Te Toʼotoʼoga Makehe—ʼE Koutou Kau Ai Anai Koa?

ʼI TE ʼaho maʼuhiga kua hili kiai taʼu e 3 500 tupu, neʼe fakatotonu e Sehova ʼAtua ki te kau Iselaele ʼaē neʼe popūla ʼi Esipito ke nātou matehi he akeno peʼe ko he tao, pea ke nātou vali tona toto ki te ʼu kaumatapā pea mo te ʼu fuga matapā ʼo tonatou ʼapi. ʼI te afiafi ʼaia, neʼe fakalaka te ʼaselo ʼa te ʼAtua ʼi te ʼu ʼapi ʼaē neʼe fakaʼiloga, kae neʼe ina matehi te ʼu foha ʼuluaki ʼi te ʼu ʼapi ʼo te kau Esipito fuli. Pea neʼe fakamavae ai te kau Iselaele mai Esipito. Moʼo fakamanatu te ʼaho ʼaia, ʼe fai e te kau Sutea te Pāsikate.

ʼI te ʼosi fai e Sesu Kilisito tana Pāsikate fakamuli mo tana ʼu ʼapositolo, neʼe ina fakatuʼu te taumafa ʼaē ka ina fakamanatuʼi anai tona mate faka sakilifisio. Neʼe ina fakatoʼo ki tana ʼu tisipulo te pane mole hona meʼa fakatupu pea mo folafola maʼana: “Koutou toʼo, ʼo kai. Ko te meʼa ʼaenī ʼe ina fakatātā toku sino.” Pea neʼe ina foaki age te ipu vino pea mo ina ʼui fēnei: “Koutou ʼiʼinu fuli kiai; heʼe ko te meʼa ʼaenī ʼe ina fakatātā toku ‘taʼataʼa ʼo te fuakava,’ ʼaē ʼe tonu ke liligi maʼa te tokolahi ki te fakamolemole ʼo te ʼu agahala.” Neʼe toe ʼui fēnei e Sesu: “Koutou fai te mea aeni mo oku fakamanatu.” (Mateo 26⁠:​26-28, MN; Luka 22⁠:​19, 20) Neʼe fakatotonu ai e Sesu ki tana ʼu tisipulo ke nātou fakamanatu tona mate.

ʼI te taʼu ʼaenī, ko te fakamanatu ʼo te mate ʼo Sesu ʼe fai anai ʼi te Feliafā ʼaho 19 ʼo ʼApelili, ʼi te ʼosi tō ʼo te laʼā. Ko te kau Fakamoʼoni ʼa Sehova ʼo te kele katoa ʼe nātou fakatahi anai ʼi te po makehe ʼaia moʼo fai te Fakamanatu ʼaia ohage ko tona fakatotonu mai e Sesu. ʼE fakaafe atu koutou ke koutou fakatahi mo mātou ki te Fakamanatu ʼaia. Koutou fakalavelave ki te kau Fakamoʼoni ʼa Sehova pe ko te hola fia pea mo te koga meʼa fea ʼaē ka fai ai te fakatahi ʼaia.