Ko Tatou Ko Te Hahaʼi Tui
ʼE Tala Te ʼAmanaki Faka Kilisitiano ʼi Sénégal
TALU mai te ʼu temi ʼāfea, ʼe kau te ika ʼi te ʼu meʼa kai tafito ʼa te tagata. Talu mai te ʼu taʼu ʼe lauʼi afe, ʼe gelu te hahaʼi ʼi te ʼu matatai, ʼi te ʼu matavai peʼe ko te ʼu vaitafe. Ko ihi ʼapositolo ʼa Sesu Kilisito neʼe ko te ʼu tagata tautai ʼi te Tai ʼo Kalilea. Kae neʼe fakahā age e Sesu kia nātou te tahi faʼahiga gelu. ʼE ko te gelu fakalaumālie ʼaē ka ʼaoga anai ki te ʼu tagata tautai pea mo te ʼu ika.
ʼO ʼuhiga mo te gelu ʼaia, neʼe folafola age e Sesu ki te tagata tautai ko Petelo: “E kamata atu i te aho-nei, e ke gelu tagata mauli anai.” (Luka 5:10) Pea ʼi te temi nei ʼe hoko te faʼahiga gelu ʼaia ʼi te ʼu fenua e 230 tupu, ʼo kau kiai mo Sénégal. (Mateo 24:14) Pea ko te ʼu “tautai tagata” ʼo te temi nei ʼe nātou tala ʼaki he lototoʼa tanatou ʼamanaki faka Kilisitiano ki te hahaʼi fuli pe.—Mateo 4:19.
Ko Sénégal ʼe tuʼu ʼi te potu taupotu ʼo te potu uesite ʼo Afelika. ʼE faka tuʼakoi te fenua ʼaia e te toafa ʼo Sahara ʼi te potu noleto, pea ʼi te potu saute e te ʼu vao matuʼa ʼo te potu fenua ko Casamance. Pea ko te fenua ʼo Sénégal ʼe havilivili e te ʼu matagi vela pea mo magemage ʼo te toafa, pea mo te ʼu matagi mokomoko ʼo te Tai Atlantique. Pea ko te toko hiva miliona tupu hahaʼi ʼe maʼuʼuli ai. Ko te hahaʼi ʼo Sénégal ʼe ʼiloa ʼi tanatou tali kāiga. Ko te tokolahi ʼo te hahaʼi ʼe mole ko he kau Kilisitiano. Tokolahi ia nātou ʼe ko he ʼu tagata tauhi ōvi, peʼe nātou tauhi te faga pipi, te faga kamelo pea mo te faga tao. ʼE ʼi ai mo te ʼu tagata gāue kele, ʼe nātou to te pinati, mo te ʼu fuʼu vavae pea mo te laisi. Ei, pea ʼe ʼi ai mo te ʼu tagata tautai, ʼe nātou toho mai te tai Atlantique pea mo te ʼu tuʼuga vaitafe ʼo tonatou fenua, te ʼu kupega kua fonu ai te ika. Ko te gelu ʼe ko he koga maʼuhiga ʼaupito ʼi te maʼuli faka ekonomika ʼo Sénégal. Pea ko te meʼa kai tāfito ʼo te fenua, ʼe ko te ceebu jën, ʼaē ʼe fai ʼaki te laisi, mo te ika pea mo te lauʼakau.
“He u Tautai Tagata”
ʼI Sénégal ʼe gāue mālohi ai te toko 863 kau fai faka mafola ʼo te Puleʼaga ʼo te ʼAtua. Ko te gelu fakalaumālie neʼe kamata ʼi te ʼu taʼu 1950. Pea ʼi te taʼu 1965 neʼe avahi ai ʼi te kolo hau ko Dakar, te filiale ʼa te Sosiete Watchtower. Neʼe kamata ʼōmai ai mai te ʼu fenua mamaʼo, te ʼu misionea ʼe ko “he u tautai.” Neʼe kamata ai te ‘gelu’ pea neʼe haga haʼele ai ki muʼa te fagonogono ʼa te ʼamanaki faka Kilisitiano ʼi Sénégal. Ki muli age, neʼe laga te ʼu pilō foʼou ʼo te filiale ʼi Almadies ʼi te tuʼa kolo ʼo Dakar, pea neʼe momoli kia Sehova ʼi Sūnio ʼo te taʼu 1999. Neʼe ko he temi fakafiafia ʼaia!
ʼE Ko He Meʼa Faigataʼa Te Tali ʼo Te Moʼoni
ʼE lahi te ʼu hahaʼi ʼaē ʼe tau mo te ʼu ʼaluʼaga kehekehe ʼe faʼa fai ki ai te gāue, pea ko ʼihi ia nātou ʼe nātou tali lelei te logo lelei ʼo te ʼamanaki ʼaē ʼe tou maʼu ʼi te Folafola ʼa te ʼAtua. Logope la ko te tokolahi ʼe mole nātou maʼu te ʼatamai mālama ʼo te Tohi-Tapu, kae ʼe nātou fiafia ʼi tanatou ʼiloʼi ʼaē kua vave hoko te ʼu fakapapau ʼa Sehova ʼAtua ʼaē neʼe ina fai ki tana ʼu polofeta ʼo te temi ʼāfea.
ʼE ʼaoga ke kita lototoʼa moʼo mulimuli tuʼumaʼu ki te ʼu pelesepeto faka Kilisitiano, tafito la mokā hoko mai he ʼu meʼa ʼe ʼi ai hona pikipikiga mo te ʼu talatisio faka famili pe ko te ʼu agaʼi fenua. Ohage la ʼi Sénégal, ʼe ko he agaʼi fenua ke ʼohoana he tagata mo he ʼu tuʼuga fafine. Koutou fakatokagaʼi age muʼa pe neʼe feafeaʼi te kamata ako ʼo te Tohi-Tapu e te tagata neʼe ʼohoana mo fafine e lua. Neʼe lotomālohi koa moʼo tali te moʼoni faka Kilisitiano pea mo mulimuli ki te fakamaʼua faka Tohi-Tapu ʼaē ke ʼohoana he tagata mo he fafine pe e tahi? (1 Timoteo 3:2) Pea neʼe ina taupau koa tona ʼohoana ʼo tona temi tūpulaga, tona ʼuluaki ʼohoana? Neʼe mulimuli kiai te tagata ʼaia, pea ʼi te temi nei ʼe ko te tagata ʼāfea faiva ʼi te foʼi kokelekasio kaugamālie ʼi Dakar. Neʼe toe tali foki te moʼoni e tana ʼuluaki ʼohoana pea mo tana ʼu tamaliki e 12, ko te ʼu tamaliki e 10 mo tona ʼuluaki ʼohoana pea ko te toko 2 mo tona lua ʼohoana ʼāfea.
Ko te tahi fihifihia moʼo tali te ʼamanaki faka Kilisitiano ʼe ko te mole poto lautohi. Ko tona faka ʼuhiga koa ko te hahaʼi ʼaē mole poto lautohi ʼe mole feala hanatou tali pea mo maʼuliʼi te moʼoni? Kailoa ia. Koutou fakatokagaʼi te faʼifaʼitaki ʼaenī ʼo Marie, ko te faʼe ʼe faʼa gāue pea ʼe ina taupau tana ʼu tamaliki e valu. Neʼe mahino fakavilivili kia ia te maʼuhiga ʼaē ke fai palalau ki he ʼu kiʼi vaega faka Tohi-Tapu mo tana ʼu tamaliki ʼi muʼa ʼo tanatou ʼolo ki te ako pea mo tana ʼalu ki te gāue. Kae e feafeaʼi hana fai te faʼahi ʼaia heʼe mole poto ʼi te lautohi? ʼI te uhu fuli, ʼe ina toʼo te kiʼi tohi Tou Vakaʼi Te Tohi-Tapu ʼi Te ʼAho Fuli pea ʼalu ʼo tuʼu ʼi te ala ʼone ʼi tona muʼa ʼapi. Pea ka fakalaka age he tahi, pea ina kole age ke ina lau age te koga tohi. Kapau ʼe tali lelei e he tahi, pea ʼe ina fakatoʼo age te kiʼi tohi pea mo ʼui fakamalotoloto age: “Mole ʼau poto ʼi te lautohi, pea fakalelei siʼi ʼou loto ʼe feala la hau lau mai te koga tohi ʼo te ʼaho ʼaenī?” Pea ʼe ina fakalogo lelei te lau age ʼo te koga tohi. ʼI tana ʼosi fakamālo age ki ai, ʼe foimo hū atu aipe ki tona loto fale ʼo fai palalau ki te koga tohi ʼaia mo tana ʼu tamaliki ʼi muʼa ʼo tanatou ʼolo ki te ako!
ʼE Tali e Te Faʼahiga Hahaʼi Fuli
ʼI Sénégal, ʼe ʼi ai te ʼu hahaʼi ʼe heheka ʼi te ʼu vaʼe ala ʼo fakatau ika, peʼe fakatau lauʼakau, peʼe nātou fakatau te ʼu fuaʼi ʼakau ʼi te lapalasi fakatauʼaga meʼa peʼe nātou heheka ʼi te lalo fuʼu ʼakau lahi ko te baobab pea nātou ʼiʼinu ai te ataya, ko te faʼahiga tī ʼe fuluʼi hega pea mo kona. Pea ko te ʼu tēhina e lua neʼe nā lotomālohi ke nā fakahā te logo lelei ki te hahaʼi fuape ʼaē ʼe felāveʼi mo nāua, pea neʼe nā fai palalau mo te tagata māʼimoa ʼe kole falā ʼi te vaʼe ala. ʼI tanā ʼalofa ki ai, neʼe nā ʼui fēnei: “Ko te tokolahi ʼe nātou foaki atu hau falā kae ʼe mole nātou tutuʼu ʼo fai palalau mo koe. Kae ʼe ma ʼōmai ʼo palalau mo koe ki te logo ʼe maʼuhiga ʼaupito ki tou ka haʼu.” Pea neʼe punamaʼuli te tagata māʼimoa ʼaia ʼaē neʼe kole falā. Pea neʼe hoko atu fēnei e te ʼu tēhina: “ ʼE ma fia fai atu he fehuʼi, he koʼe ʼe ke ʼui ʼe kua lahi te ʼu mamahi ʼi te malamanei?” Pea neʼe tali fēnei age e te tagata: “Heʼe ko te finegalo ʼo te ʼAtua.”
Pea neʼe nā fai palalau mo ia ʼaki te Tohi-Tapu pea mo fakamahino age ia Apokalipesi 21:4. Neʼe malave ʼaupito ki te loto ʼo te tagata māʼimoa ʼaia, te logo ʼo te ʼamanaki ʼaia pea mo te ʼofa age ʼa te ʼu tēhina ʼi tanā tutuʼu ʼo fai palalau mo ia ki te Tohi-Tapu. Pea neʼe tagi ai te tagata. Neʼe mole kole falā age ki te ʼu tēhina, kae neʼe ina kole mamahi age ke nā toʼo fuli te ʼu kiʼi piesi ʼaē neʼe ʼavage kia ia ʼi tana kole falā. Neʼe mālohi tana kole mamahi ki te ʼu tēhina, ʼo tokagaʼi ai e te hahaʼi ʼaē neʼe fakalaka age ʼi te ala. Pea neʼe faigataʼa ki te ʼu tēhina tanā fakalotoʼi te tagata ke ina taupau tana falā. Pea neʼe tali lelei leva e te tagata, kae neʼe ina kole mamahi age kia nāua ke nā toe liliu age ʼo ʼaʼahi ia ia.
ʼE toe aʼu foki te gelu fakalaumālie ki te univelesitē lahi ʼo Dakar. Ko Jean-Louis, ʼe ko he tūpulaga ʼe ako ke tōketā, pea neʼe ina kamata ako te Tohi-Tapu. Neʼe ina tali fakavilivili te moʼoni, ʼo ina momoli ai tona maʼuli kia Sehova pea papitema. Neʼe holi ia ke gāue maʼa te ʼAtua ʼi te selevisi pionie katoa, kae neʼe ina toe leleiʼia foki mo tana ako tōketā. ʼUhi ko te kotala ʼaē neʼe ina fai mo tona fenua, neʼe tonu ia ke ina fakaʼosi katoa tana ako tōketā. Pea lolotoga te temi ʼaia neʼe kamata gāue pionie vaeluaʼi temi. ʼI te ʼosi maʼu ʼo tana pepa tōketā, neʼe fakaafe atu aipe ke ʼalu ʼo tōketā ʼi te Petele lahi ʼo Afelika. Pea ko te tahi tūpulaga ʼaē neʼe fai faka mafola ki ai ʼi te Univelesitē ʼo Dakar, kua gāue nei ʼi te famili ʼo te Petele ʼo tona fenua.
Ei, ʼe fua lelei te gelu fakalaumālie ʼi Sénégal. Ko te ʼu tohi faka Tohi-Tapu ʼa te kau Fakamoʼoni ʼa Sehova, ʼe leleiʼia ʼaupito e te hahaʼi pea kua tā nei ʼi te faka Wolof te lea ʼo te fenua. Ko te tokolahi ʼo te hahaʼi fakamalotoloto neʼe nātou tali te logo lelei he neʼe nātou logo kiai ʼi tanatou lea. ʼAki te tapuakina ʼa Sehova, ʼe lahi anai te tahi ʼu ika fakatātā ʼaē ka puke ʼi te kupega, e te ʼu “tautai tagata” faiva ʼo Sénégal, ʼaē ʼe nātou haga tala te ʼamanaki faka Kilisitiano ʼaki te tui pea mo he lototoʼa.
[Paki ʼo te pasina 31]
SÉNÉGAL
[Paki]
ʼE tala te ʼamanaki faka Kilisitiano ʼi Sénégal
[Haʼuʼaga ʼo te paki]
Mountain High Maps® Copyright © 1997 Digital Wisdom, Inc.