Koutou Fakahā Te ʼu Nusipepa ʼi Takotou Minisitelio

1, 2. Neʼe malave feafeaʼi ia te Réveillez-vous ! pea mo Te Tule Leʼo ki te maʼuli ʼo te hahaʼi?

¹ “Ko taku hoki lau ʼaē te ʼu nusipepa ʼe lelei, ʼe tō tonu mai, pea ʼe fakaloto mālohi.” Ko te manatu ʼaia ʼa te tokolahi ʼi te malamanei ʼo ʼuhiga mo Te Tule Leʼo pea mo te Réveillez-vous ! ʼE moʼoni, ko tatatou ʼu nusipepa ʼe ko he ʼu meʼa gāue lelei moʼo tala ia te logo lelei ki “te tagata fuape.”​—⁠1 Tim. 2⁠:⁠4.

² Ko te tagata neʼe tokaga tāfito ki tana gāue, neʼe ina toʼo te Réveillez-vous ! he neʼe ina fia lau. Ki muli age, neʼe ina lau mo Te Tule Leʼo ʼaē neʼe tufa tahi mo te Réveillez-vous !, pea ko te alatike neʼe ina uga ia ia ke ina vakavakaʼi lelei te akonaki ʼo te Tahitolu ʼaē ʼe tui kiai talu mai tana kei veliveli. Neʼe tupu ai leva tana fia ako ia te Tohi-Tapu. Hili kiai māhina e ono, pea neʼe papitema. Ko te tahi tagata neʼe ina maʼu tuʼumaʼu te ʼu nusipepa kae neʼe mole ina lau. Pea neʼe ko tona ʼohoana ʼaē neʼe mole fia fai palalau mo te kau Fakamoʼoni ʼaē neʼe ina lau ia te ʼu nusipepa. Ko te meʼa leva ʼaē neʼe malave ki tona loto, neʼe ko te fakapapau ʼi te Tohi-Tapu ʼo ʼuhiga mo te palatiso fakakelekele ʼaē ka nonofo ai anai ia te hahaʼi faitotonu. Pea ʼaki te temi, ko te fafine ʼaia, mo tana tama pea mo te tēhina veliveli ʼo te fafine ʼaia kua nātou liliu ko te ʼu kaugana ʼa Sehova.

3. He koʼe ʼe lelei ke tou foaki lualua te ʼu nusipepa?

³ Tou Foaki Lualua Te ʼu Nusipepa: Ohage ko te ʼu faʼifaʼitaki ʼaē neʼe tou talanoa kiai, ʼe mole tou ʼiloʼi pe ko ai anai ʼaē ka ina lau tatatou ʼu nusipepa peʼe koteā ʼaē ka ina uga anai tanatou fia logo. (Tnk. 11⁠:⁠6) Koia, ʼe lelei ke tou foaki lualua ia Te Tule Leʼo pea mo te Réveillez-vous ! tatau aipe peʼe tou talanoa ki he nusipepa pe e tahi. ʼI ʼihi ʼaluʼaga, ʼe lagi lelei ke tou tufa age he ʼu tuʼuga nusipepa kehekehe ʼi he ʼaʼahi.

4. ʼE tou lava fakatuʼutuʼu feafeaʼi tatatou tufa ia te ʼu nusipepa?

⁴ Tou fakatuʼutuʼu he ʼaho ʼi te vāhaʼa ke tou kau ai ki te tufa ʼo te ʼu nusipepa. ʼI te kaletalio ʼa te kau Fakamoʼoni ʼa Sehova ʼo te taʼu 2005, ko te Moeaki fuli neʼe fakatuʼutuʼu ko “Te ʼAho Tufa ʼo Te ʼu Nusipepa.” ʼIo, kapau ʼe kehekehe te ʼu fakatuʼutuʼu ʼo te kokelekasioʼo pea mo tokotou ʼu ʼaluʼaga takitokotahi, ʼe feala ki ʼihi ke nātou fakatuʼutuʼu he tahi ʼaho moʼo tufa ia te ʼu nusipepa. ʼE koutou fakatuʼutuʼu koa ʼi te vahaʼā fuli, ke koutou tufa ia te ʼu nusipepa?

5. Ko te ʼu faigamālie fea ʼaē ʼe tonu ai ke tou tufa te ʼu nusipepa, pea koteā ʼaē ka tokoni mai ke tou fai ia te faʼahi ʼaia?

⁵ Koutou Fai Hakotou Fakatuʼutuʼu: ʼE tou kau anai ki te tufa ʼo te ʼu nusipepa mo kapau ʼe tou fakatuʼutuʼu ʼi te māhina fuli ke tou kau kiai. ʼE ʼi ai koa ni hahaʼi ʼe koutou ʼave tuʼumaʼu kiai te ʼu nusipepa? ʼE koutou tufa koa te ʼu nusipepa ki te hahaʼi ʼaē ʼe koutou felāveʼi mo nātou ʼi takotou minisitelio? ʼE koutou lava tufa koa te ʼu nusipepa ʼi te ala, ʼi te ʼu fale gāue, pea mo te ʼu lāpalasi? ʼE ʼi ai koa hakotou ʼu nusipepa mokā koutou folau, mo fai fakatau, pea mo he faʼahi pe ʼe koutou ʼolo kiai? Koutou kumi he ʼu temi faigamālie moʼo tufa ki te hahaʼi ia Te Tule Leʼo pea mo te Réveillez-vous !

6. E feafeaʼi hatatou fakaʼaogaʼi lelei ia te ʼu nusipepa ʼāfea?

⁶ ʼE feala ke tou toe fakatuʼutuʼu ke tou tufa tatatou ʼu nusipepa ʼāfea. Tatau aipe peʼe kua ʼāfea te ʼu nusipepa ʼaia, kae ko tona ʼu alatike ʼe kei ʼaoga tuʼumaʼu pe ki te hahaʼi. Koutou tuku ki te hahaʼi ʼaē ʼe fia logo. Ko te ʼu toko miliona hahaʼi neʼe nātou maʼu ʼi Te Tule Leʼo pea mo te Réveillez-vous ! ia “he palalau . . . ʼi tona lakaga totonu.” (Taag. 25⁠:11) Tou fakaʼaogaʼi te ʼu nusipepa ʼaia moʼo tokoni ki te ʼu lauʼi miliona hahaʼi ke nātou ʼiloʼi lelei age ia Sehova pea ke feala hanatou tauhi kiā te ia.