“Te ʼu Maka Maʼugataʼa ʼo Te Moʼoni”
“Te ʼu maka maʼugataʼa ʼo te moʼoni.” Neʼe ko te ʼu palalau ʼaia ʼaē neʼe fai ʼi te tohi ki te filiale ʼa te kau Fakamoʼoni ʼa Sehova ʼi Niselia, ʼo ʼuhiga mo te ʼu nusipepa makehe e lua. ʼE fakamahino fēnei e te talavou ʼaē neʼe ina fai te tohi:
“ ʼE ʼau faitohi moʼo fakamālo atu ki takotou ʼu faiga ʼaē ke koutou talanoa ki te ʼu ʼaluʼaga fuli pe ʼo te maʼuli ʼaki takotou ʼu nusipepa ʼaē ko Te Tule Leʼo pea mo te Réveillez-vous!
“ ʼE ʼau taʼu 17. ʼI te taʼu kua hili, neʼe fai ʼi te lātio te sivi neʼe fakatafito ki te kupu tāfito ʼaenī, ‘ ʼE Maʼuhiga Age Te Femanakoʼaki ʼi Te ʼu Felāveʼi Fakasino—Ko Te SITA ʼe Ko He Meʼa ʼe Hoko Moʼoni.’ Neʼe tonu ke tohi he fakamatala ʼe fakaʼaogaʼi ai he ʼu kupu e fāgeau tupu. ʼE foaki anai he fakapale ko te 1 000 naira [ko te falā e 1 250] kia ia ʼaē ka ina fai te fakamatala ʼaē ʼe lelei tokotahi. Kae neʼe nātou ʼui, ʼe mole tonu ki te hahaʼi ke nātou fai te tohi ʼaia ʼuhi pe ko te fakapale, kae ʼe tonu ke ʼi ai he ʼaoga lelei ʼo te tohi ʼaia. . . .
“Neʼe ʼau maʼu te ʼu fakamatala ʼo ʼuhiga mo te SITA ʼi te ʼu nusipepa e lua. Neʼe lahi ʼaupito te ʼu alatike ʼo ʼuhiga mo te ʼofa. Neʼe ʼau fakaʼaogaʼi te ʼu puani ʼi te Réveillez-vous! ʼo te ʼaho 8 ʼo Tesepeli 1978.
“Hili kiai māhina e lua ʼi taku momoli taku fakamatala, pea neʼe fakahā pe ko ai ʼaē neʼe ina maʼu te sivi. Neʼe ʼau punamaʼuli ʼi taku ʼiloʼi ʼaē neʼe ʼau ʼuluaki ʼi te potu fenua ʼo Cross River pea mo Akwa Ibom!
“Ko te ʼu meʼa fuli ʼaē neʼe ʼau fakaʼaogaʼi moʼo fai taku fakamatala, neʼe ʼau toʼo mai te ʼu nusipepa. ʼE ko he meʼa lelei ʼaupito, te foaki mai e Sehova kia tatou he ʼu naunau ʼi tona temi totonu, ʼi te mālama maveuveu pea mo mahaki ʼaenī. ʼI totatou ʼuhiga Kilisitiano moʼoni, ʼe tou ʼiloʼi ʼe maʼuhiga age te femanakoʼaki ʼi te ʼu felāveʼi fakasino. Pea ʼe mahino papau ia, kapau ʼe tou maʼuli maʼa pea mo mulimuli ki te ʼu aga ʼaē ʼe tonu ke fai, ʼe puipui anai tatou ʼi te ʼu mahaki ohage la ko te SITA.
“ ʼE ʼau fia fakamālo moʼoni atu kia koutou ki te ʼu maka maʼugataʼa ʼaia ʼo te moʼoni ʼaē ʼe koutou foaki tuʼumaʼu mai. ʼOfa pe ke haga tapuakiʼi e Sehova takotou ʼu faiga ʼi takotou foaki tuʼumaʼu te ʼu nusipepa maʼuhiga ʼaia.”