FEHUʼI 5

Kotea ʼAe ʼe Au Fai Anai Mo Kapau ʼe Gaohi Koviʼi Au ʼi Te Fale Ako?

HE KOʼE ʼE MAʼUHIGA?

ʼAki pe tau faʼahiga tali ʼe feala ke lelei age peʼe ke kovi age he aluʼaga.

KOTEA ʼAE KA KE FAI ANAI?

Fakakaukauʼi te aluʼaga ʼaeni: ʼI te ʼaho nei, ko Thomas ʼe mole kei fia alu ʼo ako. Neʼe tupu mai te aluʼaga neʼe hoko kua hili ki ai mahina ʼe tolu. Neʼe fakamafola e ʼona kaugā ako he ʼu logo ʼe kovi ʼo ʼuhiga mo ia. Pea neʼe natou fakahigoaʼi ia Thomas ʼaki he ʼu higoa fakamelemele. ʼI ʼihi temi, ko he tahi ʼe haʼu ʼo fakato ki lalo ʼana tohi ako mo ina ui neʼe to feia pe. Peʼe ko he tahi ʼe haʼu ʼo humuki ia ia, pea ʼi te temi ʼae ʼe haga ai ki muli, ʼe mole ina iloʼi pe ko ai. ʼI te ʼanafi, neʼe toe fakamatakuʼi ia ia ʼi te Neti, ʼo ʼasilisili ai tona gaohi koviʼi.

Ka na ko koe la ia Thomas, kotea ka ke fai anai?

FAKAKAUKAUʼI MUʼA

ʼE feala ke ke tauʼi tou gaohi koviʼi kaʼe mole ʼaki te agamalohi. ʼO feafeaʼi?

NOFO FAKALOGOLOGO. ʼE ui fenei ʼi te Tohi-Tapu: “E fakaha e te tagata vale tona loto katoa ki tua, kae e tataofi e te tagata poto tona loto.” (Taaga Lea 29:11) Kapau ʼe ke fakatokatoka, ʼe feala pe ʼaki te temi kia ia ʼae ʼe ina gaohi koviʼi koe ke haganoa.
ʼAUA NAʼA KE LAGAVAKA. ʼE ui fenei ʼi te Tohi-Tapu: “Aua naa kotou totogi ki he tahi te kovi aki te kovi.” (Loma 12:17) Kapau ʼe ke fia lagavaka, pea ʼe toe kovi age anai ia tou gaohi koviʼi.
TEKEʼI TE ʼU ALUʼAGA FAKATUPU TUʼUTAMAKI. ʼE ui fenei ʼi te Tohi-Tapu: “E sio te tagata poto ki te kovi pea e nono ia ia.” (Taaga Lea 22:3) Faiga ke mole ke to lotoa ia natou ʼae ʼe feala ke natou gaohi koviʼi koe pea mo te ʼu aluʼaga ʼae ʼe feala ke ke tuʼutamaki ai.
KE FAKAPOTOPOTO TAU TALI. ʼE ui fenei ʼi te Tohi-Tapu: “E fakafimaliei te ita e he tali malu.” (Taaga Lea 15:1) ʼE toe feala pe ke ke tali fakahuahua. Ohage la, kapau ʼe ui atu e he tahi ʼe ina gaohi koviʼi koe, ʼe ke foʼi mō pea ʼe feala pe ke ke hiki fuga ʼuma mo ke tali age, “ ʼE ke moʼoni pe koe, ʼe tonu pe ke kaikai mamalie.”
ALU KEHE. ʼE ui fenei e Nora ʼae ʼe taʼu 19: “Kapau ʼe mole ke gu, ʼe ke fakaha ai tau fakapotopoto pea ʼe ke malohi age ia ia ʼae ʼe ina gaohi koviʼi koe. ʼE ke toe fakaha ai ʼe ke maʼu te lotololomi pea ʼe ko he kalitate ia ʼe mole ina maʼu.”—2 Timoteo 2:24.
FAKAMALOHIʼI TOU LOTOFALALA. ʼE tokagaʼi tuʼumaʼu e te tamaliki agakovi ia ia ʼae ʼe ina ui, ʼe mole hona ʼuhiga pea mo ia ʼae ʼe mole feala hana puipui ia ia totonu. Kaʼe, ʼe hoki natou tuku pe anai tanatou gaohi koviʼi koe mo kapau ʼe natou sisio ʼe mole kei natou lavaʼi he meʼa kia koe.
FAKAHA KI HE TAHI. ʼE ui fenei e te fafine neʼe faiako: “E au fakalotomalohiʼi ia natou ʼae ʼe gaohi koviʼi ʼi te fale ako ke natou olo ʼo fakaha ki he tahi. ʼE ko he puleʼaki lelei ʼaia, pea ʼe feala ke mole toe gaohi koviʼi ai he tahi.”

ʼAki he lotofalala, ko he tupulaga ʼe tuʼu malohi ia muʼa ʼo he tahi ʼe agamalohi — ʼAki tou lotofalala, ʼe ke maʼu ai anai te malohi ʼae ʼe mole maʼu e ia ʼae ʼe ina gaohi koviʼi koe

KUA KOTOU ILOʼI KOA?

ʼE mole gata pe te gaohi koviʼi ʼo he tahi ʼi te faʼahi fakasino, kaʼe ʼe toe kau ai te ʼu aluʼaga ʼaeni:

Te ʼu palalau kovi. “ ʼE mole au galoʼi anai ʼi he ʼaho ia te ʼu higoa mo te ʼu palalau kovi ʼae neʼe natou fai mai kia au. Koia ʼae neʼe hage ai neʼe meʼa noaʼi au pea neʼe fehiʼaʼinaʼi au. Neʼe au leleiʼia age ke natou ta au ʼi hoku laukoviʼi.”—Ko Celine ʼe taʼu 20.
Te liʼakina ʼo kita. “Neʼe kamata fakamamaʼo ʼoku kaugā ako ia au. ʼI te ʼu temi kakai, neʼe natou faigaʼi ke mole au alu age ʼo kai ʼi tonatou laupapa. Neʼe au tagi ai pea neʼe au kai tokotahi. Pea neʼe hoko te aluʼaga ʼaia ʼi te taʼu katoa.”—Ko Haley ʼe taʼu 18.
Te feʼaveʼaki ʼo he ʼu palalau kovi ʼi te Neti. “ ʼAki pe tau fakaʼaogaʼi te olotinatea, ʼe feala ai ke ke maumauʼi te matagafua ʼo he tahi peʼe ko tona maʼuli. ʼE ko he aluʼaga ia ʼe hoko moʼoni.”—Ko Daniel ʼe taʼu 14.

**TE ʼU FEHUʼI ʼO ʼUHIGA MO TE GAOHI KOVIʼI ʼO HE TAHI**
MOʼONI PEʼE HALA	TE ʼU TALI
1 Ko te gaohi koviʼi ʼo he tahi neʼe hoko talu mai fualoa.	1 Moʼoni. Ohage la, ʼe talanoa ʼi te Tohi-Tapu ki ni tagata lalahi ʼaupito. ʼI te lea Fakahepeleo, ʼe fakahigoaʼi natou ko te kau Nefilime, pea neʼe malolohi ʼaupito mo agakovi ki te hahaʼi.—Senesi 6:4.
2 ʼE mole faʼa kovi leva ke feafeaʼi. ʼE ko he meʼa fakakata pe.	2 Hala. Ko te gaohi koviʼi ʼo he tahi, ʼe tupu ʼaki ai te fakamate ʼo te tokolahi ʼi te kau tupulaga.
3 Ko te puleʼaki pe ʼe tahi kia ia ʼae ʼe ina gaohi koviʼi kita, ko te liufaki ki ai te kovi ʼae neʼe ina fai mai.	3 Hala. ʼI te agamahani, ʼe malohi age ia ia ʼae ʼe ina gaohi koviʼi ʼihi, koia ʼae ʼe mole ʼaoga ai ke liufaki ki ai te kovi ʼae neʼe ina fai.
4 Kapau ʼe ke sio ki he gaohi koviʼi ʼo he tahi, pea ʼe lelei age pe tau fakalaka.	4 Hala. Kapau ʼe ke sio ki he tahi ʼe gaohi koviʼi, ʼe tonu ke ke tokoni ki ai. ʼE tonu ke ke fakaha te aluʼaga ʼaia mo ke fai he puleʼaki. Koteʼuhi naʼa ke kau mo koe ki te agakovi ʼaia.
5 Ko ia ʼae ʼe ina gaohi koviʼi kita, ʼe mole fimalie tona loto.	5 Moʼoni. Tatau aipe pe ʼe fiameʼameʼa ia natou ʼae ʼe natou gaohi koviʼi niʼihi, kaʼe tokolahi ia natou ʼe mole lotofalala. Koia ʼae ʼe natou fakato laloʼi ai ʼonatou kaugā ako ke natou logo fimalie.
6 ʼE feala ke fetogi te aga ʼa ia ʼae ʼe ina gaohi koviʼi kita.	6 Moʼoni. Kapau ʼe tokoniʼi ia ia ʼae ʼe ina gaohi koviʼi ʼihi, pea ʼe feala pe ke fetogi tana faʼahiga manatu mo tana aga.