ʼE Feala Ke Kotou Fai Fagonogono Faigamālie!
1. (a) ʼE feafeaʼi te fai fagonogono faigamālie? (b) Ko te tokofia ʼi te nofoʼaki ʼaenī neʼe natou ʼuluaki logo ki te moʼoni ʼaki te fai fagonogono faigamālie?
1 Ko te tokofia ʼi tokotou kōkelekāsio neʼe natou ʼuluaki logo ki te moʼoni ʼaki te fai fagonogono faigamālie? ʼE lagi kotou punamaʼuli anai ki te kaugamālie ʼo nātou ʼaia. Ko te fai fagonogono faigamālie ʼe ko hakita fakahā ia te logo lelei ki te hahaʼi ʼaē ʼe tou felāveʼi mo nātou ʼi te ʼaho fuli, ohagē lā mokā tou faifolau, mokā tou ʼolo ʼo ʼaʼahi hokita kāiga peʼe ko te ʼu vāhaʼa fale, peʼe mokā tou faifakatau, peʼe ki te ʼu kaugā ako, ʼi te fale gāue, pea mo te tahi age ʼu ʼaluʼaga. Ko te kau Fakamoʼoni e toko 200 tupu kua papitema, pea iā nātou ʼaia neʼe ko te toko 80 tupu neʼe natou ʼuluaki logo ki te moʼoni ʼaki te fai fagonogono faigamālie! Koia, ko te faʼahiga fai fakamafola ʼaia ʼe fua lelei ʼaupitō.
2. Koteā te ʼu faʼifaʼitaki ʼo ʼuhiga mo te fai fagonogono faigamālie ʼe tou maʼu ʼi te Tohi-Tapu?
2 ʼI te ʼuluaki sēkulō, neʼe ko he agamāhani ʼa te kau fai fakamafola evaselio ia te fai fagonogono faigamālie. Ohagē lā, ʼi te fakalaka ʼa Sesu ʼi te kolo ʼo Samalia, neʼe fai fakamafola ai ki te fafine neʼe ʼohu vai ʼi te vai keli ʼo Sakopo. (Soa. 4:6-26) Ko Filipo neʼe kamata fai palalau mo te ofisie ʼo te fale hau ʼo Etiopea ʼaē neʼe ina lau ia te tohi ʼo Isaia, ʼo ina fehuʼi fēnei age: “ ʼE ke mahino lelei koa ki te meʼa ʼaē ʼe ke lau?” (Gāue 8:26-38) ʼI te pilisoni ʼa te ʼapositolo ko Paulo ʼi te kolo ʼo Filipe, neʼe fai fakamafola ai ki te tagata leʼo ʼo te fale pilisoni. (Gāue 16:23-34) Ki muli age, ʼi te nofo pilisoni ʼa Paulo ʼi tona ʼapi, “neʼe ina fakatalitali lelei [ai] nātou fuli ʼaē neʼe hū age kiō ia, ʼo ina fakamafola age te puleʼaga ʼo te ʼAtua pea mo akoʼi age te ʼu meʼa ʼo ʼuhiga mo te ʼAliki Sesu Kilisito.” (Gāue 28:30, 31) ʼE feala foki mo koutou ke kotou fai fagonogono faigamālie, tatau aipē peʼe kotou aga ufiufi. ʼE feafeaʼi hakotou fakahoko ia te faʼahi ʼaia?
3. Koteā ʼaē ʼe feala ke tokoni mai ke tou tauʼi tatatou aga ufiufi?
3 Tou Tofa Ia Te Fai Palalau: Tokolahi iā tātou ʼe faigataʼa hatatou kamata ia he fai palalau mo ni hahaʼi ʼe mole tou feʼiloʼiʼaki mo nātou. Māʼiapē lā mo nātou ʼaē ʼe feʼiloʼiʼaki mo tātou, ʼe lagi tou tuʼaniaʼi ʼi te fakahā age ʼo te moʼoni kiā nātou ʼaia. Kae ʼe tou lototoʼa anai ʼi te palalau kiā nātou, mo kapau ʼe tou metitāsioʼi ia te lotoʼofa ʼaē ʼo Sehova, ʼo fēia ki te ʼu koloa fakalaumālie ʼaē neʼe ina foaki mai ki tana ʼu kaugana, pea mo te ʼaluʼaga fakaʼofaʼofa ʼo te hahaʼi ʼaē ʼi te mālamanei. (Son. 4:11; Pes. 40:5; Mat. 13:52) ʼE feala ke tou toe kole kiā Sehova ke tokoni mai ke tou “maʼu ia te lototoʼa.” (1 Tes. 2:2) Neʼe ʼui fēnei e te tehina neʼe kau ki te Ako ʼo Kileate: “Neʼe au tokagaʼi ko te faikole ʼe tokoni tuʼumaʼu mai kiā au mokā ʼe faigataʼa taku palalau ʼaē ki te hahaʼi.” Kapau ʼe kotou tuʼaniaʼi ia te tofa ʼaē ʼo te fai palalau, pea kotou fai hakotou kole nounou pea mo fakalogologo.—Neh. 2:4.
4. Koteā ʼaē ʼe feala ke tou fai moʼo tofa ai he fai palalau, pea koteā tona tupuʼaga?
4 ʼE tou lolotoga palalau nei ki te fai fagonogono faigamālie, koia ʼe mole fakamaʼua ai kiā kita, ke tou kamata te fai palalau ʼaki he fehuʼi peʼe ko he vaega Tohi-Tapu. ʼE lagi lelei anai ke kita kamata pē te fai palalau ʼaki te manatu ʼaē ʼe mole ko hakita fai fakamafola ohagē ko tona fai ʼi te ʼu ʼapi ʼo te hahaʼi. Tokolahi te kau fai fakamafola ʼe natou ʼui, ʼi tanatou fai fēia, ʼe natou maʼu ai he loto falala ke natou fakahā age leva ki muli age ia te logo lelei. Kapau ʼe mole fia fai palalau he tahi mo koutou, pea ʼaua naʼa kotou fakakinauʼi ke palalau atu. ʼAki he aga fakaʼapaʼapa, kotou fakagata te fai palalau pea mo kotou mavae.
5. Koteā ʼaē neʼe tokoni ki te tuagaʼane ʼe aga ufiufi ke fai fagonogono faigamālie?
5 Ko te tuagaʼane ʼe aga ufiufi, kā faifakatau ʼi te fale koloa pea ʼe ina sioʼi muʼa te hahaʼi pea mo malimali kiā nātou. Kapau ʼe malimali age he tahi, pea ʼe ina fai age he kiʼi palalau fakanounou. Kapau ʼe tali lelei age ki tana palalau, pea ʼe lototoʼa ai ia te tuagaʼane ke hoko atu te fai palalau. ʼE fakalogo lelei te tuagaʼane mokā palalau age he tahi, ke feala ai hana ʼiloʼi ia te manatu ʼaē kā fia logo anai kiai ʼo ʼuhiga mo te logo lelei. ʼI tana fai fēia, neʼe lahi ai ia te ʼu tohi neʼe ina tufa pea mo kamata ai mo te ako Tohi-Tapu.
6. ʼE tou lava kamata feafeaʼi he fai palalau ʼi
6 Te ʼu Puleʼaki Moʼo Kamata ʼAki He Fai Palalau: Koteā ʼaē ʼe feala ke tou ʼui moʼo kamata ʼaki he fai palalau? ʼI te temi ʼaē neʼe fai palalau ai Sesu mo te fafine ʼi te vai keli, neʼe ina kamata te fai palalau ʼaki pē tana kole ʼaē ke foaki age e te fafine hona moʼi vai ke ʼinu. (Soa. 4:7) Koia, lagi feala ke tou kamata te fai palalau mo he tahi ʼaki hatatou fakamālo fakaʼapaʼapa age ki ai peʼe tou fai age he fehuʼi ki ai. ʼI takotou fai palalau ʼaia, ʼe lagi kotou maʼu ai anai he faigamālie ke kotou fakahā age he manatu Fakatohi-tapu pea lagi ʼi te temi ʼaia ʼe kotou tō ai leva ia te pulapula ʼo te moʼoni ki tona loto. (Tnk. 11:6) Ko ʼihi neʼe fua lelei tanatou ʼu fai palalau he neʼe natou lagaʼi he manatu ʼe tupu ʼaki ai he fia ʼiloʼi e te hahaʼi tona tali pea mo ʼekenaki ai nātou ke natou faifehuʼi. Ohagē lā, kā kotou ʼolo ʼo vākaʼi mahaki pea ʼi te temi ʼaē ʼe kotou fakatalitali ai, ʼe feala hakotou kamata he fai palalau mo he tahi, ʼaki hakotou ʼui fēnei age: “ ʼE au fiafia anai mokā ʼe mole au toe mahaki ʼi he temi.”
7. Koteā ʼaē kā tokoni mai anai ki tatatou fai fagonogono faigamālie mo kapau ʼe tou sivisivi lelei he ʼaluʼaga ʼo he tahi?
7 ʼE toe feala ke tou kamata he ʼu fai palalau mokā tou sivisivi ia te ʼaluʼaga ʼo he tahi. Kā tou fakatokagaʼi ia he tamai peʼe ko he faʼē mo hana fānau ʼe lelei tanatou aga, pea ʼe feala ke tou vikiʼi age ia ia pea mo tou fehuʼi fēnei age: “Koteā ʼaē neʼe tokoni atu ke ke akoʼi fakalelei ai tau fānau?” Ko te tuagaʼane ʼe fakalogo lelei ki te ʼu faʼahi ʼaē ʼe fai palalau kiai tona ʼu kaugā gāue, ʼosi ʼaia pea ina foaki age kiā nātou ia te ʼu tohi ʼe talanoa ai ki te ʼu logo ʼe natou fia mahino kiai. ʼI tana ʼiloʼi ʼaē ko te fafine ʼe nā kaugā gāue neʼe ʼamanaki ʼohoana, neʼe ina foaki age te Réveillez-vous ! neʼe talanoa ki te ʼu faʼahiga fai ʼohoana. Neʼe iku ai ki te tahi ʼu fai palalau Fakatohi-tapu.
8. ʼE tou lava fakaʼaogaʼi feafeaʼi tatatou ʼu tohi moʼo kamata ʼaki ai he ʼu fai palalau?
8 Ko te tahi puleʼaki moʼo kamata ʼaki he fai palalau, ke tou lau fakahāhā ia tatatou ʼu tohi. Ko te tehina ʼe ina ʼavahi tana Tule Leʼo peʼe ko tana Réveillez-vous ! ʼi he ʼalatike, ʼe fakatupu fia ʼiloʼi meʼa fuli ia tona kupu tāfito ki te hahaʼi, ʼo ina kamata lau atu aipē. Kā ina tokagaʼi he tahi ʼi ʼona tafa ʼe fakasiosio mai ki tana nusipepa, pea ʼe ina lagaʼi age he fehuʼi peʼe fai hana kiʼi palalau ʼo ʼuhiga mo te ʼalatike. ʼI te agamāhani, ʼe fakatupu ʼaki ai he fai palalau pea mo he fai fakamafola. ʼAki pē takita tuku fakahāhā ia tatatou ʼu tohi, ʼe feala ai ki ʼotatou kaugā gāue ke natou fia ʼiloʼi meʼa fuli kiai pea mo natou faifehuʼi mai kiā tātou.
9, 10. (a) ʼE feafeaʼi hatatou kumi he ʼu ʼaluʼaga ke tou fai fagonogono faigamālie ai? (b) Neʼe lava feafeaʼi hakotou fai ia te faʼahi ʼaia?
9 Tou Kumi He ʼu ʼAluʼaga Ke Tou Fai Fagonogono Ai: ʼI te kua maʼuhiga ʼaē ʼo te gāue fai fakamafola, ʼe mole tonu ke tou manatu ko te fai fagonogono faigamālie ʼe ko he gāue ʼe mole ʼaoga ia ke teuteuʼi. ʼE tonu ia ke tou kumi he ʼu ʼaluʼaga ke tou fai fagonogono ai ki te hahaʼi ʼaē ʼe felāveʼi mo tātou ʼi te ʼaho fuli. Kotou fakakaukauʼi ʼo ʼuhiga mo te hahaʼi ʼaē kā kotou felāveʼi anai mo nātou, pea mo vakavakaʼi peʼe feafeaʼi anai hakotou kamata he fai palalau lelei mo nātou. Ke ʼi ai hakotou Tohi-Tapu pea mo he ʼu tohi ke feala ai hakotou fai palalau mo te hahaʼi ʼaē ʼe fia logo.—1 Pet. 3:15.
10 Tokolahi te kau fai fakamafola, ʼi tanatou fakakaukauʼi fakatomuʼa ni ʼu ʼaluʼaga ʼe feala ke hoko, neʼe natou maʼu ai he ʼu faʼahiga fai ke feala ai hanatou fai fagonogono faigamālie. Ko te tuagaʼane ʼe nofo ʼi te falefata ʼe leʼoleʼo lelei, ʼe ina fakaʼaogaʼi ia te faʼahi ʼaē ʼe mālōlō ai te hahaʼi moʼo fai ai ia tana gaoʼi ʼe ko te puzzle (ko he ʼu kiʼi pāki ʼe ina fakapikipiki), ʼe ko he ʼu pāki matalelei ʼo te nātulā. Kā palalau age te hahaʼi ki te matalelei ʼo te pāki, ʼe ina fakaʼaogaʼi te faigamālie ʼaia moʼo kamata ʼaki he fai palalau, pea mo fakahā age ia te fakapapau ʼi te Tohi-Tapu ʼo ʼuhiga mo “he lagi foʼou pea mo he kele foʼou.” (Fakh. 21:1-4) ʼE feala koa hakotou fakakaukauʼi he ʼu ʼaluʼaga ʼe feala ai ke kotou fai fagonogono faigamālie?
11. ʼE feafeaʼi hatatou lava taupau ia te fia logo ʼa he tahi neʼe tou fai fagonogono ki ai?
11 Tou Haga Taupau Te Fia Logo ʼa Te Hahaʼi: Kapau ʼe kotou maʼu he tahi ʼe fia logo, kotou tokaga ki ai ʼo taupau maʼu ia tana fia logo ki te moʼoni. Kapau ʼe feala, pea kotou ʼui fēnei age ki ai: “Neʼe au fiafia ʼaupitō ʼi tata fai palalau. Kofea he faʼahi ʼe feala ke au maʼu ai koe ke hoko atu tata fai palalau?” Ko ʼihi kau fai fakamafola ʼe natou ʼavage tonatou tuʼasila pea mo tonatou nūmelo telefoni pea mo natou ʼui fēnei age: “Neʼe au fiafia ʼi tata fai palalau. Kapau ʼe ke fia ʼiloʼi he tahi age ʼu faʼahi ʼo ʼuhiga mo tata fai palalau, ʼe feala ke ke maʼu au ʼi henī peʼe ke telefoni mai.” Kapau ʼe mole feala ke kotou hoko atu te fai palalau, kotou fakatuʼutuʼu ke fai ia te faʼahi ʼaia e te kōkelekāsio ʼaē ʼe tuʼu ʼi tona kolo, ʼo kotou foimo tohi tona higoa ki te kiʼi pepa Veuillez suivre lʼintérêt (Ke ʼAʼahi) (S-43), ʼe kotou maʼu te kiʼi pepa ʼaia ʼi te sīkalaipe ʼo tokotou kōkelekāsio.
12. (a) He koʼē ʼe tonu ke tou tohi te temi ʼaē ʼe tou fai fagonogono faigamālie ai? (b) Koteā te ʼu fua lelei neʼe maʼu mai te fai fagonogono faigamālie? (Vakaʼi ia te fakamatala ʼaē ʼe ʼātakai, ko tona kupu tāfito “ ʼE ʼi Ai Te ʼu Fua Lelei ʼo Te Fai Fagonogono Faigamālie!”)
12 ʼE tonu ke tou tohi ʼi te pepa tānaki gāue ia te temi ʼaē neʼe tou fai fagonogono faigamālie ai. Koia, kotou vakaʼi ke kotou tohi ia te temi ʼaia, tatau aipē pe neʼe ko he ʼu kiʼi minuta ʼi te ʼaho. Kotou tokagaʼi ia te faʼahi ʼaenī: Kapau ko te kau fai fakamafola fuli ʼe natou fai fagonogono faigamālie iā minuta e nima ʼi te ʼaho fuli, pea ʼe ko hola e 17 miliona tupu ʼe hilifaki anai ʼi te māhina fuli ki te tānaki gāue.
13. Koteā ʼaē kā ina uga ai tātou ke tou fai fagonogono faigamālie?
13 ʼE tou fai fagonogono faigamālie tupu ko te faʼahi maʼuhiga ʼaenī: heʼe tou ʼofa ki te ʼAtua pea mo totatou kāiga. (Mat. 22:37-39) ʼI tatatou fonu ʼi te loto fakafetaʼi ki te ʼu kalitātē ʼo Sehova pea mo tana ʼu fakatuʼutuʼu, ʼe uga ai tātou ke tou palalau ki “te kolōlia ʼo te taulekaleka ʼo tona ʼafioʼaga.” (Pes. 145:7, 10-12) Ko tatatou tokaga moʼoni ki totatou tatau, ʼe ina uga tātou ke tou fakaʼaogaʼi ia te ʼu faigamālie fuli ke tou fakahā kiā nātou ia te logo lelei, heʼe kei maʼu te temi faigamālie kiai. (Loma 10:13, 14) Kapau ʼe tou fakakaukauʼi fakatomuʼa ia tatatou faʼahiga fakahoko ʼo te faʼahi ʼaia pea mo teuteu kiai, ʼe feala kiā tātou fuli ke tou fai fagonogono faigamālie, pea ʼe lagi tou maʼu ai anai ia te fiafia ʼaē ke tou fakahū ia te moʼoni ki te loto ʼo he tahi ʼe fia logo moʼoni ki te logo lelei.
[Fakamatala ʼo te pasina 4]
ʼE lagi kotou leleiʼia anai te fakatuʼutuʼu ʼaē ke kotou fetaulaki mo te hahaʼi pea mo kamata fai palalau mo nātou
[Fakamatalo ʼo te pasina 5]
Tokolahi te kau fai fakamafola, ʼi tanatou fakakaukauʼi fakatomuʼa ni ʼu ʼaluʼaga ʼe feala ke hoko, neʼe natou maʼu ai he ʼu faʼahiga fai ke feala ai hanatou fai fagonogono faigamālie
[Talanoa ʼo te pasina 5]
He ʼu Tokoni Moʼo Kamata ʼAki He ʼu Fai Palalau
◼ Kotou faikole ke tokoni atu Sehova ke kotou tofa te fai palalau
◼ Kotou vakavakaʼi lelei ia te hahaʼi ʼaē ʼe mata malimali atu pea ʼe mole natou fakatevili ki he faʼahi
◼ Kotou sioʼi he tahi, mo malimali, pea kotou palalau ki he meʼa ʼe kotou fia palalau tatau kiai
◼ Kotou fakalogo lelei mokā palalau atu
[Talanoa ʼo te pasina 6]
ʼE ʼi Ai Te ʼu Fua Lelei ʼo Te Fai Fagonogono Faigamālie!
• ʼI te fakatalitali ʼa te tehina ki te faʼu ʼaē ʼo tana motokā, neʼe fai fagonogono ia ki te hahaʼi neʼe heheka ʼi ʼona tafa pea neʼe ina foaki age kiā nātou ia te ʼu pepa fakaafe ki te akonaki ʼaē ʼe fai maʼa te hahaʼi fuapē. ʼI te fakatahi lahi neʼe fai ʼi te taʼu ki muli age, neʼe fakaovi age te tehina kiā ia ʼo tauʼalofa age kae neʼe mole ina ʼiloʼi pe ko ai. Neʼe ko te tagata neʼe kau iā nātou ʼaē neʼe ina foaki age te ʼu pepa fakaafe ʼi te fale faʼu motokā ʼi te taʼu ki muʼa atu! Neʼe ʼalu te tagata ʼo fakalogo ki te akonaki ʼe fai maʼa te hahaʼi fuapē pea neʼe ina kole ke fai hana ako Tohi-Tapu. Ko ia pea mo tona ʼohoana kua nā papitema.
• Ko te tuagaʼane neʼe ina ʼiloʼi ia te moʼoni ʼi te fai fagonogono faigamālie, pea kiā ia ko tana telituale tāfito ʼe ko te hahaʼi ʼaē ʼe felāveʼi mo ia ʼuhi ko tana tamaliki e toko tolu. Neʼe fai fagonogono ki tona ʼu vāhaʼa fale pea ki te ʼu mātuʼa ʼa te tamaliki. ʼI tana kua ʼosi fakahā age tona higoa, pea ʼe ina ʼui fakanounou age pē, ko te Tohi-Tapu ʼe ko he tokoni maʼuhiga kiā ia moʼo pusiaki tana fānau, ʼosi ʼaia pea palalau age leva ia ki he tahi faʼahi. ʼI tana kua kamata ʼaia ia te fai palalau, ʼe ina tokagaʼi ai leva ʼe faigafua ai hana fakaʼaogaʼi ia te Tohi-Tapu ki muli age mokā ʼe ʼi ai he ʼu fai palalau. ʼI tana fai fēia, neʼe tokoni ai ki te toko 12 ke natou papitema.
• ʼI te ʼalu age ʼa te tagata fakatau assurances ki te ʼapi ʼo te tuagaʼane, neʼe fakaʼaogaʼi e te tuagaʼane te faigamālie ʼaia moʼo fai fagonogono ki ai. Neʼe ina fehuʼi ki te tagata pe ina loto ki he maʼuli haohaoa, mo fiafia pea mo heʼegata. Neʼe ʼio kiai te tagata pea ina fehuʼi ki te tuagaʼane peʼe ko te faʼahiga assurance fea ʼaē ʼe talanoa kiai. Neʼe ina fakahā age te ʼu fakapapau ʼi te Tohi-Tapu pea ina tuku age tana tohi, ʼaē neʼe lau kātoa e te tagata ʼi te pō pē ʼe tahi. Neʼe fai tana ako Tohi-Tapu. Neʼe kamata kau ki te ʼu fono pea ki muli age leva neʼe papitema.
• ʼI tana fai folau vakalele, neʼe kamata palalau te tuagaʼane mo te fafine neʼe heka ʼi ʼona tafa pea neʼe fai fagonogono ki ai. ʼI tanatou tau ki te fenua, neʼe foaki age e te tuagaʼane ki te fafine ia tona tuʼasila pea mo tona nūmelo telefoni, pea neʼe ina fakalotomālohiʼi ia te fafine ke ina kole hana ako Tohi-Tapu ki te kau Fakamoʼoni ʼa Sehova ʼaē kā ʼolo age anai kiō ia. ʼI te ʼaho ake, neʼe ʼolo age te kau Fakamoʼoni ki tona ʼapi. Neʼe kamata te ako Tohi-Tapu ʼa te fafine, neʼe tuputupu vave, neʼe papitema, pea mole tuai, neʼe ina fai ia te ʼu ako Tohi-Tapu ki te foʼi toko tolu.
• Ko te tehina e taʼu 100 ʼe kivi pea ʼe nofo ʼi te fale ʼo te hahaʼi vaivai matuʼa, neʼe ina fai tuʼumaʼu pē ia te ʼu palalau ʼaenī: “ ʼE ʼaoga kiā tātou ia te Puleʼaga ʼo te ʼAtua.” Neʼe tupu ai ia te faifehuʼi age ʼa te ʼu fafine taupau pea mo te hahaʼi mātutuʼa, ʼo feala ai ki te tehina ke ina fakamahino age peʼe koteā te Puleʼaga ʼo te ʼAtua. Ko te tahi ʼi te ʼu fafine ʼaē neʼe gāue ʼi te fale ʼaia, neʼe ina fehuʼi age ki te tehina pe koteā ʼaē kā ina fai anai ʼi te Palatiso. Neʼe ina tali fēnei age: “ ʼE au toe sio anai pea mo toe haʼele anai pea ʼe au tutu anai toku hekaʼaga toho.” Neʼe kole e te tehina ʼaē ʼe kivi ke lau age e te fafine ia te ʼu nusipepa. ʼI te temi ʼaē neʼe ʼalu age ai te ʼofafine ʼo te tehina ʼo fakasiosio ki ai, neʼe kole age e te fafine gāue ki te ʼofafine ʼo te tehina peʼe feala hana ʼalu mo te ʼu nusipepa. Neʼe ʼui fēnei e te fafine gāue ki te ʼofafine ʼo te tehina: “Ko te kupu tāfito foʼou ʼaenī ʼo tomatou fale taupau: ‘ ʼE ʼaoga kiā tātou ia te Puleʼaga ʼo te ʼAtua.’ ”
• Ko te tuagaʼane neʼe fakatalitali ʼi te fale kai, pea neʼe logo ki te fai palalau ʼa te hahaʼi mātutuʼa neʼe heheka ovi age, neʼe natou talanoa ki te ʼu faʼahi fakapolitike. Neʼe ʼui e te tahi tagata ko te puleʼaga ʼe mole feala ke ina fakatokatoka totatou ʼu fihifihia. Neʼe manamanatu fēnei ia te tuagaʼane: “ ʼE ko he faigamālie ʼaenī ke au fai palalau ai mo nātou.” Neʼe ina fai tana kiʼi kole fakanounou pea mo fakaoviovi atu kiā nātou. ʼI tana ʼosi fakahā age ia tona higoa, neʼe palalau age leva ia ki te puleʼaga ʼe ina fakatokatoka anai te ʼu fihifihia ʼo te mālamanei, ko te Puleʼaga ʼo te ʼAtua, pea neʼe ina foaki age kiā nātou ia te kaupepa lahi. ʼI te moʼi temi pē ʼaia neʼe ʼalu age te tagata pule ʼo te fale kai. ʼI te manatu ʼa te tuagaʼane, ʼe ʼui age anai e te tagata ki ai ke mavae ʼi te fale kai. Kae neʼe mole hoko he meʼa fēia, he neʼe ʼui age e te tagata neʼe fakalogologo mai ki tana ʼu palalau, pea ʼe toe loto mo ia ki he kaupepa lahi. Ko te fafine gāue neʼe toe fakalogo mo ia ki te fai palalau neʼe fakaovi age ki te tuagaʼane pea neʼe tagi. Neʼe ina ako ia te Tohi-Tapu ʼi muʼa atu pea kua ina toe fia toʼo nei ia tana ako.