou kaugā ako? ʼE feafeaʼi mo kapau ʼe natou ui atu, “ ʼE ke fula?” Ko te faʼahiga palalau ʼaia, ʼe ko tou pe ia fakaneke. Kaʼe koʼeni faʼahi ʼe lua ʼe feala ke ke fai.
ʼE feala ke ke tali fenei age: “ ʼEi, ʼe au mataku.” ʼOsi ʼaia pea ke fakamahino fakanounou tona tupuʼaga.
Fakaha te tupuʼaga ʼo tau fakafisi, pea ʼosi ʼaia, ʼe feala ke ke ui age, “He koʼe koa la ʼe suluka koutou?”
Kapau ʼe hoko atu pe tou fakalainoaʼi e ʼou kaugā ako, mavae koe. Koteʼuhi ʼe ʼaʼasili anai tou fakaneke mo kapau ʼe ke haga nofo pe koe. Pea ʼe ke fakaha anai ʼaki tau mavae mai ia natou, ʼe mole ke loto ke natou fetogi ia tou ʼuhiga moʼoni.
ʼE moʼoni, ʼe mole feala ke ke hao mai te ʼu fakaneke. Kaʼe ʼe feala ke ke filifili pe kotea ʼae ka ke fai anai, mo ke fakaha tou ʼuhiga moʼoni. Koteʼuhi ʼe ko koe totonu pe ʼae ina toʼo te tonu.—Sosue 24:15.