“Koutou Taupau Maʼu Te Meʼa ʼAē ʼe Koutou Maʼu”
Neʼe fai faka mafola te kau Fakamoʼoni ʼi te tahi motu ʼo te ʼu motu e 30 ʼo Cyclades ʼi Heleni. ʼI te fai faka mafola ʼa te toko lua, neʼe nā felāveʼi mo te tagata polisi neʼe ina ʼui age ke nā ʼolo mo ia ki te fale polisi. Mole fualoa ʼi tanatou tau atu kiai, pea tagi te telefoni. Neʼe ko te patele ʼo te kolo. Neʼe ina ʼui fēnei: “Neʼe ʼau logo ʼe ʼi ai te kau Fakamoʼoni ʼa Sehova ʼi te kolo.” Pea tali age e te polisi: “Ei, ʼe ʼi henī te ʼu Fakamoʼoni e toko lua.” Neʼe ʼui e te patele: “ ʼE ʼau ʼalu atu nei.” Neʼe tuʼania te ʼu tēhina ʼi tanā logo ki te fai palalau ʼaia.
Kae ʼi te tau age ʼa te patele ki te fale polisi, neʼe malimali ʼo fakaʼalofa kia nāua, pea neʼe heka ōvi ki te tagata polisi. ʼI tanā lolotoga fai palalau, neʼe ʼita te tagata polisi kae agalelei pea mo aga fakaʼapaʼapa te patele. Neʼe ina ʼui age ki te tagata polisi ke ʼaua naʼa ina meʼa noaʼi te kau Fakamoʼoni, pea neʼe ina toe ʼui fēnei: “ ʼE feala ke nātou tali ki te ʼu fehuʼi fuli pe ʼaē ʼe fai age kia nātou, heʼe akoʼi nātou ʼi te Ako Faka Teokalatike. ʼE lagi faigafua age te faka galulu ʼo te kele ʼi te fetogi ʼo te tui ʼa he tahi ʼi te kau Fakamoʼoni ʼa Sehova.”
ʼI tanatou fai faka mafola ʼi te uhu ake, neʼe toe felāveʼi te ʼu tēhina mo te patele pea neʼe nā fehuʼi age: “He koʼe neʼe ke agalelei kia māua ʼi tau fai palalau mo te polisi?” Pea fakahā age e te patele neʼe feʼiloʼiʼaki mo te ʼu Fakamoʼoni e tokolahi ʼi Syros pea ʼe ina lau te ʼu nusipepa Te Tule Leʼo pea mo te Réveillez-vous! talu mai ni ʼu taʼu. ʼI tona fakahagatonu, neʼe tuʼa lahi tana toʼo Te Tule Leʼo, ʼo fufū ʼi tana meʼa ʼaiʼaga pepa, pea ina fakaʼaogaʼi moʼo fai ʼaki tana ʼu akonaki ʼi te ʼēkelesia. Neʼe ina ʼui fēnei: “ ʼI taku manatu, ʼe mole he ʼuhiga anai ʼo toku maʼuli, mo kanapaula neʼe mole ʼau maʼu takotou ʼu tohi. ʼE ko te ʼu kaupepa ʼaia ʼaē ʼe nātou foaki mai te ʼamanaki.”
Ki muli age neʼe ʼui fēnei e te patele ki te kau Fakamoʼoni: “ ʼE ʼi ai te meʼa ʼe ʼau fia ʼui atu kia koutou: koutou taupau maʼu te meʼa ʼaē ʼe koutou maʼu. ʼAua naʼa koutou faihala ʼo līaki takotou tui. Ko te meʼa ʼaē ʼe ʼau ʼui atu kia koutou ʼi te ʼaho nei, ʼe ko taku akonaki lelei tokotahi ʼaia, pea ʼe mole ko he ʼu palalau ʼe ʼau fai ʼaki pe toku gutu, kae ʼe ʼau fai ʼaki toku loto katoa.”