Ko Te Kau Faka Mafola ʼo Te Puleʼaga ʼe Nātou Fakamatala

ʼE Ako Te Moʼoni e Te Tagata Neʼe Fakafeagai

NEʼE lahi te ʼu meʼa ʼaē neʼe talanoa kiai te ʼu tala logo ʼo ʼuhiga mo te tau faka sivile ʼi Lipelia. Ko te toko lauʼi hogofulu afe hahaʼi neʼe nātou mamate ai pea neʼe kaugamālie age te hahaʼi ʼaē neʼe fakamavae ʼi tonatou fenua. Logope la te ʼu faigataʼaʼia ʼaia, kae ʼe kei ʼi ai te hahaʼi fakamalotoloto ʼe nātou tali te moʼoni, ohage ko tona fakahā e te hisitolia ʼaenī.

Talu mai tona taʼu hogofulu, neʼe ako ia James ʼi te Lotu Luthérienne. ʼI tana ʼosi liliu ko te tagata pule faitohi ʼo te nusipepa faka lotu, neʼe ina fakaʼaogaʼi tona tuʼulaga ʼaia moʼo valokiʼi te kau Fakamoʼoni ʼa Sehova ʼi te ʼu alatike ʼaē neʼe ina tohi. Neʼe ina fai te faʼahi ʼaia kae neʼe mole heʼeki felāveʼi mo he tahi ia nātou.

ʼAki te temi, neʼe tuku e James tana gāue ʼi te nusipepa faka lotu, pea neʼe liliu ko te tagata ʼe pule ʼi te otele. Neʼe haʼele lelei te gāue ʼaia. ʼI te tahi ʼaho, neʼe heka ʼi te hūʼaga ʼo tana otele pea neʼe ʼaʼahi mai ia ia e te ʼu tuagaʼane e toko lua. ʼI tana sio ki tonā teu lelei, neʼe ina fakaafe nāua ke nā hū age ki loto. Kae ʼi tanā ʼosi fakahā age te tupuʼaga ʼo tanā ʼōmai, neʼe ina ʼui age: “ ʼE lahi toku ʼu maʼumaʼua, ʼe mole feala hatatou fai palalau.” Pea neʼe fakahā age ki ai e te ʼu Fakamoʼoni ʼe feala ke apone ki Te Tule Leʼo pea mo te Réveillez-vous! pea neʼe ina tali te ʼu apone ʼaia he neʼe ina loto ke nā mavae. Ia māhina e 12 neʼe momoli kia ia te ʼu nusipepa, kae neʼe ina ʼai te ʼu nusipepa ʼaia ki te kato kae mole ina fufuke pe la ʼo vakaʼi.

ʼI te kovi ʼo te tau faka sivile, neʼe teuteuʼi e James tana kato ʼo ʼai kiai hana falā pea mo hana ʼu meʼa maʼuhiga ke feala hana hola mokā kamata ʼohofiʼi anai tona kolo. ʼI te tahi uhu neʼe faka paʼulu te pulutuki ʼi te tuʼa matapā ʼo tona muliʼi ʼapi pea neʼe ina toʼo fakavilivili ai tana kato ʼo hola. Neʼe hola fakatahi mo te toko lauʼi afe hahaʼi sivile, pea neʼe tonu ke fakalaka ʼi te ʼu fale polisi ʼaē neʼe nātou sivi te hahaʼi. ʼI te ʼu fale polisi ʼaia neʼe tautau kaihaʼa ai te ʼu meʼa ʼa te hahaʼi pea mo hoko matehi ai nātou.

ʼI te ʼuluaki fale polisi, neʼe fakafehuʼi ia James pea neʼe fakatotonu age ke ina avahi tana kato. ʼI tana avahi age, neʼe sio ki loto pea neʼe punamaʼuli ʼaupito. Neʼe mataku ʼi tana sio ʼaē neʼe mole ina ʼave te kato ʼaē neʼe ina ʼai kiai tana ʼu koloā. ʼI tana hola fakavilivili, neʼe ina ʼave te kato ʼaē neʼe ʼai kiai te ʼu Tule Leʼo pea mo te ʼu Réveillez-vous! Kae ʼi te sio ʼa te tagata solia ki te ʼu nusipepa ʼaia neʼe ina ʼui fēnei: “Ko koe ko te Fakamoʼoni ʼa Sehova. ʼE mole mātou kumi koutou, ʼe mātou ʼiloʼi papau ʼe mole koutou loi.” Neʼe toʼo ai e te tagata solia he ʼu nusipepa pea neʼe ina ʼui age kia James ke ʼalu.

Neʼe toe hoko te faʼahi ʼaia ʼi te ʼu fale polisi kehekehe e hiva, he neʼe manatu e te kau ofisie ko James neʼe ko te Fakamoʼoni ʼa Sehova, pea neʼe haohaoa ai. Neʼe kua loto fakafetaʼi ia James he neʼe mole ina ʼave te kato ʼaē neʼe ʼai ai tana ʼu koloā, he kanaʼauala, neʼe lagi matehi ia ia ʼuhi ko tana ʼu koloā.

ʼI tana aʼu ki te fale polisi fakamuli pea mo fakamataku ʼaupito, neʼe fakalialia ʼi tana sio ʼaē neʼe lahi te ʼu sino ʼo te kau mātea neʼe leta ʼi te kele. ʼI tana mataku neʼe fetapā ki te huafa ʼa Sehova. Neʼe faikole ʼo ina ʼui ai kapau ʼe hāofaki ia ia e te ʼAtua ʼi te matehi ʼaia ʼa te hahaʼi pea ʼe tauhi anai kia ia ʼi tona maʼuli katoa.

Neʼe fakahā e James tana kato ki te kau solia pea neʼe nātou toe ʼui fēnei: “ ʼE mole mātou kumi te hahaʼi ʼaia.” Neʼe nātou sioʼi ia ia pea mo ʼui age: “ ʼE nofo tou tēhina ʼi te vaʼe moʼuga ʼaenī. ʼAlu ʼo nofo ai mo ia.” ʼI te temi ʼaia kua fetogi leva te manatu ʼa James ʼo ʼuhiga mo te kau Fakamoʼoni. Neʼe felāveʼi atu aipe mo te tēhina pea neʼe nā fai he ʼu fakatuʼutuʼu ke fai hana ako Tohi-Tapu ʼaki te tohi Mauli Heegata.a

Hili kiai he ʼu ʼaho, neʼe ʼohofiʼi te potu fenua ʼaē neʼe nofo ai pea neʼe tonu ke hola mai ai. Kae ʼi te lakaga ʼaia, neʼe hola ia James ki te vao ʼo ina ʼave pe tana tohi Mauli Heegata! Lolotoga māhina e 11 ʼo tana mole kei fesioʼaki mo te kau Fakamoʼoni, neʼe ina ako tuʼa nima te tohi katoa. ʼI te temi ʼaē neʼe kua feala ai ke toe liliu ai ki te kolo, neʼe ina toe kamata tana ako Tohi-Tapu mo te kau Fakamoʼoni pea neʼe tuputupu vave ʼi te faʼahi fakalaumālie. Mole tuai pea neʼe papitema ia ia, pea ʼi te temi nei ʼe tauhi agatonu ki te ʼAtua mo tona ʼu tēhina fakalaumālie.

[Nota ʼi te lalo pasina]