Ka Fetogi Te ʼu Loto Fefeka

ʼI te taʼu 1989, ko te kau Fakamoʼoni ʼa Sehova ʼo poloni neʼe tali nātou e te lao ko he kautahi faka lotu. Neʼe faka ʼāteaina māmālie te kau Fakamoʼoni ʼa Sehova ʼaē neʼe pilisoniʼi ʼuhi ko tanatou mole kau ki te ʼu meʼa faka politike, pea ʼi tanatou mavae ai neʼe tokolahi te kau pilisoni ʼaē neʼe nātou fia ako te Tohi-Tapu mo nātou. Koʼeni te fakamatala ʼo te faiga ʼa te kau Fakamoʼoni ʼa Sehova, ʼi he fale pilisoni, ke nātou tokoni ki te hahaʼi ʼaē neʼe fefeka tonatou loto ke nātou tali te mālohi ʼo te Folafola ʼa te ʼAtua.

ʼI WOŁÓW, te kolo ʼi te potu toga-hihifo ʼo Poloni ʼaē ʼe nonofo ai te toko 12 000 hahaʼi, ʼe ʼi ai te fale pilisoni kua taʼu 200 pea ʼe pilisoniʼi ai ʼihi hahaʼi Poloni ʼaē ʼe māmio kovi ʼosi. Talu mai te fakamoʼoni e te puleʼaga tanatou gāue, neʼe faiga te kau Fakamoʼoni ʼa Sehova ke nātou ʼave te logo lelei ʼo te Puleʼaga ki te kau pilisoni pea ʼe nātou fai ʼaki he lotomālohi.

Ko te meʼa ʼaē neʼe tokoni kia nātou ʼe ko te tohi ʼaē neʼe momoli e te Minisi ʼo te Susitisia ʼi Fepualio ʼo te taʼu 1990, ki te kau takitaki fuli ʼo te ʼu fale pilisoni ʼo Poloni. ʼI te tohi ʼaia neʼe ina ʼui age ai ke “mole nātou fakatupu he ʼu fihifihia” ki te hahaʼi pilisoni ʼaē neʼe nātou fia lau te ʼu tohi ʼo te Sosiete Watch Tower peʼe kapau ʼe nātou fia felāveʼi mo te kau Fakamoʼoni ʼa Sehova. Ko ʼihi ia nātou kua fualoa tanatou nonofo ʼi te fale pilisoni ʼo Wołów, pea kua nātou ʼiloʼi ʼihi hahaʼi ʼo te hahaʼi pilisoni loto fefeka. Kae neʼe nātou falala kia Sehova ke ina tapuakina tanatou ʼu faiga moʼo fakamalū tonatou ʼu loto fefeka ʼaki te moʼoni faka Tohi-Tapu.

Te Kamata ʼo Te Gāue

ʼE ʼui mai e te Tēhina ko Czesław ʼe nofo ʼi te kolo ʼo Wrocław ia kilometa e 40 mai te fale pilisoni ʼi Wołów pea neʼe fakagafua ke ina ʼaʼahi ai: “Neʼe faigataʼa te kamata ʼo te polokalama ʼaia. Neʼe tonu ke mātou palalau fualoa mo te hahaʼi takitaki ʼo te ʼu fale pilisoni ke nātou tui ko te ‘tokoni faka lotu’ ʼaē ʼe mātou fai ʼe fua lelei anai ki te hahaʼi pilisoni.”

Pea ʼe toe manatuʼi e Paweł ʼaē ʼe kaugā gāue mo Czesław, te tahi faigataʼa he neʼe “ ʼui e te tagata pule ko te hahaʼi pilisoni neʼe nātou fakaʼaogaʼi pe te tokoni faka lotu ʼaia he neʼe nātou holi ki he ʼu koloā.” Kae ʼi te taʼu 1991 ko te toko tolu tagata pilisoni neʼe agakovi ʼaupito ki muʼa atu, neʼe nātou fia papitema pea neʼe fetogi ai te aga ʼa te kau takitaki ʼo te fale pilisoni, pea neʼe lelei age ai tanatou lagolago ki te ʼu tēhina.

ʼE fakamatala fēnei e Czesław: “Neʼe mātou kamata ʼaki tamatou fai faka mafola ki te hahaʼi pilisoni, mo tonatou famili ʼaē neʼe nātou ʼaʼahi nātou, pea mo te hahaʼi gāue ʼo te fale pilisoni. Ki muli age neʼe tuku kia mātou ke mātou faka mafola te logo lelei ʼi te ʼu kogafale ʼo te hahaʼi pilisoni, pea ʼe ko he meʼa makehe ʼaia. Moʼo fakaʼosi, ʼi tamatou maʼu ʼihi hahaʼi neʼe nātou fia ʼiloʼi te logo lelei, neʼe fakagafua kia mātou ke mātou fai te ʼu ako Tohi-Tapu pea mo te ʼu fono ʼi te kiʼi fale.” Ei, neʼe avahi e Sehova te ala ki te ʼu loto fefeka ʼo te hahaʼi pilisoni.

Te Polokalama Ako ʼe Maʼu Hona ʼu Fua Lelei

Mole tuai pea veliveli fau te kiʼi fale ʼaia. Mai tona ʼuhiga ʼaē ko te hahaʼi pilisoni ʼaē kua papitema pea mo te ʼu tēhina mai tuʼa neʼe nātou gāue tahi ʼi te fai faka mafola, ko te toko 50 hahaʼi pilisoni neʼe nātou kamata kau ki te ʼu fono. ʼE fakamahino fēnei e te tagata ʼāfea: “Lolotoga taʼu e tolu, neʼe mātou fai ai te ʼu fono pea neʼe kau tuʼumaʼu kiai te hahaʼi pilisoni ʼi te vāhaʼa fuli.” Koia ʼi Maio ʼo te taʼu 1995, neʼe tuku age kia nātou he tahi fale ʼe lahi age.

ʼE vakaʼi feafeaʼi e te ʼu tēhina takitaki pe ko ai ʼaē ʼe feala ke kau ki te ʼu fono ʼi te fale pilisoni? ʼE ʼui mai e te Tēhina ko Czesław pea mo te Tēhina ko Zdzisław: “ ʼE ʼi ai tamā lisi ʼo te hahaʼi pilisoni ʼaē ʼe nātou fakahā tanatou fia ʼiloʼi fakamalotoloto te moʼoni. Kapau ʼe mole tuputupu he tagata pilisoni ʼi te faʼahi fakalaumālie peʼe mole haʼu ki te ʼu fono ka mole ʼi ai hona tupuʼaga lelei, ʼo ina fakahā ai tana mole loto fakafetaʼi ki te ʼu fakatuʼutuʼu ʼaia, ʼe ma molehi tona higoa ʼi te lisi pea mo fakahā te faʼahi ʼaia ki te tagata pule ʼo te fale pilisoni.”

ʼI tanatou fai te ʼu ako Tohi-Tapu, ʼe toe akoʼi e te ʼu tēhina ki te hahaʼi pilisoni ke nātou teuteuʼi lelei te ʼu fono pea ke nātou fakaʼaogaʼi lelei te ʼu tohi faka Tohi-Tapu. Koia ʼi tanatou kau ki te ʼu fono, kua nātou teuteu lelei pea ʼe feala ke nātou palalau faʼitaliha. ʼE nātou fai he ʼu tali fakaloto mālohi, mo nātou faiva ʼi te fakaʼaogaʼi ʼo te Tohi-Tapu, pea ʼe nātou fakaʼaogaʼi kia nātou te ʼu tokoni faka Tohi-Tapu, ʼe nātou tau fai te palalau ʼaenī, ‘ ʼE mahino kia ʼau ʼe tonu ke ʼau fai te meʼa ʼaē peʼe ko te meʼa ʼaē.’

ʼE fakahā e te tagata taupau sikalaipe ʼo te kokelekasio: “Ko te ʼu ako Tohi-Tapu e 20 ʼaē ʼe fai ʼi te fale pilisoni ʼo Wołów. Pea ko ako e 8, ʼe fai e te toko tolu ʼo te ʼu tagata pilisoni ʼaē ko te ʼu kaugā fagona.” Neʼe nātou maʼu he ʼu fua lelei ʼi tanatou fai faka mafola ʼi te ʼu kogafale pilisoni pea mo tanatou faka mafola lolotoga tanatou haʼele ʼi te malaʼe ʼo te fale pilisoni. Ohage la, ia māhina e hogofulu, mai Sepetepeli 1993 ʼo aʼu ki Sūnio 1994, neʼe nātou tufa te ʼu tohi e 235, mo teitei kaupepa e 300 pea mo te ʼu nusipepa e 1 700. Mole faʼa fualoa kiai, ko te toko lua ʼi te hahaʼi takitaki ʼo te fale pilisoni neʼe nā kole ke fai hanā ako Tohi-Tapu.

ʼE Fakatupu Fiafia Te ʼu Fakatahi Makehe

ʼAki te temi, neʼe hilifaki te tahi meʼa ki te polokalama ako ʼaia ʼi te fale pilisoni, ko te ʼu fakatahi makehe. Ko te ʼu tagata taupau feʼoloʼaki pea mo ʼihi tēhina fakapotopoto neʼe nātou fai te ʼu akonaki tāfito ʼo te fakatahi faka silikosikilipisio pea mo te fakatahi makehe ʼaho tahi, ʼi te kogafale faigaoʼi ʼo te fale pilisoni. Neʼe fai te ʼuluaki fakatahi ʼi ʼOketopeli 1993. Neʼe kau kiai te toko nimagofulu hahaʼi pilisoni, ʼo feiā pe mo “te ʼu famili fuli, ʼo kau ai mo te ʼu fafine pea mo te ʼu tamaliki, neʼe nātou ʼōmai mai Wrocław,” ohage ko tona ʼui e te sulunale Słowo Polskie, pea ko te kaugamālie neʼe aʼu ki te toko 139. ʼI te ʼosi ʼo te polokalama ʼo te uhu, neʼe feala ai kia nātou fuli ke nātou kai te meʼa kai ʼaē neʼe teuteuʼi e te ʼu tuagaʼane pea ke nātou fiafia ʼi tanatou nonofo fakatahi.

Talu mai te temi ʼaia neʼe fai te ʼu fakatahi makehe e fitu, pea ʼe mole gata pe kia nātou ʼaē ʼe ʼi te fale pilisoni ʼaē ʼe nātou maʼu ai he ʼu fua lelei kae ʼe toe feiā pe foki mo te hahaʼi ʼo tuʼa. Ko te tuagaʼane Fakamoʼoni neʼe ina ʼaʼahi te tagata neʼe pilisoniʼi ki muʼa atu ʼi Wołów, kae ʼe nofo ʼi te kolo lahi ʼi te temi nei, pea ko te tagata ʼaia neʼe lotolotolua ki te ʼu meʼa ʼaē neʼe fakahā age kia ia. Kae ʼi tana ʼiloʼi ʼaē neʼe liliu te tagata pilisoni ko te Fakamoʼoni, neʼe punamaʼuli ʼaupito pea mo ina ʼui fēnei: “Ko te tagata fai fakapō ʼaia, ko te Fakamoʼoni ʼi te temi nei?” Pea neʼe ina tali ai leva ke fai hana ako Tohi-Tapu.

Te ʼu Fetogi Taulekaleka

Ko te polokalama ako ʼaia neʼe ina fakamalū moʼoni koa te ʼu loto fefeka ʼo te hahaʼi pilisoni? Koutou tuku ke nātou fakamatala tonu atu tonatou hisitolia.

ʼE fakahā mai e Zdzisław, ko te tagata ʼe ina leleiʼia te metitasio: “ ʼE mole ʼau ʼiloʼi taku ʼu mātuʼa he neʼe nā līaki ʼau ʼi taku kei veliveli, pea neʼe ʼau lotomamahi ʼaupito he neʼe mole he tahi neʼe ʼofa kia ʼau. Neʼe ʼau kamata māmio kovi ʼi taku kei veliveli, pea neʼe ʼau fai fakapō. Kae ʼi taku fakahemala ki te faʼahi ʼaia neʼe ʼau fia fakamate pea neʼe ʼau kumi fakamalotoloto he ʼamanaki moʼoni. ʼI te taʼu 1987, neʼe ʼau lau he Tule Leʼo. Neʼe ʼau ako ai te ʼamanaki ʼaē ki te fakatuʼuake pea mo te maʼuli heʼegata. ʼI taku mahino ʼaē neʼe ʼi ai he ʼamanaki moʼoni, neʼe ʼau līaki leva taku manatu ki te fakamate pea neʼe ʼau kamata ako te Tohi-Tapu. ʼI te temi nei, ʼaki te tokoni ʼa Sehova pea mo toku ʼu tēhina, kua ʼau ʼiloʼi te faka ʼuhiga ʼo te ʼofa.” Talu mai te taʼu 1993, kua liliu ko te tagata faifekau faka minisitelio, te tagata ʼaia ʼaē neʼe fai fakapō ʼi muʼa atu, neʼe pionie vaeluaʼi temi pea ʼi te taʼu ʼaenī kua ʼosi neʼe kamata pionie katoa.

ʼI te tahi faʼahi, neʼe tali atu aipe e Tomasz ke fai hana ako Tohi-Tapu. ʼE ina ʼui fēnei: “Kae neʼe mole ʼau fai fakamalotoloto. Neʼe ʼau ako he neʼe ʼau fia fakahā ʼe lahi te ʼu meʼa ʼe ʼau ʼiloʼi ʼo ʼuhiga mo te tui ʼa te kau Fakamoʼoni ʼa Sehova. Kae neʼe mole ʼau maʼuliʼi te ʼu moʼoni faka Tohi-Tapu. ʼI te tahi ʼaho, neʼe ʼau fakatotonu ke ʼau ʼalu ki te fono. Neʼe fakaʼalofa mai kia ʼau ʼaki he lotomāfana, te tahi ʼu tagata pilisoni kua papitema. Neʼe mahino ai kia ʼau ʼe tonu ke ʼau fakamalū toku loto fefeka pea mo fetogi taku fakakaukau, ka mole ʼau fia fakahāhā ki te hahaʼi ʼe lahi te ʼu meʼa ʼaē ʼe ʼau ʼiloʼi.” Neʼe kamata kofuʼi e Tomasz te ʼulugaaga faka Kilisitiano. (Efesi 4:​22-24) ʼI te temi nei, ʼe ko te Fakamoʼoni kua ina foaki tona maʼuli kia Sehova pea kua papitema, pea ʼe fiafia ʼi tana fai faka mafola ʼi te ʼu kogafale ʼa te hahaʼi pilisoni.

Te ʼu Fihifihia Mai Te ʼu Kaumeʼa ʼĀfea

Ko nātou ʼaē neʼe nātou ako te moʼoni ʼi te fale pilisoni neʼe nātou tau mo te ʼu fihifihia lahi mai tonatou ʼu kaumeʼa ʼāfea ʼaē ʼe nātou kogafale tahi, pea mo te hahaʼi takitaki ʼo te fale pilisoni. ʼE manatuʼi fēnei e te tahi ia nātou: “Neʼe nātou vāʼi tuʼumaʼu ʼau pea neʼe nātou manukiʼi ʼau. Kae neʼe ʼau manatuʼi te ʼu fakaloto mālohi ʼa te ʼu tēhina. Neʼe nātou ʼui mai, ‘Haga faikole kia Sehova. Lau tau Tohi-Tapu pea ʼe maʼuli tokalelei anai tou loto.’ Neʼe tokoni ʼaupito te ʼu palalau ʼaia kia ʼau.”

ʼE ʼui fēnei e te tēhina mālohi ko Ryszard: “Ko te hahaʼi pilisoni neʼe nātou fai mai kia ʼau te ʼu palalau fakaloto mamahi. Neʼe nātou fakatokagaʼi ʼau fēnei: ‘ ʼAlu ki tau ʼu fono, kae ʼaua naʼa ke fia tagata pea ʼaua naʼa ke manatu ʼe ke lelei age ia mātou!’ Neʼe ʼau tau mo te ʼu mamahi ʼuhi ko taku fetogi toku faʼahiga maʼuli moʼo maʼuliʼi te ʼu pelesepeto faka Tohi-Tapu. Neʼe nātou tokahi toku moeʼaga, mo lī ki tuʼa taku ʼu tohi pea mo nātou fakaleta taku ʼu meʼa ʼi te kogafale. Neʼe ʼau faikole kia Sehova ke ina foaki mai te mālohi ke ʼau loto lolomi, pea neʼe ʼau fakamaʼa fakalogologo toku kogafale. Hili kiai te kiʼi temi pea gata ai te ʼu fakafeagai ʼaia.”

ʼE toe ʼui e te tahi ʼu hahaʼi pilisoni ʼaē kua papitema: “ ʼI te sio ʼa te hahaʼi pilisoni kua mātou lotomālohi ʼi tamatou tauhi kia Sehova, pea nātou fetogi tanatou faʼahiga fakafeagai kia mātou. ʼE lagi nātou ʼui mai anai, ‘Koutou manatuʼi ʼe mole tonu ke koutou ʼinu kava, peʼe koutou suluka, peʼe koutou loi.’ Ko te faʼahiga fihifihia ʼaia ʼe tokoni mai kia kita ke kita lolomi tokita sino, pea ke kita līaki vave te ʼu meʼa kovi ʼaē neʼe kita maʼuliʼi. ʼE toe tokoni mai te faʼahi ʼaia ke kita maʼu te ʼu fua ʼo te laumālie.”​—Kalate 5:​22, 23.

Kua Liliu Ko He ʼu Kaugana ʼa Te ʼAtua Kua Foaki Tonatou Maʼuli Kia Te Ia

ʼI te fasiga taʼu mātala ʼo te taʼu 1991, neʼe fakagafua e te hahaʼi takitaki ʼo te fale pilisoni, ke hoko te ʼuluaki papitema ʼi te fale faigaoʼi. Neʼe ko Zdzisław ʼaē neʼe tonu ke papitema. Neʼe kau ai te toko hogofulu-ma-lua hahaʼi pilisoni pea mo te toko 21 ʼo te ʼu tēhina mo tuagaʼane ʼo te ʼu kokelekasio ʼo tuʼa. Neʼe ko he meʼa fakaloto mālohi ki te hahaʼi pilisoni. Neʼe nātou tuputupu ʼi te faʼahi fakalaumālie pea ko te toko lua ia nātou neʼe nā papitema ki muli age ʼi te taʼu pe ʼaia. Hili kiai taʼu e lua, ʼi te taʼu 1993, neʼe fai tuʼa lua ai te papitema pea ko te toko fitu neʼe nātou fakahā ai kua foaki tonatou maʼuli kia Sehova!

ʼI tana fakamatala te papitema ʼaē neʼe fai ʼi Tesepeli, neʼe ʼui fēnei e te nusipepa Wieczór Wrocławia: “ ʼE hū te hahaʼi ki te fale faigaoʼi ʼo nātou fefakaʼalofaʼaki. ʼE nātou feʼiloʼiʼaki fuli. ʼE nātou hage ko he foʼi famili e tahi, pea ʼe nātou logo tahi ʼi tanatou ʼu manatu, mo tonatou faʼahiga maʼuli pea ʼi tanatou tauhi ki te ʼAtua pe e tahi ko Sehova.” Ko “te foʼi famili [ʼaia] e tahi” neʼe ko te toko 135, ʼo kau ai mo te toko 50 hahaʼi pilisoni. Tou felāveʼi mo ʼihi ia nātou.

ʼE fakamatala fēnei e Jerzy ʼaē neʼe papitema ʼi Sūnio: “Logope la ko ni ʼu taʼu ki muʼa atu neʼe kua ʼau logo ki te moʼoni faka Tohi-Tapu, kae ʼi te temi ʼaia neʼe kei fefeka ai toku loto. Neʼe ʼau kaihaʼa, neʼe ʼau mavete mo toku ʼuluaki ʼohoana, mo nofo feiā mo Krystina ka mole ma ʼohoana pea neʼe ma maʼu tamā toe, pea neʼe tuʼa lahi taku toe liliu ki te fale pilisoni​—pea neʼe feiā toku maʼuli.” ʼI tana sio ki te liliu ʼo ʼihi hahaʼi māmio kovi ko he kau Fakamoʼoni lolotoga tanatou nonofo ʼi te fale pilisoni, neʼe ina kamata feʼekeʼaki fēnei, ‘ ʼE mole feala koa la ke ʼau liliu ko he tagata ʼe lelei age tona maʼuli?’ Neʼe ina kole ai ke fai hana ako Tohi-Tapu pea neʼe kamata kau ki te ʼu fono. Kae ko te meʼa ʼaē neʼe maʼuhiga tāfito kia ia, neʼe ko te fakahā age e te procureur de la République, kua taʼu tolu te kua liliu ʼa Krystina ko te Fakamoʼoni ʼa Sehova. ʼE ʼui e Jerzy: “Neʼe ʼau punamaʼuli ʼaupito! Pea neʼe ʼau manatu fēnei: ‘E feafeaʼi kia ʼau? Koteā ʼaē ʼe ʼau fai?’ Neʼe mahino ai kia ʼau neʼe tonu ke ʼau fetogi toku maʼuli ke leleiʼia ʼau e Sehova.” Ko te meʼa ʼaē neʼe hoko, neʼe nātou toe felāveʼi fakafiafia ʼi te fale pilisoni​—ko ia pea mo Krystina pea mo tanā kiʼi taʼahine ko Marzena ʼaē neʼe taʼu 11. Mole tuai pea nā ʼohoana. Logope la ʼe kei nofo ʼi te fale pilisoni pea ʼi ʼihi temi ʼe lotovaivai, kae neʼe ina ako te lea ʼaē ʼe fai ʼaki te ʼu nima pea ʼe lava tokoni ki te hahaʼi tuli ʼo te fale pilisoni.

Ko Mirosław neʼe kua ina fai te ʼu aga ʼe kovi ʼi tana kei ako ʼi te ʼu kalasi veliveli. Neʼe ina leleiʼia te ʼu meʼa ʼaē neʼe fai e tona ʼu kaumeʼa pea neʼe ina kamata mulimuli ki tanatou faʼifaʼitaki. Neʼe lahi te ʼu hahaʼi neʼe ina kaihaʼa pea mo tā. Pea neʼe ʼave ai ʼo pilisoniʼi. ʼE ʼui e Mirosław: “ ʼI taku nofo ʼi te fale pilisoni neʼe ʼau kole tokoni ki te patele. Kae neʼe ʼau lotomamahi ai. Koia neʼe ʼau fakatotonu ai ke ʼau fakamate ʼaki te meʼa kona.” ʼI te ʼaho tonu ʼaē neʼe ina fakatuʼutuʼu ai ke fakamate, neʼe ʼave ia ia ki te tahi kogafale. Neʼe ina maʼu ai Te Tule Leʼo ʼaē neʼe talanoa ki te ʼuhiga ʼo te maʼuli. ʼE ina toe ʼui fēnei: “Ko te ʼu fakamatala faigafua pea mo matala lelei ʼaē neʼe ʼau maʼu ai, neʼe ʼaoga tonu kia ʼau. ʼI te temi leva ʼaia, neʼe kua ʼau fia maʼuli! Koia neʼe ʼau faikole ai kia Sehova pea neʼe ʼau kole ki te kau Fakamoʼoni ʼa Sehova ke nātou fai haku ako.” Neʼe tuputupu vave ʼi tana ako Tohi-Tapu pea neʼe papitema ʼi te taʼu 1991. ʼI te temi nei ʼe pionie vaeluaʼi temi ʼi te fale pilisoni pea ʼe ʼi ai tana pilivilesio ʼaē ko te ʼalu ʼo fai faka mafola ʼi te ʼu kogafale ʼo te hahaʼi pilisoni.

ʼO aʼu mai ki te temi nei, ko te toko 15 hahaʼi pilisoni kua nātou papitema. Kapau ʼe tou fakatahiʼi te ʼu taʼu ʼaē ʼe tonu ke nātou nonofo ai ʼi te fale pilisoni, pea ʼe fakakatoa ko teitei taʼu e 260. Ko ʼihi neʼe faka ʼāteaina ka heʼeki ʼosi tonatou fakatūʼa. Ko te tahi tagata pilisoni neʼe fakahifo tona ʼu taʼu pilisoni e 25 kia taʼu e 10. Pea ko te tokolahi ia nātou ʼaē neʼe nātou fia ʼiloʼi te moʼoni ʼi te fale pilisoni, neʼe nātou papitema ko he kau Fakamoʼoni ʼi tanatou ʼosi faka ʼāteaina. Tahi ʼaē meʼa, ko te toko fā ʼo te hahaʼi pilisoni kua nātou ʼamanaki papitema.

ʼE Fakamoʼoni Te Hahaʼi Takitaki Ki Te Lelei ʼo Te Gāue ʼAia

ʼE tou lau fēnei ʼi te fakamatala ʼa te kau takitaki ʼo te fale pilisoni: “Kua ʼiloga lelei te ʼu fetogi ʼi te aga ʼa te hahaʼi pilisoni. Ko te tokolahi kua tuku tanatou suluka, pea ʼe nātou fakamaʼa tonatou kogafale. ʼE kita sio lelei ki te ʼu fetogi ʼaia ʼi te aga ʼa te hahaʼi pilisoni tokolahi.”

Ko te nusipepa Życie Warszawy ʼe ina fakamatala ko te kau takitaki ʼo te fale pilisoni ʼo Wołów neʼe nātou ʼui “ko te hahaʼi pilisoni ʼe nātou fakalogo lelei; ʼe mole nātou fakatupu he ʼu fihifihia ki te tagata leʼo.” ʼE toe ʼui mai e te alatike ʼaia, ko nātou ʼaē neʼe faka ʼāteaina ka heʼeki ʼosi tonatou fakatūʼa, kua nātou felogoi lelei mo te kau Fakamoʼoni ʼa Sehova, pea ʼe mole nātou toe fai tanatou ʼu aga ʼaē ʼe kovi.

Pea koteā te manatu ʼa te tagata pule ʼo te fale pilisoni? ʼE ina ʼui fēnei: “Ko te gāue ʼa te kau Fakamoʼoni ʼa Sehova ʼi te fale pilisoni ʼaenī ʼe ko he gāue lelei pea mo he tokoni lelei.” Pea ʼe ina toe ʼui fēnei: “ ʼI te lolotoga ʼo tanatou ako Tohi-Tapu [mo te kau Fakamoʼoni ʼa Sehova], ʼe fetogi te ʼu pelesepeto ʼa te hahaʼi pilisoni pea ʼe ko te mālohi foʼou ʼaia ʼaē ʼe ina takitaki tonatou maʼuli. ʼE nātou aga fakaʼapaʼapa. ʼE nātou gāue fakamalotoloto, pea ʼe tahitahiga tanatou fakatupu he ʼu fihifihia.” ʼE mahino ia, ʼe fiafia te kau Fakamoʼoni ʼaē ʼe nātou gāue ʼi te fale pilisoni ʼo Wołów, ʼi te ʼu fakavikiviki ʼaia ʼaē ʼe fai e te hahaʼi takitaki.

Ko te kau Fakamoʼoni ʼaē ʼe nātou ʼaʼahi te fale pilisoni ʼe nātou mahino lelei ki te ʼu palalau ʼaenī ʼa Sesu: “ ʼE ʼau ʼiloʼi taku faga ōvi pea ko taku faga ōvi ʼe nātou ʼiloʼi ʼau. . . . ʼE nātou fagono anai ki toku leʼo, pea ʼe nātou liliu anai ko he faga ōvi pe e tahi, mo he tagata tauhi ōvi pe e tahi.” (Soane 10:14, 16) Māʼiape la mo te ʼu kaupā ʼo te fale pilisoni ʼe mole feala ke ina tāʼofi ia Sesu Kilisito, te Tagata Tauhi Ōvi Lelei, ke ina tānaki ia nātou ʼaē ʼe hage ko hana faga ōvi. Ko te kau Fakamoʼoni ʼo Wołów ʼe nātou loto fakafetaʼi ki te pilivilesio ʼaē ke nātou kau ki te selevisi fakafiafia ʼaia. Pea ʼe nātou falala kia Sehova ke ina tapuakina tuʼumaʼu nātou ke nātou tokoni ki te tahi hahaʼi ʼaē ʼe loto fefeka, ke nātou tali te logo lelei ʼo te Puleʼaga ʼi muʼa ʼo te hoko mai ʼo te fakaʼosi.​—Mateo 24:⁠14.

[Talanoa ʼo te pasina 27]

“ ʼE Nātou Hage Ko Ni Tamaliki”

Ko te kau Fakamoʼoni ʼaē ʼe nātou gāue ʼi te fale pilisoni ʼo Wołów, ʼe nātou ʼui fēnei: “Ka nofo fualoa he tahi ʼi te fale pilisoni, pea ʼi te agamāhani ʼe mole kei ina ʼiloʼi pe koteā te ʼuhiga ʼo te maʼuli ʼāteaina peʼe ko te nofo tokotahi. Ei, ʼe hage ia ko he kiʼi toe, koteʼuhi ʼi tana ʼosi mavae mai te fale pilisoni ʼe mole kei ina ʼiloʼi peʼe feafeaʼi te taupau ʼo ia totonu. Koia la ʼaē, ko te kokelekasio ʼe mole gata pe tana akoʼi kia ia te ʼu moʼoni faka Tohi-Tapu, kae ʼe tonu ke ina teuteuʼi ia ia ke lava maʼuli ʼi te lotolotoiga ʼo te hahaʼi pea mo fakatokagaʼi age kia ia te ʼu tuʼutāmaki pea mo te ʼu fakahala ʼaē ʼe feala ke hoko kia ia. Logope la ʼe mātou tokakaga ke mole mātou puipui fau ia ia, kae ʼe tonu ke mātou tokoni ki ai ke ina kamata hona maʼuli foʼou.”