Tou Gelu He ʼu Tagata ʼi Te ʼu Vai Katoa ʼo Te Malamanei

“Kapau ʼe ʼau tala te logo lelei, ʼe mole ko he meʼa ke ʼau fakavikiviki kia te ʼau, kae ʼe ko he meʼa maʼuhiga neʼe fakamaʼua kia ʼau. Ei, malaʼia kia ʼau mo kapau ʼe mole ʼau tala te logo lelei!” — 1 Kolonito 9:16.

1, 2. a) Ko ai koa ʼaē ʼe fakahoko te ʼu palalau ʼaē ʼe tuʼu ʼi te tohi ʼo 1 Kolonito 9:16, pea he koʼe koa ʼe koutou tali feiā? b) Koteā koa te maʼua neʼe tali e te kau Fakamoʼoni ʼa Sehova?

KO AI koa ʼi totatou 20 sekulo ʼe nātou fakahoko te ʼu palalau ʼaenī ʼa Paulo? Ko ai koa ʼaē neʼe ʼolo haʼele ʼi te malamanei ʼo gelu te toko miliona tagata pea mo fafine “ ʼaē ʼe nātou ʼiloʼi te maʼuhiga ʼo te ʼu meʼa fakalaumālie kia nātou”? (Mateo 5:3.) Ko ai koa ʼaē neʼe tali te pilisoni pea mo te mate, pea ke mamahi ʼi te ʼu potu fuli ʼo te kele, ʼuhi ko tanatou fakalogo ki te fakatotonu ʼaē ʼa Kilisito ʼi te tohi ʼa Mateo 24:14?

² ʼE tali fēnei e te hisitolia: ko te kau Fakamoʼoni ʼa Sehova. ʼI te taʼu pe ʼaenī kua hili atu, neʼe ko te toko fā miliona tupu kau Fakamoʼoni, neʼe ʼolo haʼele ʼi te ʼu ʼapi ‘ ʼo faka mafola te logo lelei’ ʼi te ʼu fenua pea mo te ʼu telituale e 211, pea ʼi te ʼu lea e 200 tupu. Neʼe mole ko he kūtuga pe ia neʼe fili ʼi te kau misionea ʼaē neʼe akoʼi. Kailoa ia, ko te kau Fakamoʼoni fuli ʼa Sehova ʼe nātou ʼiloʼi tonatou maʼua ʼaē ko te faka mafola pea mo fai te ʼu ako ʼi te ʼu ʼapi pea mo te ʼu faʼahi faigamalie fuli. He koʼe koa ʼe nātou ʼiloʼi te maʼuhiga ʼo te fakahā ʼo tanatou tui ki niʼihi? Heʼe nātou ʼiloʼi ko te mālama ʼo te Tohi-Tapu ʼe ina fakamaʼua nātou ki te faʼahi ʼaia. — Esekiele 33:8, 9; Loma 10:14, 15; 1 Kolonito 9:16, 17.

Gelu te ʼu tagata: ko te gāue fakatalakitupua faka malamanei

3. ʼE tonu koa ke laulahi feafeaʼi te telituale ʼo te gelu ʼaia?

³ Ko te gelu lahi ʼaia ʼe mole faka tuʼakoi, ʼe he liuʼa pe ʼe ko he matavai, pe ʼe ko he moana. Kailoa ia, ohage ko te fakatotonu ʼa Sesu, ʼe tonu ke fai “ ʼi te ʼu fenua fuli”. (Maleko 13:10.) Ia muʼa ʼo tana haega ki tana Tāmai, neʼe ʼui e Sesu ki tana kau tisipulo, ʼo fēnei: “Koutou ʼolo pea mo koutou fai he kau tisipulo ʼo te ʼu hahaʼi ʼo te ʼu fenua fuli, ʼo koutou papitemaʼi ʼaki te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou akonakiʼi ke nātou maʼuliʼi te ʼu meʼa fuli neʼe ʼau fakatotonu atu. Pea koʼeni ʼe ʼau nofo mo koutou ʼi te ʼaho fuli ʼo aʼu ki te temi fakaʼosi ʼo te ʼu faʼahiga meʼa ʼo te tuʼu ʼaenī.” — Mateo 28:19, 20.

4. a) Koteā ʼaē neʼe fakapuna’maʼuli ki te kau ʼuluaki tisipulo ʼa Sesu, ʼaē neʼe ko te kau Sutea? b) Koteā koa te manatu ʼa te kau Fakamoʼoni ʼa Sehova ʼo ʼuhiga mo te lahi ʼo tanatou gāue faka mafola?

⁴ Ko te kau tisipulo ʼa Sesu ʼaē ko te kau Sutea, neʼe lagi nātou puna’maʼuli ʼi te fakatotonu ʼaia. Neʼe ina ʼui age ki tana kau tisipulo Sutea, ke nātou ʼolo nei ki te kau Senetile “ ʼe mole maʼa” ʼo te ʼu fenua fuli pea mo akoʼi ia nātou. Neʼe ʼaoga ke toe vakaʼi tanatou faʼahiga manatu ke nātou mahino ki te fakatotonu ʼaia pea mo fai te gāue ʼaē neʼe foaki age kia nātou (Gāue 10:9-35). Kae neʼe mole feala hanatou hāo ai; neʼe ʼui age e Sesu kia nātou ʼi te fakatā: “Ko te gāueʼaga ko te malamanei.” Koia, ko te kau Fakamoʼoni ʼa Sehova ia ʼaho nei, ʼe ʼiloa nātou ʼi te malamanei ʼi tanatou gelu faitotonu. ʼE mole he vai faka telituale ʼe feala ke ina tāʼofi tanatou gāue ʼaia mai te ʼAtua. ʼI te ʼu fenua ʼaē ʼe tapuʼi ai te ʼāteaina faka lotu, ʼe nātou fai fakafūfū te gāue. Pea tahi foki, ʼe nātou ʼiloʼi ʼe tonu ke nātou fai fakavilivili te gelu ʼaia. Koteā tona tupuʼaga? Koteʼuhi ko te ʼu meʼa faka malamanei pea mo te ʼu fakakikite faka tohi-tapu ʼaē ʼe hoko ʼe nātou fakahā kua tou aʼu ki te faʼahi fakaʼosi ʼo te gelu faka malamanei. — Mateo 13:38; Luka 21:28-33.

Ko te gelu ʼe mafola ʼi te malamanei

5. Ko te faʼahiga hahaʼi feafeaʼi koa ʼaē ʼe nātou tali lelei te gelu faka malamanei ʼaia?

⁵ Tokolahi ʼi te kau hahaʼi fakanofo ʼo te Puleʼaga neʼe “geluʼi” ʼi te ʼu fenua ʼi muʼa atu ʼo te taʼu 1935, taʼu neʼe ʼui ai kua nātou katoa. Koia, talu mai te taʼu 1935, ko te kau Fakamoʼoni ʼa Sehova ʼe nātou kumi te hahaʼi agavaivai ʼaē ʼe fakahā e te Tohi-Tapu “ ʼe nātou maʼu anai te kele”. (Pesalemo 37:11, 29.) Ko nātou ʼaia, ʼe nātou “toʼe pea mo tagi ʼo ʼuhiga mo te ʼu meʼa fakalialia fuli ʼe hoko”. ʼE nātou mulimuli ki te fai pule ʼa te Puleʼaga ʼo te ʼAtua ia muʼa ʼo te haga ʼo te “mamahi lahi” ʼo tautea te ʼu faʼahiga meʼa ʼo te tuʼu fakahehema mo fakahala ʼa Satana, pea mo lī tana kau ʼatolasio ki te “afi kakaha” ʼo te faka ʼauha ʼo talu ai ʼosi. — Esekiele 9:4; Mateo 13:47-50; 24:21.

6, 7. a) Koteā te ʼu fakatuʼutuʼu neʼe fai ʼi te taʼu 1943 ʼo ʼuhiga mo te gāue faka mafola? b) Koteā tona ʼu fua?

⁶ Ko te gelu faka malamanei neʼe fua manuʼia koa? Ko te ʼu meʼa ʼaē neʼe hoko ʼe tali ki te fehuʼi ʼaia. ʼI te taʼu 1943, ʼi te lolotoga haʼaki ʼo te Lua Tau faka malamanei, ko te kau tēhina fakanofo agatonu ʼo te Kolesi pule ʼo te kau Fakamoʼoni ʼa Sehova ʼi Brooklyn, New York, neʼe nātou fakakikite ko te gelu lahi ʼe hoko anai. Koia, koteā anai te ʼu fakatuʼutuʼu ka faia? — Fakahā 12:16, 17.

⁷ ʼI te taʼu 1943 neʼe fakatuʼu e te Sosiete Watchtower te fale ako misionea ʼe higoa ko Kalaate (faka hepeleo: “Tānakiʼaga ʼa te kau Fakamoʼoni”; Senesi 31:47, 48) neʼe ina kamata akoʼi te toko teau misionea ʼi te ʼu māhina e ono pea mo fekauʼi nātou ki te ʼu potu taupotu ʼo te kele ko he kau tautai fakatā. Pea, neʼe ko te toko 126 329 Fakamoʼoni neʼe nātou tautai tagata ʼi te ʼu fenua e 54. Hili ki ai taʼu e hogofulu, ko nātou ʼaia neʼe nātou fakalaka ki te toko 519 982 kau Fakamoʼoni ʼi te ʼu fenua e 143! ʼIo, ko te fale Ako ʼo Kalaate neʼe ina akoʼi te kau tautai faʼa kātaki, neʼe nātou tali lelei ke nātou felāveʼi mo te ʼu agaʼi fenua kehekehe pea mo tali ke nātou maʼuli ai moʼo gelu ʼi te ʼu vai foʼou ʼaia. Ko tona fua, ko te lauʼi afe hahaʼi loto manavaʼofa neʼe tali ki ai. Ko te kau misionea pea mo te kau Fakamoʼoni ʼo te ʼu fenua ʼaia neʼe nātou gāue fakatahi, ʼonatou tofa te tafitoʼaga ʼo te tuputupu taulekaleka ʼaē ʼe hoko ʼi te temi nei.

8, 9. a) Ko te ʼu faʼifaʼitakiʼaga feafeaʼi koa ʼo te gāue faka misionea fakatalakitupua ʼe feala ke tou talanoa ki ai? b) Ko te tuputupu fakatalakitupua misionea feafeaʼi koa neʼe hoko ʼi tonatou ʼu telituale? (Vakaʼi ʼi te Annuaire des Témoins de Jéhovah 1992)?

⁸ Ko ʼihi kau Fakamoʼoni agatonu kua matutua nei ia ʼaho nei ʼaē neʼe kau ʼi te ʼu ʼuluaki kalasi ʼo Kalaate, kei nātou lolotoga gāue ʼi te temi nei ʼi te ʼu fenua ʼaē neʼe fekauʼi nātou ki ai, logope tonatou kua taʼu 70 pe e 80. Ohage la ko Eric Britten kua taʼu 82 nei pea mo tona hoa ko Christina, neʼe nā kau ʼi te kalasi hogofulu-ma-nima ʼo Kalaate ʼo te taʼu 1950 pea ia ʼaho nei kei nā gāue pe ʼi Pelesile. ʼI tanā kamata gāue ʼi Pelesile, neʼe ko te toko 3 000 kau Fakamoʼoni pe ʼi te kolo ʼaia. ʼI te temi nei kua nātou toko 300 000 tupu! ʼIo, ko te ‘veliveli ʼe liliu ia ko te puleʼaga mālohi’ ʼi Pelesile, he neʼe ko te gelu neʼe fua. — Isaia 60:22.

⁹ Koteā hatatou ʼui ʼo ʼuhiga mo te kau misionea ʼi Afelika? Tokolahi neʼe nātou maʼuliʼi te ʼu agaʼi fenua kehekehe pea mo nātou ʼoʼofa ki te hahaʼi ʼo Afelika. Ko te ʼu tēhina ko John pea mo Eric Cooke pea mo tonā ʼu hoa, ko Kathleen pea mo Myrtle, ʼe nātou lolotoga gāue nei ʼi te potu Toga ʼo Afelika. Ko John pea mo Eric neʼe nā kau ʼi te kalasi valu ʼo te taʼu 1947. Ko nātou ʼaia, neʼe nātou gāue ʼi Angola, ʼi Zimbabwe, ʼi Mozambique, pea mo te potu Toga ʼo Afelika. Ko ʼihi misionea neʼe mamate ʼi Afelika ʼuhi ko te mahaki, pea ko ʼihi ʼi te tau pea mo te fakataga, ohage ko Alan Battey pea mo Arthur Lawson, ʼaē neʼe mamate lolotoga ʼo te taʼu sivile ʼaē neʼe hoko ʼi Lipelia. Kae, ko te ʼu vai ʼo Afelika neʼe ʼiloga ia neʼe fua manuʼia ʼaupito. ʼI te temi nei ko te toko 400 000 tupu kau Fakamoʼoni kua mafola ʼi te ʼu faʼahi fuli ʼo te fenua ʼaia.

ʼE tou kau fuli ki ai

10. Koteā te gāue fakavikiviki ʼe fai e te kau pionie, pea koteā tona tupuʼaga?

¹⁰ ʼE tou ʼiloʼi ko te toko lauʼi afe misionea, kae ko te hahaʼi faka mafola pea mo te kau pionieb kua nātou liliu ʼo toko miliona. Neʼe nātou gāue ʼaupito ʼi te faka mafola ʼaē ʼi te ʼu faʼahi fuli ʼo te kele. ʼI te taʼu 1991, ko tona hahaʼi neʼe ko te toko 550 000 pionie pea mo te kau minisi feʼaluʼaki. ʼE ko he tānaki maʼuhiga ʼaia, mokā ʼe kita fakakaukauʼi ko te kau fakamoʼoni agatonu fuli neʼe nātou faʼa fai ʼaupito moʼo foaki ki te gelu fakatalakitupua ʼaia ni ʼu hola e 60 pea mo 140 ʼi te māhina fuli. Ki te tokolahi, ʼe ko he sakilifisio lahi ia. Koteā tona tupuʼaga? Koteʼuhi ʼe nātou ʼoʼofa kia Sehova tonatou ʼAtua ʼaki tonatou loto katoa, tonatou ʼatamai katoa, tonatou nefesi katoa pea mo tonatou mālohi katoa, pea mo nātou toe ʼoʼofa ki ʼonatou ʼu kāiga ohage pe kia nātou. — Mateo 22:37-39.

11. Koteā ʼaē ʼe ʼiloga mai ko te laumālie ʼo Sehova ʼe gāue mo tana hahaʼi?

¹¹ Koteā koa te ʼui ki te tolu miliona tupu kau Fakamoʼoni ʼaē ʼe mole kau ki te gāue katoa, kae ʼe nātou gāue fakamalotoloto kia Sehova ʼo mulimuli ki ʼonatou ʼu ʼaluʼaga? Tokolahi ko te ʼu fafine, pe ʼe ko te ʼu faʼe ʼe maʼumaʼua ki tanatou fānau kei liliki, logope te ʼu faʼahi ʼaia, ʼe nātou faiga aipe ke nātou kau ki te gelu faka malamanei ʼaia. Tokolahi ko te ʼu tagata ʼohoana pe ʼe ko te ʼu tāmai ʼe gāue ʼaho katoa maʼa tonatou famili; kae, ʼe nātou maʼu aipe te temi ʼi te fakaʼosi vahaʼa pea mo te ʼu afiafi moʼo akoʼi te moʼoni ki ni hahaʼi ʼe mole māhani mo nātou. Tatau pe mo te kau selipatea tokolahi — tagata pea mo fafine — pea mo te kau tūpulaga ʼe nātou faka mafola pea mo fakalaka tonu te moʼoni ʼaki tanatou aga. Ko ai koa he tahi age kūtuga lotu ʼe toko fā miliona ʼe nātou faka mafola te logo lelei ʼo te Puleʼaga ʼo te ʼAtua kua fakatuʼu? ʼE ʼiloga mai ko te laumālie ʼo Sehova ʼe gāue pea mo nātou! — Pesalemo 68:11; Gāue 2:16-18; fakatatau mo Sakalia 4:6.

Te ʼu meʼa ʼe kau ki te tuputupu

12. He koʼe koa ʼe tali e te hahaʼi te moʼoni, pea ko te toko fia ʼaē neʼe tali ki ai?

¹² Ko te foʼi gāue faka mafola ʼaia ʼe fua manuʼia pe ʼi te taʼu fuli. ʼI te taʼu 1991, ko te toko 300 000 tupu kau Fakamoʼoni foʼou neʼe papitemaʼi, ʼo fakauku katoa nātou ʼi te vai. Ko te tānaki ʼaia ʼe fakatā ki te ʼu kokelekasio e tolu afe tupu te kau Fakamoʼoni ʼe toko 100 ʼi te kokelekasio pe e tahi! ʼE hoko feafeaʼi koa te ʼu meʼa fuli ʼaia? Tou manatuʼi te ʼui ʼa Sesu fēnei: “ ʼE mole he tahi ʼe haʼu kia te ʼau, mo kapau ko te Tāmai ʼaē neʼe ina fekauʼi ʼau ʼe ina taki ia ia (...). ʼE tohi ʼi te ʼu Polofeta: ‘Pea ʼe akonakiʼi anai fuli ia nātou e Sehova.’ Ko ʼaē neʼe fagono ki te Tāmai pea mo ako, ʼe haʼu kia te ʼau.” Koia, ʼe mole mole fakalogo te tali lelei ʼo te gelu faka malamanei ʼaia ki he ʼu fai fakatagata pe. ʼE sio ia Sehova ki te loto ʼo te hahaʼi pea ko ia ʼaē ʼe ina taki mai nātou kia te ia. — Soane 6:44,45; Mateo 10:11-13; Gāue 13:48.

13, 14. Koteā te aga ʼe lelei neʼe fakahā e te kau Fakamoʼoni tokolahi ʼa Sehova?

¹³ Pea tahi foki, ke haʼu te hahaʼi kia te ia, ʼe fakaʼaoga e Sehova te kau tautai. Koia, ko tanatou aga ki te hahaʼi pea mo te telituale ʼaē ʼe nātou faka mafola ai ʼe maʼuhiga. ʼE ko he meʼa fakaloto mālohi ia te sio ʼaē ko te hahaʼi tokolahi ʼe nātou faka ʼuhiga fakamalotoloto te ʼu palalau ʼaē ʼa Paulo ki te kau Kalate: “ ʼAua naʼa tou fiu ʼi te fai ʼo te meʼa ʼaē ʼe lelei, heʼe tou utu anai ʼi tona temi totonu, mo kapau ʼe mole tou fiu.” — Kalate 6:9.

¹⁴ Tokolahi ʼi te kau Fakamoʼoni agatonu neʼe nātou faka mafola ʼi taʼu e lauʼi hogofulu ʼo nātou tokagaʼi aipe te ʼu meʼa ʼaē ʼe hoko ʼi te malamanei. Neʼe nātou mamata ki te pule mālohi pea mo te fakahifo ʼo te ‘nazisme’ ʼo te ‘fascisme’ pea mo ʼihi age ʼu puleʼaga faʼifaʼitaliha. Tokolahi neʼe nātou mamata ki te atu tau neʼe hoko talu mai te taʼu 1914. Neʼe nātou toe mamata foki ki te falala ʼaē ʼa te kau takitaki faka malamanei ki te Sosiete ʼo te atu ʼu Fenua pea ki muli age ki te Kautahi ʼo te atu Puleʼaga fakatahi. Neʼe nātou mamata ki te tapuʼi ʼaē ʼo te gāue faka mafola ʼa te kau Fakamoʼoni ʼa Sehova pea ki muli age tona toe fakagafua e te atu ʼu fenua. ʼI te temi fuli pe, ko te kau Fakamoʼoni ʼa Sehova neʼe mole nātou situʼa ʼo ʼuhiga mo te meʼa ʼaē ʼe lelei, ohage ko te gelu ʼo te ʼu tagata. ʼE ko he faʼifaʼitakiʼaga fakatalakitupua agatonu! — Mateo 24:13.

15. a) Koteā ʼe tokoni kia tatou ke tou ʼiloʼi te ʼu meʼa ʼaē ʼe ʼaoga ki totatou telituale faka malamanei? b) ʼE feafeaʼi te tokoni ʼa ʼihi tohi faka tohi-tapu ki takotou gāue?

¹⁵ ʼE ʼi ai foki ʼihi ʼu meʼa ʼi te malamanei neʼe kau ki te tuputupu ʼaia. Koia, ko te kau tautai tagata neʼe nātou ʼiloʼi te ʼu meʼa ʼaē ʼe ʼaoga ki tonatou telituale. ʼI te feʼaluʼaki haʼele ʼa te ʼu hahaʼi lanu kehekehe, lotu kehekehe, pea mo lea kehekehe, neʼe uga ai te kau Fakamoʼoni ʼa Sehova ke nātou folahi tanatou mālama ʼo ʼuhiga mo te faʼahi ʼaia. Pea ko te kokelekasio faka malamanei neʼe ina gāue mālohi ki te fai ʼo te ʼu Tohi-Tapu pea mo te ʼu tohi faka tohi-tapu ʼi te ʼu lea e 200 tupu. Ko te Les Saintes Ecritures — Traduction du monde nouveau, katoa pe ʼe vaelua, kua maʼu ʼi te temi nei ʼi te ʼu lea e 13, ʼi te lea faka ‘tchèque’ pea mo faka ‘slovaque’. Ko te kaupepa Fiafia kite mauli heeegata ite kele! ʼe maʼu ʼi te temi nei ʼi lea e 198, faka albanienne, faka zoulu, ko te lahi ʼo tona ta ko te 72 miliona tohi. Ko te tohi Le plus grand homme de tous les temps neʼe kua fakaliliu ki te ʼu lea e 69. Kae ki te L’humanité à la recherche de Dieu, neʼe fakaliliu ki te ʼu lea e 29, ʼe ina fakahā he mahino lelei ki te kamataʼaga ʼo te ʼu akonaki ʼo te ʼu lotu lalahi ʼo te malamanei. Ko te tohi ʼaia ʼe maʼuhiga ʼaupito ki te gelu faka malamanei.

16. ʼE feafeaʼi koa te tokaga ʼa ʼihi ki te maʼuhiga ʼo te gelu ʼaia ʼi ʼihi fenua?

¹⁶ Koteā koa te tahi age meʼa neʼe fai ʼo ʼuhiga mo te gelu faka malamanei ʼaia? Ko te lauʼi afe neʼe nātou talagafua ki te ‘pāuʼi faka masetonia’. Ohage ko te talagafua ʼaē ʼa Paulo ke mavae ʼi Asia Mineure ʼo ʼalu ki Masetonia, ʼi Eulopa, ʼi te pāuʼi ʼa te ʼAtua, tokolahi ʼi te kau Fakamoʼoni neʼe nātou ʼolo ki te ʼu fenua pea mo te ʼu telituale neʼe ʼaoga tāfito ai he kau faka mafola ʼo te Puleʼaga, feiā aipe ki te kau tagata ʼāfea pea mo te kau faifekau faka minisitelio. ʼE nātou hage ko te kau tautai ʼaē ʼe fia gelu ʼi te ʼu koga meʼa ʼaē ʼe mole hahaʼi ai, ʼo nātou mavae ʼi te ʼu vai ʼaē ʼe mole lahi ai te ʼu vaka kae e ika. — Gāue 16:9-12; Luka 5:4-10.

17. Ko ai koa te ʼu faʼifaʼitakiʼaga kilisitiano neʼe nātou tali ki te ‘pāuʼi faka masetonia’?

¹⁷ ʼI te ʼu kalasi ʼo te fale Ako ʼo Kalaate neʼe nātou tali te ʼu tēhina pea mo te ʼu tuagaʼane ʼo te ʼu fenua kehekehe ʼo Eulopa. Neʼe nātou ako te lea fakapilitānia pea ko hanatou faʼahiga foaki ʼaia ʼo tonatou maʼuli moʼo gāue ʼi niʼihi atu ʼu fenua pea mo tonatou ʼu agaʼi fenua. Tatau aipe, mo te Ako faka minisitelio, tokolahi te ʼu tēhina selipatea neʼe akoʼi nātou fakalelei ʼi māhina e lua pea mo fekauʼi nātou ki ʼihi ʼu fenua moʼo fakaloto mālohiʼi te ʼu kokelekasio pea mo te ʼu silikosikilipisio. Ko ʼihi telituale gelu fakatalakitupua kua avahi nei ʼi te Eulopa ʼo te potu Hahake pea ʼi te ʼu faʼahi ʼāfea ʼo te Lepupilika Lusia. — Vakaʼi ia Loma 15:20, 21.

18. a) He koʼe koa ko te kau pionie ko te kau minisi faiva? b) ʼE feafeaʼi koa hanatou tokoni ki niʼihi ʼi te kokelekasio?

¹⁸ Ko te tahi age tokoni ʼo ʼuhiga mo te gelu faka malamanei ʼaia, ko te Ako ʼaē ʼe kau ki ai te kau pionie katoa. Lolotoga vāhaʼa e lua, ʼe nātou ako tāfito te tohi Brillez comme des foyers de lumière dans le monde, ʼaē neʼe teuteuʼi tāfito moʼo hikihiki tanatou minisitelio ʼi tanatou ako te ʼu meʼa ʼaenī: “Muliʼi te ala ʼo te ʼofa”, “Muliʼi ia Sesu ohage ko he faʼifaʼitakiʼaga” pea mo “Hikihiki ʼi te faiva ʼo te fai akonaki”. ʼE fiafia te ʼu kokelekasio fuli ʼi te ʼu kūtuga tautai faiva ʼaia ʼi tanatou fai te gāue faka mafola ʼaē ʼi te ʼu ʼapi pea mo faʼa akoʼi ʼihi kau tautai ki te gāue lahi ʼaia! — Mateo 5:14-16; Filipe 2:15; 2 Timoteo 2:1, 2.

ʼE feala koa ke tou hikihiki age tatou minisitelio?

19. Ohage ko te ʼapositolo ko Paulo, ʼe feafeaʼi koa hatatou hikihiki tatatou minisitelio ʼi te temi nei?

¹⁹ Ohage ko Paulo, ʼe tou fia fakahā tatatou fia gāue mālohi pea mo faiga ki muʼa (Filipe 3:13, 14). Ko te ʼapositolo neʼe faiva ʼi te palalau ki te faʼahiga hahaʼi kehekehe, feiā aipe mo te ʼu faʼahiga ʼaluʼaga kehekehe. Neʼe poto ʼi te felōgoʼi pea mo fakaʼutaʼuta te felōgoʼi ʼaia ʼaki te faʼahiga manatu mo te agaʼi fenua ʼaē ʼo nātou neʼe fagono kia te ia. ʼE feala hatatou kamata he ʼu ako faka tohi-tapu mokā ʼe tou tokaga ki te faʼahiga agaaga ʼa te hahaʼi ki te logo ʼo te Puleʼaga pea mo fai ke tau tatatou felōgoʼi mo te ʼu meʼa ʼaē ʼe ʼaoga kia ia. ʼAki te atu faʼahiga tohi faka tohi-tapu ʼaē ʼe tou maʼu, ʼe tou foaki age anai te tohi ʼaē ʼe feʼauga mo tana manatu. Ko tatatou faʼa fai pea mo tatatou fakatokaga, ko he ʼu meʼa maʼuhiga foki ʼaia ki he gelu fua manuʼia. — Gāue 17:1-4, 22-28, 34; 1 Kolonito 9:19-23.

20. a) He koʼe koa ʼe maʼuhiga tāfito tatatou gelu ʼi te temi nei? b) Koteā totatou maʼua takitokotahi ʼi te temi nei?

²⁰ He koʼe koa ʼe maʼuhiga tāfito te gelu faka malamanei ʼaia ʼi te temi nei? Heʼe ko te ʼu lea faka polofeta ʼo te Tohi-Tapu ʼe iloga lelei ʼi te ʼu meʼa ʼaē neʼe kua ʼosi hoko pea mo te ʼu meʼa ʼaē ʼe hoko nei, ko te faʼahiga tuʼu faka malamanei ʼaenī ʼa Satana kua vave aʼu ki tona faka ʼauha. Koia, koteā koa ʼe tonu ke tou fai ʼi te temi nei, tatou ʼaē ko te kau Fakamoʼoni ʼa Sehova? Ko te ʼu alatike e tolu ʼo te nusipepa ʼaenī neʼe nātou faka maʼuhigaʼi totatou maʼua ʼaē ke tou gelu fakamālohi ʼi te faʼahi ʼo te ʼu vai faka malamanei neʼe foaki mai kia tatou. ʼE tou ʼiloʼi papau ʼaki te Tohi-Tapu ko Sehova ʼe mole ina galoʼi tatatou ʼu faiga ki te faʼahi ʼaia. Neʼe tala e Paulo fēnei: “ ʼE mole heʼe agatonu ʼi te ʼAtua ʼo ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa, ʼi takotou tauhi te kau fakanofo pea kei koutou lolotoga tauhi nei pe. Kae, ʼe mātou loto ke koutou faʼifaʼitaki ki ai ke feala ke koutou ʼiloʼi papau te falala ʼo aʼu ki he temi fakaʼosi.” — Hepeleo 6:10-12.

[Nota ʼi te lalo pasina]

Kei koutou manatuʼi koa?

◻ He koʼe koa ʼe ʼui e te kau Fakamoʼoni ʼa Sehova ko te gāue ʼo tanatou gelu ʼe mafola katoa ʼi te malamanei?

◻ Ko te tapuaki feafeaʼi neʼe fai e te fale Ako faka misionea ʼo Kalaate ki te gelu ʼaia?

◻ Koteā te ʼu meʼa neʼe feala ke fua manuʼia ai te gāue ʼa te kau Fakamoʼoni ʼa Sehova?

◻ ʼE feafeaʼi koa kia tatou takitokotahi hatatou hikihiki tatatou minisitelio faka kilisitiano?

[Talanoa ʼo te pasina 20]

TE ʼU FUA ʼO TE GELU FAKA MALAMANEI

Taʼu Fenua Kau Fakamoʼoni

1939 61 71 509

1943 54 126 329

1953 143 519 982

1973 208 1 758 429

1983 205 2 652 323

1991 211 4 278 820

[Paki ʼo te pasina 21]

Ko te gāue fakamoʼoni kei fai pe e te kau tautai Kalilea.