Neʼe Nā “Manavasiʼi Ki Te ʼAtua Moʼoni”
LOLOTOGA te nofo popūla ʼa te kau Iselaelite ʼi Esipito, ko te ʼu fafine faifānau ko Sifala pea mo Pua, neʼe nā tau mo te ʼaluʼaga faigataʼa. ʼI tana fia tāʼofi te fakahahaʼi ʼa te kau matāpule, neʼe fai e Falaone ki te ʼu fafine ʼaia te fakatotonu ʼaenī: “Mokā koulua tokoni anai ki te ʼu fafine Hepeleo ke nātou faifānau . . . , kapau ʼe ko he tama, pea ʼe tonu ke koulua matehi ia ia.”—Ekesote 1:15, 16.
Ko Sifala pea mo Pua neʼe nā “manavasiʼi ki te ʼAtua,” koia neʼe nā lototoʼa ʼo “mole nā fai te meʼa ʼaē neʼe ʼui age kia nāua e te hau ʼo Esipito.” Kae neʼe nā hāofaki te maʼuli ʼo te ʼu kiʼi tamaliki tagata, logope la neʼe feala ke matehi nāua ʼi tanā fai te faʼahi ʼaia. Neʼe “fai [e Sehova] he ʼu meʼa lelei ki te ʼu fafine faifānau ʼaia,” pea neʼe ina fakapale nāua ʼuhi ko tanā hāofaki te maʼuli ʼo te ʼu kiʼi tamaliki tagata.—Ekesote 1:17-21.
ʼE fakahā lelei mai e te fakamatala ʼaia, ʼe leleiʼia e Sehova ia nātou ʼaē ʼe nātou tauhi kia te ia. Neʼe feala pe ke manatu ia Sehova, logope la te lototoʼa ʼa Sifala pea mo Pua, kae neʼe ko he meʼa neʼe tonu pe ke nā fai. ʼE mole feala ki he fafine fakapotopoto ke ina matehi he ʼu kiʼi toe! Kae neʼe ʼiloʼi e Sehova neʼe fai e he ʼu hahaʼi he ʼu meʼa fakalialia ʼuhi ko tanatou mataku ki te tagata. Neʼe mahino kia ia ko te meʼa ʼaē neʼe fai e te ʼu fafine faifānau ʼaia, neʼe mole tupu ʼuhi pe ko tanā agalelei, kae neʼe tupu ko tanā manavasiʼi ki te ʼAtua pea mo tanā fia tauhi lelei kia te ia.
ʼE feala ke tou loto fakafetaʼi heʼe tou tauhi ki he ʼAtua ʼe ina tokagaʼi tatatou ʼu gāue agatonu! ʼE moʼoni, lagi ʼe mole he tahi ia tatou neʼe hoko ki ai te ʼahiʼahi ʼaē neʼe hoko kia Sifala pea mo Pua. Kae kapau ʼe tou lotomālohi ʼo tou fai te meʼa ʼaē ʼe faitotonu—pe ʼi te faleako, pe ʼi te fale gāue, pe ʼi he tahi ʼaluʼaga—ʼe mole meʼa noaʼi e Sehova totatou ʼofa agatonu. Kae “e ina fakapale natou e natou kumi iaʼia.” (Hepeleo 11:6) Ei, “e mole agakovi te Atua pea e mole ina galoi tautou gaue mo toutou ofa nee koutou fakaha o uhiga mo tona Huafa, i tautou tauhi te kaigalotu pea e kei koutou fai aipe.”—Hepeleo 6:10.