Ko Te Kau Faka Mafola ʼo Te Puleʼaga ʼe Nātou Fakamatala
ʼE Tapuakinaʼi Te ʼu Tēhina ʼo Malawi ʼUhi Ko Tanatou Faʼa Kātaki
KO SOSEFO neʼe ko te kaugana agatonu ʼa Sehova. (Hepeleo 11:22) Tahi ʼaē meʼa, neʼe ko te tagata neʼe faʼa kātaki. Logope la neʼe lavakiʼi ia ia e tona ʼu tēhina totonu, pea neʼe fakatau tuʼa lua ia ia ke maʼuli popūla, pea ki muli age neʼe pilisoniʼi ia ia he neʼe tukugakoviʼi hala, kae neʼe mole lotovaivai ia Sosefo. Neʼe ina kātakiʼi te ʼu taʼu ʼaia ʼaē neʼe fakatagaʼi ai ia ia, ʼo talitali ʼaki he agavaivai ke tapuakina ia ia e Sehova.—Senesi 37:23-28, 36; 39:11-20.
ʼO toe feiā pe ia ʼaho nei, ko te kau Fakamoʼoni ʼa Sehova ʼi Malawi neʼe nātou faʼa kātaki, ʼo talitali ki te ʼu tapuakina mai te ʼAtua. Lolotoga taʼu e 26, ko te kau Fakamoʼoni Kilisitiano ʼaia neʼe nātou kātakiʼi te tapuʼi ʼo tanatou gāue e te puleʼaga, mo he ʼu fakafeagai lahi, pea mo te gaohi koviʼi ʼo nātou. Kae neʼe fakapale tanatou faʼa kātaki!
ʼI te temi ʼaē neʼe kamata ai te ʼu fakataga ʼi Malawi ʼi te fakaʼosi ʼo te taʼu 1967, neʼe ʼi ai te toko 18 000 kau fai faka mafola ʼi te fenua. Koutou fakakaukauʼi age muʼa te fiafia ʼa te kau Fakamoʼoni ʼa Sehova ʼi tanatou ʼiloʼi ʼaē, neʼe maʼu te tupu foʼou ʼaki te toko 38 393 kau fai faka mafola ʼi te kamata ʼo te taʼu faka teokalatike 1997—ko he tupu ʼaia ʼe tuʼa lua age tonatou kaugamālie, kapau ʼe tou fakatatau mo te temi ʼaē neʼe tapuʼi ai tanatou gāue faka mafola! Tahi ʼaē meʼa, ko te toko 117 000 neʼe nātou kau ki te ʼu Fakatahi Faka Tisitilike e 13 “Ko Te Kau ʼAve Logo ʼo Te Tokalelei Fakaʼatua” ʼaē neʼe fai ʼi Malawi. ʼE moʼoni, neʼe tapuakina e Sehova tanatou tui pea mo tonatou faʼa kātaki.
Ko te tahi faʼifaʼitaki ʼo te ʼu tapuakina ʼaia, ʼe ko te ʼu meʼa ʼaē neʼe hoko ki te kiʼi tama e taʼu 14, ʼe higoa ko Machaka. ʼI te temi ʼaē neʼe tali ai e Machaka ke ina ako te Tohi-Tapu mo te kau Fakamoʼoni ʼa Sehova, neʼe lotomamahi ai tana ʼu mātuʼa. Neʼe nā ʼui fēnei: “Kapau ʼe ke fia liliu ko te Fakamoʼoni ʼa Sehova, pea ʼe tonu ke ke mavae ʼi totatou ʼapi.” Kae ko te ʼahiʼahi ʼaia neʼe mole ina fakaloto vaivai ia ia ʼi tana holi ʼaē ke hoko atu tana ako. Ko te meʼa ʼaē neʼe hoko, neʼe faʼao e te ʼu mātuʼa ʼa Machaka tona ʼu mutuʼi meʼa fuli. Kae neʼe toe totogi e te ʼu tēhina ʼo te kokelekasio he ʼu mutuʼi meʼa foʼou maʼa ia. ʼI te ʼiloʼi e te ʼu mātuʼa ʼa Machaka ia te faʼahi ʼaia, neʼe nā ʼui age ki ai: “Kapau ʼe foaki atu e te kau Fakamoʼoni te ʼu meʼa fuli ʼaē ʼe ʼaoga ki tou maʼuli, pea ʼe tonu anai ke ke mavae ʼi henī ʼo ke ʼalu ʼo nofo mo nātou.” ʼI tana ʼosi fakakaukauʼi fakalelei te faʼahi ʼaia, neʼe mavae ia Machaka ʼi tona ʼapi, pea neʼe tali ia ia e te tahi famili ʼo te kokelekasio ke nofo mo nātou ʼi tonatou ʼapi.
Neʼe lotomamahi ʼaupito te ʼu mātuʼa ʼa Machaka, koia neʼe nā mavae ai ʼi te koga meʼa ʼaia ke ʼaua naʼa nā toe felāveʼi mo te kau Fakamoʼoni ʼa Sehova. ʼE mahino papau ia, neʼe lotomamahi ia Machaka ʼi tana sio ki te faʼahi ʼaia, kae neʼe fīmālieʼi tona loto ʼi te temi ʼaē neʼe fakahā age ai e te ʼu tēhina te koga tohi ʼo Pesalemo 27:10, ʼaē ʼe ina ʼui fēnei: “ ʼI te temi ʼaē ʼe līaki ai ʼau e taku tāmai pea mo taku faʼe, ʼe tali anai ʼau e Sehova.”
ʼAki te temi, neʼe fetogi te aga ʼa te ʼu mātuʼa ʼa Machaka, pea neʼe ina fakatuʼutuʼu ke toe ʼalu ʼo nofo mo nāua. ʼE hā mai, neʼe malave kia nāua te lotomālohi ʼo tanā tama ke tauhi kia Sehova, koteʼuhi neʼe nā toe fia ako foki mo nāua te Tohi-Tapu mo te kau Fakamoʼoni ʼa Sehova! Tahi ʼaē meʼa, neʼe nā kau ki te ʼu ʼaho e tolu ʼo te Fakatahi Faka Tisitilike ko “Te Kau ʼAve Logo ʼo Te Tokalelei Fakaʼatua,” pea neʼe nā ʼui ʼi te ʼosi ʼo te fakatahi ʼaia: “ ʼE moʼoni, ʼe ko te kautahi ʼaenī ʼa te ʼAtua.”
Ei, ʼe feala ke fakatupu lotovaivai te ʼu fakataga, kae ʼe kātaki aipe te kau ʼave logo agatonu ʼa te ʼAtua. ʼE nātou haʼele ki muʼa ʼaki he lototoʼa, ʼi tanatou ʼiloʼi ʼaē “ ʼe fakatupu e te ʼahiʼahi te faʼa kātaki; pea ko te faʼa kātaki, ʼe ina fakatupu totatou ʼuhiga agatonu.” (Loma 5:3, 4) ʼE feala ke fakamoʼoni e te kau Fakamoʼoni ʼa Sehova ʼi Malawi, kapau ʼe tou faʼa kātaki, pea ʼe tou maʼu anai te ʼu tapuakina mai te ʼAtua.