Tou ʼAve Te ʼĀteaina Fakalaumālie Kia Nātou ʼAē ʼi Te ʼu Fale Pilisoni

“NEʼE mātou talitali atu kia koutou.” “ ʼI te ʼu po ʼaenī kua hili, neʼe ʼau moemisi ʼe koutou ʼōmai anai.” “ ʼE mātou fakamālo atu ki takotou fakatuʼutuʼu he tahi ke ina ʼaʼahi tuʼumaʼu mātou.” “ ʼE mātou fia fakahā atu tamatou loto fakafetaʼi ki te ʼu tapuakina fuli ʼaē neʼe mole tau mo mātou ke mātou maʼu mai ia Sehova pea mo tana kautahi, ʼi tana foaki kia mātou te meʼa kai fakalaumālie ʼi tona temi tonu.”

Koteā te tupuʼaga ʼo te ʼu loto fakafetaʼi ʼaia? Ko te ʼu palalau ʼaia neʼe fai e te ʼu hahaʼi ʼe nātou nonofo ʼi te ʼu fale pilisoni kehekehe ʼi Mekesike. ʼE nātou loto fakafetaʼi ki te loto tokaga ʼaē ʼe fakahā kia nātou e te kau Fakamoʼoni ʼa Sehova, ʼaē neʼe nātou foaki age kia nātou te ʼāteaina fakalaumālie, māʼiape la peʼe nātou nonofo ʼi te fale pilisoni. ʼI Mekesike, ʼe ʼi ai te ʼu fale pilisoni e 42 ʼe fai faka mafola tuʼumaʼu ai te kau Fakamoʼoni ʼa Sehova moʼo foaki te ʼu meʼa ʼaē ʼe ʼaoga ki te hahaʼi pilisoni ʼi te faʼahi fakalaumālie. ʼE higoaʼi te ʼu fale pilisoni ʼaia ko te Centro Readaptación Social (ko te ʼu fale moʼo fakaliliu te hahaʼi ke nātou agalelei). ʼI te tahi ʼu fale pilisoni, ʼe fai tuʼumaʼu ai te ʼu fono faka Kilisitiano, pea ʼe ʼi ai tona ʼu fua lelei. Ohage la, ʼi te tānaki fakamuli, ko te toko 380 neʼe nātou kau ki te ʼu fono ʼi te ʼu fale pilisoni ʼaia. ʼI te temi ʼaia, neʼe fai te ʼu ako Tohi-Tapu e 350. Ko te toko tolugofulu-ma-fitu neʼe nātou kamata fai faka mafola, pea ko te toko 32 neʼe nātou foaki tonatou maʼuli kia Sehova, ʼo nātou papitema.

Te Faʼahiga Fai ʼo Te Gāue

ʼE fakahoko feafeaʼi e te kau Fakamoʼoni ʼa Sehova tanatou faka mafola ʼi te ʼu koga meʼa ʼaia? ʼUluaki, ʼe nātou ʼolo ki te kau pule ʼo nātou kole he pepa ʼe ina fakagafua tanatou hū ki te fale pilisoni, ʼo nātou fakamahino te fakatuʼutuʼu ʼo tanatou ʼu ʼaʼahi: ko te akoʼi ki te hahaʼi pilisoni te faʼahiga meʼa ʼaē ʼe tonu ke nātou fai moʼo hikihiki ʼo tanatou maʼuli, pea mo tauhi ki te ʼAtua ʼaki te tauhi ʼaē ʼe ina leleiʼia.

Ko te ʼu kole fuli ʼaia, ʼe fakagafua e te ʼu pule kia nātou. Ko te ʼu pule ʼaia, ʼe nātou leleiʼia te ako faka Tohi-Tapu ʼaē ʼe foaki ki te hahaʼi pilisoni. Neʼe fakatokagaʼi e te ʼu pule ʼo te fale pilisoni, ʼe mulimuli lelei te kau Fakamoʼoni ʼa Sehova ki te ʼu lekula ʼaē ʼe fakatuʼu ʼi te ʼu fale ʼaia. ʼE nātou fakagafua ki te ʼu minisi ʼaia ʼaē ʼe nātou ʼaʼahi te hahaʼi pilisoni, ke nātou fakaʼaogaʼi te ʼu pilō, mo te ʼu fale kai ʼo te fale pilisoni, pea mo te ʼu fale gāue moʼo fai ai tanatou ʼu fono. ʼI te tahi fale pilisoni, neʼe fakagafua ki te kau Fakamoʼoni ke nātou laga te kiʼi Fale veliveli ʼo te Puleʼaga, ohage ko tona fakahā e te fakamatala ʼaenī ʼa te tagata taupau feʼaluʼaki ʼi te potu toga pea mo hahake ʼo Mekesike.

“ ʼI te kamata ʼo te taʼu 1991, neʼe mātou kamata ʼaʼahi te fale pilisoni ʼo Tehuantepec, ʼi Oaxaca, pea neʼe lahi te pakupaku ʼa te hahaʼi ʼi te faʼahi fakalaumālie. Mole fualoa, pea neʼe mātou kamata te ʼu ako Tohi-Tapu e 27. ʼUhi ko te fia ʼiloʼi ʼo te moʼoni e te hahaʼi pilisoni, koia neʼe fakatuʼutuʼu ai ke fai te ʼu fono e nima ʼo te kokelekasio. Ko te tagata pilisoni, ʼaē neʼe ina fakahā tona ʼofa lahi kia Sehova, neʼe ina fakatotonu ke ina laga he Fale veliveli ʼo te Puleʼaga ʼi te koga meʼa ʼo te fale pilisoni, ke maʼu ai he fale moʼo fai ʼo te ʼu fono. Neʼe ʼalu ki te tagata pule ʼo te fale pilisoni, pea neʼe ina kole age peʼe feala ke ina fai te faʼahi ʼaia, pea neʼe tali lelei e te ʼu pule ia te faʼahi ʼaia. ʼI te kamata ʼo te māhina ʼo Tesepeli 1992, neʼe liliu te hahaʼi pilisoni e toko 6 ko he kau kaugā fai faka mafola ʼo te logo lelei. ʼAki te tuputupu ʼaē neʼe hoko, neʼe fai te ʼu fakatuʼutuʼu ke fai te ʼAho ʼo te Fakamanatu ʼi te fale pilisoni. Neʼe mātou kole ki te pule ʼo te fale pilisoni peʼe ina fakagafua ke mātou ʼōmai mo te pane pea mo te vino, pea hili tamatou fai palalau ia hola e fā, neʼe fakagafua mai ke mātou fai te faʼahi ʼaia.

“Ko te meʼa ʼaē neʼe hoko ʼi te ʼaho 3 ʼo ʼApelili 1993, (ko ʼaho e tolu ʼi muʼa ʼo te fai ʼo te taumafa ʼo te ʼAho ʼo te Fakamanatu) neʼe fakamavae ʼihi ʼu hahaʼi pilisoni. ʼI te temi ʼaē neʼe maʼu ai e te tagata pilisoni ʼaē kua liliu ko te kaugā fai faka mafola tana ʼu pepa fakamavae, neʼe ina kole ke palalau ki te pule ʼo te fale pilisoni, ke ina fakagafua age ke nofo ʼi te fale pilisoni ʼo aʼu ki te ʼosi ʼo te taumafa ʼo te ʼAho ʼo te Fakamanatu. Neʼe punamaʼuli te tagata pule, he mole ko he kole māhani ʼaia ʼe fai, kae ʼi tana sio ʼaē ki te lahi ʼo te fia kau ʼa te tagata pilisoni ʼaia ki te ʼAho ʼo te Fakamanatu ʼi te fale pilisoni, neʼe ina tali tana kole. Ko te toko 53 neʼe nātou kau ki te ʼAho ʼo te Fakamanatu, pea ʼi te fakaʼosi ʼo te polokalama, neʼe nātou fetāgihi ʼi tonatou fiafia. Neʼe mātou lototahi ke higoa te kūtuga ʼaia ko ‘Te hahaʼi ʼāteaina ʼo Cereso,’ koteʼuhi ʼe nātou ʼāteaina ʼi te faʼahi fakalaumālie.”

ʼE leleiʼia ʼaupito te gāue ʼo te kau Fakamoʼoni ʼa Sehova ʼi te ʼu potu ʼaia. ʼI te tahi fale pilisoni, ʼe ʼui e te pule ko te kau ki te ʼu fono ʼa te kau Fakamoʼoni ʼa Sehova, ʼe ko he “faitoʼo” ki te hahaʼi pilisoni ke fetogi ai tonatou maʼuli.

ʼE Fua Lelei Te Polokalama Moʼo Fetogi Te Maʼuli ʼo Te Kau Pilisoni

Tokolahi te hahaʼi pilisoni kua fetogi tonatou maʼuli, ʼuhi ko te gāue ʼa te kau Fakamoʼoni ʼa Sehova. Logope la ʼe moʼoni ko te hahaʼi ʼaē neʼe pilisoni, ʼi tanatou mavae mai ai, ʼe nātou toe maumauʼi te lao, kae ko nātou ʼaē neʼe nātou tali moʼoni te logo ʼo te Folafola ʼa te ʼAtua kua nātou fetogi katoa tonatou maʼuli. Ko tanatou fetogi ʼaia, ʼe ina fakamanatuʼi mai kia tatou te ʼu palalau ʼaenī ʼa te ʼapositolo ko Paulo: “ ʼE mole he tagata fai folonikasio . . . , he kau kaihaʼa, he hahaʼi mānumānu, he kau konahia, he kau leakovi, he ʼu hahaʼi ʼe nātou faʼao he ʼu meʼa ka mole ʼanatou, ʼe nātou maʼu anai te puleʼaga ʼa te ʼAtua. Pea neʼe ko te ʼuhiga ʼaia ʼo niʼihi ia koutou. Kae kua fakamaʼa koutou, kua fakamaʼoniʼoni koutou pea kua tala ʼe koutou faitotonu ʼi te huafa ʼo totatou ʼAliki ko Sesu Kilisito pea ʼaki te laumālie ʼo totatou ʼAtua.”​—1 Kolonito 6:​9-​11.

Ko te fetogi lahi ʼo tanatou ʼu agaaga ʼe hā lelei mokā nātou fakamatala te ʼu meʼa ʼaē ʼe nātou logoʼi ʼi tonatou loto. Ko Miguel, ʼaē ʼe nofo ʼi te fale pilisoni ʼo Campeche, ʼi te kolo ʼo Campeche, ʼe ina ʼui fēnei: “Ia ʼaho nei, ʼe feala ke ʼau ʼui ʼaki he loto fiafia, ʼe ʼau kau ki te tahi ʼu ōvi ʼaē ʼe nātou maʼu te ʼamanaki ʼaē ʼe tuʼu ia 2 Petelo 3⁠:13 pea mo Mateo 5⁠:⁠5.” Ko José, ʼaē ʼe ʼi te fale pilisoni ʼo Koben, ʼi Campeche, neʼe ina ʼui fēnei: “Logope la ʼe ʼau pilisoni pea ʼe lagi mamafa te agakovi ʼaē neʼe ʼau fai, ʼe ʼau mahino ko Sehova ʼe manavaʼofa lahi pea ʼe fagono ki taku ʼu faikole pea mo taku ʼu tagi. ʼE feala ke ina fakamolemole taku ʼu agahala pea mo ina foaki mai te fealagia ʼaē ke ʼau fakaʼaogaʼi te toe ʼo toku maʼuli moʼo faka mafola te logo lelei ʼo ʼuhiga mo te Puleʼaga ʼa te ʼAtua. ʼE mātou fakamālo ki tamatou ʼu tagata ʼāfea, ki te temi ʼaē ʼe nātou fakaʼaogaʼi moʼo ʼaʼahi ʼo mātou ʼi te ʼu fale pilisoni, ke feala hamatou maʼu te ʼu fakapapau ʼo te Puleʼaga ʼa te ʼAtua. ʼE ko he ʼu tapuakina ʼe mātou leleiʼia! ʼE feala koa ke ʼau ʼui ko ʼau ko he tagata pilisoni? Kailoa, he neʼe foaki mai e Sehova te ʼāteaina fakalaumālie ʼaē neʼe ʼaoga kia ʼau.”

Koteā ʼaē neʼe hoko ki te hahaʼi fai fakapō, te hahaʼi ʼaē neʼe fai fakaʼaliki, ia nātou ʼaē ʼe nātou fakatupu te ʼu afi, mo te hahaʼi kaihaʼa, pea mo ʼihi, ʼaē kua nātou liliu ai ko he kau Kilisitiano ʼe maʼuʼuli faitotonu? ʼE ʼui e te ʼu tagata ʼaia, ʼe ko te mālohi ʼo te Folafola ʼa te ʼAtua ʼaē ʼe ina fakahoko te ʼu fetogi ʼaia, pea mo te fakatahitahi lelei mo te hahaʼi ʼaē ʼe nātou tauhi fakamalotoloto. Ohage ko Tiburcio, ʼaē ʼe nofo ʼi te fale pilisoni ʼi Mazatlán, ʼi Sinaloa, ʼe hā lelei te ʼu fua lelei ʼo te polokalama moʼo fetogi ʼo tonatou maʼuli. Neʼe nofo ʼi te fale pilisoni ʼo Concordia, ʼi Sinaloa, ʼaē neʼe hoko ai tana ʼu fihifihia ʼuhi ko tana agamālohi. Ko tona ʼohoana ʼe ko te Fakamoʼoni ʼa Sehova, pea neʼe gaohi koviʼi ia ia e Tiburcio, māʼiape la mo te temi ʼaē neʼe haʼu ʼo ʼaʼahi ia ia ʼi te fale pilisoni. Neʼe faʼa kātaki pea neʼe haʼu tuʼumaʼu ʼo ʼaʼahi ia ia, pea neʼe kole age leva e Tiburcio ke ina foaki age te tohi E Feala Keke Mauli o Heegata Ite Palatiso, ʼo ina kamata ako tokotahi.a Pea neʼe ina kole ke haʼu he tahi ʼo ako mo ia ʼi te fale pilisoni. Neʼe kamata tuputupu ʼi te faʼahi fakalaumālie, pea neʼe liliu ʼo vāhaʼa lelei mo te hahaʼi. Neʼe ʼave ia ia ki te fale pilisoni ʼo Mazatlán, ʼaē neʼe ʼi ai te kūtuga neʼe nātou ako te Tohi-Tapu, pea ʼi te temi nei ko he kaugā fai faka mafola. ʼE ina ʼui fēnei: “ ʼI te temi nei, ʼaki toku ʼohoana, mo taku fānau, pea mo nātou ʼi te fale pilisoni, ʼe ʼau loto fakafetaʼi ki te fealagia ʼaē ke ʼau logo ki te ʼu moʼoni ʼo te Tohi-Tapu ʼi henī, ʼaki te ʼamanaki ʼi te temi ka haʼu ʼaē kua ōvi mai, ʼe fakamavae anai ʼau pea mo ʼau kau anai ki te ʼu fakatahi pea mo te ʼu fono ʼo te kokelekasio.”

ʼE toe ʼi ai mo Conrado, ʼaē ʼe loto fakafetaʼi ʼaupito ʼo ʼuhiga mo te ʼu fetogi ʼaē neʼe ina fai ʼi tona maʼuli. Neʼe lahi ʼaupito tona ʼu fihifihia ʼi tana nofo ʼohoana, koia neʼe nā mavete ai mo tona ʼohoana. Neʼe ina kumi he fīmālie ʼi te toloke. ʼAki te temi neʼe liliu ko he tagata ʼe ina fakatau te toloke. Neʼe puke ia ia pea neʼe fakatūʼa ke nofo pilisoni he neʼe ina feʼāveʼaki te toloke ko te marijuana pea mo te kokaine. ʼI te fale pilisoni, neʼe ʼi ai te kūtuga neʼe nātou ako te Tohi-Tapu mo te kau Fakamoʼoni ʼa Sehova, pea neʼe fakaafe ia ia ke ako mo nātou. ʼE ina fakahā fēnei te meʼa ʼaē ʼe ina logoʼi ʼi tona loto: “Neʼe ʼau punamaʼuli ʼi te fakaʼaluʼalu lelei ʼo te ʼu fono, mo te ʼu kumi ʼaē neʼe nātou fai ʼaki te ʼu tohi moʼo fakamahino ʼo te Tohi-Tapu, pea mo taku sio ʼaē ko te ʼu meʼa fuli ʼaē ʼe nātou ako ʼe fakatafito ki te Tohi-Tapu. Neʼe ʼau kole atu aipe haku ako Tohi-Tapu pea neʼe ʼau kamata kau ki te ʼu fono.” Neʼe hoko te ʼu meʼa ʼaia ʼi Sanualio 1993. ʼI te temi nei, kua mavae ia Conrado mai te fale pilisoni, pea ʼe hoko atu tana tuputupu ʼi te kokelekasio faka Kilisitiano.

Ko Te ʼu Motu ʼo Marías

ʼI Mekesike, ʼe ʼi ai te fale pilisoni ʼe fakatupu manavahe, ʼe ko te ʼu motu e fā ʼe higoaʼi ko te ʼu Motu ʼo Marías. ʼE feala ke feʼoloʼaki te hahaʼi pilisoni ʼi te ʼu motu ʼaia ʼaē ʼe nātou nonofo pilisoni ai. Ko ʼihi ʼe nātou maʼuʼuli ʼi ai mo tonatou ʼu ʼohoana pea mo tanatou fānau.

Neʼe fakatuʼu ai te kiʼi kokelekasio veliveli. ʼE ʼōmai kiai te ʼu tēhina e toko tolu mai Mazatlán ʼo tuʼa tahi ʼi te māhina, moʼo tokoni ki te takitaki ʼo te ʼu fono, mo foaki he ʼu tohi, pea mo foaki he ʼu fakaloto mālohi. ʼI ʼihi temi, ʼe ʼalu kiai te tagata taupau faka silikosikilipisio ʼo ʼaʼahi ia nātou. Ko nātou ʼaē ʼe kau ki te ʼu fono ʼe ko te toko 20 ki te 25. ʼE ʼi ai te ʼu Fakamoʼoni ʼe fā kua papitema pea mo te toko lua ʼu kaugā fai faka mafola. ʼE ʼui e te tagata taupau feʼaluʼaki ko “ ʼihi ʼe nātou haʼele ia kilometa e 17 ke nātou kau ki te ʼu fono ʼi te ʼAhotapu, pea ʼe tonu ke nātou mavae fakavilivili ʼi te ʼosi fono ke nātou toe liliu ki tonatou kogafale pilisoni ki te pāui ʼo tonatou higoa. Māʼiape la pe nātou haʼele fakavilivili kae ʼe fakalaka ia hola e lua tanatou toe liliu.” ʼE mole heʼeki faʼa fualoa, neʼe ʼui fēnei e te tēhina neʼe ina ako te moʼoni ʼi te fale pilisoni ʼaia: “Neʼe ʼau fia mavae vave mai ai, kae ʼi te temi nei, ʼe hoki ʼau mavae anai mokā kua loto kiai ia Sehova, heʼe lahi te gāue ʼaē ʼe tonu ke ʼau fai ʼi henī ʼi te fale pilisoni.”

ʼE tou fiafia ʼi te sio ʼaē ko te moʼoni ʼe ina fakaʼaogaʼi tona mālohi, moʼo faka ʼāteaina te hahaʼi fakamalotoloto ʼaē ʼe nātou kumi te meʼa ʼaē ʼe tonu ke nātou fai moʼo fakafiafia ia Sehova. Ko te toko 12 tupu ia nātou ʼaia, ʼaē neʼe nātou ako te moʼoni ʼi te fale pilisoni, kua faka ʼāteaina, kua nātou papitema, pea ʼi te temi nei, ʼe nātou maʼu he maʼuli ʼe lelei ʼi tonatou ʼuhiga kau kaugana ʼa te ʼAtua, pea ko ʼihi kua liliu ko he kau tagata ʼāfea ʼi te kokelekasio. Kua hā lelei te mālohi ʼaē ʼe maʼu e te Tohi-Tapu moʼo faitoʼo ʼo te ʼu loto pea mo toe fakafoʼou te hahaʼi. Ko te ʼu hahaʼi ʼaē neʼe pilisoniʼi ʼuhi ko tanatou ʼu aga kovi, ʼi tanatou maʼu te ala ʼo te mālama ʼo te Folafola ʼa te ʼAtua, ʼe hoko kia nātou te ʼāteaina moʼoni ʼaē neʼe fakapapau e Sesu ʼi tana ʼui fēnei: “ ʼE koutou ʼiloʼi ai anai te moʼoni, pea ko te moʼoni ʼe ina faka ʼāteaina anai koutou.”​—Soane 8:​32; Pesalemo 119:105.

[Nota ʼi te lalo pasina]

[Paki ʼo te pasina 23]

Neʼe fua lelei ki te tokolahi te ʼu moʼoni faka Kilisitiano ʼaē neʼe nātou ako ʼi te fale pilisoni