‘ ʼE Nātou Mulimuli Ki Tanatou Ako Faka Lotu’

KO TE fafine mai Miami, ʼi Floride, ʼi Amelika, neʼe ina momoli te tohi ʼaenī ki te fale fai sulunale ʼo te kolo: “ ʼI te ʼaho 10 ʼo Tesepeli, neʼe kaihaʼa te kato paʼaga ʼo taku tama ʼaē neʼe ʼai ʼi tona tagaʼi vavae, ʼi te lapalasi fakatauʼaga meʼa. Neʼe ʼai ʼi loto tona pelemi pea mo tana kate ʼo te sécurité sociale, pea mo tana tahi ʼu meʼa, ʼo feiā aipe mo tana paʼaga, neʼe ko tola e 260.

“ ʼI tana ʼosi fakahā te meʼa ʼaia ki te tagata pule ʼo te lapalasi fakatauʼaga meʼa, neʼe liliu ia ki fale. ʼI te afiafi, neʼe telefoni age ki ai te fafine ʼe palalau faka Sepania pea neʼe fakaliliu ʼe ia ʼaē ʼe gāue ʼi te fale telefoni, ʼo ina ʼui age neʼe ina maʼu tana kato paʼaga.

“Neʼe foaki age e te fafine tona tuʼasila . . . ʼO ina liufaki age tana kato paʼaga, ʼe mole puli he meʼa, pea neʼe toe katoa ai mo te paʼaga.

“Neʼe sio te fafine ki te kaihaʼa e te tagata tana kato paʼaga pea neʼe kalaga. Neʼe siʼaki e te tagata kaihaʼa te kato paʼaga pea hola ia. ʼI te temi ʼaia, neʼe mole kei sio te fafine ki taku tama, koia neʼe ʼalu ai mo te kato paʼaga ki tona ʼapi pea mo telefoni ai.

“Ko ia mo tona famili ʼe ko te kau Fakamoʼoni ʼa Sehova. ʼE mahino papau ia ʼe nātou mulimuli ki tanatou ako faka lotu.”

ʼE mole fakahā e te kau Fakamoʼoni ʼa Sehova te agatonu ke vikiʼi ia nātou e te tagata. (Efesi 6:7) Kae ʼe nātou holi fakamalotoloto ke fakavikiviki tanatou Tāmai ʼaē ʼe ʼi selo, ia Sehova. (1 Kolonito 10:31) Ko tanatou ʼofa ki te ʼAtua pea mo tanatou kāiga ʼe ina uga nātou ke nātou tala te “logo lelei” ʼo ʼuhiga mo te Puleʼaga ʼo te ʼAtua. (Mateo 24:14) ʼAki te Puleʼaga, ʼe fakapapau mai e te ʼAtua ʼe ina fetogi anai te kele ko he palatiso taulekaleka. ʼI te temi ʼaia, ʼe liliu anai te kele ko he nofoʼaga matalelei pea ʼe toe maʼu ai pe anai te aga ʼaē ʼe tonu ke fai, ko he koga meʼa ʼe maʼu ai anai te agatonu ʼo heʼegata.​—Hepeleo 13:18; 2 Petelo 3:​13.