Neʼe Mate ʼUhi Ko Tana Tui

TOU MANATUʼI te Fakamoʼoni ʼa Sehova ko August Dickmann (ʼaē neʼe tupu ʼi te 1910).” Ko te ʼu ʼuluaki palalau ʼaia ʼaē ʼe tohi ʼi te maka fakamanatu (ʼi te paki) ʼaē neʼe hoki fakahā ki te hahaʼi, ʼi te lotoʼā fakamamahi ʼāfea ʼo Sachsenhausen. He koʼe ʼe tau mo feʼauga ke fai te maka fakamanatu ʼaia ki he Fakamoʼoni ʼa Sehova? ʼE hoko fēnei atu te ʼu palalau ʼaē ʼe tohi ʼi te maka ʼaia: “Neʼe fanahi [ia ia] e te kau SS ʼi muʼa ʼo te hahaʼi, ʼi te ʼaho 15 ʼo Sepetepeli 1939, he neʼe fakalogo ki tona leʼo ʼo loto.”

Neʼe pilisoniʼi August Dickmann ʼi te lotoʼā fakamamahi ʼo Sachsenhausen ʼi te 1937. Hili ʼaho e tolu ʼi te kua kamata ʼo te Lua Tau Faka Malamanei ʼi te 1939, neʼe fakatotonu kia ia ke ina sinie tana pepa hū solia. ʼI tana mole fia sinie te pepa ʼaia, neʼe ʼalu te kamutoa ʼo te lotoʼā kia Heinrich Himmler, te pule ʼo te kau SS (Schutzstaffel, te kau solia makehe ʼa Itilele), pea neʼe ina kole ke fakagafua age ke ina matehi ia Dickmann, kae mamata kiai te hahaʼi pilisoni fuli ʼo te lotoʼā. ʼI te ʼaho 17 ʼo Sepetepeli 1939, neʼe ʼui fēnei e te sulunale The New York Times mai Siamani: “Ko August Dickmann, ʼi tona taʼu 29, . . . neʼe fanahi e te kau solia.” Neʼe ʼui e te nusipepa, neʼe ko ia te ʼuluaki tagata Siamani ʼaē neʼe mole kau ki te tau ʼuhi ko tona leʼo ʼo loto.

Hili kiai taʼu e onogofulu, ʼi te ʼaho 18 ʼo Sepetepeli 1999, neʼe fakamanatuʼi te mate ʼo Dickmann e te Kautahi ʼo te Fakamanatu ʼo Brandenbourg, pea ʼi te temi nei ko te maka fakamanatu ʼaia, ʼe ina fakamanatuʼi ki te hahaʼi ʼaē ʼe ʼōmai ʼo mamata ki te lotoʼā, neʼe lototoʼa pea mo tui mālohi. Ko te tahi maka fakamanatu ʼi te tuʼa kaupā ʼo te lotoʼā ʼāfea ʼaia, ʼe ina fakamanatuʼi ki te hahaʼi ʼaia, neʼe kau ia Dickmann ʼi te toko 900 kau Fakamoʼoni ʼa Sehova ʼaē neʼe gaohi koviʼi ʼi Sachsenhausen ʼuhi ko tanatou tui. Ko te tahi age kaugamālie neʼe gaohi koviʼi ʼi te tahi ʼu lotoʼā fakamamahi. Ei, logola neʼe gaohi koviʼi nātou ʼi te ʼu lotoʼā fakamamahi, kae ko te tokolahi neʼe nātou nonofo agatonu ki te ʼu pelesepeto fakaʼatua.

Maʼa te kau Fakamoʼoni ʼa Sehova, ʼe ko he maʼua faka Kilisitiano ke nātou ‘fakalogo ki te u pule e taki [pe ko te puleʼaga].’ (Loma 13⁠:⁠1) Kae kapau ʼe fakamālohiʼi nātou e te ʼu puleʼaga ke nātou fakafeagai ki te ʼu lao ʼa te ʼAtua, pea ʼe nātou mulimuli ki te faʼifaʼitaki ʼa te kau ʼapositolo ʼa Kilisito, ʼaē neʼe nātou ʼui fēnei: “E maua ke [tou] fakalogo ki te Atua i te fakalogo ki te tagata.” (Gaue 5:​29) Koia, ʼi he mālama ʼe lahi ai te ʼu tau faka telepi pea mo te fefehiʼaʼaki ʼa te ʼu lanu ʼaē neʼe iku ai ki te ʼu fakapō fakalialia, ko te kau Fakamoʼoni ʼa Sehova ʼi te potu fuli pe, ohage ko August Dickmann, ʼe nātou maʼuli ʼi te tokalelei. ʼE nātou mulimuli ki te tokoni faka Tohi-Tapu ʼaenī: “Vakai naa puleʼi koe e te kovi, kae aki te lelei ke ke toà i te kovi.”​—⁠Loma 12⁠:⁠21.