Kua Puli Koa Te Faka ʼUhiga ʼo Te Kupu “Kilisitiano”?
KOTEĀ te faka ʼuhiga ʼo he Kilisitiano? ʼE koutou tali feafeaʼi anai? Neʼe fai te fehuʼi ʼaia ki te tokolahi neʼe filifili ʼi te ʼu kolo kehekehe, pea koʼeni tanatou ʼu tali:
“Ke tou mulimuli kia Sesu pea mo faʼifaʼitaki kia te ia.”
“Ke tou agalelei pea mo vaevae mo te hahaʼi.”
“Ke tou fakamoʼoni ʼe ko Kilisito te ʼAliki pea mo te Fakamaʼuli.”
“Ke tou ʼolo ʼo misa, mo lau te lōsalio, pea mo tou komunio.”
“ ʼI taku ia manatu, ʼe mole tonu ke kita ʼalu ʼo misa ke feala ai he ʼui ʼe kita Kilisitiano.”
ʼO feiā mo te ʼu tikisionalio, ʼe tou maʼu ai te ʼu tuʼuga fakamahino faigataʼa ʼo ʼuhiga mo te kupu ʼaia. ʼI tona fakahagatonu, ʼe tou maʼu ʼi te tahi tikisionalio te ʼu fakamahino e hogofulu ʼo te kupu “Kilisitiano,” ʼo ina ʼuluaki ʼui ʼe “ko te tui kia Sesu Kilisito peʼe ko te kau ki tana lotu” pea ʼi te fakamahino fakamuli ʼe ina ʼui ʼe “ko he tahi ʼe lelei tana aga pea mo ʼofaina.” ʼE mole tou punamaʼuli ai ki te kua faigataʼa maʼa te tokolahi hanatou fakamahino te faka ʼuhiga ʼo he Kilisitiano.
ʼE Nātou Tali Ia Meʼa Fuli
Ia ʼaho nei, ʼi te hahaʼi ʼaē ʼe nātou lau ko he kau Kilisitiano—ʼo feiā mo nātou ʼaē ʼe lotu tahi—ʼe kita lava maʼu ai he ʼu manatu kehekehe, ohage la ko te taki e te ʼAtua te tohi ʼo te Tohi-Tapu, mo te evolisio, mo te fai politike ʼa te lotu, pea mo te vaevae ʼa he tahi tana tui ki te hahaʼi. ʼE tau fakafihiʼi te ʼu aga ohage ko te fakatō fatu, mo te nofo ʼa he tagata mo he tahi tagata, pea mo te maʼuli ʼa he toko lua kae mole heʼeki nā ʼohoana. ʼE hā ʼaki mai ʼe nātou tali ia meʼa fuli.
Ohage la, neʼe tohi e te sulunale Christian Century ʼe mole heʼeki faʼa fualoa, neʼe vote te komite ʼo te Lotu Polotesita ke lagolago ki te fealagia ʼa he lotu ke ina “fili he tagata ʼe nofo mo he tahi tagata ke tagata ʼāfea ʼi tana kolesi pule.” Pea ko ʼihi teolosia neʼe nātou ʼui ʼe mole maʼuhiga ke kita tui kia Sesu moʼo hāofaki ʼo kita. ʼE ʼui e te alatike ʼo te sulunale The New York Times, ʼe tui te kau teolosia ʼaia ko te kau Sutea, te kau Mahometa, pea mo te tahi ʼu lotu, “ ʼe feala ke nātou hū ki selo [ʼi tonatou ʼuhiga Kilisitiano ʼaia].”
Koutou fakakaukauʼi age muʼa, kapau ko he tahi ʼe kominisi kae lagolago ki te faʼahi politike ʼaē ʼe gaohi paʼaga, peʼe ko he tahi ʼe fia puleʼaga faʼitaliha kae ʼe lagolago ki he puleʼaga fefeka, peʼe ko he tahi ʼe ina fia puipui te natula kae lagolago ki te maumauʼi ʼo te ʼu vao matuʼa. ʼE koutou ʼui anai “ ʼe mole ko he tagata kominisi moʼoni, peʼe loto moʼoni ke puleʼaga faʼitaliha peʼe ina fia puipui moʼoni te natula,”—pea ʼe koutou tonu. Kae kapau ʼe koutou vakaʼi ia ʼaho nei te ʼu manatu kehekehe ʼa te hahaʼi ʼaē ʼe nātou ʼui ko he kau Kilisitiano, pea ʼe koutou fakatokagaʼi anai te fefakafeagaiʼaki ʼo te ʼu meʼa ʼaē ʼe nātou tui kiai, pea ʼi te agamāhani ʼe fakafeagai ki te meʼa ʼaē neʼe akoʼi e ia ʼaē neʼe ina fakatuʼu te Lotu Faka Kilisitiano, ia Sesu Kilisito. Koteā ʼaē ʼe hā ai ʼo ʼuhiga mo tanatou faʼahiga Lotu Faka Kilisitiano?—1 Kolonito 1:10.
Koia ʼe tou vakaʼi anai, kua fualoa te fakaloto mālohi ke fetogi te ʼu akonaki faka Kilisitiano ke ʼalutahi mo te manatu ʼa te hahaʼi. Koteā te manatu ʼa te ʼAtua pea mo Sesu Kilisito ʼo ʼuhiga mo te ʼu fetogi ʼaia? ʼE feala koa ke fakahigoaʼi te ʼu lotu ko he ʼu Lotu Faka Kilisitiano mo kapau ʼe nātou lagolago ki te ʼu akonaki ʼaē neʼe mole fai e Kilisito? ʼE tou vakaʼi anai te ʼu fehuʼi ʼaia ʼi te alatike ʼaē ka hoa mai.