ʼE Lahi Age Sehova ʼi Totatou Loto

NEʼE tohi fēnei e te tagata fai pesalemo: “ ʼE leleiʼia e Sehova ia nātou ʼaē ʼe manavasiʼi kia te ia.” Ei, ʼe fiafia te Tupuʼaga mokā sio kia tatou takitokotahi ʼo tana ʼu kaugana, ʼe tou faiga ke tou mulimuli ki tana ʼu lekula faitotonu. ʼE tapuakina e te ʼAtua tana hahaʼi agatonu, mo fakaloto mālohiʼi nātou, pea mo fakafimālieʼi nātou ʼi te ʼu temi faigataʼa. ʼE ina ʼiloʼi ko tana kau atolasio ʼe mole nātou haohaoa, pea ʼe mole lahi fau te ʼu meʼa ʼaē ʼe ina fakamaʼua kia nātou.​—⁠Pesalemo 147⁠:⁠11.

ʼE mole lagi faigataʼa kia tatou hatatou tui, ko Sehova ʼe ʼofa lahi ki tana ʼu kaugana fuli. Kae ko ʼihi ʼe nātou tokagaʼi fau tonatou ʼu vaivaiʼaga, pea ʼe nātou tui mālohi ko Sehova ʼe mole lava ʼofa anai kia nātou ʼi he temi. ʼE nātou ʼui fēnei: “ ʼE mole lava ʼofa Sehova kia ʼau, heʼe lahi fau taku ʼu agahala.” ʼE moʼoni ko tatou fuli ʼi ʼihi temi, ʼe tou lotovaivai ai. Kae ko ʼihi, ʼe nātou tauʼi tuʼumaʼu tanatou manatu ʼaē ʼe mole honatou ʼaoga.

ʼE Nātou Loto Taʼomia

ʼI te ʼu temi faka Tohi-Tapu, ko te tokolahi ʼo te kau agatonu neʼe nātou maʼuli mamahi he neʼe nātou taʼomia. Ko Sopo neʼe mole kei fia maʼuli, pea neʼe manatu ia kua līʼakina ia ia e te ʼAtua. ʼI te tahi temi, ko Ana, te faʼe ʼa Samuele, neʼe maʼuli mamahi ʼaupito he neʼe paʼa, pea neʼe tagi mamahi ai. Ko Tavite neʼe “mafasia ʼaupito,” pea ko Epafolotito neʼe lotohoha he neʼe ʼiloʼi e tona ʼu tēhina neʼe mahaki pea neʼe nātou lotomamahi ai.​—⁠Pesalemo 38⁠:6; 1 Samuele 1:​7, 10; Sopo 29:​2, 4, 5; Filipe 2:​25, 26.

Kae e feafeaʼi ki te kau Kilisitiano ia ʼaho nei? Lagi ko ʼihi ʼe nātou fia gāue lahi ʼi te minisitelio kae ʼe mole kei feala ʼuhi ko te mahaki, te vaivai matuʼa, pea mo te tahi ʼu ʼaluʼaga ʼe tau mo nātou takitokotahi. ʼE lagi nātou manatu ai kua nātou līaki ia Sehova pea mo tonatou ʼu tēhina. Pea ko ʼihi ʼe lagi nātou lotomamahi tuʼumaʼu ʼuhi ko te ʼu meʼa kovi ʼaē neʼe nātou fai ki muʼa atu, ʼo lagi nātou manatu ʼe mole heʼeki fakamolemole age Sehova kia nātou. Lagi ko ʼihi ʼe ʼōmai mai te ʼu famili neʼe faigataʼa tonatou maʼuli, pea ʼe nātou tui papau ʼe mole tonu ke ʼofa age he tahi kia nātou. ʼE lava feafeaʼi te faʼahi ʼaia?

Ko ʼihi neʼe lalahi ake ʼi he ʼu famili ʼe mole maʼu ai te ʼofa, kae ʼe maʼu tāfito ai te manatu pe kia kita, mo te manukinuki, pea mo te mataku. ʼE mole lagi nātou ʼiloʼi pe koteā te ʼofa mamahi ʼa he tāmai kia nātou, he tāmai ʼe ina kumi he ʼu faigamālie ke ina vikiʼi nātou pea mo fakaloto mālohiʼi nātou, ʼe mole ina tokagaʼi te ʼu hala ʼaē ʼe nātou fai, pea ʼe feala ke ina fakamolemole age ki tanatou ʼu hala mamafa, pea ko tana ʼofa ʼe ina foaki te fīmālie ki te famili katoa. Mai tona ʼuhiga ʼaē neʼe mole nātou maʼu hanatou tāmai fakakelekele ʼe ʼofa kia nātou, koia ʼe lagi faigataʼa ai tanatou mahino ki te faka ʼuhiga ʼo he Tāmai ʼofaina ʼe nofo ʼi selo.

Ohage la, ʼe tohi fēnei e Fritz: “Neʼe ʼau faʼifaʼitaki te aga fefeka ʼo taku tāmai, ʼi taku kei veliveli pea mo toku temi tūpulaga.a Neʼe mole he temi neʼe ina vikiʼi ai ʼau, pea neʼe mole he temi neʼe ʼau ʼofa kia ia. ʼI tona fakahagatonu, neʼe ʼau mataku tuʼumaʼu ia ia.” Koia ʼi te temi nei, ko Fritz ʼaē kua taʼu 50, ʼe kei manatu pe ia, ʼe mole feala ke ina fai he meʼa lelei. Pea ʼe fakamahino fēnei e Margarette: “Neʼe aga fefeka taku ʼu mātuʼa, pea neʼe mole nā agaʼofa. ʼI taku kamata ako te Tohi-Tapu, neʼe faigataʼa taku mahino peʼe feafeaʼi he tāmai ʼofa.”

Ko te ʼu manatu ʼaia, ʼaē ʼe kehekehe tonatou tupuʼaga, ʼe feala ke faka ʼuhiga ʼi ʼihi temi, ko tatatou tauhi ki te ʼAtua ʼe mole fai tāfito ʼaki te ʼofa, kae ʼe fai tāfito ʼuhi heʼe kita mataku peʼe kita valokiʼi kita. ʼE hage maʼa tatou ʼe mole feʼauga te ʼu meʼa lelei ʼaē ʼe tou fai. Pea ʼe lagi tou manatu ʼe faigataʼa fau te fai ʼo te ʼu meʼa fuli ʼaē ʼe tou fia fai moʼo fakafiafia ia Sehova pea mo totatou ʼu tēhina. Koia, ʼe mole lagi tou fakahoko anai tatatou ʼu fakatuʼutuʼu, ʼe tou valokiʼi anai ia tatou totonu, pea tou lotovaivai ai.

Koteā ʼaē ʼe feala ke tou fai? ʼE lagi tonu anai ke tou manatuʼi ko Sehova ʼe lotoʼofa. Ko te ʼapositolo ko Soane neʼe mahino ki te agaaga ʼaia ʼo te ʼofa ʼo te ʼAtua.

“E Lahiʼage Te Atua i Otatou Loto”

ʼI te fakaʼosi ʼo te ʼuluaki sēkulō ʼo totatou temi, neʼe faitohi fēnei ia Soane ki tona ʼu tēhina ʼi te tui: “Aki te mea aeni e tou iloi anai pe tou fakatahi mo te mooni, pea e tou fakamalulu anai totatou loto i ona mua, koteuhi kapau e fakahalaʼi tatou e totatou loto, e lahiʼage te Atua i otatou loto pea e ina iloi te meafuape.” He koʼe neʼe tohi e Soane te ʼu palalau ʼaia?​—⁠1 Soane 3:​19, 20.

Neʼe ʼiloʼi lelei e Soane, ʼe feala ki he kaugana ʼa Sehova ke valokiʼi ia ia e tona loto. Neʼe lagi hoko kia Soane te ʼaluʼaga ʼaia. Ko Soane, ʼi tona ʼuhiga tūpulaga neʼe hoko ʼita, neʼe fakatonutonuʼi ʼi te tahi lakaga e Sesu Kilisito he neʼe aga fefeka fau ki te hahaʼi. Ei, neʼe fakahigoaʼi e Sesu ia Soane pea mo tona tēhina ko Sakopo ko “Poanelekesi, ko tona uhiga, ko he u fanau a te mana.”​​—⁠Maleko 3:​17; Luka 9:​49-​56.

ʼI te ʼu taʼu e 60 ki muli age, neʼe liliu ia Soane ko he Kilisitiano ʼe agamālū, mo fakapotopoto, mo agaʼofa, pea mo loto manavaʼofa. ʼAki te temi, ʼi tona ʼuhiga ʼapositolo fakamuli ʼaē neʼe kei maʼuli, neʼe ina fai tana ʼuluaki tohi, pea neʼe mahino ai kia ia ko Sehova ʼe mole ina tokagaʼi te ʼu kiʼi hala fuli pe ʼaē ʼe fai e tana ʼu kaugana. Kae ʼe ko he Tāmai ʼe lotoʼofa, mo loto fia foaki, pea mo manavaʼofa, pea ʼe ʼofa mālohi ki te hahaʼi fuli ʼaē ʼe ʼoʼofa kia te ia, pea mo nātou atolasio kia te ia ʼaki te moʼoni. Neʼe tohi fēnei e Soane: “Ko te ʼAtua ʼe ʼofa.”​—⁠1 Soane 4⁠:​8, MN.

ʼE Fiafia Ia Sehova ʼi Tatatou Tauhi Kia Te Ia

ʼE ʼiloʼi e te ʼAtua, neʼe tou tutupu ake mo ʼatatou ʼu vaivaiʼaga pea mo tatatou ʼu hala, pea ʼe mahino ki te faʼahi ʼaia. Neʼe tohi fēnei e Tavite: “Koteʼuhi ʼe ina ʼiloʼi lelei peʼe faʼu tatou ʼaki teā, ʼe ina manatuʼi ʼe tou efu.” ʼE ʼiloʼi e Sehova ʼe ʼalutahi tatatou aga mo te ʼu meʼa ʼaē neʼe akoʼi mai kia tatou. Ei, ʼe ina ʼiloʼi lelei age tatou ia tatou totonu.​—⁠Pesalemo 103⁠:⁠14.

ʼE ina ʼiloʼi ko te tokolahi ia tatou ʼe tou fia fetogi, kae ʼe faigataʼa tatatou tauʼi totatou ʼu vaivaiʼaga. ʼE feala ke fakatatau totatou ʼaluʼaga ki te ʼaluʼaga ʼa te ʼapositolo ko Paulo, ʼaē neʼe ina tohi fēnei: “E mole au fai te lelei e au loto ki ai, kae ko te kovi ae e mole au loto ki ai, e au mauliʼi.” Ko tatou fuli ʼe tou tau mo te fihifihia ʼaia. ʼI ʼihi ʼaluʼaga, ʼe valoki ai tatou e totatou loto.​—⁠Loma 7:​19.

Tou manatuʼi tuʼumaʼu te faʼahi ʼaenī: Ko te meʼa ʼaē ʼe maʼuhiga age, ʼe ko te faʼahiga sio ʼa Sehova kia tatou, ka mole ko tatatou faʼahiga sio. Kapau ʼe ina sio ʼe tou faiga ke tou fakafiafia ia ia, ʼe mole fīmālie aipe, kae ʼe fiafia ai. (Tāʼaga Lea 27⁠:11) Logola ko te ʼu meʼa ʼaē ʼe tou fakahoko ʼe mole lagi faʼa maʼuhiga kia tatou, kae ʼe loto fiafia mokā sio ki tatatou lotomālohi ki te faʼahi ʼaia pea mo tatatou lotolelei kiai. ʼE mole sio pe ki te meʼa ʼaē ʼe tou fai, kae ʼe ina ʼiloʼi te meʼa ʼaē ʼe tou fia fai; ʼe mahino kia ia tatatou ʼu fakaʼamu pea mo te ʼu meʼa ʼaē ʼe tou holi kiai. ʼE ʼiloʼi e Sehova te ʼu meʼa ʼaē ʼi totatou loto.​—⁠Selemia 12⁠:3; 17⁠:⁠10.

Ohage la, ʼe lahi te kau Fakamoʼoni ʼa Sehova ʼe nātou umiuminoa pea mo fakalogologo, pea ʼe mole nātou leleiʼia ke tokagaʼi nātou. Ki te ʼu hahaʼi ʼaia, ʼe feala ke nātou matataku ʼi te faka mafola ʼo te logo lelei ʼi te ʼu ʼapi. Kae ʼi tanatou fia tauhi ki te ʼAtua, pea mo tanatou fia tokoni ki tonatou kāiga, ko te kau umiuminoa ʼe nātou ako ke feala hanatou ʼolo ki te hahaʼi, pea ke nātou palalau age kia nātou ʼo ʼuhiga mo te Tohi-Tapu. ʼE lagi nātou manatu anai ʼe mole lahi te ʼu meʼa ʼaē ʼe nātou fai, pea ʼe feala ke puli ai tanatou fiafia. ʼE lagi fakahā age anai e tonatou loto, ʼe mole tāu mo nātou ke nātou ʼolo ʼo fai faka mafola. Kae ko Sehova ʼe fiafia ʼaupito ʼi tanatou ʼu faiga lahi ʼi tanatou tauhi. Tahi ʼaē meʼa, ʼe mole nātou lava ʼiloʼi pe ko te temi fea pea kofea ʼaē ka to ai te ʼu pulapula ʼo te moʼoni, mo tuputupu ai, pea mo fua ai.​—⁠Tagata Tānaki 11⁠:6; Maleko 12⁠:​41-​44; 2 Kolonito 8:​12.

Ko ʼihi Fakamoʼoni ʼe nātou maʼuli mamahi, ʼuhi ko he mahaki loaloaga, pe ko he mahaki ʼe nātou maʼu ʼaki te temi. Maʼa nātou, ʼe lagi ko he meʼa fakamamahi pea mo fakatupu tuʼania tanatou ʼolo tuʼumaʼu ki te ʼu fono ʼaē ʼe fai ʼi te Fale ʼo te Puleʼaga. Ko tanatou fakalogo ki he akonaki ʼo ʼuhiga mo te fai faka mafola, ʼe lagi ina fakamanatuʼi age kia nātou te ʼu meʼa ʼaē neʼe nātou fai māhani, pea mo te ʼu meʼa ʼaē ʼe kei nātou fia fai, logola tanatou mahaki. Ko nātou ʼaia ʼe lagi nātou lotohoha, heʼe mole feala ke nātou mulimuli katoa ki te tokoni ʼaia, ohage ko tanatou loto kiai. Kae ʼe tou ʼiloʼi papau, ʼe leleiʼia e Sehova tanatou agatonu pea mo tanatou faʼa kātaki. Kapau ʼe nātou haga nofo agatonu, pea ʼe mole galo anai kia te ia tanatou agatonu ʼaia.​—⁠Pesalemo 18⁠:25; 37⁠:⁠28.

‘Tou Fakamalulu Totatou Loto’

ʼI te temi matuʼa ʼa Soane, neʼe lahi te ʼu meʼa neʼe kua mahino ki ai ʼo ʼuhiga mo te lotoʼofa ʼa Sehova. Koutou manatuʼi neʼe ina tohi fēnei: “E lahiʼage te Atua i otatou loto pea e ina iloi te meafuape.” Tahi ʼaē meʼa, neʼe fakaloto mālohiʼi tatou e Soane ke ‘tou fakamalulu totatou loto.’ Koteā te faka ʼuhiga ʼo te ʼu palalau ʼaia ʼa Soane?

ʼE ʼui fēnei e te tikisionalio Vine’s Expository Dictionary of Old and New Testament Words, ko te kupu faka Keleka ʼaē neʼe fakaliliu ʼaki te kupu “fakamalulu,” ko tona faka ʼuhiga “ ʼe fakanikiniki, ʼe fakalotoʼi, ʼe fakaoloolo.” ʼI tona tahi faʼahiga ʼui, moʼo fakamalūlū totatou loto, ʼe tonu ke tou fakalotoʼi, ke tou fakaoloolo ke tui ko Sehova ʼe ʼofa kia tatou. ʼO feafeaʼi?

Ko Fritz ʼaē neʼe tou talanoa ki ai ʼi te kamata ʼo te alatike ʼaenī, kua tagata ʼāfea ʼi te kokelekasio ʼa te kau Fakamoʼoni ʼa Sehova lolotoga taʼu e 25, pea neʼe ina fakatokagaʼi ko te ako takitokotahi, ʼe feala ke ina fakafimālieʼi tona loto, ko Sehova ʼe ʼofa kia ia. “ ʼE ʼau ako tuʼumaʼu pea mo ʼau ako fakalelei te Tohi-Tapu pea mo tatatou ʼu tohi. Ko te faʼahi ʼaia neʼe tokoni kia ʼau ke ʼau galoʼi taku maʼuli ki muʼa atu, kae ke ʼau manatuʼi tatatou ka haʼu taulekaleka. ʼI ʼihi temi, ʼe ʼau lotohoha ʼuhi ko te ʼu meʼa ʼaē neʼe ʼau fai ki muʼa atu, pea ʼe ʼau manatu ai ʼe mole feala ʼi he temi ke ʼofa te ʼAtua kia ʼau. Kae ʼi te agamāhani, ʼe ʼau tokagaʼi ko te ako tuʼumaʼu ʼo te Tohi-Tapu ʼe ina fakaloto mālohiʼi toku loto, ʼe ina fakatuputupu taku tui, pea ʼe tokoni kia ʼau ke ʼau fiafia tuʼumaʼu pea mo fakapotopoto.”

ʼE moʼoni, ʼe mole lagi fetogi anai totatou ʼaluʼaga mokā tou lau te Tohi-Tapu pea mo tou metitasioʼi. Kae ʼe feala ke ina fetogi tatatou faʼahiga sio ki te ʼaluʼaga ʼaia. Kapau ʼe tou fakahū te ʼu manatu ʼa te Folafola ʼa te ʼAtua ki totatou loto, pea ʼe tokoni anai kia tatou ke tou manatu ohage ko ia. Tahi ʼaē meʼa, ko te ako ʼe ina faka fealagia kia tatou ke toe lelei age tatatou mahino ki te lotoʼofa ʼo te ʼAtua. ʼAki te temi, ʼe tou mahino ai ko Sehova ʼe mole ina valokiʼi te ʼu meʼa ʼaē neʼe hoko kia tatou ʼi tatatou kei liliki, pea ʼe mole ina valokiʼi tatou ʼuhi ko tatatou ʼu mahaki. ʼE ina ʼiloʼi, ʼi te agamāhani ko te ʼu kavega ʼaē ʼe ʼamo e te tokolahi ʼo tatou​—⁠te hoha ʼo totatou loto pea mo totatou ʼu mahaki fakasino​—⁠neʼe mole tupu ʼi te ʼu hala ʼaē neʼe tou fai, pea ʼaki he agaʼofa ʼe ina tokagaʼi te faʼahi ʼaia.

Kae e feafeaʼi kia Margarette ʼaē neʼe tou talanoa ki ai ʼi te kamata? ʼI tana ʼiloʼi ia Sehova, neʼe fua lelei ʼaupito kia ia te ako ʼo te Tohi-Tapu. Ohage ko Fritz, neʼe tonu ke ina fetogi tana faʼahiga mahino ki te ʼuhiga ʼo he tāmai. Ko te faikole neʼe tokoni kia ia ke ina fakaʼaogaʼi te ʼu meʼa ʼaē neʼe ina ako ʼi te Tohi-Tapu. ʼE ina ʼui fēnei: “ ʼI te kamata, neʼe ʼau faka ʼuhiga ia Sehova ʼe ko hoku kaumeʼa lelei, he neʼe ʼi ai tāfito toku ʼu kaumeʼa ʼofaina, kae neʼe mole ʼau ʼiloʼi pe koteā he tāmai ʼofa. ʼAki te temi, neʼe ʼau ako ʼe tonu ke ʼau fakahā kia Sehova te ʼu meʼa ʼaē ʼi toku loto, te ʼu meʼa ʼaē neʼe ʼau lotolotolua ai, taku ʼu tuʼania, pea mo taku ʼu fihifihia. Neʼe ʼau faikole tuʼumaʼu kia te ia, pea neʼe ʼau fakatahiʼi te ʼu meʼa foʼou fuli ʼaē neʼe ʼau ako ʼo ʼuhiga mo ia, ohage pe ko he ʼu meʼa ʼe kita fakapikipiki tahi. ʼAki te temi, neʼe tuputupu ai taku ʼofa kia Sehova, pea ʼi te temi nei kua tahitahiga taku tuʼaniaʼi te faka ʼuhiga ʼo ia, ko haku Tāmai ʼofa.”

ʼE Nātou ʼĀteaina Mai Te ʼu Tuʼania Fuli

ʼI te kei tuʼu ʼo te mālama ʼāfea pea mo agakovi ʼaenī, ʼe mole feala ke tou hāo mai te ʼu tuʼania. Ki ʼihi Kilisitiano, ko tona faka ʼuhiga ko tanatou tuʼania pea mo tanatou lotolotolua ʼe toe hoko anai pea mo fakatupu lotomamahi anai kia nātou. Kae ke tou lotomālohi he ko Sehova ʼe ina ʼiloʼi tatatou lotolelei, pea mo te gāue kinakina ʼaē ʼe tou fai moʼo tauhi kia te ia. ʼE mole galo anai kia te ia ʼe tou ʼofa ki tona huafa.​—⁠Hepeleo 6:​10.

ʼI te kua ōvi mai ʼo te kele foʼou ʼaē ka takitaki e te Puleʼaga Faka Mesianike, ʼe falala te hahaʼi agatonu fuli, ʼe faka ʼāteaina anai nātou mai te ʼu kavega ʼo te mālama ʼa Satana. ʼI meʼa fakaloto fīmālie foki! Pea ʼe tou toe sio anai ki te lotoʼofa lahi ʼa Sehova. ʼO aʼu ki te temi ʼaia, tou falala “e lahiʼage te Atua i otatou loto pea e ina iloi te meafuape.”​—⁠1 Soane 3:​20.

[Nota ʼi te lalo pasina]

[Talanoa ʼo te pasina 30]

Ko Sehova ʼe mole aga fefeka, kae ʼe ko he Tāmai agalelei, lotoʼofa pea mo manavaʼofa

[Paki ʼo te pasina 31]

Ko te ako ʼo te Folafola ʼa te ʼAtua, ʼe tokoni mai ke tou manatu ohage ko ia