Tou Tokoni Ki He Kivi Ke Ina Ako ʼo ʼUhiga Mo Sehova

1. Neʼe fakaha feafeaʼi e Sesu ia tana manavaʼofa ʼae ki te kau kivi?

¹ Neʼe kei toe pe ni ʼu kiʼi ʼaho pea mate ia Sesu. ʼI tana mavae mai te kolo ko Seliko, neʼe ʼi ai te ʼu tagata kivi kai kolekole ʼe toko lua neʼe nā kalaga fenei: “Ofa mai kia maua, Aliki.” Logo la neʼe manatuʼi e Sesu ia te ʼu ʼahiʼahi faigataʼa ka tau anai mo ia, kaʼe neʼe tuʼu pea neʼe ina pauʼi te ʼu tagata ke olo age kia ia. Pea neʼe ina fakamalolo ia naua. (Mat. 20:29-34) ʼE tou lava faʼifaʼitaki feafeaʼi ia te manavaʼofa ʼo Sesu ki te kau kivi?

2. (1) ʼE tou lava faifakamafola feafeaʼi ki he tahi ʼe kivi ʼi te ʼu koga meʼa ʼae ʼe hahaʼi ai? (2) Kotea ʼae ʼe tonu ke tou manatuʼi moka tou faifakamafola ki he tahi ʼe kivi?

² Tokoni Kia Natou: Moka kotou felaveʼi mo he tahi ʼe kivi, lagi ʼi te ʼu koga meʼa ʼae ʼe hahaʼi ai, ʼe feala takotou tokoni ki ai. ʼE lagi ʼe feala ʼi te kamata ke mole ina fia tokagaʼi koutou koteʼuhi ʼe tau kakāʼi natou e te hahaʼi. Kaʼe kapau ʼe kotou agalelei pea mo fakaha ʼe kotou tokaga moʼoni kia ia ʼe feala anai ke mole mataku. Kotou manatuʼi ʼe ʼi ai te ʼu faʼahiga kivi kehekehe pea ʼe fakalogo ia takotou tokoni ki te aluʼaga ʼaia. Hili takotou tokoni ki ai, ʼe lagi feala ke kotou ui age ʼe kotou ako ia te Tohi-Tapu. Kotou kole age ke kotou lau ia he vaega Tohi-Tapu ohage ko Pesalemo 146:8 peʼe ko Esaia 35:5, 6. Kapau ʼe ina fia lau ia te ʼu mataʼi tohi maʼa te kau kivi, kotou kole age pe ʼe ina fia maʼu ia he Tohi ʼi te ʼu mataʼi tohi maʼa te kau kivi ʼe tokoni anai kia ia ke lahi age tana ako ʼo ʼuhiga mo te Tohi-Tapu. ʼE toe feala takotou tokoni ki ai ke ina maʼu ia he ʼu fakamatala neʼe puke mai tatatou tuʼasila jw.org. Kapau ʼe maʼu ʼi tana olotinatea ia he logiciel ʼe feala ai tana fakalogo ki te lau leʼo lahi ʼo te ʼu tohi, ʼe feala ke ina leleiʼia ia te ʼu tohi ʼae ʼi tatatou tuʼasila jw.org ʼae ʼe format RTF (Rich Text Format).—Vakaʼi te fakamatala ʼae ʼi te ʼa takai “Moka Kotou Tokoni Ki He Tahi ʼe Kivi . . . ”

3. ʼE tou lava kumi feafeaʼi ia he tahi ʼe kivi ʼi totatou telituale?

³ Kumi Ia Te Kau Kivi: ʼE tahitahiga tatatou felaveʼi mo he kau kivi ʼi tatatou faifakamafola ʼi te ʼu ʼapi, koteʼuhi tokolahi ʼo natou ʼe ufiufi ʼi te palalau ki te hahaʼi kehe ʼae ʼe ʼomai kio natou. Koia, ʼe tonu ai ke tou faiga moʼoni ʼo ‘kumi’ ia te faʼahiga hahaʼi ʼaia moʼo faifakamafola kia natou. (Mat. 10:11) ʼE ʼi ai koa hakotou kaugā gaue peʼe kaugā ako ʼe kivi? Kotou fakatuʼutuʼu ke kotou palalau kia ia. Kapau ʼi takotou telituale neʼe maʼu ai he fale ako maʼa te kau kivi, kotou foaki he ʼu tohi ʼi te ʼu mataʼi tohi maʼa te kau kivi ki te fale tanakiʼaga tohi ʼo te fale ako. ʼE kotou iloʼi koa he tahi ʼi takotou famili ʼe kivi? ʼE maʼu koa ʼi takotou telituale ia he ʼu kautahi moʼo tokoni ki te kau kivi peʼe ko he ʼu hahaʼi ʼe gaue ʼi te ʼu fale ʼe nonofo ai te kau kivi? Kotou fakamahino ki he tahi ʼo te famili, peʼe ko he tahi ʼe tali fagona, peʼe ko he tagata pule, ʼe fia tokoni ia te kau Fakamoʼoni ʼa Sehova ki te kau kivi pea ʼe natou fia foaki he ʼu tohi ʼi Te ʼu Mataʼi Tohi Maʼa Te Kau Kivi peʼe ko he ʼu fakamatala neʼe puke. Kotou fakaha age ia te fakapapau ʼae ʼe tuʼu ʼi te Tohi-Tapu ʼe kua vave fakamalolo e te ʼAtua ia te kau kivi ʼo talu ai. ʼE toe feala takotou fakaha age ia te ʼata viteo ʼi tatatou tuʼasila ʼi te Neti jw.org ko tona kupu tafitō “Sans elle, je serais perdu.” Ko te fakamatala ʼa he tagata kivi neʼe fiafia ʼi tana maʼu ia he Tohi-Tapu ʼi Te ʼu Mataʼi Tohi Maʼa Te Kau Kivi. Kapau ʼe kotou fakaha ia te tupuʼaga ʼo takotou ʼaʼahi, ʼe feala takotou felogoʼi mo te kau kivi.

4. Kotea ia te ako ʼe tou maʼu mai te aluʼaga ʼae neʼe hoko kia Janet?

⁴ Neʼe alu ia te tuagaʼane kivi ʼe higoa ko Janet ʼo mamata ia te fale ʼa te kau kivi. Neʼe kamata ia tana faipalalau mo te fafine. Neʼe ina ui fenei age: “Neʼe fakamalolo e Sesu ia te kau kivi moʼo fakaha pe kotea ʼae ka ina fai anai ki te kau kivi.” Neʼe nā lau fakatahi ia Apokalipisi 21:3, 4, pea neʼe fakamahino e Janet pe ʼe fakahoko feafeaʼi anai e te Puleʼaga ʼo te ʼAtua ia te fakapapau ʼaia. Neʼe nofo fakalogologo ia te fafine pea neʼe ina ui fenei: “Neʼe mole heʼeki au logo ʼi he temi ki te faʼahi ʼaia mai he tahi ʼe kivi. Ko ʼihi ʼo natou ʼae ʼe mole kivi ʼe natou tui ʼe kivi ia te hahaʼi koteʼuhi ko te ʼu aga ʼe kovi ʼae neʼe natou fai peʼe ko ʼanatou kui.” Neʼe fakaha e Janet ki te fafine ʼaki he mail pe ʼe ina lava maʼu feafeaʼi ʼi te Neti ia te tohi Te Ako Mai Te Tohi-Tapu, pea ʼi te temi nei ʼe nā ako fakatahi ia te Tohi-Tapu tuʼa lua ʼi te vahaʼa.

5. Logo la ʼe mole feala ke tou fakamalolo ia he tahi ʼe kivi ohage ko Sesu, kotea ia te ʼu tapuakina ʼe feala ke tou maʼu mo kapau ʼe tou tokagaʼi ia he tahi ʼe kivi?

⁵ ʼE moʼoni ia, ʼe mole feala ke tou fakamalolo ia te kau kivi ohage ko Sesu, kaʼe ʼe feala tatatou tokoni kia natou fuli ʼae neʼe fakakiviʼi e te ʼatua ʼo te tuʼu ʼo te ʼu faʼahiga meʼa ʼaeni, feia mo natou ʼe kivi ʼi te faʼahi fakasino ke natou mahino ki te moʼoni ʼo te Folafola ʼa te ʼAtua. (2 Ko. 4:4) Neʼe fakamalolo e Sesu ia te ʼu tagata e toko lua ovi ki Seliko koteʼuhi “nee ofa mamahi” ia naua. (Mat. 20:34) Kapau ʼe tou fakaha ʼe tou tokagaʼi moʼoni ia te kau kivi, ʼe feala ke tou maʼu ia te pilivilesio ʼae ke tou tokoni ki ʼihi ke natou ako ʼo ʼuhiga mo Sehova, ia ia ʼae ka ina fakamalolo ia te kau kivi ʼo talu ai.