Ko Te Kau Faka Mafola ʼo Te Puleʼaga ʼe nātou fakamatala

Te Faka ʼĀteaina Mai Te Mālohi ʼo Te Kau Temonio

KO TE faifakalauʼakau ʼe ina puleʼi te maʼuli ʼo te toko lauʼi miliona hahaʼi talu mai fualoa. Kae ʼe feala ke tou faka ʼāteaina mai ai! Ko te meʼa ʼaia neʼe hoko ki te tokolahi ʼi te kolo ʼāfea ʼo Efesi. ʼO mulimuli ki te fakamatala ʼo te Tohi-Tapu, “tokolahi ia nātou ʼaē neʼe nātou fai te ʼu meʼa fakatemonio, neʼe nātou tānaki tanatou ʼu tohi pea nātou tutu ia muʼa ʼo te hahaʼi fuli . . . Koia ʼaki he faʼahiga mālohi neʼe tuputupu pea mo mafola te folafola ʼa Sehova.”​—Gāue 19:19, 20.

ʼO toe feiā pe mo te temi nei, ʼe tuputupu lelei te kokelekasio faka Kilisitiano. Ohage ko te meʼa ʼaē neʼe hoko ʼi Efesi, ko te hahaʼi ʼaē neʼe gaohi meʼa fakatemonio ki muʼa atu, kua liliu ko he ʼu hahaʼi tui. ʼE fakamoʼoni kiai te meʼa ʼaenī ʼaē neʼe hoko ʼi Zimbabwe.

Neʼe ʼiloʼi lelei ia Gogo (Kui fafine) Mthupha ʼuhi ko tona mālohi ʼi te ʼu meʼa fakatemonio. Neʼe ʼōmai te hahaʼi mai te ʼu potu mamaʼo ohage ko Zambie, Botswana pea mo Afelika Saute ke ina faitoʼo nātou ʼaki tana ʼu faitoʼo faifakalauʼakau. Neʼe toe akoʼi foki e Gogo Mthupha ki te tahi ʼu hahaʼi ke nātou liliu ko he ʼu nʼanga, ko tona faka ʼuhiga ko he ʼu tōketā faifakalauʼakau. Pea ʼi ʼihi temi, neʼe ina fai te ʼu faitutuku!

ʼI te tahi ʼAhotapu uhu, neʼe ʼaʼahi ia Gogo Mthupha e te kau Fakamoʼoni ʼa Sehova ʼi tanatou ʼolo ʼo faka mafola ʼi te ʼu ʼapi. Neʼe ina leleiʼia ʼaupito tana fai palalau mo nātou ʼaia ʼo ʼuhiga mo te fakapapau ʼo te Tohi-Tapu ki te mālama foʼou pea mo faitotonu, ko he mālama ʼe ʼāteaina mai te ʼu meʼa kovi. Neʼe ina tali te tohi E Feala Keke Mauli O Heegata Ite Palatiso Ite Kele,a pea neʼe ʼio ke fai hana ako Tohi-Tapu ʼi tona ʼapi. ʼO hili pe kiai ia ako e tolu, pea neʼe kamata kau ki te ʼu fono.

ʼI tana ako te Tohi-Tapu, neʼe mahino ia Gogo Mthupha neʼe haʼu tona ʼu mālohi makehe mai te ʼu laumālie agakovi ʼaē neʼe agatuʼu ki te tuʼi faʼitaliha ʼa Sehova. (2 Petelo 2:4; Suta 6) Neʼe ina toe ako foki, kua fakatotonu e te kau temonio ke nātou fakamaliu te hahaʼi fuli mai ia Sehova pea mo tana tauhi maʼa. Mai tona ʼaluʼaga ʼaē neʼe fakalogo tona maʼuli ki te ʼu faitoʼo ʼaē ʼe nātou puipui mai te ʼu laumālie agakovi, koteā ʼaē ka ina fai anai?

Neʼe fakahā e Gogo Mthupha tona loto ʼaē ke ina līaki tana ʼu meʼa fakatemonio fuli. Neʼe kau kiai tona puloga makehe pea mo te ʼu “talaʼi pipi ʼaē ʼe palalau,” ʼaē neʼe ina fakaʼaogaʼi ʼi tana ʼu fakamālōlō nʼanga. Neʼe fia līaki e Gogo Mthupha te ʼu meʼa fuli ʼaia ke feala ai hana tauhi ki te ʼAtua tokotahi ʼaē ʼe moʼoni pea mo maʼuli ʼaē ko Sehova.

Kae ko ʼihi ʼi tona ʼu kāiga neʼe mole nātou tali te faʼahi ʼaia, he ko ia ʼaē neʼe lagolago kia nātou ʼi te faʼahi ʼo te paʼaga. Neʼe nātou kole mamahi kia ia ke ina foaki age kia nātou tana ʼu meʼa fakatemonio, ʼo feiā aipe mo tona mālohi fakalilolilo, ke feala tuʼumaʼu ai ke nātou maʼu hanatou falā. Kae neʼe fakafisi kiai ia Gogo Mthupha.

ʼAki te tokoni ʼo te kokelekasio ʼa te kau Fakamoʼoni ʼa Sehova ʼo te potu fenua ʼaia, neʼe ina tānaki tana ʼu meʼa fakatemonio ʼo ina fakafonu ai te ʼu kato e tolu pea neʼe ina tutu te ʼu meʼa fuli ʼaia. ʼI te vela ʼo tana ʼu meʼa ʼaē neʼe ina fakaʼaogaʼi moʼo tauhi ki te kau temonio, neʼe kalaga fēnei ia Gogo Mthupha: “Koutou sisio! Ko te talaʼi pipi ʼaia, ʼe mole feala hana hāofaki ia ia totonu.”

ʼAki te temi, neʼe fakahā e Gogo Mthupha tana kua foaki ʼo tona maʼuli kia Sehova ʼo papitema ʼi te vai. Koteā koa tana gāue ʼi te temi nei? ʼE ina fakatau te ʼu lauʼakau. ʼIo, ʼaki te mālohi ʼo te Folafola ʼa te ʼAtua, ʼe feala ke faka ʼāteaina tatou mai te tauhi ki te kau temonio. ʼE ʼui fēnei e Gogo Mthupha: “Ki muʼa atu neʼe mole heʼeki ʼau logoʼi ʼi toku loto ʼe ʼau ʼāteaina ohage ko te temi nei.”

[Nota ʼi te lalo pasina]