Te Meʼa ʼAē Neʼe Ina Leleiʼia ʼi New York

TALU mai te ʼu taʼu 1950, neʼe tohi te ʼu kupu ʼe hā lelei ʼi te ʼu fale gāue ʼo te Sosiete Watchtower ʼi Brooklyn, ʼi New York. ʼE fakamanatuʼi ai ki te hahaʼi pea mo te kau tulisi ʼaē ʼe fakalaka ai ke nātou lau te Tohi-Tapu ʼi te ʼaho fuli. Koʼeni te tohi, neʼe momoli mai e te taʼahine Fakamoʼoni, pea ʼe ina fakahā mai te ʼu fua lelei ʼo te ʼu kupu ʼaia.

“Neʼe ʼau fai palalau mo toku kaumeʼa ʼe ma ako tahi, ʼo ʼuhiga mo te meʼa ʼaē ka ʼau fai mokā ʼosi taku ako ʼi te lisē. Neʼe ʼau kamata palalau age ki te Petele, te ʼu pilō tāfito ʼa te kau Fakamoʼoni ʼa Sehova, pea neʼe loto fiafia ai. Pea neʼe ina ʼui mai, neʼe fualoa tana nofo ʼi New York. Ko tona famili neʼe mole tauhi lotu lelei, kae ʼi te uhu fuli mokā fakasiosio ʼi tana matapā fakamālama, neʼe sio ki te falefata ʼe tohi ai te ʼu kupu ʼaenī ‘Koutou Lau ʼi Te ʼAho Fuli Te Tohi-Tapu Ia Te Folafola ʼa Te ʼAtua.’ Pea ʼi te ʼaho fuli ʼi muʼa ʼo tana ʼalu ki te ako, neʼe ina lau tana Tohi-Tapu.

ʼI tana mavae mai te kolo ʼaia, ʼe ina ʼui mai ko te meʼa ʼaē neʼe ina leleiʼia ʼo ʼuhiga mo New York, ʼe ko te ʼu kupu ʼaē neʼe ina fakamanatuʼi age ke ina lau tana Tohi-Tapu. Kae ʼaki te ʼu kupu ʼaia ʼaē ʼe tohi ʼi te foʼi fale ʼo te Watchtower, kua liliu ko he meʼa māhani tana lau te Tohi-Tapu, pea ʼe kei ina fai te faʼahi ʼaia ʼi te ʼaho fuli pe.”

ʼE ko he meʼa lelei te lava kamata ʼo te ʼaho ʼaki te lau ʼo he kiʼi koga ʼo te Folafola ʼa te ʼAtua! Kapau ʼe tou fai te faʼahi ʼaia, pea ʼe tou mahino lelei anai te ʼu palalau fakafiafia ʼaenī ʼa te ʼapositolo ko Paulo: “Te Tohi tapu, e feala ke ina foaki atu kia te koe te poto, o uhiga mo te mauli aki te tui e ia Kilisito Sesu.”​—⁠2 Timoteo 3⁠:​15-17.