ʼE Feala Koa He Fakaōvi Ki He ʼAtua Fakapulipuli?

ʼE feala hakotou feʼekeʼaki fēnei: ‘ ʼE lava feafeaʼi haku felogoi lelei mo he tahi ʼe mole ʼau sio ki ai?’ ʼE lagi ko he fehuʼi ʼe maʼuhiga ke tou tali kiai. Kae tou fakatokagaʼi age muʼa te ʼu faʼahi ʼaenī:

ʼE MAʼUHIGA koa ke kita sio ke feala ai hakita maʼu he ʼu felogoi ʼofa pea mo tologa? ʼE mole toe maʼuhiga koa la mo te ʼu meʼa ʼaē ʼe fakapulipuli? Ei! Koia la ʼaē, neʼe ʼi ai te ʼu hahaʼi neʼe nātou felogoi lelei he neʼe nātou fefaitohiʼaki tuʼumaʼu​—⁠ʼo nātou fakahā fakahagatonu ʼi tanatou ʼu tohi te ʼu meʼa ʼaē ʼe nātou leleiʼia, mo te ʼu meʼa ʼaē ʼe nātou fehiʼa kiai, mo tanatou ʼu fakatuʼutuʼu, mo tanatou ʼu pelesepeto, mo tanatou ʼu fakahuahua, pea mo te tahi ʼu agaaga ʼo nātou pea mo te ʼu meʼa ʼaē ʼe nātou fia fai.

ʼE toe feiā mo te hahaʼi kivi, ʼe tou fakatokagaʼi ia nātou, ko te sio ʼe mole maʼuhiga ki tanatou ʼu felogoi lelei mo he tahi. Koutou fakatokagaʼi te faʼifaʼitaki ʼa Edward pea mo Gwen, ko te taumatuʼa kivi.a Neʼe felāveʼi ia Edward mo Gwen ʼi te faleako ʼa te kau kivi, ʼaē neʼe nā kaugā ako fakatahi ai. Neʼe leleiʼia e Edward te ʼu kalitate ʼo Gwen, tāfito tana agatonu ʼi tana ʼu palalau pea mo tana aga, pea mo tana tokaga lelei ki tana gāue. Pea kia Gwen, neʼe ʼofa kia Edward, koteʼuhi ʼe ina ʼui fēnei: “Neʼe ina fakahā te ʼu kalitate fuli ʼaē neʼe ʼau manako kiai, pea neʼe ko he ʼu kalitate maʼuhiga.” Pea neʼe nā fakatahi, pea hili taʼu e tolu pea nā ʼohoana.

ʼE ʼui fēnei e Edward: “Ka koutou fakatahi, pea ʼe mole ko he fihifihia takotou kivi ke koutou felogoi mo he tahi. ʼE mole lagi feala hakotou fesioʼaki, kae ko te ʼu meʼa ʼaē ʼi ʼokotou loto ʼe mole kivi ia.” Kua hili nei kiai taʼu e 57, kae kei nā feʼofaʼaki ʼaupito. ʼE nā fakahā mai ko tanā ʼu felogoi taulekaleka ʼe fakatafito kia meʼa e fā: (1) ko te tokagaʼi ia te ʼu kalitate ʼa he tahi, (2) ko te fakakaukauʼi ʼo te ʼu kalitate ʼaia pea mo te leleiʼia ʼo te ʼu kalitate ʼaia, (3) ko te taupau ʼo he felogoi lelei, pea (4) mo fai fakatahi he ʼu gāue.

ʼE maʼuhiga te ʼu puani ʼaia e fā ki he ʼu felogoi lelei, ʼa he ʼu kaumeʼa, pe ko he taumatuʼa, pea ʼe maʼuhiga tāfito ki te ʼu felogoi ʼa te tagata pea mo te ʼAtua. ʼI te alatike ʼaē ka hoa mai, ʼe tou vakaʼi anai peʼe feafeaʼi hatatou maʼuliʼi te ʼu puani ʼaia, ke feala hanatou tokoni mai kia tatou ke tou maʼu he ʼu felogoi lelei mo te ʼAtua, logola ʼe mole feala hatatou sio ki ai.b

[Kiʼi nota]