Neʼe Fua Lelei Te ʼu Po ʼAē Neʼe Mole Nā Mamoe Ai
MĀʼIA mo te ʼu hau, ʼe ʼi ai te ʼu po ʼe mole nātou mamoe ai. Neʼe hoko te meʼa ʼaia ki te pule Pelesia mālohi ko Asuelusi ʼi te nima sēkulō ʼi muʼa ʼo totatou temi. Neʼe lagi manatu ia neʼe ʼi ai he gāue neʼe mole ina fai, koia neʼe ina fakatotonu ai ke lau age kia ia te ʼu tohi faka hau. Neʼe mahino leva kia ia, neʼe fakaiku noaʼi e tana kaugana agatonu ko Maletokeo, te fakatuʼutuʼu ʼaē neʼe fai moʼo fakapogi ia ia, kae neʼe mole fakapale ia ia. Pea neʼe fakatuʼutuʼu e Asuelusi ke foimo fai atu aipe te meʼa ʼaia ʼaē neʼe galo ke fai. Ko te ʼu fua lelei ʼaē neʼe hoko ki te hahaʼi ʼa te ʼAtua ʼaki te ʼu meʼa ʼaē neʼe ina fai, ʼe hā ʼaki mai neʼe mole mamoe te hau ʼuhi ko te ʼAtua.—Esitele 6:1-10.
ʼE tonu te fakamanatuʼi ʼo te koga tohi ʼaia ʼo te Tohi-Tapu e te kokelekasio ʼo te kau Fakamoʼoni ʼa Sehova ʼi te kolo ko Her-manus ʼi te matafenua ʼo Afelika Saute. Ki muʼa atu, neʼe nātou fakatahi ʼi te fale neʼe nātou lue. Lolotoga ni ʼu taʼu neʼe nātou faiga ke nātou totogi te moʼi kele moʼo laga ai tonatou Fale ʼo te Puleʼaga. Moʼo fakaʼosi, ʼi te taʼu 1991, neʼe ʼui e te Fono ʼo te Kolo ʼaia neʼe feala ke nātou maʼu te moʼi kele ʼe lelei ʼaupito.
Kae neʼe fakafeagai ʼihi hahaʼi ki te fakatau ʼo te moʼi kele ʼaia ki te kau Fakamoʼoni ʼa Sehova. Hili kiai ni ʼu māhina, neʼe fakahā ki te kokelekasio te tonu ʼaē ʼe tapuʼi anai te fakatau ʼo he ʼu kele ki te ʼu ʼēkelesia lolotoga taʼu e tolu, pea neʼe toe toʼo te tonu ʼaē ke foaki te moʼi kele ʼaia. ʼI Maio 1993 neʼe toe faitohi te kokelekasio ʼo ina kole ai ki te Fono ʼo te Kolo ke ina fetogi tana tonu. Pea neʼe nātou maʼu te kiʼi tohi neʼe fakahā ai, ʼe mole heʼeki fetogi te tonu ʼaē neʼe fai.
ʼI ʼOketopeli ʼo te taʼu ʼaia, ko te tahi ia nātou ʼi te Fono ʼo te Kolo, neʼe mole mamoe. Neʼe ina lau te ʼu tohi ʼāfea ʼo te fono moʼo vakaʼi peʼe ʼi ai he ʼu meʼa neʼe tonu ke ina vakavakaʼi lelei. Neʼe ina tokagaʼi te tohi ʼaē neʼe fai e te kau Fakamoʼoni moʼo kole ki te fono ke fetogi tana tonu. Koia neʼe ina fakatotonu ai ke palalau ki te faʼahi ʼaia ʼi tanatou tahi fono. Neʼe ina fia fakahā lelei, ʼi te temi ʼaē neʼe kole ai he moʼi kele e te kau Fakamoʼoni ʼa Sehova, neʼe mole heʼeki tapuʼi ke totogi he ʼu moʼi kele e te ʼu ʼēkelesia.
ʼI tona temi totonu, neʼe toe foaki age ki te kokelekasio te moʼi kele ʼaē neʼe nātou fia totogi ʼi te taʼu 1991! ʼE tuʼu te moʼi kele ʼaia ʼi te ala tāfito pea ʼe faigafua te feʼaluʼaki ai ʼo te kokelekasio pea mo nātou ʼaē ʼe nātou fia logo ki te moʼoni. Neʼe nātou laga ai te Fale matalelei ʼo te Puleʼaga, pea neʼe avahi pea mo momoli kia Sehova ʼi te ʼaho 5 ʼo ʼOketopeli 1996.
ʼE lotomamahi te kokelekasio ʼi te ʼaho ʼaē neʼe mole mamoe ai te fafine ʼaē ʼe kau ki te Fono ʼo te Kolo, kae ʼe feala ke fīmālie koteʼuhi neʼe toe hoko feiā ki te hau ko Asuelusi. Pea neʼe fua lelei te ikuʼaga ʼo te ʼu lakaga ʼaia e lua. ʼE mahino ia, ʼe loto fakafetaʼi ʼaupito te kokelekasio ʼo Hermanus he kua nātou maʼu tonatou Fale ʼo te Puleʼaga, te potu ʼaē ʼe fai ai te tauhi moʼoni pea mo te ako faka teokalatike, ʼi te kolo ʼiloa ʼaia ʼo te matafenua.—Hepeleo 10:24, 25.