“Koutou Kaugana Ki Te Pule, Ko Kilisito”
LOLOTOGA te hisitolia, ko te ʼu hahaʼi ʼe toko lauʼi miliona neʼe nātou tau mo te kavega ʼo te maʼuli fakapōpula. Ohage la, kua hili kiai taʼu ʼe lauʼi afe, ko te kau Iselaelite neʼe nātou mamahi lahi ia nima ʼo te kau tagata leʼo ʼo Esipito. Ohage ko tona ʼui e te Tohi-Tapu, neʼe nātou “fakatuʼutuʼu he ʼu tagata pule gāue ki te kau Iselaelite, moʼo fakamamahiʼi ʼo nātou ʼaki te ʼu kavega mamafa,” tāfito ʼi tanatou faʼu te ʼu piliki.—Ekesote 1:11, La Bible de Jérusalem.
Ia ʼaho nei, ʼe lahi te ʼu fenua, ʼe lagi mole maʼuli popūla ai te hahaʼi ʼi tona ʼuhiga moʼoni, kae ko te tokolahi ʼe tonu ke nātou gāue lolotoga ni ʼu hola, ʼi he ʼu ʼaluʼaga faigataʼa pea ʼi ʼihi temi, ʼi he ʼu ʼaluʼaga kovi. ʼE nātou ʼamo te kavega mamafa ʼaē ʼe feala ke fakahigoaʼi ko te maʼuli popūla ki te paʼaga.
Kae ʼe ʼi ai te tahi faʼahiga maʼuli popūla ʼe mole faka mafasia ia. Neʼe fakaloto mālohi fēnei e te ʼapositolo ko Paulo tona ʼu tēhina ʼi te tui: “Koutou kaugana ki te Pule, ko Kilisito.” (Kolose 3:24) Ko nātou ʼaē ʼe nātou fili ke nātou liliu ko he kau kaugana ʼo Kilisito, ʼe fakafimālie ia nātou mai tanatou kavega mamafa. Neʼe ʼui tonu e Sesu: “Koutou ʼōmai kia te ʼau, ia koutou fuli ʼaē ʼe kinakina pea mo mafasia, pea ʼe ʼau fakafimālie anai koutou. Koutou toʼo kia koutou taku ʼakau toho pea ke koutou ako ia te ʼau, heʼe ʼau agamālū pea mo loto agavaivai, pea ʼe koutou maʼu anai he fīmālie ki ʼokotou nefesi. Heʼe ko taku ʼakau toho ʼe mālū pea ko taku kavega ʼe maʼamaʼa.”—Mateo 11:28-30.
Ko te tali ʼo te ʼakau toho ʼa Kilisito ʼe mole ina faka ʼāteainaʼi he tahi mai tona maʼua ʼaē ke ina foaki te ʼu meʼa ʼaē ʼe ʼaoga ki tona loto fale. (1 Timoteo 5:8) Kae ʼe ina foaki te ʼāteaina mai te ʼu tuʼuga holi ʼaē ki te ʼu koloā. ʼE mole faiga tāfito e te kau Kilisitiano ʼi tonatou maʼuli ke lahi tonatou ʼu koloā, kae ʼe nātou fakafeauga pe ki te ʼu meʼa ʼaē ʼe ʼaoga tāfito ki tonatou maʼuli.—1 Timoteo 6:6-10; vakaʼi ia 1 Kolonito 7:31.
ʼE toe maʼu foki e te kau Kilisitiano he loto fiafia ʼi tanatou fakahoko tanatou maʼua ʼaē ko te faka mafola ʼo te “logo lelei” ʼo te Puleʼaga ʼo te ʼAtua. (Mateo 24:14) ʼE nātou fiafia moʼoni ʼi te faʼahi ʼaia!
ʼE tonu ke tou loto fakafetaʼi ki te fealagia ʼaē ke tou “kaugana ki te Pule, ko Kilisito”!
[Haʼuʼaga ʼo te paki pasina 32]
Pictorial Archive (Near Eastern History) Est.