Ko Te Fakafeagai Ki Te ʼu Tukugakovi Hala ʼi Falani

KO TE KAU FAKAMOʼONI ʼA SEHOVA ʼi Falani, ʼe mole heʼeki faʼa fualoa kiai, neʼe fai kia nātou te tuʼuga tukugakovi hala. Ko te ʼu sulunale, te lātio pea mo te televisio neʼe nātou fakaʼaogaʼi te ʼu meʼa kovi ʼaē neʼe hoko ʼi te ʼu magaʼi lotu ʼi Eulopa mo Saponia, moʼo faka mafola he ʼu logo fakakākā ʼo ʼuhiga mo te kau Fakamoʼoni. Neʼe fai te fakamatala hala ʼo ʼui ko nātou ʼaia ʼe ko te magaʼi lotu ʼe lahi ʼaupito pea mo fakatupu tuʼutāmaki.

Moʼo fakatonutonuʼi te ʼaluʼaga ʼaia, neʼe tā e te kau Fakamoʼoni ʼa Sehova te kiʼi pepa lotu neʼe tali ki te ʼu faʼahiga fehuʼi ohage la: ‘Ko ai te kau Fakamoʼoni ʼa Sehova? ʼE ko he kau Kilisitiano koa? ʼE nātou tali koa te ʼu faitoʼo? He koʼe koa ʼe nātou ʼolo ki te ʼu ʼapi? E feafeaʼi te fakaʼaluʼalu ʼo tanatou gāue ʼi te faʼahi ʼo te paʼaga? Koteā te meʼa ʼaē ʼe fai e te kau Fakamoʼoni ʼa Sehova maʼa te hahaʼi?

Ko te kupu tāfito ʼo te kiʼi pepa lotu ʼaia ʼi te lea Fakafalani ʼaē neʼe fai ai te ʼu fakamahino, neʼe koia ʼaenī Les Témoins de Jéhovah​—⁠Ce que vous devez savoir. Neʼe fakatuʼutuʼu te tufa makehe ke tuku te kiʼi pepa lotu ʼaia ki te tokolahi ʼaē neʼe feala ke tuku ki ai. Mai te ʼaho 13 ʼo Maio ki te ʼaho 19 ʼo Sūnio 1996, neʼe tufa te ʼu pepa e hiva miliona tupu.

Neʼe ōfo te tokolahi ʼi te kiʼi pepa lotu ʼaia, ʼo kau ki ai mo te ʼu tagata maʼu tuʼulaga ʼi te puleʼaga. Neʼe ʼui fēnei e te tagata ʼe kau ki te fono ʼo tona potu fenua, ʼi tana ʼosi lau te kiʼi pepa lotu ʼaia: “ ʼE ʼau ʼita ki te ʼu fatufatu ʼaē neʼe fai ki te kau Fakamoʼoni ʼa Sehova. Neʼe lahi te ʼu lakaga neʼe ʼau fakatokagaʼi ai takotou lotolelei ʼi te gāue ʼaē ʼe koutou fai ʼaki he loto fia foaki.” Moʼo tali ki te kiʼi pepa lotu ʼaia, neʼe tohi fēnei e te tagata ʼe kau ki te Fono lahi ʼo Eulopa: “Tokolahi te hahaʼi ʼe feala ke nātou sio ki te kehekehe ʼo te faʼahiga kūtuga Kilisitiano ʼaē ʼe koutou kau kiai pea mo te tahi ʼu magaʼi lotu.”

ʼI Bretagne, neʼe fakahā e te Fakamoʼoni te kiʼi pepa lotu ʼaia ki te patele neʼe ina tali lelei. Neʼe ʼui fēnei e te patele ʼaia: “ ʼE ʼau fakamālo atu ki te meʼa ʼaē ʼe koutou fai.” Pea neʼe ina toe ʼui fēnei: “ ʼE ʼau fakaloto mālohiʼi ia nātou ʼo toku ʼēkelesia ke nātou tali koutou ʼi tonatou ʼu ʼapi pea mo fakaafe koutou ke koutou ʼinu kafe. Pea ʼe feala ke koutou ʼui age kia nātou ʼaē ʼe koutou felāveʼi mo nātou, kua koutou ʼosi ʼōmai ki toku ʼapi. ʼE ʼau toe fia ʼui atu foki, ʼe ʼau leleiʼia te lau ʼo takotou ʼu tohi.”

ʼI tana ʼosi maʼu te kiʼi pepa lotu ʼaia, neʼe faitohi te tagata Polotesita ʼo Alsace ki te Sosiete Watch Tower ʼo kole age ke fai hana ako Tohi-Tapu. Neʼe ina tohi fēnei: “ ʼE ʼau holi ke fakafoʼou toku maʼuli ʼi te faʼahi fakalaumālie heʼe mole kei ʼau falala ki toku ʼēkelesia.” Logope la te ʼu tukugakovi hala ʼaē ʼe fai kia nātou ʼi ʼihi temi, ko te kau Fakamoʼoni ʼa Sehova ʼaē ʼi Falani​—pea mo nātou ʼaē ʼi te potu fuli pe ʼo te malamanei—​ʼe hoko atu pe tanatou tokoni ki te hahaʼi ke nātou maʼu te ʼatamai mālama totonu ʼo ʼuhiga mo te ʼu fakatuʼutuʼu ʼa te ʼAtua, ohage ko tona fakahā ʼi te Tohi-Tapu.​—2 Timoteo 3:​16, 17.