Tou Faka Mafola Ke Hāofaki Te Hahaʼi
“Ko ia ʼaē ʼe fetapā ki te huafa ʼo Sehova ʼe hāo anai ia.”—Loma 10:13.
1. Koteā te ʼu fakatokaga ʼaē neʼe fai ʼi te ʼu temi ʼāfea?
ʼE FAKAMATALA mai e te hisitolia faka Tohi-Tapu te ʼu ‘ ʼaho kehekehe ʼo Sehova.’ Ko te Tulivio ʼo te ʼu ʼaho ʼo Noe, mo te fakaʼauha ʼo te ʼu kolo ʼo Sotoma pea mo Komola, pea mo te fakaʼauha ʼo Selusalemi ʼi te taʼu 607 ʼi muʼa ʼo totatou temi pea mo te taʼu 70 ʼo totatou temi, neʼe ko he ʼu ʼaho lalahi pea mo fakamanavahe ʼaia ʼo Sehova. ʼI te ʼu ʼaho ʼaia, neʼe fakamāuʼi ai ia nātou fuli ʼaē neʼe fakafeagai kia Sehova. (Malakia 4:5; Luka 21:22) Ko te tokolahi neʼe nātou mamate ʼuhi ko tanatou agakovi. Kae neʼe hāo ʼihi. Neʼe fai e Sehova te ʼu fakatokaga ki te hahaʼi, ʼo ina fakahā ai ki te kau agakovi te kua ōvi mai ʼo te fakaʼauha, pea mo ina faka fealagia ai ki te kau faitotonu ke nātou hāo ʼi te tautea ʼaia.
2, 3. (a) Koteā te fakatokaga faka polofeta ʼaē neʼe fakaʼaogaʼi ʼi te Penikosite? (b) Talu mai te Penikosite ʼo te taʼu 33 ʼo totatou temi, koteā te meʼa ʼaē neʼe fakamaʼua ki te fetapā ʼaē ki te huafa ʼo Sehova?
2 Ko te fakaʼauha ʼo Selusalemi ʼi te taʼu 70 ʼo totatou temi neʼe ko he faʼifaʼitaki lelei ʼo te faʼahi ʼaia. ʼI tana fakakikite fakatomuʼa te meʼa ʼaia ia taʼu e 900 ki muʼa atu, neʼe tohi fēnei e te polofeta ko Soele: “ ʼE ʼau fai anai he ʼu fakamelomelo ʼi te lagi pea mo te kele, te toto pea mo te afi, pea mo te ʼu kohu mātolu. ʼE liliu anai te laʼā ʼo fakapōʼuli, pea mo te māhina ʼo toto, ʼi muʼa ʼo te hoko mai ʼo te ʼaho lahi pea mo fakamanavahe ʼo Sehova.” ʼE lava hāo feafeaʼi he tahi ʼi te ʼaho fakamataku ʼaia? Neʼe tohi fēnei e Soele ʼaki te laumālie maʼoniʼoni: “Pea ʼe hoko moʼoni anai, ko ʼaē ʼe fetapā ki te huafa ʼo Sehova ʼe hāo anai ia; heʼe ʼi te moʼuga ko Sione pea mo Selusalemi ʼe ʼi ai anai ia nātou ʼaē neʼe hāo, ohage ko te ʼui ʼaē ʼa Sehova, pea mo nātou ʼaē neʼe maʼuʼuli, ʼaē ʼe pāuiʼi e Sehova.”—Soele 2:30-32.
3 ʼI te Penikosite ʼo te taʼu 33 ʼo totatou temi, neʼe palalau te ʼapositolo ko Petelo ki te hahaʼi Sutea pea mo te kau poloselite ʼi Selusalemi, pea neʼe ina fakaʼaogaʼi te lea faka polofeta ʼa Soele, ʼo ina fakahā kia nātou ʼaē neʼe fakalogo ki ai, ʼe ʼamanaki hoko te ʼu meʼa ʼaia ʼi tonatou temi: “ ʼE ʼau fai anai he ʼu fakamelomelo ʼi te lagi pea mo he ʼu fakaʼiloga ʼi te kele, ko te toto, mo te afi, pea mo te ʼu kohu mātolu; ʼe liliu anai te laʼā ʼo fakapōʼuli pea ko te māhina ʼo toto ʼi muʼa ʼo te hoko mai ʼo te ʼaho lahi pea mo logona ʼo Sehova. Pea ko ia ʼaē ʼe fetapā ki te huafa ʼo Sehova, ʼe hāo anai ia.” (Gāue 2:16-21) Ko te hahaʼi ʼaē neʼe nātou fakalogo ki te ʼu palalau ʼa Petelo, neʼe nātou mulimuli ki te Lao Faka Moisese, koia neʼe kua nātou ʼiloʼi te huafa ʼo Sehova. Ko te tupuʼaga la ʼaia ʼo te fakamahino age e Petelo kia nātou, ko te fetapā ki te huafa ʼo Sehova, ʼe faka ʼuhiga ki te tahi age meʼa. ʼE hā lelei mai, neʼe faka ʼuhiga ki te papitemaʼi ʼo nātou ʼi te huafa ʼo Sesu, ia ia ʼaē neʼe matehi pea kua toe fakatuʼuake ki te maʼuli tuputupua ʼi selo.—Gāue 2:37, 38.
4. Koteā te logo ʼaē neʼe tala e te kau Kilisitiano ʼi te ʼu potu fuli pe?
4 Talu mai te Penikosite, neʼe faka mafola e te kau Kilisitiano te logo ʼo ʼuhiga mo Sesu ʼaē neʼe kua fakatuʼuake. (1 Kolonito 1:23) Neʼe nātou fakahā ai, ʼe feala anai ki he ʼu hahaʼi ke nātou kau ki te ʼu foha fakalaumālie ʼa Sehova ʼAtua pea ki te “Iselaele [foʼou] ʼa te ʼAtua,” ko he puleʼaga fakalaumālie ʼe ina ‘faka mafola anai te ʼu kalitate ʼo Sehova.’ (Kalate 6:16; 1 Petelo 2:9) Ko nātou ʼaē neʼe nonofo agatonu ʼo aʼu ki tonatou mate, ʼe nātou maʼu anai te maʼuli tuputupua ʼi selo ʼi tonatou ʼuhiga hahaʼi maʼu tofiʼa ʼo fakatahi mo Sesu ʼi tona Puleʼaga ʼaē ʼe ʼi selo. (Mateo 24:13; Loma 8:15, 16; 1 Kolonito 15:50-54) Tahi ʼaē meʼa, ko te kau Kilisitiano ʼaia, neʼe tonu ke nātou tala te hoko mai ʼo te ʼaho lahi pea mo fakamanavahe ʼo Sehova. Neʼe tonu ke nātou fakatokagaʼi te kau Sutea, ʼe hoko anai kia nātou he mamahi lahi ʼe fakamataku age ʼi te ʼu mamahi fuli ʼaē neʼe hoko ki Selusalemi pea mo te hahaʼi ʼa te ʼAtua ki muʼa atu. Kae neʼe ʼi ai te ʼu hahaʼi neʼe nātou hāo ʼi te ʼaho ʼaia. Neʼe ko ai te ʼu hahaʼi ʼaia? Neʼe ko nātou ʼaē neʼe nātou fetapā ki te huafa ʼo Sehova.
“ ʼI Te ʼu ʼAho Fakamuli”
5. Koteā te ʼu faʼahi ʼo te ʼu lea faka polofeta ʼaē ʼe lolotoga hoko ia ʼaho nei?
5 ʼI te ʼu faʼahi kehekehe, ko te ʼu ʼaluʼaga ʼo te temi ʼaia neʼe ko he fakatātā ʼo te ʼu meʼa ʼaē ʼe tou sio kiai ia ʼaho nei. Talu mai te taʼu 1914, ʼe maʼuli te malamanei ʼi te temi makehe ʼaē ʼe fakahigoaʼi e te Tohi-Tapu ko “te temi ʼo te fakaʼosi,” mo “te fakaʼosi ʼo te tuʼu ʼo te ʼu faʼahiga meʼa ʼaenī,” pea mo “te ʼu ʼaho fakamuli.” (Taniela 12:1, 4; Mateo 24:3-8; 2 Timoteo 3:1-5, 13) ʼI totatou sēkulō, ko te ʼu tau fakamataku, mo te agamālohi ʼaē ʼe fakaʼāsili kovi, pea mo te mavetevete ʼo te sosiete fakatagata, ʼe ko he fakahoko ʼaia ʼo te ʼu lea faka polofeta ʼa te Tohi-Tapu. Ko te ʼu meʼa fuli ʼaia ʼe kau ki te fakaʼiloga ʼaē neʼe fakakikite e Sesu, ʼo ina fakahā ai kua vave hoko ki te malamanei te ʼaho fakaʼosi pea mo fakamanavahe ʼo Sehova. ʼE fakaʼosi anai ʼaki te tau ʼo Halamaketone, te ikuʼaga ʼo te “mamahi lahi, [ʼaē] ʼe mole hona tatau kua hoko talu mai te kamataʼaga ʼo te malamanei ʼo aʼu ki te temi nei, kailoa, pea ʼe mole toe hoko anai he tahi mamahi feiā.”—Mateo 24:21; Fakahā 16:16.
6. (a) Koteā te ʼu fakatuʼutuʼu ʼaē neʼe fai e Sehova moʼo hāofaki ʼo te kau agavaivai? (b) Ko te tohi fea ʼaē ʼe tou maʼu ai te tokoni ʼa Paulo ʼo ʼuhiga mo te meʼa ʼaē ʼe tonu ke tou fai ke tou hāo ai?
6 ʼI te kua ōvi mai ʼo te ʼaho ʼaia ʼo te fakaʼauha, ʼe faiga ia Sehova ke ina hāofaki te kau agavaivai. Lolotoga “te temi fakaʼosi” ʼaenī, kua ina tānaki te toe ʼo te kau fakanofo ʼo te Iselaele fakalaumālie ʼa te ʼAtua, pea mo kamata tokaga talu mai te taʼu 1930 ki tana kau kaugana ʼaē ʼe nonofo ʼi te kele, ʼo ina tānaki “te toe hahaʼi tokolahi, ʼe mole feala tona lau e he tahi, mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli.” Ko nātou fuli ʼaia, ʼe nātou “ ʼōmai [haohaoa] mai te mamahi lahi.” (Fakahā 7:9, 14) Kae ʼe lava feafeaʼi hakita fakatuʼutuʼu ke kita hāo ʼi te temi ʼaia? ʼE tali e te ʼapositolo ko Paulo ki te fehuʼi ʼaia. ʼI te koga tohi ʼo Loma ʼi te kapite 10, ʼe ina fai he ʼu tokoni ʼo ʼuhiga mo totatou hāofaki—ko he ʼu tokoni neʼe ʼaoga ʼi tona temi pea ʼe toe ʼaoga kia tatou ia ʼaho nei.
Ko He Faikole Ki Te Hāofaki
7. (a) Koteā te ʼamanaki ʼaē ʼe tou maʼu ia Loma 10:1, 2? (b) He koʼe neʼe feala kia Sehova ke ina fakalahi age te kalagaʼi ʼo te “logo lelei”?
7 ʼI te temi ʼaē neʼe fai ai e Paulo tana tohi ki te kau Loma, neʼe kua līaki e Sehova ia Iselaele ʼi tona ʼuhiga puleʼaga. Kae neʼe ʼui fēnei e te ʼapositolo: “Ko te finegaloʼofa ʼo toku loto pea mo taku kole mamahi ki te ʼAtua maʼa nātou, ʼe mahino ia, ʼe ko he ʼu meʼa ki tonatou hāofaki.” Neʼe ʼamanaki e Paulo ke maʼu e te kau Sutea te ʼatamai mālama totonu ʼo ʼuhiga mo te finegalo ʼo te ʼAtua, ʼaē ka ina hāofaki nātou. (Loma 10:1, 2) Tahi ʼaē meʼa, ʼe loto e Sehova ke hāofaki ʼi te malamanei katoa te hahaʼi fuli ʼaē ʼe nātou maʼu te tui, ohage ko tona fakahā ia Soane 3:16: “Ko te ʼAtua, ʼi tona ʼofa lahi ki te malamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kia te ia, ke ʼaua naʼa fakaʼauha kaʼe ke ina maʼu te maʼuli heʼegata.” Ko te sakilifisio faitotogi ʼa Sesu ʼe ina faka fealagia te fakahoko ʼo te hāofaki lahi ʼaia. Ohage ko te ʼu ʼaho ʼo Noe pea mo te tahi ʼu ʼaho fakamāu ʼaē neʼe hoko ki muli age, neʼe fakatuʼutuʼu e Sehova ke tala he “logo lelei,” moʼo fakahā te ala ʼo te hāofaki.—Maleko 13:10, 19, 20.
8. ʼI tanatou faʼifaʼitakiʼi ia Paulo, ko ai ʼaē ʼe fakahā ki ai e te kau Kilisitiano moʼoni te finegaloʼofa, pea ʼe nātou fai feafeaʼi te faʼahi ʼaia?
8 ʼI tana fakahā tona finegaloʼofa ki te kau Sutea pea mo te kau Senitile, neʼe fakaʼaogaʼi e Paulo te ʼu faka fealagia fuli moʼo faka mafola ai ki te hahaʼi. Neʼe ina “faigaʼi ke tui te kau Sutea pea mo te kau Keleka.” Neʼe ina ʼui fēnei ki te kau tagata ʼāfea ʼo Efesi: “Neʼe mole ʼau fakatātāʼofi te fakahā atu kia koutou te ʼu meʼa fuli ʼaē ʼe ʼaoga, pe ko he ako ʼo koutou ʼi muʼa ʼo te hahaʼi peʼe ʼi te ʼu ʼapi. Kae neʼe ʼau fakamoʼoni fakalelei ia muʼa ʼo te kau Sutea pea mo te kau Keleka ʼo ʼuhiga mo te fakahemala ki te ʼAtua pea mo te tui ki totatou ʼAliki ko Sesu.” (Gāue 18:4; 20:20, 21) ʼE toe feiā pe mo te kau Fakamoʼoni ʼa Sehova ia ʼaho nei, ʼe nātou faiga mālohi ʼi te fai faka mafola, ʼo mole gata pe ki te hahaʼi ʼo te Keletiate kae ki te hahaʼi fuli pe, māʼiape la mo te hahaʼi ʼaē ʼe nonofo ʼi “te potu taupotu ʼo te kele.”—Gāue 1:8; 18:5.
Tou Fakahā “Te ‘Folafola’ ʼo Te Tui”
9. (a) Ia Loma 10:8, 9, koteā te faʼahiga tui ʼaē ʼe fakaloto mālohiʼi tatou ke tou maʼu? (b) Ko te temi fea koa ʼaē ʼe tonu ke tou fakahā ai tatatou tui, pea ʼe tonu ke tou fakahā feafeaʼi?
9 ʼE tonu ke tou faʼa kātaki ʼi te tui ke feala he hāofaki ʼo tatou. Neʼe ʼui fēnei e Paulo, ʼi tana fakaʼaogaʼi te ʼu palalau ʼo te koga tohi ʼo Teutalonome 30:14: “ ‘Ko te folafola ʼe ōvi atu kia te koe, ʼi tou gutu totonu pea mo tou loto totonu’; ko tona faka ʼuhiga, ko te ‘folafola’ ʼo te tui ʼaē ʼe tou faka mafola.” (Loma 10:8) ʼI tatatou faka mafola ia te “ ‘folafoala’ [ʼaia] ʼo te tui,” ʼe fakaʼāsili aipe tana hū ki totatou loto. Neʼe moʼoni te faʼahi ʼaia ʼo ʼuhiga mo Paulo, pea ko te hoko atu ʼo tana ʼu palalau ʼe feala ke ina fakaloto mālohiʼi tatou ke tou faʼifaʼitakiʼi ia ia ʼo tou fakahā te tui ʼaia ki te hahaʼi: “ ‘Kapau ʼe ke tala ia muʼa ʼo te hahaʼi te folafola ʼaenī ʼaki tou gutu totonu,’ ko Sesu te ʼAliki, pea mo ke haga tui ʼi tou loto neʼe fakatuʼuake ia ia e te ʼAtua mai te kau mate, pea ʼe hāofaki anai koe.” (Loma 10:9) Ko te tala ʼaia ʼe mole gata pe tona fai ia muʼa ʼo te hahaʼi ʼi te temi ʼaē ʼe kita papitema ai, kae ʼe tonu ke toe hoko atu te tala ʼaia, ko he fakamoʼoni ki te hahaʼi ʼo ʼuhiga mo te ʼu agaaga fakaofoofo ʼo te moʼoni. Ko te moʼoni ʼaia ʼe ina faka maʼuhigaʼi te huafa ʼo te Tuʼi ʼAliki ko Sehova; mo totatou Hau Faka Mesianike pea mo Tagata Faitotogi, ia te ʼAliki ko Sesu Kilisito; pea mo te ʼu fakapapau taulekaleka ʼo ʼuhiga mo te Puleʼaga.
10. ʼO mulimuli ki te koga tohi ʼo Loma 10:10, 11, ʼe tonu ke tou fakahā feafeaʼi te “ ‘folafola’ [ʼaia] ʼo te tui”?
10 ʼE mole hāofaki anai ia nātou ʼaē ʼe mole nātou tali pea mo maʼuliʼi te “ ‘folafola’ ʼo te tui” ʼaia, ohage ko tona ʼui e te ʼapositolo: “ ʼAki te loto ʼe kita tui ki te faitotonu, kae ʼaki te gutu ʼe kita tala ia muʼa ʼo te kaugamālie ʼo ʼuhiga mo te fakamaʼuli. Heʼe ʼui fēnei e te Folafola: ‘Ko ʼaē ʼe tui kia te ia ʼe mole lainoa anai ia.’ ” (Loma 10:10, 11) ʼE tonu ke tou maʼu he ʼatamai mālama totonu ʼo ʼuhiga mo te “ ‘folafola’ ʼo te tui” ʼaia, pea ke hoko atu tatatou fakatuputupu ʼo te ʼatamai mālama ʼaia ʼi totatou loto ke uga ai tatou ke tou tala ki te hahaʼi. Ko Sesu totonu ʼe ina fakamanatuʼi fēnei mai kia tatou: “Ko ʼaē ʼe ufiufi ʼuhi ko ʼau pea mo ʼaku folafola ʼi te taʼiake fai feʼauʼaki pea mo agahala ʼaenī, ko te Foha ʼo te tagata ʼe toe ufiufi anai mo ia ki ai, mokā haʼu anai ʼi te kolōlia ʼo tana Tāmai pea mo te kau ʼaselo maʼoniʼoni.”—Maleko 8:38.
11. ʼE tonu ke lahi feafeaʼi te faka mafola ʼo te logo lelei, pea koteā tona tupuʼaga?
11 Ohage ko tona fakakikite e te polofeta ko Taniela, ko “nātou ʼaē ʼe nātou maʼu te fakasiosio poto” ʼi te temi ʼaenī ʼo te fakaʼosi, ʼe nātou gigila “ohage ko te mālamagia ʼo te lagi,” koteʼuhi ʼe mafola te logo ʼo te Puleʼaga ʼo aʼu ki te ʼu potu taupotu ʼo te kele. ʼE nātou “faka haʼu te tokolahi ki te faitotonu,” pea kua mahu ai te ʼatamai mālama moʼoni, heʼe tuputupu te ʼu fakamahino ʼaē ʼe foaki mai e Sehova kia tatou ʼo ʼuhiga mo tana ʼu lea faka polofeta ʼi te temi ʼaenī ʼo te fakaʼosi. (Taniela 12:3, 4) ʼE ko he logo maʼuhiga ʼaia ki te hāofaki ʼo nātou fuli ʼaē ʼe nātou ʼofa ki te moʼoni pea mo te faitotonu.
12. Koteā te pikipikiga ʼo te koga tohi ʼo Loma 10:12 pea mo te gāue ʼa te ʼaselo ʼaē ʼe talanoa ki ai ia Fakahā 14:6?
12 ʼE hoko atu e te ʼapositolo ko Paulo tana ʼu palalau ʼo ina ʼui fēnei: “ ʼE mole kehekehe te kau Sutea pea mo te kau Keleka, heʼe ko te ʼAliki pe e tahi ki te hahaʼi fuli, pea ʼe koloaʼia ia maʼa nātou fuli ʼaē ʼe nātou fetapā kia te ia.” (Loma 10: 12) Ia ʼaho nei, ʼe tonu ke lahi age te faka mafola ʼo “te logo lelei” ʼi te kele katoa—ki te hahaʼi fuli, ʼo aʼu ki te potu taupotu ʼo te kele. ʼE hoko atu e te ʼaselo ʼaē ʼe talanoa kiai ia Fakahā 14:6 tana lele ʼi te lotomalie ʼo te lagi, ʼo ina foaki mai kia tatou te “logo lelei heʼegata ke [tou] kalagaʼi ohage ko he evaselio kia nātou ʼaē ʼe nonofo ʼi te kele, pea mo te puleʼaga kehekehe, te telepi kehekehe, te lea kehekehe pea mo te hahaʼi kehekehe.” Koteā anai tona ʼu fua lelei kia nātou ʼaē ʼe nātou tali te logo ʼaia?
Tou Fetapā Ki Te Huafa ʼo Sehova
13. (a) Koteā te vaega ʼaē ka tou fakaʼaogaʼi anai ʼi te taʼu 1998? (b) He koʼe ʼe tonu te fili ʼo te vaega ʼaia ia ʼaho nei?
13 ʼI tana fakaʼaogaʼi te koga tohi ʼo Soele 2:32, ʼe ʼui fēnei e Paulo: “Ko ia ʼaē ʼe fetapā ki te huafa ʼo Sehova ʼe hāo anai ia.” (Loma 10:13) ʼE lelei te fili ʼo te ʼu palalau ʼaia ki te vaega faka Tohi-Tapu ʼa te kau Fakamoʼoni ʼa Sehova ʼi te taʼu 1998! ʼE maʼuhiga ʼaupito ia ʼaho nei ke tou haʼele ki muʼa ʼo tou falala kia Sehova, pea ke tou fakahā tona huafa pea mo tana ʼu fakatuʼutuʼu! Ohage ko tona fai ʼi te ʼuluaki sēkulō, ʼe toe fai foki te kalaga ʼaenī ʼi te ʼu ʼaho fakamuli ʼo te tuʼu ʼo te ʼu faʼahiga meʼa agakovi ʼaenī: “Koutou feholaki mai te taʼiake pikopiko ʼaenī.” (Gāue 2:40) ʼE ko he fakaafe mālohi ʼaia kia nātou fuli ʼo te malamanei katoa ʼaē ʼe nātou manavasiʼi ki te ʼAtua, ke nātou fetapā kia Sehova ke ina hāofaki nātou, ʼo feiā mo nātou ʼaē ʼe nātou fakalogo ki tanatou faka mafola ia te logo lelei ʼaia.—1 Timoteo 4:16.
14. Koteā te Maka ʼaē ʼe tonu ke tou fetapā ki ai ke hāofaki ai tatou?
14 Koteā anai te meʼa ʼaē ka hoko mokā fakahoko anai e Sehova tona ʼaho lahi ki te kele? Ko te tokolahi, ʼe mole nātou fetapā anai kia Sehova ke ina hāofaki nātou. Ko te tokolahi ʼo te hahaʼi ʼe nātou “ ʼui tuʼumaʼu pe [anai] ki te ʼu moʼuga pea mo te ʼu mata maka: ‘Koutou holo ifo kia mātou pea mo koutou fakanono mātou mai te fofoga ʼo Ia ʼaē ʼe heka ʼi te hekaʼaga faka hau pea mai te hāūhāū ʼo te akeno.’ ” (Fakahā 6:15, 16) ʼE nātou falala anai ki te ʼu kautahi pea mo te ʼu fakatuʼutuʼu ʼo te tuʼu ʼo te ʼu faʼahiga meʼa ʼaenī ʼaē ʼe nātou hage ko he ʼu moʼuga. Kae ʼe lelei age anai kia nātou, ke nātou falala ki te Maka ʼaē ʼe lelei tokotahi, ʼaē ko Sehova ʼAtua! (Teutalonome 32:3, 4) Neʼe ʼui fēnei e te Hau ko Tavite ʼo ʼuhiga mo ia: “Ko Sehova ʼe ko toku Maka, pea ko toku tule mālohi, pea ʼe ko Ia ʼaē ʼe ina fakahāo ʼau.” Ko Sehova ko “totatou Maka hāofaki.” (Pesalemo 18:2; 95:1) Ko tona huafa ʼe “ko he tule mālohi,” ko te “tule” pe ʼaia e tahi ʼaē ʼe feʼauga tona mālohi moʼo puipui ʼo tatou ʼi te temi faigataʼa ʼaē ka hoko mai. (Tāʼaga Lea 18:10) Koia, ʼe maʼuhiga ʼaupito ke akoʼi e te teitei toko ono miliale hahaʼi ʼo te kele ia ʼaho nei, ke nātou fetapā fakamalotoloto ki te huafa ʼo Sehova pea mo nātou nonofo agatonu kia ia.
15. Koteā te meʼa ʼaē ʼe fakahā e te koga tohi ʼo Loma 10:14 ʼo ʼuhiga mo te tui?
15 Koia, ʼe tonu ai te hoko atu ʼo te palalau ʼa Paulo ʼi tana fehuʼi fēnei age: “Kae ʼe nātou fetapā feafeaʼi anai kia ia ʼaē ʼe mole nātou tui ki ai?” (Loma 10:14) ʼE kei lahi te hahaʼi, ʼe feala ke tou tokoni kia nātou ke nātou tali “te ‘folafola’ ʼo te tui,” ke nātou fetapā kia Sehova ke ina hāofaki nātou. ʼE maʼuhiga ʼaupito te tui kia nātou. ʼE ʼui fēnei e Paulo ʼi tana tahi tohi: “Kapau ʼe mole ʼi ai te tui, pea ʼe mole feala ke kita lelei [ki te ʼAtua], heʼe ko ʼaē ʼe fakaōvi ki te ʼAtua ʼe tonu ke tui ʼe maʼuli, pea ʼe ko ia ʼaē ʼe ina fakapale ia nātou ʼaē ʼe nātou kumi moʼoni ia ia.” (Hepeleo 11:6) Kae ʼe lava feafeaʼi anai ki te tahi ʼu hahaʼi ʼe toko lauʼi miliona ke nātou tui ki te ʼAtua? ʼI tana tohi ki te kau Loma, ʼe fai e Paulo te fehuʼi ʼaenī: “Pea ʼe nātou tui feafeaʼi anai kia ia ʼaē ʼe mole heʼeki nātou logo ki he talanoa ʼo ʼuhiga mo ia?” (Loma 10:14) ʼE ʼi ai koa he fakatuʼutuʼu ʼa Sehova ke logo kiai te hahaʼi ʼaia? Ei! Koutou fakatokagaʼi te hoko atu ʼo te ʼu palalau ʼa Paulo: “Pea ʼe nātou logo feafeaʼi anai mo kapau ʼe mole he tahi ʼe fai faka mafola?”
16. ʼI te fakatuʼutuʼu fakaʼatua, he koʼe ʼe maʼuhiga ʼaupito ke ʼi ai he kau fai faka mafola?
16 ʼE hā lelei mai ʼi te ʼu palalau ʼa Paulo, ʼe ʼaoga ʼaupito ke ʼi ai he kau fai faka mafola. Neʼe fakahā e Sesu ʼe hoko moʼoni anai te faʼahi ʼaia, pea ʼe fai anai “ ʼo aʼu ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 24:14; 28:18-20) Ko te gāue faka mafola ʼe ko he koga maʼuhiga ʼi te fakatuʼutuʼu ʼaē ʼe fai e Sehova moʼo tokoni ki te hahaʼi ke nātou fetapā ki tona huafa pea ke hāofaki ai nātou. Māʼiape la ʼi te Keletiate, ko te tokolahi ʼe mole nātou fai he meʼa moʼo faka maʼuhigaʼi te huafa taputapu ʼo te ʼAtua. Kua lahi ia nātou ʼaē ʼe nātou faka ʼuhigaʼi hala ia Sehova, ʼo nātou ʼui ʼe kau ki he Tahitolu ʼe mole feala hona fakamahino. Tahi ʼaē meʼa, ʼe lahi ia nātou ʼaē ʼe nātou kau ʼi te hahaʼi ʼaē ʼe talanoa ki ai ia Pesalemo 14:1 pea mo te 53:1: “Neʼe ʼui e te tagata vale ʼi tona loto: ‘ ʼE mole he Sehova.’ ” ʼE tonu ke nātou ʼiloʼi, ko Sehova ko te ʼAtua maʼuli, pea ʼe tonu ke nātou mahino ki te maʼuhiga ʼo tona huafa ke feala he hāofaki ʼo nātou ʼi te mamahi lahi ʼaē kua vave hoko mai.
Ko Te ʼu ‘Vaʼe Matalelei’ ʼo Te Kau Fai Faka Mafola
17. (a) He koʼe ʼe tonu te fakaʼaogaʼi e Paulo te lea faka polofeta ʼo ʼuhiga mo he toe fakafoʼou? (b) Koteā te faka ʼuhiga ʼo te kupuʼi palalau te ʼu ‘vaʼe matalelei’?
17 ʼE ʼi ai te tahi fehuʼi maʼuhiga ʼa te ʼapositolo ko Paulo: “Pea ʼe nātou fai faka mafola feafeaʼi anai mo kapau neʼe mole fekauʼi nātou? Ohage ko te meʼa ʼaē kua tohi: ‘ ʼE matalelei te ʼu vaʼe ʼo nātou ʼaē ʼe nātou tala te ʼu logo lelei ʼo te ʼu meʼa lelei!’ ” (Loma 10:15) ʼE fakaʼaogaʼi e Paulo te koga tohi ʼo Isaia 52:7, ʼaē ʼe kau ki te lea faka polofeta ʼo ʼuhiga mo te toe fakafoʼou ʼaē ʼe lolotoga hoko talu mai te taʼu 1919. Ia ʼaho nei, ʼe toe fekauʼi e Sehova “ia ia ʼaē ʼe ina ʼave te logo lelei, ia ia ʼaē ʼe ina fakahā te tokalelei, ia ia ʼaē ʼe ina ʼave te ʼu logo lelei ʼo he meʼa ʼe lelei age, ia ia ʼaē ʼe ina fakahā te hāofaki.” ʼAki he loto fia fakalogo, ko te kau “tagata leʼo” fakanofo ʼa te ʼAtua pea mo tonatou ʼu kaugā fagona ʼe nātou haga kalagaʼi fakafiafia te logo ʼaia. (Isaia 52:7, 8) Ko te ʼu vaʼe ʼo nātou ʼaē ʼe nātou tala te hāofaki ia ʼaho nei, ʼe lagi gaʼegaʼe pea mo efuʼia ʼi tanatou ʼolo ʼi te ʼu ʼapi, kae ʼe hā tonatou fiafia ʼi tonatou ʼu fofoga! ʼE nātou ʼiloʼi, ʼe fekauʼi nātou e Sehova ke nātou tala te logo lelei ʼo te tokalelei pea mo nātou fakafimālieʼi ia nātou ʼaē ʼe lotomamahi, ʼo nātou tokoni kia nātou ʼaia ke nātou fetapā ki te huafa ʼo Sehova ke feala hana hāofakiʼi nātou.
18. Koteā te meʼa ʼaē ʼe fakahā ia Loma 10:16-18 ʼo ʼuhiga mo te ikuʼaga ʼo te kalagaʼi ʼo te logo lelei?
18 Tatau aipe peʼe “tui [te hahaʼi] ki te meʼa ʼaē kua [nātou] logo kiai” peʼe nātou fakafisi kiai, kae ʼe tonu te ʼu palalau ʼaenī ʼa Paulo: “Neʼe mole nātou logo moʼoni koa la? ʼIo, ʼe moʼoni ‘ ʼi te kele katoa, kua mafola ai tonatou leʼo, pea ko tanatou ʼu akonaki kua kaku ki te ʼu potu taupotu ʼo te kele ʼaē ʼe nofoʼi.’ ” (Loma 10:16-18) Ohage pe ko te “kalagaʼi e te lagi te kolōlia ʼo te ʼAtua” ʼaē ʼe hā lelei ʼi te ʼu meʼa ʼaē neʼe ina fakatupu, ʼe toe feiā pe mo tana kau Fakamoʼoni ʼi te kele, ʼe tonu ke nātou kalagaʼi “te taʼu ʼo te finegaloʼofa ʼo Sehova pea mo te ʼaho lagavaka ʼo totatou ʼAtua . . . moʼo fakafimālieʼi ia nātou fuli ʼaē ʼe putu.”—Pesalemo 19:1-4; Isaia 61:2.
19. Koteā te meʼa ʼaē ka hoko anai kia nātou ʼaē ‘ ʼe nātou fetapā ki te huafa ʼo Sehova’ ia ʼaho nei?
19 ʼE fakahaʼuhaʼu pe te temi pea mo te fakaōvi mai ʼo te ʼaho lahi pea mo fakamanavahe ʼo Sehova. “Meʼa la ke feafeaʼi ki te ʼaho ʼaia; he kua ōvi mai te ʼaho ʼo Sehova, pea ʼe hoko mai anai ohage ko he fakaʼauha ʼe haʼu mai te Māfimāfi!” (Soele 1:15; 2:31) ʼE tou faikole fuli ke toe lahi age te hahaʼi ʼaē ka nātou tali fakafiafia anai te logo lelei, pea mo nātou hū ki te kautahi ʼa Sehova. (Isaia 60:8; Hapakuke 2:3) Koutou manatuʼi, neʼe kua fakaʼauha e Sehova te kau agakovi ʼi te ʼu temi ʼāfea—ʼi te temi ʼo Noe, mo Lote, pea ʼi te ʼu ʼaho ʼo te ʼu puleʼaga ʼaposita ʼo Iselaele pea mo Suta. ʼE tou maʼuʼuli nei ʼi te temi ʼaē ka hoko ai te mamahi lahi ʼaē ʼe mole hona fakatatau ʼi te ʼu temi muʼa, ʼaē ka pulihi ai anai e te afā ʼo Sehova te ʼu agakovi fuli pe ʼo te kele ʼaenī, ʼo ina faka fealagia ai leva ke fakatuʼu te palatiso pea mo te tokalelei heʼegata. ʼE koutou kau anai koa kia nātou ʼaē ka nātou nonofo agatonu ʼo “fetapā ki te huafa ʼo Sehova”? Kapau koia ʼaia, pea ʼe feala hakotou fakafiafia! ʼE fakapapau atu e Sehova ʼe ina hāofaki anai koutou.—Loma 10:13.
ʼE Koutou Tali Feafeaʼi Anai?
◻ Koteā te ʼu meʼa foʼou ʼaē neʼe fakahā ʼi te ʼosi ʼo te Penikosite ʼo te taʼu 33 ʼo totatou temi?
◻ ʼE tonu ke tokagaʼi feafeaʼi e te kau Kilisitiano “te ‘folafola’ ʼo te tui”?
◻ Koteā te faka ʼuhiga ʼo te ‘fetapā ki te huafa ʼo Sehova’?
◻ ʼE faka ʼuhiga kiteā te ‘matalelei ʼo te ʼu vaʼe’ ʼo te kau ʼave logo ʼo te Puleʼaga?
[Paki ʼo te pasina 18]
Ko te hahaʼi ʼa te ʼAtua ʼe nātou fakahā tona ʼu kalitate ʼi Porto Rico, mo Sénégal, mo Pérou, mo Papua Niu Kini—ei, ʼi te kele katoa