“Ko Ai ʼAē Neʼe Ina Fakatupu Te Hahau?”

ʼO ʼUHIGA mo te hahau neʼe ʼui e te tagata fai sulunale ʼo te 19 sēkulō, ʼe hage ko he ʼu “huʼa maka maʼugataʼa neʼe faʼu ʼaki te ʼaele.” Neʼe fehuʼi fēnei e totatou Tupuʼaga ki te pateliaka ʼāfea ko Sopo: “Ko ai ʼaē neʼe ina fakatupu te hahau?” (Sopo 38:28) Neʼe fakamanatuʼi e te ʼAtua kia Sopo ko te hahau ʼe hifo mai te ʼAtua.

ʼE tou ʼiloʼi te matalelei pea mo te gigila ʼo te hahau, pea ʼi te Tohi-Tapu ʼe pipiki ki te tapuakina, ki te maʼuli lelei ʼo te vao, ki te mahu pea mo te taupau ʼo te maʼuli. (Senesi 27:28; Teutalonome 33:13, 28; Sakalia 8:​12) Lolotoga te fasiga taʼu māfana pea mo magemage ʼi Iselaele, neʼe maʼuli lelei te vao ʼo te fenua pea mo tona hahaʼi ʼaki “te hahau ʼo Helemone.” ʼAki te vao matuʼa ʼi te tumutumu ʼo te Moʼuga ko Helemone pea mo tona nive, neʼe tupu ʼaki ai te mao ʼi te pōʼuli, pea neʼe liliu ko te hahau. Ko te tagata fai pesalemo ko Tavite neʼe ina fakatatau te mokomoko ʼo te hahau ki te fiafia ʼaē ʼe tupu ʼi te nofo fakatahi ʼa te kau kaugana ʼa Sehova ʼi te logo tahi.​—Pesalemo 133:3.

Ko te ʼu fakatotonu ʼa te polofeta ko Moisese ki Iselaele neʼe agamālū pea mo mokomoko ohage ko te hahau. Neʼe ina ʼui fēnei: “Ko taku folafola ʼe maligi anai ohage ko he hahau, ohage ko he afuafu ki te mohuku, peʼe ko he ʼua lalahi ki te ʼu ʼakau.” (Teutalonome 32:2) Ia ʼaho nei, ko te kau Fakamoʼoni ʼa Sehova ʼe nātou fakahā te logo lelei ʼo ʼuhiga mo te Puleʼaga ʼo te ʼAtua, ʼo aʼu ki te potu taupotu ʼo te kele. (Mateo 24:14) ʼE fai e te ʼAtua te fakaafe ʼaenī: “ ‘Haʼu!’ Pea ko ʼaē ʼe fia ʼinu ke haʼu; ko ʼaē ʼe loto kiai ke ina toʼo noa te vai ʼo te maʼuli.” (Fakahā 22:17) Ko te hahaʼi ʼe toko lauʼi miliona ʼo te ʼu puleʼaga fuli, ʼe nātou tali te fakaafe ʼaē ke nātou maʼu te fakamokomoko fakalaumālie ʼaē ʼe haʼu mai te ʼAtua, ke feala ai hanatou maʼu te maʼuli heʼegata.