Tou Faʼa Gāue ʼo Tou “Fai He Fagonogono Katoa”
1, 2. Koteā ʼaē ʼe malave kia koutou ʼo ʼuhiga mo te manatu ʼa Paulo ki te faka mafola ʼo te logo lelei, pea ʼe tou lava mulimuli feafeaʼi ki tana faʼifaʼitaki ʼaē ko te ‘fai ʼo he fagonogono katoa’?
1 Ohage ko Sesu pea mo te kau kaugana agatonu tokolahi ʼo te temi muʼa, ko te ʼapositolo ko Paulo neʼe ko he tagata fai faka mafola faiva ʼo te logo lelei, he neʼe ina “fai he fagonogono katoa” ʼi te ʼu ʼaluʼaga fuli pe. Māʼiape la mo tana nofo pilisoni, neʼe “ina tali lelei ia nātou fuli ʼaē neʼe ʼolo age kia te ia, ʼo ina faka mafola kia nātou ʼo ʼuhiga mo te Puleʼaga ʼo te ʼAtua pea mo ina akoʼi age te ʼu meʼa ʼo ʼuhiga mo te ʼAliki ko Sesu Kilisito, ʼo fai fakahagatonu pea mo faʼifaʼitaliha.”—Gaue 28:16-31, MN.
2 ʼO feiā mo tatou, ʼe feala ke tou faʼa gāue ʼo tou “fai he fagonogono katoa” ʼi te temi fuli pe. ʼE kau kiai te fagonogono ki te hahaʼi ʼaē ʼe tou felāveʼi mo nātou mokā tou ʼolo pea mo toe liliu mai te Fakatahi Faka Tisitilike, ʼaē ko tona kupu tāfito “Koutou Faka Kolōlia Ki Te ʼAtua,” pea mokā tou feʼoloʼaki ʼi te kolo ʼaē ʼe fai ai te fakatahi.—Gaue 28:23; Pes. 145:10-13.
3. Koteā ʼaē ʼe tonu ke tou fai ke mole tou meʼa noaʼi te fai fagonogono faigamālie?
3 Koteā Te Fai Fagonogono Faigamālie? Ko te fagonogono faigamālie ʼe mole ko he meʼa ʼe tou hoko fai feiā, neʼe mole tou fai he fakatuʼutuʼu kiai. ʼE mole feiā tatatou fai faka mafola. Ohage ko Paulo, ko te faka kolōliaʼi ʼo te ʼAtua ʼaki tatatou fai fagonogono ʼe maʼuhiga kia tatou, pea ʼe tonu ke tou tokaga ʼo fai he fagonogono faigamālie ʼi tatatou ʼu feʼoloʼaki ʼi te temi māfana ʼaenī. Kae ko tatatou faʼahiga fakaōvi ki te hahaʼi ʼe feala ke ʼui ʼe ko he fagonogono faigamālie—heʼe hage ko he felogoi fakakaumeʼa. Ko te faʼahi ʼaia ʼe feala ke fua lelei.
4. Koteā ʼaē neʼe ina faka fealagia kia Paulo ke fai fagonogono ʼi te kogafale ʼaē neʼe nofo ai?
4 Koutou Teuteu Ke Koutou Fai He Fagonogono: Neʼe tonu ke fakatupu e Paulo he ʼu faigamālie ke fai fagonogono ʼi te temi ʼaē neʼe pilisoni ai ʼi Loma. ʼI te kogafale ʼaē neʼe nofo ai, neʼe ina fakaafe te kau takitaki Sutea ʼo te kolo ke nātou ʼolo age kiō ia. (Gaue 28:17) Logola neʼe ʼi ai te kokelekasio ʼi Loma, kae neʼe mahino kia Paulo neʼe mole lahi te ʼu meʼa ʼaē neʼe ʼiloʼi e te kau Sutea ʼo ʼuhiga mo te tui faka Kilisitiano. (Gaue 28:22; Loma 1:7) Neʼe mole ina tātāʼofi tana “fai he fagonogono katoa” ʼo ʼuhiga mo Sesu Kilisito pea mo te Puleʼaga ʼo te ʼAtua.
5, 6. Koteā te ʼu faigamālie ʼe tou maʼu moʼo fai he fagonogono faigamālie, pea e feafeaʼi hatatou teuteu ke ʼi ai hona fua lelei?
5 Koutou fakakaukauʼi fakatomuʼa te hahaʼi ʼaē ʼe feala ke koutou felāveʼi mo nātou ʼi takotou feʼoloʼaki, ʼaē ʼe mole nātou ʼiloʼi lelei te kau Fakamoʼoni ʼa Sehova. ʼE lagi mole nātou ʼiloʼi ʼe tou fakaafe te hahaʼi ke nātou ako te Tohi-Tapu, pea ʼe mole totogi. Koutou tokagaʼi te ʼu faigamālie ʼaē ke koutou fagonogono ki te hahaʼi ʼaē ʼe koutou felāveʼi mo nātou ʼi takotou ʼu feʼoloʼaki, peʼe ʼi te ʼu fale koloā mokā tou ʼolo ʼo faifakatau, mokā tou ʼolo ki he fale ʼutuʼaga lolo, ʼi tatatou nonofo ʼi te otele, mokā tou kakai ʼi te ʼu fale kai, peʼe ka tou ʼolo ʼi te kā, pea mo te tahi atu ʼu faʼahi. Koutou fakakaukauʼi fakatomuʼa te meʼa ʼaē ka koutou ʼui moʼo kamata ʼaki he fai palalau, pea mo fai he fagonogono nounou. Lagi ʼi te ʼu ʼaho ka hoko mai, ʼe feala ke koutou ʼahiʼahi te fai fagonogono faigamālie ki tokotou ʼu vāhaʼa fale, mo tokotou ʼu kāiga, mo te ʼu kaugā gāue, peʼe ko tokotou ʼu feʼilo.
6 ʼE ʼaoga anai ke ʼi ai hakotou ʼu tohi moʼo fai ʼaki takotou fagonogono faigamālie. Koteā te ʼu tohi ʼaia? ʼE feala ke koutou fakaʼaogaʼi te kiʼi pepa lotu ʼE Koutou Fia Mahino Lahi Koa Ki Te Tohi-Tapu? Koutou faka maʼuhigaʼi te ʼu ʼuluaki palakalafe e nima, ʼaē ʼe fakahā ai te ʼu tupuʼaga kehekehe ke tou lau te Tohi-Tapu. Koutou fakahā age te faʼahi ʼaē ʼe tonu ke tohi ai mokā ina loto ki hana ako Tohi-Tapu. Ka koutou maʼu he tahi ʼe fia logo, pea koutou foaki age te kaupepa lahi Fakamaʼua. Kapau ʼe koutou felāveʼi mo he ʼu hahaʼi ʼe nātou palalau he tahi lea, koutou toʼo mo koutou te kiʼi kaupepa Une bonne nouvelle pour toutes les nations. ʼE fakamahino ʼi te pasina 2 peʼe feafeaʼi te fakaʼaogaʼi ʼo te kiʼi kaupepa ʼaia moʼo fai he fagonogono. Kapau ʼe koutou ʼolo motokā, pea ʼe lagi feala ke koutou toʼo mo koutou he ʼu nusipepa maʼa nātou ʼaē ʼe nātou fia ʼiloʼi moʼoni te logo ʼo te Puleʼaga.
7, 8. Koteā ʼaē ʼe tonu ke tou tokakaga kiai ʼo ʼuhiga mo tatatou faʼahiga teu pea mo tatatou aga ʼi tatatou ʼu feʼoloʼaki pea ʼi te hili ʼo te polokalama ʼo te fakatahi?
7 Tou Tokakaga Ki Tatatou Teu Pea Mo Tatatou Aga: ʼE tonu ke tou tokakaga ki tatatou aga pea mo tatatou teu pea mo te gaohi ʼo totatou ʼulu, naʼa mole leleiʼia anai e te hahaʼi peʼe tupu ai hanatou ‘palalau ʼo fakafeagai’ ki te kautahi ʼa Sehova. (Gaue 28:22) ʼE maʼuhiga te faʼahi ʼaia mokā tou kau ki te fakatahi, pea ʼi tatatou ʼu feʼoloʼaki pea ʼi te hili ʼo te polokalama. Ko Te Tule Leʼo ʼo te ʼaho 1 ʼo ʼAukusito 2002, ʼi te pasina 18, palakalafe 14, neʼe ina fai te fakatokaga ʼaenī: “ ʼE mole tou tui anai he ʼu mutuʼi meʼa ʼe hā ai tatatou fia fakahāhā, peʼe ko he ʼu mutuʼi meʼa ʼe mata faikehe, peʼe ko he ʼu mutuʼi meʼa ʼe tupu ai he sioʼi ʼo tatou ʼaki he ʼu holi kovi, peʼe tou mulimuli fau ki te faiteuteu ʼo te temi ʼaenī. ʼE tonu foki ke hā ʼi tatatou faiteuteu ‘ ʼe tou fakaʼapaʼapa ki te ʼAtua.’ ʼE ko he faʼahi ʼe tonu ke tou fakakaukauʼi. ʼE mole tonu pe ke tou teuteu lelei ʼi te ʼu temi ʼaē ʼe tou ʼolo ai ki te ʼu fono, kae tou meʼa noaʼi leva totatou ʼu teu ʼi te tahi ʼu lakaga. Tuʼumaʼu pe ʼe tonu ke tou fakahā ʼi totatou ʼu teu tatatou aga fakaʼapaʼapa, mo tatatou aga fakapoipoi, heʼe ko tatou ko te kau Kilisitiano pea mo te kau minisi ʼi te temi fuli pe.”—1 Tim. 2:9, 10.
8 ʼE tonu ke tou teuteu ʼaki he aga fakaʼapaʼapa pea mo he aga fakapoipoi. Kapau ʼe hā tuʼumaʼu ʼi tatatou faʼahiga teu pea mo tatatou aga tatatou tui ki te ʼAtua, pea ʼe mole tou ufiufi anai ʼi te fagonogono faigamālie koteʼuhi ʼe lelei tatatou teu.—1 Pet. 3:15.
9. Koteā te fua lelei ʼaē neʼe maʼu e Paulo ʼi tana fagonogono ʼi Loma?
9 ʼE Maʼu He Fua Lelei ʼo Te Fagonogono Faigamālie: ʼI te ʼu taʼu e lua ʼaē neʼe pilisoni ai Paulo ʼi Loma, neʼe sio ki te ʼu fua lelei ʼo tana ʼu faiga ʼi te fagonogono. Neʼe ʼui e Luka “nee tui ihi ki te u mea nee ina fakaha.” (Gaue 28:24) Neʼe fakahā e Paulo totonu te fua lelei ʼo tana “fai he fagonogono katoa” ʼi tana tohi fēnei: “Ko toku ʼaluʼaga neʼe tokoni ki te fakahaʼele ki muʼa ʼo te logo lelei, pea ko toku seiniʼi tupu ko Kilisito neʼe mahino kiai te kau tagata leʼo katoa ʼo Loma pea mo nātou fuli ʼaē, pea tokolahi ʼi te ʼu tēhina ʼi te ʼAliki, ʼi tanatou falala ʼuhi ko taku ʼu haʼi, neʼe nātou liliu ʼo lototoʼa age ʼi tanatou tala te folafola ʼa te ʼAtua kae mole nātou matataku.”—Filp. 1:12-14, MN.
10. Koteā te fua lelei neʼe maʼu e te taumatuʼa ʼi te temi māfana ʼaenī kua hili?
10 ʼI te temi māfana ʼaenī kua hili, ʼi te ʼosi ʼo te ʼaho ʼo te fakatahi faka tisitilike, neʼe fua lelei te fai fagonogono faigamālie ʼa te taumatuʼa ki te fafine gāue ʼi te fale kai, ʼaē neʼe ina fehuʼi age kia nāua ʼo ʼuhiga mo te kiʼi kate ʼo te fakatahi. Neʼe nā palalau age ʼo ʼuhiga mo te fakatahi pea mo te ʼamanaki ʼaē ʼe foaki mai e te Tohi-Tapu ki te malamanei ʼi te ka haʼu. Neʼe nā tuku age te kiʼi pepa lotu ʼE Koutou Fia Mahino Lahi Koa Ki Te Tohi-Tapu? pea mo nā fakamahino age te fakatuʼutuʼu ʼo he ako Tohi-Tapu. Neʼe ʼui e te fafine ʼe ina loto ke ʼaʼahi ia ia, mo ina tohi tona higoa pea mo tona tuʼasila ʼi te tuʼa ʼo te kiʼi pepa lotu, pea neʼe ina kole ki te taumatuʼa pe feala ke nā fai he ʼu fakatuʼutuʼu. ʼE ko he toe fua lelei ʼe feala ke tou maʼu ʼi te taʼu ʼaenī mo kapau ʼe tou faʼa gāue ʼo “fai he fagonogono katoa”!
11. Koteā ʼaē ʼe tonu ke tou fai ke faka mafola lahi ai te logo lelei ʼi te temi māfana ʼaenī ʼi tatatou “fai he fagonogono katoa”?
11 Tou Faiga Ke Fakahaʼele Ki Muʼa Te Logo Lelei: Koutou fakakaukauʼi age muʼa te fiafia ʼa Paulo ʼi tana logo ʼaē neʼe faʼifaʼitakiʼi e te ʼu Kilisitiano tana faʼafai. ʼOfa pe ke tou faiga lahi ke faka mafola lahi te logo lelei, ʼo tou fagonogono faigamālie ʼo ʼuhiga mo tatatou ʼu akonaki ʼaē ʼe tuʼu ʼi te Tohi-Tapu, pea ʼe tou toe maʼu anai mo te ʼu lelei ʼi te fakatahi faka tisitilike ʼo te temi māfana ʼaenī.
[Talanoa ʼo te pasina 3]
Te ʼu Tohi ʼAē ʼe ʼAoga Ki Te Fagonogono Faigamālie
■ ʼE Koutou Fia Mahino Lahi Koa Ki Te Tohi-Tapu? (kiʼi pepa lotu)
■ Koteā ʼAē ʼe Fakamaʼua Mai e Te ʼAtua Kia Tatou? (kaupepa lahi)
■ Une bonne nouvelle pour toutes les nations (kiʼi kaupepa)
■ Ko te tahi ʼu tohi
[Talanoa ʼo te pasina 4]
ʼAua Naʼa Koutou Galoʼi Nātou!
Ko ai ʼaē ʼe mole tonu ke galoʼi? Ko te hahaʼi fuli ʼaē neʼe kau ki te ʼAho Fakamanatu ʼo te mate ʼa Kilisito peʼe ko te akonaki makehe. Neʼe tou fakaafe koa nātou ki te fakatahi faka tisitilike ʼo te taʼu ʼaenī? ʼE mahino ia tokolahi ia nātou ʼe nātou kau anai kiai mo kapau ʼe tou fakaloto mālohiʼi fakalelei nātou. ʼI tanatou fiafia ʼi te fakatahi mo he ʼu hahaʼi fakaloto mālohi pea mo te polokalama fakalaumālie, ʼe nātou fakaōvi anai kia Sehova pea mo tona kautahi. He koʼe ʼe mole koutou fakaafe nātou pea mo vakaʼi peʼe nātou tali anai? Koutou fakahā age kia nātou ia meʼa fuli pe ʼe nātou fia ʼiloʼi, ʼo feiā mo te ʼu ʼaho ʼo te fakatahi, te koga meʼa ʼaē ka fai ai te fakatahi, te hola ʼaē ʼe kamata ai pea mo fakaʼosi ai te polokalama, pea mo te polokalama ʼaē ʼe hā fakalelei ʼi te tuʼa nusipepa ʼo te Réveillez-vous ! ʼo te ʼaho 8 ʼo Sūnio 2003.