ʼE Feala Ke Tou Maʼu ʼIfea Te Fiafia Moʼoni?

TOKOLAHI te hahaʼi ʼe nātou manatu, ʼe feala ke nātou fiafia ʼaki te ʼu koloā fakasino. Koteā takotou manatu? ʼE mahino ia, ko te ʼu meʼa fakasino ʼe kau ki totatou fiafia, kae ʼe mole fakatafito kiai totatou fiafia; pea ko te ʼu meʼa fakasino ʼaia ʼe mole nātou fakatupu te tui pea mole nātou foaki mai te ʼu meʼa ʼaē ʼe ʼaoga kia tatou ʼi te faʼahi fakalaumālie.

ʼI tana Akonaki ʼi te Moʼuga, neʼe ʼui fēnei e Sesu Kilisito: “Manuʼia ia nātou ʼaē ʼe nātou ʼiloʼi tonatou masiva fakalaumālie, heʼe ʼa nātou te puleʼaga ʼo selo.” (Mateo 5:3) Pea neʼe ina toe ʼui fēnei: “Ke koutou tokaga pea ke koutou taupau ia koutou mai te ʼu faʼahiga mānumānu kehekehe, heʼe tatau aipe peʼe nofo he tahi ʼi te mahu, ko tona maʼuli ʼe mole haʼu mai te ʼu meʼa ʼaē ʼe ina maʼu.”​—Luka 12:15.

Ko te tokolahi ʼe nātou kumi te fiafia ʼi tanatou fai te ʼu aga heʼeʼaoga ʼi te ʼu felāveʼi fakasino, pea mo te tahi ʼu “gāue ʼo te kakano.” (Kalate 5:​19-​21) Kae, ko te ʼu fakafiafia ʼi te faʼahi fakasino ʼe mole iku ia ki te fiafia moʼoni pea mo loaloaga. ʼI tona fakahagatonu, ko nātou ʼaē ʼe nātou fai te ʼu meʼa ʼaia ʼe mole nātou maʼu anai te Puleʼaga ʼo te ʼAtua.​—1 Kolonito 6:​9, 10.

Ko ʼihi ʼe nātou tokakaga pe kia nātou totonu ʼi tanatou kumi te fiafia, ʼo nātou faiga ke hikihiki tanatou maʼuhiga ʼo nātou totonu. ʼE lahi te ʼu tohi ʼi te ʼu tānakiʼaga tohi pea mo te ʼu fale koloā fakatau tohi, ʼe nātou talanoa ki te ʼu meʼa ʼaē ʼe feala ke tou fai moʼo hikihiki tatatou ʼulugaaga, kae ko te ʼu tohi ʼaia neʼe mole nātou foaki ki te hahaʼi he fiafia loaloaga. Koia, ʼe feala ke tou maʼu ʼifea te fiafia moʼoni?

Ke tou fiafia moʼoni, ʼe tonu ke tou mahino ʼe ʼaoga kia tatou te ʼu meʼa fakalaumālie. Neʼe ʼui fēnei e Sesu: “Manuʼia ia nātou ʼaē ʼe nātou ʼiloʼi tanatou masiva fakalaumālie.” ʼE mahino ia, ʼe mole ʼi ai anai hona ʼaoga mo kapau ʼe tou ʼiloʼi te faʼahi ʼaia, ka mole tou fai he meʼa ʼo ʼuhiga mo te faʼahi ʼaia. Koʼeni tona faʼifaʼitaki: Koteā te meʼa ʼaē ka hoko anai ki te tagata lele ʼi he fai lele loaloaga, mo kapau ʼe mole ina toʼo te vai ʼaē ʼe ʼaoga ki tona sino ʼi tana ʼosi lele? ʼE mole vaivai vave anai koa ʼuhi ko te mole kei lahi ʼo te vai ʼo tona sino pea mo hoko kia ia te tahi ʼu meʼa kovi? ʼO toe feiā pe, kapau ʼe mole tou toʼo te meʼa ʼaē ʼe ʼaoga kia tatou ʼi te faʼahi fakalaumālie, pea ʼe tou vaivai anai ʼi te faʼahi fakalaumālie. Pea ʼe mole tou fiafia anai pea mo maʼuli manuʼia.

Neʼe ʼiloʼi e Sesu te maʼuhiga ʼo te ʼu meʼa fakalaumālie kia ia, koia neʼe ina ako pea mo metitasioʼi tuʼumaʼu te Folafola ʼa te ʼAtua. Neʼe ko he meʼa faigafua kia ia tana lau pea mo maʼu te ʼu vaega ʼo te Tohi-Tapu, pea neʼe ina akoʼi te hahaʼi ke nātou mulimuli ki tana faʼifaʼitaki. (Luka 4:​16-​21; fakatatau mo Efesi 4:​20, 21.) Tahi ʼaē meʼa, neʼe fakatatau e Sesu te fakahoko ʼo te finegalo ʼo tana Tāmai ʼaē ʼe ʼi selo ki hana meʼa kai. Neʼe fiafia ʼaupito ʼi tana fai ia te finegalo ʼo te ʼAtua.​—Soane 4:​34.

Ei, ʼe mole feala ke kita maʼu te fiafia ʼaki te ʼu meʼa fakasino; pea ʼe mole kita fiafia mo kapau ʼe kita fakamuʼamuʼa te ʼu holi ʼo te kakano heʼe haohaoa. Ko te fiafia moʼoni ʼe fakalogo ki te loto, ʼe fakatafito ki te tui moʼoni pea mo te felogoi lelei mo Sehova ʼAtua. Koia neʼe tonu te hiva ʼa te tagata fai pesalemo ko Tavite: “Manuʼia te hahaʼi ʼaē ko tonatou ʼAtua ko Sehova.”​—Pesalemo 144:15b.

[Paki ʼo te pasina 23]

Ko te tui pea mo te ʼu felogoi lelei mo te ʼAtua ʼe nātou foaki atu anai kia koutou te fiafia moʼoni