Neʼe Nātou ‘Totogi Te Moʼoni’!

“KE KE totogi te moʼoni pea ʼaua naʼa ke fakatau.” (Tāʼaga Lea 23:23) ʼE ko te fakaloto mālohi ʼaia ʼaē neʼe fai e te tagata poto ko Salomone. Logope la ʼe feala ke tou ʼui te meʼa ʼaia ʼo ʼuhiga mo te ʼu moʼoni fuli pe, kae ʼe faka ʼuhiga tāfito te manatu ʼaenī ki te moʼoni ʼaē ʼe tou maʼu ʼi te Folafola ʼa te ʼAtua, te Tohi-Tapu. Ko te moʼoni ʼaia ʼe feala ke ina taki tatou ki te maʼuli heʼegata! (Soane 17:​3, 17) Kae koutou fakatokagaʼi, ʼe tonu ke tou totogi, mo kapau ʼe tou fia maʼu te moʼoni ʼaia. ʼE tonu ke holi he tahi ke ina “totogi” te moʼoni ʼaia, ko tona faka ʼuhiga, ke ina sakilifisioʼi peʼe ke ina līaki he meʼa ke ina maʼu ai te moʼoni. (Vakaʼi ia Mateo 13:​45, 46.) ʼI te agamāhani, ʼe mole fia fai e te hahaʼi ia te faʼahi ʼaia. Kae ʼe lahi te ʼu fenua, ʼe tuputupu ai te hahaʼi lototoʼa ʼaē ʼe nātou totogi te moʼoni ʼo te Tohi-Tapu​—pea ʼi ʼihi temi ʼe lahi te ʼu sakilifisio ʼaē ʼe nātou fai.

Ohage ko te kau Fakamoʼoni ʼa Sehova ʼi te Potu Hihifo ʼo Afelika, ʼi te fenua ʼo Ghana. ʼI Sūnio 1989, ʼi te fenua ʼaia, neʼe ko te hahaʼi ʼe toko 34 000 tupu neʼe nātou tali te moʼoni ʼo te Tohi-Tapu pea neʼe lahi tanatou vaevae te ʼu moʼoni ʼaia ki te hahaʼi. Kae neʼe faka tuʼakoi leva e te puleʼaga te gāue fai faka mafola. Logope la te tāʼofi ʼaia ʼo te puleʼaga, kae neʼe hoko atu te “totogi ʼo te moʼoni” e te hahaʼi fakamalotoloto. Neʼe fakagata te ʼu tuʼakoi ʼi te ʼaho 31 ʼo ʼOketopeli 1991, pea ʼi te vaelua ʼo te taʼu 1995, hili kiai taʼu e tolu vaelua ʼo te kua toʼo ʼo te ʼu faka tuʼakoi ʼaia, neʼe tuputupu te kaugamālie ʼo te kau Fakamoʼoni ʼa Sehova ʼo aʼu ki te toko 46 104! Pea ʼi te taʼu ʼaenī, neʼe tuputupu ʼo aʼu ki te toko 52 800.

Koteā ʼaē neʼe ina ʼaumai ai te hahaʼi ki te moʼoni ʼo te Folafola ʼa te ʼAtua? Koteā te ʼu sakilifisio ʼaē neʼe tonu ke fai e ʼihi moʼo “totogi te moʼoni”? Moʼo tali kiai, tou vakaʼi te ʼu meʼa ʼaē neʼe hoko ki te ʼu Kilisitiano e toko tolu ʼi Ghana.

Neʼe Ina Leleiʼia Te ʼu Akonaki ʼo Te Tohi-Tapu

Tou talanoa muʼa ki te meʼa ʼaē neʼe fai e te fafine ʼi tona taʼu 20. Ko tana tāmai neʼe ko te pasitea, kae neʼe mole fia kau te fafine ʼaia ki te lotu ʼo tana tāmai. Koteā tona tupuʼaga? ʼUhi ko tona ʼofa ki te moʼoni.

Neʼe ina fakamahino fēnei: “Neʼe ko te agamāhani ʼo te ʼōmai ʼa te kau Fakamoʼoni ʼa Sehova ki tomatou ʼapi ʼi tanatou fai faka mafola. Hili taku ʼu fai palalau mo nātou, neʼe ʼau ʼiloʼi ai ko te meʼa ʼaē ʼe nātou akoʼi ʼe fakatafito lelei ki te Tohi-Tapu. Neʼe ʼau fai te ʼu fehuʼi ʼo ʼuhiga mo te Tahitolu, mo te ʼifeli, mo te tuputupua ʼo te nefesi, pea tāfito ʼo ʼuhiga mo te ʼu faitoʼo faka milakulo. Neʼe ʼau tui mālohi neʼe tuʼu te ʼu akonaki ʼaia ʼi te Tohi-Tapu. Kae neʼe tokoni mai te kau Fakamoʼoni ʼa Sehova ke ʼau mahino ʼe mole maʼu ia ʼi te Tohi-Tapu.”​—Kapau ʼe koutou fia ʼiloʼi te manatu ʼo te Tohi-Tapu ʼo ʼuhiga mo te ʼu faʼahi ʼaia, koutou vakaʼi ia Maleko 13:​32; Loma 6:​23; Gāue 10:40; pea mo 1 Kolonito 13:​8-​10.

Neʼe toe ʼui fēnei e te fafine ʼaia: “Kae neʼe lahi te fakafeagai ʼo toku famili, tāfito taku tāmai. Neʼe manatu ia ʼe ʼau faihala. Kae neʼe ʼau ʼiloʼi neʼe ko te moʼoni, te meʼa ʼaē neʼe ʼau ako mo te kau Fakamoʼoni ʼa Sehova. Neʼe ʼau faiga ke ʼiloʼi e taku tāmai ko te ʼu meʼa ʼaia ʼe haʼu mai te Tohi-Tapu, kae neʼe mole fia logo ia kiai. ʼI tona fakahagatonu, neʼe toe ʼāsili age tana fakafeagai.

“Neʼe mole ʼau lotovaivai. Neʼe ʼau ʼiloʼi ʼe ko te ʼatamai mālama moʼoni tokotahi pe ʼaē ʼe ina taki ki te maʼuli heʼegata ʼi te Palatiso, pea neʼe ʼau fakatotonu ke ʼau pipiki maʼu kiai. ʼI te logo ʼa te kau Fakamoʼoni ʼa Sehova ki te ʼu faigataʼaʼia ʼaē neʼe tau mo ʼau, neʼe nātou tokoni mai ʼaki te ʼofa, mo fakaloto mālohiʼi ʼau pea mo nātou foaki mai te ʼu meʼa ʼaē neʼe ʼaoga tāfito kia ʼau. Neʼe ʼau mahino ai leva ki te ʼu palalau ʼaenī ʼa Sesu ʼaē ʼe tou maʼu ia Soane 13:35: ‘ ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe koutou femaʼuʼaki te ʼofa.’ Neʼe toe ʼāsili age taku tui papau ʼaē ʼe maʼu e te kau Fakamoʼoni ʼa Sehova te lotu moʼoni. Ki muli age, ʼi te fakatokagaʼi e taku ʼu mātuʼa te ʼu fetogi lelei ʼaē neʼe ʼau fai ʼi toku maʼuli, neʼe nā leleiʼia leva te ʼu meʼa ʼaē neʼe nā sisio kiai, pea neʼe fetogi tanā aga kia ʼau​—pea neʼe kole e taku tāmai ke ako e toku tokolua lahi te Tohi-Tapu mo te kau Fakamoʼoni ʼa Sehova!”

Ke Kita ʼAhiʼahiʼi Takitokotahi Te Moʼoni

Ko te ‘totogi ʼo te moʼoni’ ʼe toe faigataʼa foki ki ʼihi kau tūpulaga ʼaē neʼe tutupu ake mo ni ʼu mātuʼa ʼe ko he kau Fakamoʼoni. ʼE manatu e ʼihi kau tūpulaga kua nātou mahino katoa ki te ʼu moʼoni ʼo te Tohi-Tapu. Kapau ʼe mole nātou kumi ʼe nātou totonu te ʼu moʼoni ʼaia, pea ʼe vaivai anai tanatou tui, pea ʼe mole loloto anai. (Vakaʼi ia Mateo 13: 20, 21.) ʼE fakamatala mai e Nathaniel, ko te tagata Ghana e taʼu 30, pe neʼe feafeaʼi tana ‘totogi te moʼoni’ ʼi tana kei tūpulaga.

ʼE ina manatuʼi fēnei: “Neʼe akoʼi mai e taku ʼu mātuʼa te Tohi-Tapu talu mai taku kei veliveli. ʼI taku lahilahi ake, neʼe ʼau fai faka mafola mo nāua, kae neʼe mole heʼeki ʼau fakatotonu ke ʼau liliu ko he Fakamoʼoni ʼa Sehova. ʼAki te temi, neʼe ʼau mahino ai ki te ʼaoga ʼaē ke ʼau vakaʼi totonu te Tohi-Tapu.

“ ʼUluaki, neʼe tonu ke ʼau tui papau ko te Tohi-Tapu ʼe ko te Folafola ʼa te ʼAtua, kae mole ko he tahi age tohi taputapu ʼo te lotu. ʼI taku ako takitokotahi, neʼe ʼau ako ʼe ko te tohi taputapu pe ʼaia ʼaē ʼe maʼu ai te ʼu fakamatala ʼo te ʼu lea faka polofeta ʼaē neʼe hoko moʼoni. Neʼe ʼau toe ako foki ʼe maʼu ʼi te Tohi-Tapu te ʼu moʼoni ʼi te faʼahi ʼo te poto fakatagata​—ohage la ‘ ʼe tautau te kele ʼi te noa.’ (Sopo 26:7) Neʼe tohi te ʼu palalau ʼaia ia taʼu ʼe lauʼi afe ʼi muʼa ʼo te mahino ʼa te kau popoto ki te faʼahiga fakatuʼutuʼu ʼo te laʼā. Neʼe gata pe ki te ʼAtua te fealagia ʼaē ke ina takitaki te ʼu tagata ke nātou tohi te ʼu meʼa ʼaia!a

“Ki muli age, neʼe ʼau fia maʼu te kautahi faka lotu ʼaē ʼe ina ako pea mo maʼuliʼi te ʼu moʼoni ʼaē ʼe akoʼi ʼi te Tohi-Tapu. ʼE lahi te ʼu lotu ʼe nātou akoʼi ki te hahaʼi te ʼifeli, mo te Tahitolu, pea mo te nefesi ʼaē ʼe maʼuli tuputupua ʼi te hili ʼo te mate. Kae neʼe mole he ʼuhiga ʼo te ʼu akonaki ʼaia kia ʼau. Neʼe ʼau fakakaukau fēnei: ʼe mole agakovi koa la te tāmai ʼaē ʼe ina fakatūʼa hana tamasiʼi ʼo ina ʼai tona nima ki he kulo vai vela? Pea ʼe lava feafeaʼi koa ke tuku e te ʼAtua ʼofa tana fānau ki he afi kakaha pea mo ina fakamamahiʼi nātou? Kae ʼe mulimuli te ako ʼa te kau Fakamoʼoni ʼa Sehova ki te ʼu vaega ʼo te Tohi-Tapu ohage ko Loma 6:​23, ʼaē ʼe ʼui fēnei ai: ‘Ko te totogi ʼaē ʼe foaki e te agahala, ko te mate’​—kae mole ko he afi kakaha. Neʼe ʼau mahino ai leva ki te ʼuhiga ʼo te faʼahi ʼaia.

“Neʼe ʼau toe fakatokagaʼi foki ʼe fakamaʼua e te kau Fakamoʼoni ʼa Sehova ke maʼuliʼi e tanatou hahaʼi fuli te ʼu lekula ʼo te Tohi-Tapu, pea mo nātou fakamavae nātou ʼaē ʼe agahala kae mole nātou fakahemala. ʼI taku ʼosi vakaʼi te ʼu meʼa fuli ʼaia, neʼe ʼau ʼiloʼi ai leva ʼe maʼu e te kau Fakamoʼoni ʼa Sehova te moʼoni, pea neʼe ʼau fakatotonu ke ʼau liliu ko he Fakamoʼoni ʼa Sehova. Neʼe ʼau faiga mālohi ke feala haku papitema, ʼo liliu ko he Fakamoʼoni.”​—1 Kolonito 5:​11-​13.

Ko te meʼa ʼaē neʼe hoko kia Nathaniel ʼe ina fakahā lelei mai, te maʼua ʼaē ke “totogi te moʼoni” e te kau tūpulaga ʼaē neʼe tutupu mo he ʼu mātuʼa Kilisitiano. ʼE mole tonu pe ke nātou kau ki te ʼu fono faka Kilisitiano. Ohage ko te hahaʼi ʼo Pelea ʼi te temi muʼa, ʼe tonu ke nātou ‘vakavakaʼi lelei te ʼu Tohi ʼi te ʼaho fuli pe, peʼe moʼoni te ʼu meʼa ʼaia.’ (Gāue 17:11) ʼE fakamaʼua e te faʼahi ʼaia he temi pea mo he ʼu faiga, kae ko tona ʼu fua ʼe ko he tui pea mo he falala mālohi.​—Vakaʼi ia Efesi 3:​17-​19.

Neʼe ʼAu Lotovaivai ʼUhi Ko Te Lotu Hala

Ko te tagata Ghana ʼe higoa ko Godwin, neʼe mavae ʼi te ’Ēkelesia Presbytérienne pea mo te kūtuga ʼo te Franc-Maçonnique ʼi tona teitei taʼu 70. ʼE ina ʼui fēnei: “Neʼe mole ʼau tali ʼihi ʼu meʼa ʼaē neʼe hoko ʼi te lotu ʼaia. Ohage la, neʼe hoko te ʼatu ʼu tokakovi, pea ʼe kei hoko pe ʼi te temi nei. ʼI ʼihi temi, neʼe ʼōmai te kau polisi moʼo fakatokatoka te ʼu meʼa ʼaia! Neʼe ʼau manatu ʼe mole lelei te fai e te kau tisipulo ʼa Sesu te ʼu meʼa ʼaia. Pea neʼe hoko toku fihifihia mo te tagata neʼe kau ki te lotu ʼaia. Neʼe fakamāuʼi e te telepinale te faʼahi ʼaia ʼaē neʼe hoko pea neʼe ina fakatūʼa ia te tagata ʼaia. Kae ko te tahi minisi ʼo te lotu neʼe lagolago ki te tagata ʼaia pea neʼe ina faiga ke ina fakamavae ʼau mai te ʼēkelesia! Neʼe ʼau fakahā age kia ia taku manatu ʼo ʼuhiga mo te faʼahi ʼaia, pea neʼe ʼau mavae ʼi te ʼēkelesia​—neʼe mole ʼau toe liliu kiai ʼi he temi.

“Hili kiai te temi, pea neʼe ʼōmai te kau Fakamoʼoni ʼa Sehova. ʼI te kamata, neʼe ʼau fagono kia nātou he neʼe mole ʼau fia kapu te hahaʼi ʼaē ʼe nātou palalau ki te ʼAtua. Kae neʼe ʼau kamata fakatokagaʼi, logope la neʼe ʼau kau ki te lotu Presbytérienne lolotoga ni taʼu e hogofulu, kae neʼe lahi te ʼu meʼa neʼe mole ʼau ʼiloʼi ʼo ʼuhiga mo te Tohi-Tapu. Ohage la, neʼe mole ʼau ʼiloʼi ʼe talanoa te Tohi-Tapu ki te ʼamanaki ʼaē ke tou maʼuʼuli ʼo heʼegata ʼi te Palatiso ʼi te kele.b Pea ʼi taku kamata kau ki te ʼu fono ʼo te kau Fakamoʼoni ʼa Sehova, neʼe ʼau punamaʼuli ʼaupito ʼi tanatou aga, kae tāfito ʼi te faʼahiga teu pea mo te gaohi ʼo te lauʼulu ʼa te kau tūpulaga. Neʼe ko te hahaʼi ʼaia ʼaē neʼe nātou maʼuliʼi moʼoni te ʼu pelesepeto ʼo te Tohi-Tapu!”

Kae ke feala hana ‘totogi te moʼoni’ neʼe tonu ke lahi tana ʼu faiga moʼo fetogi tona maʼuli. ʼE toe manatuʼi fēnei e Godwin: “Neʼe ʼau kau ʼi te kūtuga ʼo te Franc-Maçonnique. Pea logope la neʼe ʼiloa te sosiete fakatautehina ʼaia ʼi tanatou foaki he tokoni ki te hahaʼi, kae neʼe ʼau kau ki te ʼu toʼotoʼoga neʼe fakaʼaogaʼi ai te ʼu ʼulu poko pea mo te ʼu hui, pea mo nātou pāui ki te ʼu laumālie. Neʼe ʼui ʼe tokoni te ʼu laumālie ʼaia kia nātou ʼaē ʼe felogoi mo nātou ke nātou tuputupu ʼi te faʼahi fakalaumālie.

“Ko te meʼa ʼaē neʼe ʼau ako, neʼe tokoni mai kia ʼau ke ʼau mahino ʼe fehiʼa ia Sehova ʼAtua mokā kita kau ki te ʼu meʼa faifakalauʼakau, heʼe feala ai ke puleʼi kita e Satana pea mo tana ʼu mālohi fakalaumālie agakovi.c ʼE ʼau hoko atu anai koa taku kau ki te Franc-Maçonnique pea mo tana faka maʼuhigaʼi te ʼu toʼotoʼoga faka misitelio, peʼe ʼau mavae anai koa mai ai pea mo fakafiafia ia Sehova? Neʼe ʼau fili te tonu fakamuli. Neʼe ʼau maumauʼi te ʼu meʼa fuli ʼo te Franc-maçon, māʼia mo te teu ʼaē neʼe ʼau ʼai ki tanatou ʼu fono. Neʼe ʼau ʼiloʼi ai te ʼuhiga moʼoni ʼo te fakapapau ʼa Sesu, ʼi tana ʼui fēnei: ‘Ko te moʼoni ʼe ina faka ʼāteaina anai koutou’! (Soane 8:​32) ʼI te temi nei, ʼe ʼau fiafia ʼi taku vaevae mo te hahaʼi te ʼu meʼa ʼaē neʼe ʼau ako. ʼE mole ʼau fakahemala.”

Ko te ʼu lauʼi afe hahaʼi fakamalotoloto neʼe nātou fai mo nātou te ʼu sakilifisio lahi moʼo “totogi te moʼoni.” Ohage ko te ʼu Kilisitiano ʼe toko tolu ʼaē neʼe tou talanoa kiai ʼi henī, neʼe mole nātou fakahemala ʼo ʼuhiga mo te ʼu fetogi ʼaē neʼe nātou fai. Neʼe foaki kia nātou e te ʼu moʼoni ʼo te Tohi-Tapu “he fakatafito taulekaleka ki te temi ka haʼu, koteʼuhi ke nātou puke maʼu te maʼuli moʼoni.” (1 Timoteo 6:​19) Ko te “maʼuli moʼoni” ʼaia pea mo tana ʼu tapuakina fuli ʼe feala mo koutou ke koutou maʼu, mo kapau ʼe koutou fia “totogi te moʼoni.”

[Nota ʼi te lalo pasina]

[Paki ʼo te pasina 9]

Ko Nathaniel

[Paki ʼo te pasina 9]

Ko Godwin