Kei Koutou Manatuʼi Koa?

Neʼe koutou fakatokagaʼi koa te ʼu alatike fakamuli ʼo Te Tule Leʼo? Kapau koia ʼaia, pea ʼe lagi koutou leleiʼia anai te ʼu fakamanatu ʼaenī:

◻ He koʼe koa ʼe mole fakapotopoto te akonaki ʼaē ʼe ina ʼui ko meʼa fuli ʼe tohi fakatomuʼa?

Kapau neʼe ʼiloʼi fakatomuʼa e te ʼAtua pea mo ina fakatuʼutuʼu ʼe agahala anai ia Atama, pea ʼe liliu anai ko ia ʼaē neʼe ina fakatupu te agahala ʼi tana fakatupu te tagata, pea ko ia ʼaē ʼe tupu ai te agakovi pea mo te ʼu mamahi ʼo te hahaʼi. ʼE mahino papau ia, ʼe mole ʼalutahi te manatu ʼaia mo tatatou ʼiloʼi ʼaē ko Sehova ʼe ko he ʼAtua ʼofa pea ʼe fehiʼa ki te agakovi. (Pesalemo 33:5; Tāʼaga Lea 15:9; 1 Soane 4:8)​—15/4, pasina 7, 8.

◻ Moʼo fakahoko ia Isaia 2:​2-4, koteā ʼaē ʼe fai e te hahaʼi tokolahi ʼe ʼōmai mai te ʼu puleʼaga kehekehe?

ʼI tanatou ʼolo ki te ʼapi ʼaē ʼe fai ai te tauhi kia Sehova, ʼe nātou fakafisi ki te ‘ako ʼo te tau’ heʼe nātou falala ki te puipui ʼaē ʼe foaki age e te ʼu kautau fakaʼaselo ʼa te ʼAtua. ʼE nātou teuteu ke nātou pulihi ʼi te kele te ʼu fili ʼo te tokalelei.​—15/4, pasina 30.

◻ Ko ai te hahaʼi mālohi ʼa te ʼAtua ʼaē ʼe talanoa ki ai ia Soele 3:​10, 11?

ʼI te Tohi-Tapu, ko te ʼAtua moʼoni ʼe fakahigoa tuʼa 280 ko “Sehova ʼo te ʼatu kautau.” (2 Hau 3⁠:14) Ko te ʼu kautau ʼaia ʼe ko te ʼu ʼaselo tokolahi ʼaē ʼe nonofo ʼi selo pea ʼe nātou teuteu ke nātou fai te meʼa ʼaē ka fakatotonu anai e Sehova kia nātou.​—1/5, pasina 23.

◻ Koteā te meʼa ʼaē ʼe tou ako ʼi te fakamaʼua e Sehova kia Sopo ke faikole maʼa nātou ʼaē neʼe agahala kia te ia? (Sopo 42:8)

ʼI muʼa ʼo tana fakamālōlō ia Sopo, neʼe fakamaʼua e Sehova kia ia ke faikole maʼa nātou ʼaē neʼe agahala kia ia. ʼE hā lelei ai, ʼe fakamaʼua mai e Sehova ke tou fakamolemole muʼa kia nātou ʼaē ʼe nātou agahala kia tatou ke feala ai hana fakamolemole tatatou ʼu agahala. (Mateo 6⁠:12; Efesi 4⁠:⁠32)​—1/5, pasina 31.

◻ Koteā te faka ʼuhiga ʼo te ʼui ʼa Sake “Ke katoa te gāue ʼa te faʼa kātaki”? (Sake 1:4)

ʼE ʼi ai te “gāue” ʼe tonu ke fakahoko e te faʼa kātaki. Ko tana gāue tāfito ʼe ko te fai ʼaē ke tou katoa ia meʼa fuli. Koia, kapau ʼe tou tuku ke hoko te ʼu ʼahiʼahi, kae mole tou faiga ke tou fakaʼaogaʼi he ʼu meʼa ʼe mole ʼalutahi mo te Tohi-Tapu moʼo fakagata fakavilivili te ʼu ʼahiʼahi ʼaia, pea ʼe ʼahiʼahiʼi ai tatatou tui pea mo fakatonutonuʼi.​—15/5, pasina 16.

◻ He koʼe koa neʼe fakatalitali fualoa te ʼAtua moʼo fakatokatoka te ʼu fihifihia ʼo te malamanei?

Ko Sehova, ʼe mole tatau tana fakafuafua te temi mo tatou. Ki te ʼAtua heʼegata, ko te temi loaloaga ʼaē neʼe kamata mai te fakatupu ʼo Atama ʼo aʼu mai ki te temi ʼaenī, ʼe mole pe la ko he vāhaʼa katoa. (2 Petelo 3:8) Kae tatau aipe peʼe feafeaʼi tatatou fakafuafua te temi, ʼi te taʼu fuli pea mo te ʼu ʼaho fuli ʼe fakaōvi mai te fakahoko ʼo te ʼaho ʼo te faka lākatonuʼi ʼa Sehova.​—1/6, pasina 5, 6.

◻ Koteā ʼaē ʼe ina uga te kau Fakamoʼoni ʼa Sehova ke nātou fakahoko tanatou gāue?

Ko te ako ʼa Sehova neʼe ina fakatupu he hahaʼi makehe, he neʼe akoʼi nātou ke nātou feʼofani pea mo ʼofa ki tonatou ʼu kāiga ohage ko nātou. (Isaia 54:13) Ko te ʼofa ʼe ina uga te kau Fakamoʼoni ʼa Sehova, ke nātou haga fai faka mafola logope la te mole tokagaʼi e te hahaʼi te logo lelei peʼe ko tonatou fakatagaʼi. (Mateo 22:36-40; 1 Kolonito 13:​1-8)​—15/6, pasina 20.

◻ Koteā te faka ʼuhiga ʼo te ʼu palalau ʼaenī ʼa Sesu: “Koutou faiga mālohi ke koutou hū ʼi te matapā fāveliveli”? (Luka 13⁠:24)

Ko te ʼu palalau ʼa Sesu ʼe faka ʼuhiga ki he faʼahiga tau pea mo te fakakinauʼi ʼo kita. ʼE toe hā ʼi tana ʼu palalau ko ʼihi ʼe nātou faiga ke nātou ‘hū ʼi te matapā’ kae ʼe nātou filifili te temi ʼaē ka nātou fai ai te faʼahi ʼaia, ʼo nātou filifili te faʼahi ʼaē ʼe nātou fīmālie ai. ʼE feala kia tatou takitokotahi ke tou fai te fehuʼi ʼaenī: ‘ ʼE ʼau fai fakamalotoloto koa taku gāue, ʼaki he loto faiva?’​—15/6, pasina 31.

◻ ʼO ʼuhiga mo te kau fakatuʼuake, ʼe feafeaʼi anai tonatou “fakamāuʼi . . . ʼo mulimuli pe ki te ʼu meʼa ʼaē neʼe tohi ʼi te ʼu takaiga tohi, ʼo fai pe ki tanatou ʼu gāue”? (Fakahā 20:12)

Ko te ʼu takaiga tohi ʼaia ʼe mole ko he ʼu fakamatala ʼo te ʼu aga ʼaē neʼe nātou fai ki muʼa atu; koteʼuhi ʼi tanatou mate, kua nātou totogi te ʼu agahala ʼaē neʼe nātou fai lolotoga tanatou kei maʼuli. (Loma 6:​7, 23) Kae ko te hahaʼi ʼaē ka fakatuʼuake ʼe kei nātou maʼu te agahala mai ia Atama. Ko te ʼu takaiga tohi ʼaia ʼe lagi tuʼu ai anai te ʼu fakatotonu ʼa te ʼAtua ʼaē ʼe tonu ke mulimuli kiai te hahaʼi fuli, ke feala ai hanatou maʼu katoa te ʼu fua lelei ʼo te sakilifisio ʼo Sesu Kilisito.​—1/7, pasina 22.

◻ Koteā te ʼu ako ʼaē ʼe tou maʼu maʼa tatou ʼi te lea fakatātā ʼa Sesu ʼo ʼuhiga mo te tagata Samalitana agalelei? (Luka 10:30-​37)

Ko te lea fakatātā ʼa Sesu ʼe ina fakahā mai ko te tagata ʼaē ʼe faitotonu, ʼe mole gata ʼaki pe ki tana fakalogo ki te ʼu lao ʼa te ʼAtua, kae ʼe ina toe faʼifaʼitakiʼi foki mo tona ʼu kalitate. (Efesi 5:1) ʼE toe hā mai ai ko te ʼofa ki totatou kāiga ʼe mole tonu ke ina fakakeheʼi he lanu, mo he puleʼaga pea mo he ʼu lotu. (Kalate 6:​10)​—1/7, pasina 31.

◻ Koteā te ʼu faʼahi e tolu ʼaē ʼe feala ke koutou ʼiloʼi ai takotou fānau pea mo koutou foaki kia nātou he takitaki?

(1) Koutou tokoni ki takotou fānau ke nātou filifili he faʼahiga gāue ʼe lelei; (2) koutou teuteuʼi nātou ke nātou tauʼi te lotohoha ʼuhi ko te ako pea mo te gāue; (3) koutou fakahā age kia nātou peʼe lava feafeaʼi hanatou maʼu te ʼu meʼa ʼaē ʼe ʼaoga kia nātou ʼi te faʼahi fakalaumālie.​—15/7, pasina 4.

◻ He koʼe koa neʼe mālōlō te ʼAtua ʼi te “fitu ʼaho”? (Senesi 2:​1-3)

Neʼe mole mālōlō te ʼAtua he neʼe gaʼegaʼe. Kae neʼe ina tuku tana fakatupu te ʼu meʼa ʼo te kele, moʼo faka fealagia ke tuputupu tana ʼu gāue fakatupu, ke aʼu ki tonatou kolōlia katoa, moʼo fakavikiviki kia te ia.​—15/7, pasina 18.

◻ Koteā te ʼu faʼahi e tolu ʼaē ʼe feala ai ke tou maʼuliʼi te faitotonu?

ʼUluaki, ʼe tonu ke tou mulimuli ki te ʼu lekula ʼa te ʼAtua ʼo ʼuhiga mo te aga ʼaē ʼe tonu ke fai. (Isaia 1:​17) Lua, ʼe tou maʼuliʼi te faitotonu mokā tou fai ki te hahaʼi te aga ʼaē ʼe tou loto ke fai mai e Sehova kia tatou. (Pesalemo 130:​3, 4) Tolu, ʼe tou fakahā te faitotonu ʼa te ʼAtua mokā tou kau mālohi ki te gāue fai faka mafola. (Tāʼaga Lea 3:​27)​—1/8, pasina 14.