Tou Fakaʼaogaʼi Fakalelei Te Tule Leʼo Pea Mo Te Koutou ʼAʼala!
1 Ko Te Tule Leʼo pea mo te Koutou ʼaʼala! ko te ʼu nusipepa ʼe lahi ʼaupito tona maʼuhiga pea mo lelei ke lau e te hahaʼi ia ʼaho nei. Koteā koa tona tupuʼaga? Koteʼuhi ko te ʼu moʼoni fakalaumālie ʼaē ʼe tuʼu ʼi ai ʼe maʼu ai te maʼuli heʼegata, ko he meʼa lelei ki te maʼuli ʼo te hahaʼi. Kae, tokolahi ʼe mole nātou ʼiloʼi katoa te maʼuhiga ʼo tanatou ʼu meʼa fakalaumālie, peʼe mole mahino kia nātou pe ko te faʼahi fea ʼaē ke nātou maliu kiai moʼo fakafimālieʼi ʼo te potu ʼaia. Ko totatou pilivilesio ʼe ko te faʼifaʼitakiʼi ʼo te ʼapositolo ko Paulo ʼo tokoni ki te hahaʼi ke ava ʼonatou mata fakalaumālie. — Mat. 5:3; Gāue 26:18.
2 Ke ia tatou te manatu tonu pea ke tou teuteu lelei: ʼE lagi ʼe ʼi ai ni hahaʼi ʼe hage ko he ʼu ōvi ʼi tokotou telituale ʼe nātou tali anai te moʼoni. Ko ʼihi ʼe ʼaoga pe kia nātou he fakaloto mālohi ke nātou lau te ʼu nusipepa. Koia, ke ia koutou te manatu tonu pea mo fakalotoʼi te hahaʼi mokā koutou fakahā Te Tule Leʼo pea mo te Koutou ʼaʼala! Ke ia tatou he ʼu nusipepa ke feala ai hatatou fakaʼaogaʼi te ʼu temi faigamālie fuli moʼo tufa ʼo te ʼu nusipepa ʼaia, tatau aipe pe neʼe tou fakatuʼutuʼu ke tou tufa niʼihi tohi.
3 Koteā koa te meʼa ke tou fai ʼo lahi age moʼo tufa ʼo te ʼu nusipepa? ʼUluaki, ʼe tonu ke tou leleiʼia te maʼuhiga ʼo te ʼu tohi ʼaia kia tatou totonu. ʼE tonu ke tou ʼiloʼi lelei te ʼu alatike ʼo te ʼu nusipepa ʼaē ka tou fakahā, pea ko te meʼa ʼaia ʼe fakamālohiʼi ai tatatou falala pea mo tatatou holi fakamalotoloto ʼaē ʼo fakahāhā te ʼu nusipepa. Tou manatuʼi te meʼa ʼaia ʼi tatatou ʼuluaki lau te ʼu nusipepa. Tou tokaga ʼo tāʼofi te ʼu puani ʼaē ʼe ʼaoga ki te minisitelio. Tou fai te fehuʼi ʼaenī: ‘Ko ai ʼaē ʼe ʼaoga tāfito ki ai te alatike ʼaenī? ʼE leleiʼia anai koa e he fafine ʼi tona ʼapi, he tūpulaga, peʼe lagi ko he tahi ʼe gāue pilō? Ko he puani koa ʼe fakatupu fia logo ki ai he tahi kei ako, he tahi kua ʼohoana, peʼe ko he tahi ʼe lotolotolua ʼuhi ko te agaaga ʼo te fenua?’ Moʼo faiva moʼoni, ʼe tonu anai ke tou faʼafai ʼi te fakahā ʼo te ʼu nusipepa ʼaē neʼe tou lau pea mo tou fiafia ʼo fakahā te ʼu alatike ʼi te temi totonu.
4 Ke tou fakaʼaogaʼi lelei te ʼu nusipepa ʼāfea: Tou manatuʼi ko Te Tule Leʼo pea mo te Koutou ʼaʼala! ʼe mole puli tonā maʼuhiga, tatau aipe pe neʼe mole tufa lolotoga te māhina peʼe ko te ʼu māhina e lua ki muli age ʼaē neʼe tonu ke tufa ai. Ko te manatu ʼaē ʼe tuʼu ʼi ai neʼe mole liliu ia ʼo siʼisiʼi tona maʼuhiga ʼuhi ko te haʼele ki muʼa ʼo te temi, pea ʼaua naʼa tou lotolotolua ʼo fakahā ni ʼu nusipepa ʼāfea mokā kei lelei. ʼI te tuku ʼo te ʼu nusipepa ʼāfea ke tuʼuga pea ʼe mole tou fakaʼaogaʼi ʼe tou fakahā ai leva ʼe mole tou leleiʼia te maʼuhiga ʼo te ʼu meʼa gāue ʼaia. Ko te nusipepa takitahi ʼe tuʼu ʼi ai te ʼu moʼoni moʼo fakatokaga pea mo fakafimālie ʼo te fia kai fakalaumālie. Ke ʼaua naʼa tuku kehe te ʼu nusipepa ʼāfea pea mo galoʼi leva ia, kae ʼe lelei age te fai ʼo he faiga makehe ʼo tufa ki te hahaʼi ʼaē ʼe lotolelei peʼe tuku ʼi he faʼahi ʼe mole hā mokā ʼe mole nātou nonofo ʼi tonatou ʼapi.
5 Ko te nusipepa Koutou ʼaʼala! neʼe ina tokoniʼi te hahaʼi tokolahi, ʼi te kamataʼaga neʼe mole nātou loto ki te ʼu meʼa fakalaumālie kae neʼe nātou liliu leva ʼo ʼiloʼi te ʼu meʼa fakalaumālie ʼe ʼaoga kia nātou. Ko Te Tule Leʼo ʼe ko te meʼa gāue tāfito ʼo ʼuhiga mo te foaki ʼo te meʼa kai fakalaumālie ki te hahaʼi ʼa Sehova. Ko te ʼu nusipepa ʼaia ʼe nā fefakakatoaʼaki lelei, pea ʼe nā fai he gāue maʼuhiga ʼi te faka mafola ʼo te logo lelei.
6 Kapau ʼe tou faigaʼi fakalelei te ʼu temi faigamālie fuli moʼo tufa ʼo te ʼu nusipepa, ʼe feala anai ke tou falala katoa ki tonatou ʼaoga lelei ʼi te faʼahi fakalaumālie ki te hahaʼi ʼe hage ko he ʼu ōvi. ʼE tou fia taupau anai te manatu tonu, mo lelei tatatou teuteu, pea mo tou kau tuʼumaʼu ki te minisitelio. ʼUhi ko tatou ko te kau faka mafola ʼo te logo lelei, ʼe tonu ke tou kau fuli ʼo fakaʼaogaʼi fakalelei Te Tule Leʼo pea mo te Koutou ʼaʼala!