Koutou Fakavikiviki Kia Sehova ʼAki Te Fagonogono Faigamālie
1 Ko te kau kaugana agatonu ʼa Sehova ʼe nātou kumi ʼi te ʼaho fuli, he ʼu faigamālie ke nātou fakavikiviki kia te ia. (Pes. 96:2, 3; Hep. 13:15) ʼE feala ke tou fai te faʼahi ʼaia, ʼi te fagonogono faigamālie. Ko te tokolahi ʼo te kau atolasio ʼa Sehova ia ʼaho nei, ʼe nātou fakafetaʼi kia nātou ʼaē neʼe nātou tala age te logo ʼo te Puleʼaga ʼi te fagonogono faigamālie.
2 ʼI te agamāhani, kapau ʼe tou fagonogono faigamālie ki he tahi, pea ʼe feala ai ki ʼihi hahaʼi ke nātou logo ki te logo ʼo te Puleʼaga. Ohage la, ko te fai palalau ʼa Sesu mo te fafine Samalitana ʼi te vai keli ʼo Sakopo, neʼe ina faka fealagia ai ki te tokolahi ke nātou fia ʼiloʼi te logo lelei. (Soa. 4:6-30, 39-42) Lolotoga te temi pilisoni ʼa Paulo pea mo Silasi ʼi Filipe, neʼe nā fagonogono ki te tagata leʼo pilisoni, pea ko te famili katoa ʼo te tagata ʼaia neʼe nātou tali te moʼoni.—Gaue 16:25-34.
3 Te ʼu Faigamālie: Ko te ʼu lakaga fea ʼaē ʼe koutou lava fai ai te fagonogono faigamālie? Ko ʼihi ʼe nātou fai lolotoga tanatou faifakatau, mokā nātou toʼo te kā, peʼe ka nātou talitali ʼi te ʼu fale tōketā. Ko ʼihi ʼe nātou fagonogono lolotoga te ʼu temi kai ʼi te fale gāue peʼe ʼi te faleako. Kapau ʼe tou tuku hatatou tohi faka Tohi-Tapu ʼi he faʼahi ʼe lava sio kiai te hahaʼi, ʼe feala anai ke nātou lagaʼi he ʼu fehuʼi ʼo ʼuhiga mo tatatou tui.—1 Pet. 3:15.
4 Te Faʼahiga Kamata ʼo Te Fagonogono Faigamālie: Ko te kiʼi taʼahine umiuminoa ʼe taʼu fitu, neʼe ina logoʼi ʼi te fono ʼe maʼuhiga kia tatou fuli ke tou fai faka mafola. Koia ʼi tana ʼalu mo tana faʼe ki te fale koloā, neʼe ina ʼai ʼi tana kato te ʼu kaupepa lalahi e lua. Lolotoga te temi ʼaē neʼe totogi ai e tana faʼe tana ʼu fakatau, neʼe foaki e te kiʼi taʼahine te kaupepa lahi ki te fafine neʼe ina tali lelei. ʼI te fehuʼi age ki ai pe koteā ʼaē neʼe mole mataku ai ʼi te palalau ki te fafine, neʼe tali fēnei e te kiʼi taʼahine umiuminoa ʼaia: “Neʼe ʼau ʼui fēnei ʼi toku loto: Teuteu ke ke ʼalu! Pea neʼe ʼau ʼalu ai!”
5 Moʼo fai te fagonogono faigamālie, ʼe tonu kia tatou fuli ke tou maʼu te manatu ʼaē neʼe maʼu e te kiʼi taʼahine. Koteā ʼaē ʼe lava tokoni mai kia tatou? Tou faikole ke tou maʼu te lototoʼa moʼo palalau. (1 Tes. 2:2) Tou teuteuʼi he fehuʼi, peʼe ko he manatu ʼe fia logo kiai te hahaʼi, moʼo kamata ʼaki he fai palalau. Pea tou falala ko Sehova ʼe ina tapuakina anai tatatou ʼu faiga.—Luka 12:11, 12.
6 Ko tatatou fagonogono ki te hahaʼi ʼaē ʼe tou felāveʼi mo nātou ʼi te ʼaho fuli, ʼe fakatupu ai he fakavikiviki kia Sehova pea mo tou fiafia ai. Ko te faʼahi ʼaia ʼe lava tokoni ki he tahi ke haʼele ʼi te ala ʼaē ʼe ina taki ki te maʼuli heʼegata.