Ko Te Aga Fakahagatonu—ʼE Hoko Fakafokifā Koa Peʼe Ko He Meʼa Neʼe Kita Fili?
“LOGOPE ia ʼe mole ʼau māhani ʼi te fai ʼo te aga fakahagatonu, kae ʼi ʼihi temi ʼe fokifā pe kua ʼau aga fakahagatonu.” Ko te palalau ʼaia ʼa te tagata noa ko Autolycus ʼi te tohi Le Conte d’Hiver ʼaē neʼe fai e William Shakespeare. ʼE hā ʼaki ai te agahala tāfito ʼa te tagata—ko tatatou holi ki te fai ʼo te kovi, ʼaē ʼe tupu mai he ‘loto kākā.’ (Selemia 17:9; Pesalemo 51:5; Loma 5:12) Kae ko tona faka ʼuhiga koa, ʼe mole feala ke tou fili te meʼa ʼaē ʼe tou loto kiai? Ko te fai ʼo te aga ʼaē ʼe lelei, ʼe ko he meʼa koa ia ʼe hoko fakafokifā pe ia? Kailoa!
ʼI muʼa ʼo te hū ʼa te ʼu foha ʼo Iselaele ki te Kele ʼo te Fakapapau, neʼe palalau ia Moisese kia nātou ʼi tanatou nonofo ʼi te ʼu falelā ʼi te ʼu sia ʼo Moape. Neʼe ina fakahā age kia nātou ʼe feala ke nātou filifili ia meʼa e lua. Neʼe feala ke nātou fakalogo ki te ʼu fakatotonu ʼa te ʼAtua pea mo nātou maʼu ai tana tapuakina, pe neʼe feala ke nātou fakafisi kiai pea mo nātou maʼu ai te ʼu fua kovi ʼo tanatou agahala. (Teutalonome 30:15-20) Neʼe tonu ke nātou filifili te meʼa ʼaē neʼe nātou loto kiai.
Neʼe fakatupu tatou ʼaki te loto faʼitaliha, koia ʼe toe feiā mo tatou, ʼe feala ke tou filifili te meʼa ʼaē ʼe tou loto kiai. ʼE mole he tahi—ʼo kau ki ai mo te ʼAtua—ʼe ina fakamālohiʼi tatou ke tou fai te meʼa ʼaē ʼe lelei peʼe ko te meʼa ʼaē ʼe kovi. Kae ʼe feala ke fai e ʼihi te fehuʼi ʼaenī, ‘Kapau ʼe uga tatou e totatou loto ke tou fai te ʼu aga ʼaē ʼe kovi, ʼe lava feafeaʼi hatatou fai te ʼu meʼa ʼaē ʼe lelei?’ Ko te tōketā toʼo nifo ʼe ina vakaʼi fakalelei te ʼu nifo ke feala hana maʼu te kovi ʼo te ʼu nifo ʼaia, naʼa toe ʼāsili kovi age. ʼO toe feiā aipe, ʼe tonu ke tou vakaʼi totatou mafu fakatātā ʼo tou kumi ai tatatou ʼu vaivaiʼaga pea mo te ʼu aga ʼaē ʼe mole tonu ke tou fai. Koteā tona tupuʼaga? He neʼe ʼui fēnei e Sesu “ ʼe haʼu mai te loto te ʼu fakakaukau kovi, te ʼu fakapō, te ʼu tono, te ʼu folonikasio, te ʼu kaihaʼa, te ʼu fakamoʼoni loi, te ʼu laukovi ki te ʼAtua.”—Mateo 15:18-20.
Moʼo taupau he foʼi nifo, ʼe tonu ki te tōketā toʼo nifo ke ina toʼo te kovi ʼaē ʼe ina maʼu ai. ʼO toe feiā aipe, ʼe tonu ke tou gāue fakamalotoloto ke tou fakamaʼa ʼi totatou loto te ʼu “fakakaukau kovi” pea mo te ʼu holi kovi. Kapau ʼe tou lau pea mo tou fakakaukauʼi te Folafola ʼa te ʼAtua, te Tohi-Tapu, ʼe tou ʼiloʼi ai anai te ʼu ala ʼo totatou Tupuʼaga, pea ʼe tou ako ai foki te fai ʼo te meʼa ʼaē ʼe lelei.—Isaia 48:17.
Ko te Hau ʼo Iselaele ko Tavite, neʼe ina fakaʼaogaʼi te tahi tokoni neʼe ʼaoga kia ia moʼo fakahoko ʼaki tana faiga ʼaē ke ina fai te ʼu meʼa ʼaē ʼe totonu. Neʼe faikole fēnei: “Fakatupu ia te ʼau he loto maʼa, Ê ʼAtua, pea ke ke ʼai ia te ʼau he laumālie foʼou, he laumālie mālohi.” (Pesalemo 51:10) ʼIo, kapau ʼe tou falala ki te ʼAtua ʼo faikole kia ia, ʼe toe feala foki kia tatou ke tou mālo ʼi tatatou tauʼi totatou holi ʼaē ki te fai ʼo te meʼa ʼaē ʼe kovi, pea mo tou maʼu he “laumālie foʼou” ke tou fai te meʼa ʼaē ʼe lelei. Kapau ʼe tou fai feiā, pea ʼe tou fai anai ke mole hoko fakafokifā tatatou aga fakahagatonu. ʼE hoko feiā anai koteʼuhi he neʼe tou fili te faʼahi ʼaia.
[Paki ʼo te pasina 21]
Ohage ko te meʼa ʼaē neʼe hoko kia Tavite, ko te faikole kia Sehova ʼe tokoni anai kia tatou ke tou fai te meʼa ʼaē ʼe lelei