ʼE Koutou Kau Koa Ki Te Fagonogono Faiga Malie?
1 ʼI tatatou polokalama māhani, ʼe tou fakatuʼutuʼu he ʼu temi tāfito moʼo palalau ai kia Sehova. ʼE tou fakatuʼutuʼu he temi ki te faka mafola ʼi te ʼu ʼapi, ki te ʼu ʼaʼahi pea mo te ʼu ako faka tohi-tapu. ʼE ʼi ai foki ʼihi ʼu faʼahi mole tou ʼamanaki ki ai kae ʼe feala ai hatatou palalau ki te moʼoni. ʼE tou higoaʼi te faʼahi ʼaia ko te fagonogono faiga malie.
2 Ko ʼihi kau faka mafola ʼe nātou maʼu he ʼu faʼahi lahi ʼo feala ai tanatou kau ki te faʼahi ʼaia ʼo te minisitelio. ʼE feala ke tou faigaʼi te ʼu faʼahi kehekehe ʼe feala ai ke tou palalau ki te faʼahi ʼaia ʼi te ʼu māhina ka hoko mai.
3 Ke tou teuteu: Ko te teuteu ʼe ina faka fealagia ai ke tou faiva ʼi te fagonogono faiga malie. ʼE katoa fuli ʼatatou ʼu meʼa gāue, ʼaki he ʼu tohi kehekehe ʼe faigafua ai te gāue ʼaia. ʼI tuʼa ʼo Te Tule Leʼo pea mo te Réveillez-vous! ʼe lahi tatatou ʼu kiʼi pepa lotu ʼe feala ke lagaʼi ai te fia logo ʼaki tona ʼu kupu ʼe fakatupu ai he fia lau. ʼO kau ki ai mo te ʼu kaupepa ʼe ʼaoga ki te ʼu hahaʼi ʼo te ʼu lanu pea mo te ʼu lotu kehekehe. ʼE ʼi ai foki mo te ʼu tohi veliveli ʼe feala ta kita ai ki to kita tagaʼi kofu ʼe palalau ki te ʼu logo ʼo te mālama. Ko te ʼu tohi fea koa ʼe koutou manatu ke koutou fakaʼaogaʼi? Koutou fakakaukauʼi faka famili. Koutou faʼifaʼitaki te meʼa ka koutou palalau anai ki ai ke faigafua kia koutou mokā hoko tona temi fai.
4 Ko te ʼu ʼaʼahi ʼe tou fai ki ʼotatou ʼu mātuʼa pea mo ʼotatou ʼu kaumeʼa ʼe ko he ʼu faʼahi lelei ʼaia ki te fagonogono faiga malie. ʼE koutou fakatuʼutuʼu koa ʼo ʼaʼahi he tahi ʼi tokotou famili? ʼI te fahaʼi ʼaia, koutou ʼave he Tohi-Tapu pea mo he ʼu tohi ʼi te ʼu tohi neʼe kua tou ʼosi palalau ki ai. Kapau ʼe koutou folau ʼi he kā, ko te lau pe ʼo he tohi ʼe feala ai ke kamata ʼo he fai palalau. Kapau ʼe koutou ʼolo ʼi he motokā, koutou fakakaukauʼi ha kotou palalau mokā tuʼu anai te motokā. ʼE feala takotou feʼāveʼaki he ʼu kiʼi pepa lotu ke feala ai takotou ʼavage kia nātou neʼe fakalogo atu. ʼI he matatai matalelei pe ko he tahi faʼahi, ʼe feala ke kamata ha kotou fai palalau ʼo fehuʼi ki he tahi: “ ʼE mole ko he meʼa lelei koa mokā ʼe liliu te kele katoa ohage ko te koga meʼa ʼe tuʼu ʼi te paki ʼaenī? ” ʼE feala ha kotou fakaʼaogaʼi he tahi atu ʼuluaki palalau ʼe tatau mo te manatu ʼaenī.
5 Lolotoga te fakatahi faka tisitilike: ʼE feala foki hatatou maʼu he ʼu faʼahi ʼe ʼaoga ki te fagonogono faiga malie lolotoga te fakatahi faka tisitilike ʼi te māhina ʼo ʼaukusito. Tokolahi neʼe iku lelei tanatou fai palalau mo ʼihi neʼe felōgoʼi tahi mo nātou, feiā foki mo te ʼaʼahi ʼo te ʼu kaumeʼa pe ʼe ko te ʼu hahaʼi ʼo te famili. Koutou tokaga ʼo ʼai maʼu ho kotou fakaʼiloga lolotoga te fakatahi. Kapau ʼe koutou ʼolo ki he koloā ʼe feala anai ke fehuʼi atu he tahi po koteā te ʼuhiga ʼo tokotou fakaʼiloga. ʼE lagi ko te faʼahi lelei ʼaia ke fai ai he faka mafola lelei.
6 ʼAua naʼa tou meʼa noaʼi te ʼu faʼahi ʼaē ʼe feala ke fai ai te faka mafola ʼaki te fagonogono faiga malie. Ko te faʼahi ʼaia ʼo te faka mafola ʼe ʼi ai tona ʼu fua, pea ko te kau kaugana ʼa Sehova ʼe tonu ke nātou kau ki ai. Ohage ko Sesu, ke haga fai totatou ʼofa ki ʼotatou ʼu kāiga ʼo uga tatou ke tou palalau ʼi te temi fuli pe ʼe faka fealagia ai te faʼahi ʼaia! — Mat. 5:14-16.