Kua Kotou Nofo Teuteu Koa Ki He Fagonogono Faigamālie?
1. ʼE maʼu ʼifea te faʼifaʼitaki ʼe hā ʼaki mai ʼe feala ke fua lelei ia te fagonogono faigamālie?
1 ʼE feala ke fua lelei ia he fai fagonogono faigamālie. ʼE maʼu ʼi te Tohi-Tapu ia te ʼu tuʼuga faʼifaʼitaki ʼo ʼuhiga mo te ʼu fagonogono faigamālie neʼe fua lelei. (Soa. 4:7-15) Koteā ʼaē ʼe lagi lelei ke tou teuteuʼi ki te taʼi faʼahiga fai fagonogono ʼaia?
2. ʼE lava lagolago feafeaʼi mai tatatou faiteuteu ke tou fai ai he fagonogono?
2 Te Faiteuteu: Ko tatatou tōkakaga ʼi te temi fuli pē ke fakaʼapaʼapa tatatou faiteuteu, ʼe feala ai anai ke ina fakafealagia ke tou fakahā faʼifaʼitaliha ia tatatou tui ki te hahaʼi. (1 Tim. 2:9, 10) Kapau ʼe tou ufiufi ʼi tatatou faʼahiga faiteuteu, pea ʼe lagi mole tou fai fagonogono anai. Kae kapau ʼe tou teu maʼa pea mo fakapoipoi, ʼe lagi fia ʼiloʼi anai e te hahaʼi pe koʼē ʼe tou faiteuteu fēia. Ohagē lā ʼi te fai folau ʼa te taumātuʼa Fakamoʼoni neʼe teu lelei pea neʼe nā heheka iā tafa ʼo te tagata ʼe Lotu Mahometa, ʼi tana fakatokagaʼi ʼaē tanā faiteuteu lelei, neʼe ina fehuʼi age peʼe ko nāua ko he ʼu Kilisitiano. ʼAki te fehuʼi ʼaia, neʼe tupu ai ia te fai palalau ki te Tohi-Tapu iā hola e tolu.
3. ʼO mulimuli ki te faʼifaʼitaki ʼa Sesu, ʼe feafeaʼi hatatou kamata he fai palalau?
3 Tou Kamata He ʼu Fai Palalau: ʼI te temi ʼaē neʼe felāveʼi ai ia Sesu mo te fafine Samalitana ʼi te vai keli ʼo Sakopo, neʼe ina kamata ia te fai palalau ʼaki hana kole age ki te fafine hona moʼi vai ke ʼinu. ʼE toe feala pē mo tātou, ke tou kamata ia he fai palalau ʼaki hatatou talanoa fakanounou ki he meʼa peʼe ʼaki pē he kihiʼi fehuʼi noa. Logolā ʼi ʼihi temi ʼe tou lotolotolua, kae ʼaki te tokoni ʼa Sehova, ʼe feala ke tou ‘lototoʼa’ ʼo kamata he fai palalau.—1 Tes. 2:2.
4. ʼE feafeaʼi hakotou lava nofo teuteu ki he fai fagonogono faigamālie?
4 Tou Fakatupu Ia He ʼu ʼAluʼaga Ke Fai Ai He Fagonogono: Tokolahi ia te kau fai fakamafola ʼe natou maʼu ia te ʼu ʼaluʼaga ke natou fai ai ia he fagonogono faigamālie. Vakavakaʼi tokotou ʼu ʼaluʼaga, pea mo fakakaukauʼi fakatomuʼa ia te faʼahiga hahaʼi ʼaē kā felāveʼi anai mo koutou ʼi te ʼaho ʼaia. Kotou ʼai ki takotou kato fai fakamafola ia he ʼu tohi ʼe ʼaoga ki takotou gāue pea mo he kiʼi Tohi-Tapu veliveli. Kotou maʼu ia he fakasiosio poto, pea mo kotou tokagaʼi te manatu ʼa te hahaʼi. Kā kotou fakakaukauʼi fakatomuʼa ia te ʼu ʼaluʼaga ʼaē ʼe feala anai ke felāveʼi mo koutou ʼi te ʼaho ʼaia, pea ʼe kotou nofo teuteu anai ki te fai ʼo he fagonogono ʼe lelei.—Filp. 1:12-14; 1 Pet. 3:15.
5. He koʼē ʼe tonu ke fai he fakatuʼutuʼu ki te fagonogono faigamālie?
5 ʼE tou maʼu ia tupuʼaga e lua ke kita fakaʼaogaʼi ai he ʼu ʼaluʼaga ki te fai fagonogono faigamālie—ko te ʼofa ki te ʼAtua pea mo te ʼofa ki te kāiga. (Mat. 22:37-39) ʼI te kua maʼuhiga ʼo te temi ʼaē ke fakahoko ai te fai fakamafola, koia ʼe tonu ai ke fai he fakatuʼutuʼu ki te fagonogono faigamālie. ʼE tonu ke tou nonofo teuteu, ʼo tou fakaʼaogaʼi ia te ʼu faigamālie fuli moʼo fakahā ia te logo lelei ʼo te Puleʼaga ki te hahaʼi heʼe kei maʼu te temi.—Loma 10:13, 14; 2 Tim. 4:2.