Ko Te Gāue—“ ʼE Tupu Ai Tatatou Fakaʼapaʼapa Kiai”
KO TE ʼapositolo ko Petelo neʼe ina uga fēnei te kau Kilisitiano: “Ke koutou taupau he aga matamatalelei ʼi te lotolotoiga ʼo te ʼu puleʼaga, ke feala ʼi te temi ʼaē ʼe nātou laukovi ai kia koutou ʼo nātou ʼui ko koutou ko he kau agakovi, ke nātou faka kolōliaʼi te ʼAtua ʼi te ʼaho ʼo tana ʼaʼahi, ʼuhi ko tanatou sio mata ki takotou ʼu gāue lelei.” (1 Petelo 2:12) Talu mai ni ʼu taʼu, neʼe fakahā te aga matamatalelei ʼaia e te kau Fakamoʼoni ʼa Sehova ʼo Italia. ʼO mulimuli ki te manatu ʼa Sesu ʼi tana fakatotonu ʼaē ke nātou “kalagaʼi ʼi te ʼu ʼato fakaheketālaʼa,” ʼe nātou fai fakahāhā tanatou gāue faka Kilisitiano, ʼo sio mata kiai te hahaʼi fuli. (Mateo 10:27; Soane 18:20) Koia la ʼaē, ʼi te temi ʼaē neʼe tā ai e te avoka Italia pea mo te patele te ʼu tukugakovi ʼo ʼuhiga mo te kau Fakamoʼoni ʼa Sehova, ʼo nā ʼui ʼe ko he “magaʼi lotu kae mole ko he lotu” pea ʼe hage pe ia ko te ʼu “kautahi fakafūfū ʼaē ʼe nātou kākāʼi te hahaʼi,” neʼe fakatotonu ai e te kau Fakamoʼoni ke nātou ʼave nāua ke fakamāuʼi ʼuhi ko tanā ʼu tukugakovi hala.
ʼI te ʼuluaki fakamāu, neʼe ʼui e te telepinale ko te avoka pea mo te patele neʼe mole nā maumauʼi he lao. Kae ʼi te ʼaho 17 ʼo Sūlio ʼo te taʼu 1997, ko te Telepinale ʼo Venise ʼaē ʼe māʼoluga age neʼe ina fetogi te ʼuluaki faifakamāu, pea neʼe ina ʼui neʼe hala te avoka pea mo te patele. Neʼe ʼui fēnei e te telepinale: “Ko te ʼu alatike e lua [ʼaē neʼe tā e te avoka pea mo te patele] ʼe maʼu ai te ʼu palalau ʼe feala ke fakatupu kovi ki te matagafua ʼo te hahaʼi ʼaē ʼe nātou mulimuli ki te lotu ʼa te kau ‘Fakamoʼoni ʼa Sehova.’ ʼE hā lelei mai, neʼe fakatuʼutuʼu ʼaki te ʼu alatike ʼaia ke manukiʼi te hahaʼi ʼaia.” Neʼe toe fakahā e te telepinale, ko te ʼu alatike ʼaia ʼe “mole mulimuli ki te faʼitaliha ʼaē ʼe foaki mai e te lao ke kita fakahā he meʼa pea mo fai he ʼu valoki.” Koia neʼe fakatūʼa e te telepinale te ʼu tagata ʼaia e lua ʼaē neʼe nā fai te ʼu tukugakovi hala, ke nā foaki he falā ki te kau Fakamoʼoni ʼa Sehova, pea mo totogi te gāue ʼo te telepinale, pea mo huʼi te falā ʼaē neʼe totogi ʼaki e te kau Fakamoʼoni ʼa Sehova te ʼu faifakamāu ʼaia e lua.
ʼI te tohi ʼo te faifakamāu, neʼe ʼui fēnei e te Telepinale ʼo Venise: “ ʼE feala ke tou tekeʼi te ʼu aga fefeka ʼaē ʼe mole nātou tali te ʼu manatu kehekehe pea mo te tauhi fakavale ki te lotu, mo kapau ʼe tou maʼuliʼi pea mo taupau te ʼu faʼitaliha ʼaē ʼe lagolago kiai te Lao [ʼo Italia.]” Neʼe ʼui ʼi te tonu ʼaia, ʼe mole fai fakafūfū te gāue ʼa te kau Fakamoʼoni ʼa Sehova pea ʼe mole feala ke ʼui ʼe mole ko he lotu. Neʼe fakatokagaʼi fēnei e te telepinale: “Kapau ʼe tou ʼui ko te kau Fakamoʼoni ʼe hage ko te ʼu kautahi fakafūfū, pea ʼe mole tou mulimuli ki te moʼoni faka hisitolia, mai tona ʼuhiga ʼaē ʼe lahi te ʼu kolo ʼaē ʼe maʼu ai te lotu ʼaia pea ʼe ʼiloʼi lelei te gāue ʼaē ʼe nātou fakahoko, ʼaē ko te fai ʼo ni ʼu tisipulo, tāfito la ʼi te ʼAhotapu pea mo te ʼu ʼaho ʼaē ʼe mole gāue ai. Pea ʼe tupu ai tatatou fakaʼapaʼapa kiai, tatau aipe pe koteā tatatou manatu ʼo ʼuhiga mo tanatou akonaki.” Koia ko te faiva ʼo te kau Fakamoʼoni ʼa Sehova ʼo Italia ʼi te fai faka mafola pea mo tanatou aga matamatalelei, neʼe ina faka fealagia ke pulihi te fakapalatahi ʼaē neʼe fai kia nātou.—Mateo 5:14-16; 1 Petelo 2:15.