Ko Sehova ʼe Ina “Fakapale Natou e Natou Kumi Iaʼia”

“He ko ae e laka ki te Atua, e maua ke tui, e mauli pea e ina fakapale natou e natou kumi iaʼia.”​—Hepeleo 11:⁠6.

1, 2. He koʼe ʼe maʼu e ʼihi kaugana ʼa Sehova ia te ʼu manatu ʼe mole lelei?

ʼE UI fēnei e Barbara:a “Kua lagi taʼu 30 taku kua liliu ko he Fakamoʼoni ʼa Sehova, kae kiā au ʼe mole tāu mo au ke au toʼo te higoa ʼaia. Logola taku selevisi pionie pea mo taku fakahoko mo ʼihi pilivilesio, kae ʼi toku loto ʼe mole he meʼa ʼi te ʼu gāue ʼaia ʼe au faka tui ai ko au ko te Fakamoʼoni.” ʼE toe feiā mo te manatu ʼa Keith: “ ʼI ʼihi temi ʼe au ʼita koteʼuhi ko te ʼu kaugana ʼa Sehova ʼe lahi te ʼu tupuʼaga ke nātou fiafia ai, kae kiā au ʼe mole au fiafia pe la. ʼE mole lelei ia te ʼu manatu ʼaē ʼe au maʼu, pea tahi neʼe toe ʼāsili kovi age.”

² Neʼe lahi ia te ʼu kaugana agatonu ʼa Sehova ʼo te temi muʼa pea mo te temi nei neʼe nātou maʼu ia te ʼu manatu feiā. ʼE koutou manatu feiā koa ʼi ʼihi temi? ʼE lagi koutou tau tuʼumaʼu mo he ʼu fihifihia, kae ʼe hage tokotou ʼu tēhina mo tuagaʼane ʼe nātou maʼuli fiafia pea ʼe mole nātou tuʼania ki he meʼa. Pea ʼe feala ʼi te ʼu ʼaluʼaga ʼaia ke koutou manatu ʼe mole kei ʼofa pea mo tokaga ia Sehova kiā koutou. Kae ʼe mole tonu ke koutou manatu feiā. ʼE fakapapau fēnei mai ʼi te Tohi-Tapu: “[Ko Sehova] neʼe mole ina meʼa noaʼi pea mo fehiʼa ki te mamahi ʼo ia ʼaē ʼe lotomamahi; pea neʼe mole ina fufū kiā ia tona fofoga, pea ʼi te temi ʼaē neʼe pāuʼi ai kiā te ia ke ina hāofaki, neʼe ina logoʼi.” (Pesalemo 22:24) Ko te ʼu palalau fakakikite ʼaia ʼo ʼuhiga mo te Mesia, ʼe ʼasi mai ai ko Sehova ʼe mole gata ʼaki pe tana logo ki te ʼu faikole ʼo tana ʼu kaugana agatonu, kae ʼe ina toe fakapale foki ia nātou.

3. He koʼe ʼe mole he tahi iā tatou ʼe hāo mai te ʼu faigataʼaʼia ʼo te ʼu faʼahiga meʼa ʼo te tuʼu ʼaenī?

³ ʼE mole he tahi ʼe hāo mai te ʼu faigataʼaʼia ʼo te ʼu faʼahiga meʼa ʼo te tuʼu ʼaenī​—māʼiape la mo te hahaʼi ʼa Sehova. ʼE tou māʼuʼuli nei ʼi te mālama ʼe puleʼi e Satana te Tevolo ia te fili lahi ʼo Sehova. (2 Kolonito 4:4; 1 Soane 5:19) ʼE tauʼi tāfito e Satana ia te ʼu kaugana ʼa Sehova, pea ʼe mole puipui faka milakulo nātou e Sehova. (Sopo 1:​7-12; Apokalipesi 2:10) Kae ʼe tonu ke tou “kataki mo agatonu aipe i te faikole,” ʼo aʼu ki te temi ʼaē kua fakakatofa e te ʼAtua, heʼe tou falala ko Sehova ʼe tokaga kiā tatou. (Loma 12:12) ʼE mole tonu ke tou manatu ʼe mole ʼofa totatou ʼAtua ko Sehova kiā tatou, heʼe ina tuku ke hoko te ʼu fihifihia kiā tatou.

Te ʼu Faʼifaʼitaki ʼo Te Faʼa Kātaki ʼo Te ʼu Kaugana ʼo Temi Muʼa

4. Ko ai te ʼu kaugana agatonu ʼa Sehova neʼe nā kātakiʼi te ʼu ʼaluʼaga faigataʼa?

⁴ ʼI te temi muʼa, neʼe lahi te ʼu kaugana ʼa Sehova neʼe nātou kātakiʼi te ʼu ʼaluʼaga faigataʼa. Ohage la ko Ana, neʼe ‘mamahi tona loto’ he neʼe mole fānaunau, pea neʼe hage kua galoʼi ia e te ʼAtua. (1 Samuele 1:​9-11) ʼI te temi ʼaē neʼe tuli haʼele ai ia Elia e te fineʼaliki faifakapō ko Sesapele, neʼe mataku pea neʼe faikole fēnei kiā Sehova: “Kua feʼauga! ʼI te temi nei, Ê Sehova, toʼo toku nefesi, heʼe mole au lelei age ʼi toku ʼu tupuʼaga.” (1 Hau 19:4) ʼO feiā pe la mo te ʼapositolo ko Paulo, neʼe lagi lotomamahi ʼaupito ʼi tona ʼuhiga agahala, he neʼe ina ʼui fēnei: “Ka au fakaʼamu ke au fai te meʼa ʼaē ʼe totonu, ko te meʼa ia ʼaē ʼe kovi ʼe iā au.” Neʼe ina toe ʼui fēnei: “Tagata fakaʼofaʼofa ʼaē ko au!”​—Loma 7:​21-24, MN.

5. (a) Neʼe fakapale feafeaʼi ia Ana, mo Elia pea mo Paulo? (b) Koteā te fakaloto fīmālie ʼe tou lava maʼu mai te Folafola ʼa te ʼAtua mo kapau ʼe mole tou maʼu he ʼu manatu ʼe lelei?

⁵ Neʼe kātakiʼi aipe e Ana, mo Elia, mo Paulo tonatou ʼu fihifihia, ʼo mole nātou tuku ia tanatou tauhi ʼaē kiā Sehova, pea neʼe Ina fakapale ʼaupito nātou. (1 Samuele 1:20; 2:21; 1 Hau 19:​5-18; 2 Timoteo 4:8) Kae neʼe nātou tau mo te ʼu fihifihia kehekehe, ko te lotomamahi, mo te heʼe ʼamanaki, pea mo te mataku. Koia ʼe mole tou punamaʼuli ai, mo kapau ʼi ʼihi temi ʼe tou maʼu ia te ʼu manatu ʼe mole lelei. Kae koteā ʼaē ʼe koutou lava fai mo kapau ʼe koutou feʼekeʼaki peʼe ʼofa moʼoni koa ia Sehova kiā koutou ʼuhi ko te ʼu tuʼania ʼo te maʼuli? Ko te Folafola ʼa te ʼAtua ʼe ina lava fakaloto fīmālieʼi koutou. Ohage la, ʼi te alatike kua ʼosi, neʼe tou talanoa ai ki te ʼui ʼaē e Sesu ko Sehova ʼe ina lau “te ʼu fuluʼi ʼulu fuli ʼo tokotou ʼulu.” (Mateo 10:​30, MN ) ʼE ʼasi mai ʼi te ʼu palalau fakaloto mālohi ʼaia ko Sehova ʼe tokaga fakamalotoloto ki tana ʼu kaugana fuli. Koutou toe manatuʼi mo te lea fakatātā ʼa Sesu ʼo ʼuhiga mo te ʼu pasele. Kapau ʼe tokaga ia Sehova ki he tahi ʼi te ʼu kiʼi manulele ʼaia ʼe tō ki te kele, pea ʼe toe tokaga pe anai kiā koutou.

6. ʼE lava liliu feafeaʼi ia te Tohi-Tapu ko he matapuna fakaloto fīmālie kiā nātou ʼaē ʼe nātou tauʼi te ʼu manatu ʼaē ʼe mole lelei?

⁶ ʼE feala moʼoni koa kiā tatou tagata agahala ke tou maʼuhiga kiā mata ʼo te Tupuʼaga māfimāfi ko Sehova ʼAtua? Ei! ʼE lahi te ʼu vaega faka Tohi-Tapu ʼe nātou fakamoʼoni ki te faʼahi ʼaia. Ka tou metitāsioʼi te ʼu vaega ʼaia, ʼe feala ke tou fai te ʼu palalau ʼaenī ʼa te tagata fai pesalemo: “ ʼI te hoha lahi ʼo toku loto, neʼe fakapelepeleʼi toku nefesi e tau ʼu fakaloto fīmālie.” (Pesalemo 94:19) Tou vakaʼi muʼa te ʼu palalau fakaloto fīmālie ʼi te Folafola ʼa te ʼAtua, ʼe tokoni mai anai kiā tatou ke tou mahino lahi age ʼe tou maʼuhiga ki te ʼAtua pea ʼe ina fakapale anai tatou mo kapau ʼe tou haga fai ia tona finegalo.

Te “Koloā Makehe” ʼa Sehova

7. Koteā te fakakikite fakaloto mālohi neʼe tala e Sehova kiā Malakia ʼo ʼuhiga mo te puleʼaga agahala?

⁷ Neʼe hoko te meʼa fakamataku ʼi te lotolotoiga ʼo te kau Sutea lolotoga te nima sēkulō ʼi muʼa ʼo totatou temi. Neʼe tali e te kau pelepitelo ia te ʼu manu ʼe mole lelei pea neʼe nātou momoli faka sākilifisio ia te ʼu manu ʼaia ʼi te ʼaletale ʼo Sehova. Neʼe fakapalatahi ia te kau tuʼi fakamāu. Neʼe mafola ʼi te fenua ia te ʼu gāue fakatemonio, te loi, te kākā, pea mo te tono. (Malakia 1:8; 2:9; 3:5) ʼO ʼuhiga mo te puleʼaga agahala ʼaia, neʼe fai e Malakia ia te fakakikite fakatalakitupua. ʼI tona temi totonu, ʼe toe tapuakina anai e Sehova ia tana hahaʼi. ʼE tou lau fēnei: “ ‘ ʼE mahino papau ia, ʼe nātou liliu anai ko taku hahaʼi,’ ko te ʼui ʼaia ʼa Sehova ʼo te ʼatu kautau, ‘ ʼi te ʼaho ʼaē ka au fakatupu ai anai he koloā makehe. Pea ʼe au manavaʼofa anai kiā nātou ohage ko he tagata ʼe manavaʼofa ki tona foha ʼaē ʼe tauhi kiā ia.’ ”​—Malakia 3:⁠17.

8. Koteā te pikipikiga ʼo te ʼu palalau ʼaē iā Malakia 3:17 pea mo te toe hahaʼi tokolahi?

⁸ ʼE ʼi ai te pikipikiga ʼo te lea faka polofeta ʼa Malakia mo te kau Kilisitiano fakanofo ʼo te temi nei, ia te puleʼaga fakalaumālie ʼaē ko tana kau faʼu ko te toko 144 000. ʼIo, ko te puleʼaga ʼaia ʼe ko “he koloā makehe” peʼe ko “he hahaʼi ki he gāue makehe” maʼa Sehova. (1 Petelo 2:​9, MN ) ʼE toe fakaloto mālohi ia te lea faka polofeta ʼa Malakia ki te “toe hahaʼi tokolahi,” ʼaē ʼe nātou “tutuʼu iā muʼa ʼo te hekaʼaga faka hau pea iā muʼa ʼo te Akeno, ʼe nātou kofuʼi te ʼu kofu hina.” (Apokalipesi 7:​4, 9, MN ) Ko te toe hahaʼi tokolahi ʼaia ʼe nātou liliu mo te kau fakanofo ko te faga ōvi e tahi, ʼo nātou fakalogo ki te takitaki ʼa te Tagata Tauhi Ōvi ko Sesu Kilisito.​—Soane 10:⁠16.

9. He koʼe kiā Sehova ko tana hahaʼi ʼe ko “he koloā makehe”?

⁹ Koteā te manatu ʼa Sehova ʼo ʼuhiga mo nātou ʼaē ʼe filifili ke nātou kaugana kiā te ia? Ohage ko tona ʼui iā Malakia 3:​17, ʼe ʼofa kiā nātou ohage ko he tāmai ʼe ʼofa ki tona foha. Pea koutou fakatokagaʼi ʼe ina ʼui ʼo ʼuhiga mo tana hahaʼi​—ʼe ko “he koloā makehe.” ʼE fakaliliu fēnei e ʼihi Tohi-Tapu ko “taku koloā,” ko “taku koloā maʼuhiga ʼaupito.” He koʼe ʼe ʼui e Sehova ʼe makehe te hahaʼi ʼaē ʼe nātou tauhi kiā te ia? Heʼe ko he ʼAtua ʼe loto fakafetaʼi. (Hepeleo 6:10) ʼE fakaōvi kiā nātou ʼaē ʼe nātou tauhi age kiā te ia mo tonatou loto kātoa pea ʼe ina faka ʼuhiga nātou ko hana koloā makehe.

10. ʼE puipui feafeaʼi e Sehova ia tana hahaʼi?

¹⁰ ʼE ʼi ai koa he meʼa ʼe koutou faka ʼuhiga ohage ko hakotou koloā makehe? Kapau koia pea ʼe koutou fai anai he ʼu fakatuʼutuʼu moʼo taupau takotou koloā ʼaia. ʼE toe fai feiā e Sehova ʼo ʼuhiga mo tana “koloā makehe.” ʼIo, ʼe mole ina puipui tana hahaʼi mai te ʼu fihifihia pea mo te ʼu tuʼutāmaki fuli ʼo te maʼuli. (Tagata Tānaki 9:11) Kae ko Sehova ʼe ina lava puipui ia tana ʼu kaugana agatonu ʼi te faʼahi fakalaumālie. ʼE ina foaki age kiā nātou ia te mālohi ʼaē ʼe ʼaoga kiā nātou moʼo kātakiʼi tonatou ʼu ʼahiʼahi. (1 Kolonito 10:13) Koia, neʼe ʼui e Moisese ki te hahaʼi ʼa te ʼAtua ʼo te temi muʼa, ia te kau Iselaele: “Koutou lototoʼa pea mo mālolohi. . . . Ko Sehova tou ʼAtua ʼaē ʼe haʼele mo koe. ʼE mole mavae anai ia te koe pea ʼe mole ina līaki kātoa anai koe.” (Teutalonome 31:6) Ko Sehova ʼe ina tokagaʼi te ʼu gāue lelei ʼo tana hahaʼi. Maʼa ia, ko nātou ʼe ko hana “koloā makehe.”

Ko Sehova ʼAē ʼe Ina “Fakapale”

11, 12. Ko tatatou ʼiloʼi ʼaē ko Sehova ʼe ina fakapale tana hahaʼi, ʼe lava tokoni feafeaʼi mai ke tou tekeʼi ia te lotolotolua?

¹¹ Ko te tahi fakamoʼoni ʼe maʼuhiga kiā Sehova tana ʼu kaugana, heʼe ina fakapale ia nātou. Neʼe ina ʼui fēnei ki te kau Iselaele: “ ‘Koutou fakalelei age, kae ke koutou ʼahiʼahiʼi au ki te faʼahi ʼaia,’ ko te ʼui ʼaia ʼa Sehova ʼo te ʼatu kautau, ‘peʼe mole au avahi anai kiā koutou te ʼu matapā ʼo te lagi pea mo huaʼi moʼoni anai kiā koutou he tapuakina ʼo aʼu ki te mole toe ʼi ai ʼo he hoge.’ ” (Malakia 3:10) Pea ʼe fakapale anai e Sehova tana ʼu kaugana ʼaki te maʼuli heʼegata. (Soane 5:24; Apokalipesi 21:4) ʼE hā mai ʼi te fakapale ʼaia, ʼe lahi ʼaupito te ʼofa ʼo Sehova pea mo tana manavaʼofa. ʼE toe hā ʼaki mai, ʼe maʼuhiga moʼoni kiā ia te hahaʼi ʼaē ʼe nātou fia tauhi kiā te ia. Kapau ʼe tou ʼiloʼi ko Sehova ʼe ina Fakapale tatou, pea ʼe faigafua anai hatatou tui papau ʼe ʼofa kiā tatou. ʼI tona fakahagatonu, ko Sehova ʼe ina fakaloto mālohiʼi tatou ke tou faka tui ʼe ina Fakapale anai tatou! Neʼe tohi fēnei e Paulo: “He ko ae e laka ki te Atua, e maua ke tui, e mauli pea e ina fakapale natou e natou kumi iaʼia.”​—Hepeleo 11:⁠6.

¹² ʼIo, ʼe tou tauhi kiā Sehova heʼe tou ʼofa ia ia​—kae mole ʼuhi pe heʼe ina fakapapau mai ia te fakapale. Kae kapau ʼe tou taupau ʼi totatou loto ia te ʼamanaki ʼo ʼuhiga mo he fakapale, pea ʼe mole ko he fakaʼamu kovi pea ʼe mole ko he manatu pe kiā kita. (Kolose 3:​23, 24) ʼO hilifaki ki tana ʼofa ʼaē kiā nātou pea mo tana faka maʼuhigaʼi ʼaupito ia nātou, ʼe fai e Sehova ia he puleʼaki pea ʼe ina fakapale ia nātou ʼaē ʼe nātou kumi fakamalotoloto ia ia.

13. He koʼe ko te fakatuʼutuʼu ʼo te faitotogi ʼe ko he fakamoʼoni lahi ʼaia ʼo te ʼofa ʼo Sehova kiā tatou?

¹³ ʼE hā lelei mai ʼaki te faitotogi ʼaē neʼe fai e Sehova, ʼe maʼuhiga ʼaupito ia te malamanei ki ʼona mata. Neʼe tohi fēnei e te ʼapositolo ko Soane: “Nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.” (Soane 3:16) Ko te manatu ʼaē ʼe mole ʼofa ia Sehova kiā tatou, ʼe mole ʼalutahi mo te fakatuʼutuʼu ʼo te sākilifisio faitotogi ʼo Sesu Kilisito. Kapau neʼe foaki e Sehova ia he totogi maʼuhiga maʼa tatou​—ʼi tana foaki tona ʼAlo ʼulu tokotahi​—ʼe mahino ia ʼe ʼofa ʼaupito kiā tatou.

14. Neʼe faka ʼuhigaʼi feafeaʼi e Paulo ia te sākilifisio faitotogi?

¹⁴ Koia, kapau ʼe hake iā koutou he ʼu manatu ʼe mole lelei, pea ʼe tonu ke koutou metitāsio ʼo ʼuhiga mo te faitotogi. Ei, koutou faka ʼuhigaʼi te meʼa ʼofa ʼaia ohage ko he fakatuʼutuʼu ʼe foaki totonu atu e Sehova kiā koutou. Neʼe ko te faʼahi ʼaia neʼe fai e te ʼapositolo ko Paulo. Koutou manatuʼi neʼe ina fai te ʼu palalau ʼaenī: “Tagata fakaʼofaʼofa ʼaē ko au!” Pea neʼe ina toe ʼui fēnei: “ ʼE au fakafetaʼi ki te ʼAtua ʼaki ia Sesu Kilisito totatou ʼAliki,” ʼaē neʼe ʼui e Paulo, “neʼe ʼofa kiā te au pea mo ina foaki ia ia ʼuhi ko au.” (Loma 7:​24, 25, MN; Kalate 2:​20, MN ) ʼI tana fai te ʼu palalau ʼaia, neʼe mole manatu pe ia Paulo kiā te ia. Neʼe ina fia fakahā pe ia, ʼe falala ko Sehova ʼe ina tokagaʼi ia ia. Ohage ko Paulo, ʼe tonu ke koutou sio ki te faitotogi ohage ko he meʼa ʼofa mai te ʼAtua. Ko Sehova ʼe mole gata pe ʼi tona ʼuhiga ʼAtua mālohi moʼo Hāofaki, kae ʼe toe ʼofa foki ki te hahaʼi pea mo ina fakapale nātou.

Tou Tōkakaga Ki “Te ʼu Kākā” ʼa Satana

15-17. (a) ʼE fakaʼaogaʼi feafeaʼi e te Tevolo ia te ʼu manatu ʼaē ʼe mole lelei? (b) Koteā te fakaloto mālohi ʼe feala ke tou tāʼofi mai te maʼuli ʼo Sopo?

¹⁵ ʼE feala ke mata faigataʼa hakotou tui ko te ʼu fakaloto fīmālie ʼaē ʼe tuʼu ʼi te Folafola ʼa te ʼAtua ʼe ʼaoga moʼoni kiā koutou. ʼE lagi kiā koutou ko te fakapale ʼo ʼuhiga mo he maʼuli heʼegata ʼi te mālama foʼou ʼo te ʼAtua ʼe ko he meʼa ia ʼe maʼu pe e ʼihi, kae ʼe mole tuha mo koutou ia te faʼahi ʼaia. Kapau ʼe feiā ia takotou manatu, pea koteā ʼaē ʼe koutou lava fai?

¹⁶ ʼE mahino ia ʼe koutou ʼiloʼi lelei ia te fakaloto mālohi ʼa Paulo ki te kau Efeso: “Koutou kofuʼi te teu tau kātoa ʼo te ʼAtua ke feala ai hakotou tutuʼu mālohi ʼo fakafeagai ki te ʼu kākā ʼa te Tevolo.” (Efeso 6:​11, MN ) Ka tou fakakaukauʼi te ʼu kākā ʼa Satana, ko te ʼu meʼa ʼaē ʼe tou foimo manatu kiai, ʼe ko te mānumānu koloā pea mo te ʼu aga heʼeʼaoga. Ko te ʼu kākā ʼaia ʼaē neʼe tupu ai ia te higa ʼa te tokolahi ʼi te hahaʼi ʼa te ʼAtua ʼo te temi muʼa pea mo totatou temi. Kae ʼe mole tonu ke galo ia tatou ia te tahi kākā ʼa Satana​—tana faiga ʼaē ke ina fakalotoʼi te hahaʼi ke nātou faka tui ʼe mole ʼofaʼinaʼi nātou e Sehova ʼAtua.

¹⁷ ʼE faiva ia te Tevolo ʼi te fakaʼaogaʼi ʼo te ʼu manatu ʼaia moʼo faigaʼi ke ina fakamamaʼo ia te hahaʼi mai te ʼAtua. Koutou manatuʼi te ʼu palalau ʼaē neʼe fai e Pilitate kiā Sopo: “Koia ʼe lava feafeaʼi ki he tagata hana lākatonu iā muʼa ʼo te ʼAtua, peʼe lava feafeaʼi hana maʼa, ia ia ʼaē neʼe tupu mai te fafine? Sio! Māʼia mo te māhina, ʼe mole gigila, pea mo te ʼu fetuʼu, neʼe mole nātou maʼa ki ʼona mata. ʼO feafeaʼi age la he tagata, ʼaē ko he ʼugaga, pea mo he foha ʼo te tagata, ʼaē ko he kelemutu!” (Sopo 25:​4-6; Soane 8:44) ʼE mahino ia neʼe ko he ʼu palalau fakatupu lotovaivai. Koia ʼaua naʼa koutou tuku ke fakalotovaivaiʼi koutou e Satana. Tahi ʼaē meʼa, koutou ʼiloʼi te ʼu kākā ʼa Satana ke feala hakotou lototoʼa pea moʼo tekeʼi ia te ʼu fihifihia ʼaē moʼo fai ia te meʼa ʼaē ʼe lelei. (2 Kolonito 2:11) Ohage ko Sopo, logola tona fakatonutonuʼi, kae neʼe fakapale e Sehova tana faʼa kātaki ʼo ina toe liufaki age tana ʼu koloā fuli ʼaē neʼe puli.​—Sopo 42:⁠10.

Ko Sehova “ ʼe Lahi Age Ia ʼi Totatou Loto”

18, 19. E feafeaʼi te ‘lahi age ʼa te ʼAtua ʼi totatou loto,’ pea e feafeaʼi tana ‘ ʼiloʼi ia meʼa fuli’?

¹⁸ ʼE moʼoni, ʼe lagi faigataʼa he lolomi ʼo he ʼu manatu fakatupu lotovaivai mo kapau kua tauaka ʼi totatou loto. Kae ko te laumālie ʼo Sehova ʼe feala ke tokoni atu ke koutou holoʼi māmālie “he ʼu tule . . . ʼe fakafeagai ki te ʼiloʼi ʼo te ʼAtua.” (2 Kolonito 10:​4, 5, MN ) Ka koutou tau mo he ʼu manatu ʼe mole lelei, koutou metitāsioʼi te ʼu palalau ʼa te ʼapositolo ko Soane: “ ʼAki te meʼa ʼaia ʼe tou ʼiloʼi ai anai ko tatou ʼe tou nonofo ʼi te moʼoni, pea ʼe tou fakafimālie anai totatou loto ʼi ʼona muʼa, ʼo ʼuhiga mo meʼa fuli ʼe tautea tatou e totatou loto, heʼe ko te ʼAtua ʼe lahi age ia ʼi totatou loto pea ʼe ina ʼiloʼi ia meʼa fuli.”​—1 Soane 3:​19, 20, MN.

¹⁹ Koteā te faka ʼuhiga ʼo te kupusiga palalau “ko te ʼAtua ʼe lahi age ia ʼi totatou loto”? ʼI ʼihi temi, ʼe feala ke tauteaʼi tatou e totatou loto, tāfito la mokā ʼe tou ʼiloʼi lelei totatou ʼuhiga heʼe haohaoa pea mo agahala. Lagi ʼe tou feiā ʼuhi ko totatou haʼuʼaga, ʼe lahi tatatou ʼu manatu ʼe mole lelei ʼo ʼuhiga mo tatou totonu, ʼo tou ʼui ʼe mole he meʼa ʼe feala ke leleiʼia ai tatou e Sehova. ʼE fakapapauʼi mai e te ʼapositolo ko Soane, ko Sehova ʼe lahi age ia ia tatou! ʼE mole gata pe tana sio ʼi te ʼu hala ʼaē ʼe tou fai kae ʼe toe sio ia ki totatou ʼu fealagia moʼoni. ʼE ina toe ʼiloʼi foki mo te ʼu tupuʼaga ʼaē ʼe tou fai ai te ʼu meʼa ʼaia pea mo te ʼu meʼa ʼaē ʼi ʼotatou loto. Neʼe tohi fēnei e Tavite: “Koteʼuhi ʼe ina ʼiloʼi lelei peʼe faʼu tatou ʼaki teā, ʼo ina manatuʼi ko tatou ʼe tou efu.” (Pesalemo 103:14) Ei ko Sehova ʼe ina ʼiloʼi lelei age ia tatou!

Ko “He Pale Matalelei” Pea Mo “He Kie Faka Hau”

20. ʼI te lea faka polofeta ʼa Isaia ʼo ʼuhiga mo te toe liliu ʼa Iselaele ki tonatou fenua, ʼe faka ʼuhiga feafeaʼi e Sehova tana ʼu kaugana?

²⁰ ʼAki te polofeta ko Isaia, neʼe foaki e Sehova ki tana hahaʼi ʼo te temi muʼa te ʼamanaki ʼo hanatou toe liliu ki tonatou fenua. ʼI tanatou māʼuʼuli popūla ʼi Papiloni, neʼe ko he fakaloto mālohi ʼaia ki te hahaʼi lotomamahi! ʼO ʼuhiga mo te temi ʼaē ka nātou toe liliu ai ki tonatou fenua, neʼe ʼui fēnei e Sehova: “ ʼE ke liliu anai ko he pale matalelei ʼi te nima ʼo Sehova, ko he kie faka hau ʼi te ʼalofi nima ʼo tou ʼAtua.” (Isaia 62:3) ʼAki te ʼu palalau ʼaia, neʼe fakahā ai e Sehova ʼe fakaʼapaʼapa pea mo ina mataleleiʼia tana hahaʼi. Neʼe ina toe fai feiā ki te puleʼaga fakalaumālie ʼo Iselaele ia ʼaho nei. ʼE hage ʼe ina hikihiki nātou ke sio fuli kiai te hahaʼi.

21. ʼE lava feafeaʼi hakotou falala ko Sehova ʼe ina fakapale anai takotou faʼa kātaki agatonu?

²¹ ʼE ʼuluaki hoko te lea faka polofeta ʼaia ki te kau Kilisitiano fakanofo, kae ʼe ina toe fakahā mai foki ʼe faka maʼuhigaʼi e Sehova ia nātou fuli ʼaē ʼe kaugana kiā te ia. Koia, ka koutou tau mo he ʼu manatu ʼe mole lelei, koutou manatuʼi logola tokotou ʼuhiga agahala kae kiā Sehova ʼe koutou hage ko “he pale matalelei” pea mo “he kie faka hau.” Koia koutou haga fakafiafia ia tona loto ʼo koutou faigaʼi fakamalotoloto ke koutou fai ia tona finegalo. (Tāʼaga Lea 27:11) Ka koutou fai feiā, ʼe feala hakotou falala ko Sehova ʼe ina fakapale anai takotou faʼa kātaki agatonu!

[Kiʼi nota]

ʼE Kei Koutou Manatuʼi Koa?

• Koteā ʼaē ʼe faka ʼuhiga ai tatou e Sehova ʼe ko “[hana] koloā makehe?”

• He koʼe ʼe maʼuhiga ke tou sio kiā Sehova ohage ko he Tagata ʼe ina Fakapale tana hahaʼi?

• Koteā te “kākā” ʼa Satana ʼaē ʼe tonu ke tou tōkakaga ʼo fakafeagai kiai?

• Ko te ʼaluʼaga fea ʼaē “ ʼe lahi age ia [te ʼAtua] ʼi totatou loto”?

[Paki ʼo te pasina 26]

Paulo

[Paki ʼo te pasina 26]

Elia

[Paki ʼo te pasina 26]

Ana

[Paki ʼo te pasina 28]

ʼE mahu te ʼu tuʼuga manatu fakaloto fīmālie ʼi te Folafola ʼa te ʼAtua