Kapite 71

ʼE Tuʼu Aipe Te Mole Fia Tui ʼa Te Kau Faliseo

ʼI TONĀ ʼaumai ʼaē kia muʼa ʼo te kau Faliseo, neʼe tuʼania te ʼu mātuʼa ʼa te tagata ʼaē neʼe kivi. ʼE nā ʼiloʼi neʼe kua fakatotonu ko ʼaē ka ina fakahā tana tui kia Sesu ʼe kapu ia ʼi te sinakoka. Pea ʼe feala ke liliu ko he meʼa faigataʼa ʼaupito ki he famili masiva, hanatou mavaevae mo ʼihi ʼo tonatou kolo. Koia ʼaē ʼe tokaga fakalelei ai te taumatuʼa.

“ ʼE ko takolua tama koa la ʼaenī ʼaē neʼe koulua ʼui neʼe kivi talu tana tupu? ko te fehuʼi age ʼaia ʼa te kau Faliseo. Koteā te tupuʼaga ʼo tana kua sio leva ʼi te temi ʼaenī?”

“ ʼE ma ʼiloʼi ko tamā tama pea neʼe tupu ia ʼe kivi, ko te fakamoʼoni age ʼaia ʼa te ʼu mātuʼa. Kae ki te tupuʼaga ʼo tana sio ʼi te temi nei, ʼe mole ma ʼiloʼi māua, pe ko ai ʼaē neʼe ina avahi ʼona mata, ʼe mole ma ʼiloʼi māua.” Neʼe lagi fakamatala age e tanā tama te ʼu meʼa ʼaē neʼe hoko, kae ʼe nā tokaga ki tana ʼu palalau: “Koutou fehuʼi pe kia ia. Kua lahi ʼona taʼu. ʼE tonu ke palalau ia ʼo ʼuhiga mo ia.”

Neʼe toe pāuiʼi ai e te kau Faliseo te tagata pea, nātou faiga leva ke nātou fakamatakuʼi ʼo ʼui maʼa nātou neʼe nātou maʼu te ʼatu ʼu fakamoʼoni ʼe faka lākahalaʼi ai ia Sesu. “Faka kolōlia ki te ʼAtua, ko tanatou ʼui age ʼaia ki ai; heʼe mātou ʼiloʼi ko te tagata ʼaia ʼe ko he tagata agahala.”

“Kapau ko ia ko he tagata agahala, ʼe mole ʼau ʼiloʼi”, ko tana tali age ʼaia, kae mole fakafeagai ia ki tanatou talaʼakiʼi. Kae neʼe ina toe ʼui age: “Ko te meʼa e tahi ʼe ʼau ʼiloʼi: neʼe ʼau kivi, pea ko te temi nei kua ʼau sio.”

ʼI tanatou faiga ʼaē ke nātou maʼu he hala ʼi tana fakamatala, neʼe toe fehuʼi age e te kau Faliseo ki ai: “Koteā ʼaē neʼe ina fai kia koe? Neʼe feafeaʼi tana avahi ʼou mata?”

“Kua ʼosi pe ʼi taku fakahā atu, ko te tali age ʼaia ʼa te tagata, kae neʼe mole koutou fakalogo. He koʼe ʼe koutou toe fia logo kiai?” Pea, neʼe manukinuki fēnei ia ia kia nātou: “ ʼE toe fia liliu koa la ia mo koutou ko hana ʼu tisipulo?”

Ko te faʼahi ʼaia neʼe ʼiʼita ai te kau Faliseo. “Ko koe ʼaē ko te tisipulo ʼa te tagata ʼaia, ko tanatou talaʼakiʼi age ʼaia, kae, ko mātou, ko te ʼu tisipulo ʼa Moisese. ʼE mātou ʼiloʼi neʼe palalau te ʼAtua kia Moisese; kae, ʼo ʼuhiga mo ia ʼaenā, ʼe mole mātou ʼiloʼi mātou pe neʼe haʼu maifea.”

Neʼe mole ina fufū tana punamaʼuli, kae neʼe leʼolahi te tagata ʼo fēnei: “ ʼE ko he meʼa fakapuna’maʼuli: takotou mole ʼiloʼi, e koutou, peʼe haʼu ia maifea, kae neʼe ina avahi ʼoku mata.” Koteā te manatu ki te faʼahi ʼaia? Neʼe fakaʼaogaʼi e te tagata masiva ʼaia te manatu kua ʼiloʼi tona totonu: “ ʼE tou ʼiloʼi ko te ʼAtua ʼe mole fakalogo ki te kau agahala, kae kapau ʼe ʼi ai he tahi ʼe manavasiʼi ki te ʼAtua pea mo fai tona finegalo, ʼe ko ia ia ʼaē ka ina tali. Talu mai te temi muʼa neʼe mole heʼeki tou logo ki he tahi neʼe ina avahi te ʼu mata ʼo he tagata neʼe tupu ake ʼe kivi.” Koʼeni te manatu fakaʼosi ʼo ʼuhiga mo te faʼahi ʼaia: “Kapau ʼe mole haʼu te tagata ʼaia mai te ʼAtua, ʼe mole lava anai ke ina fai he meʼa.”

ʼE ko te manatu fakapotopoto ʼaia, ʼaē ʼe mahino gafua pea mo mālohi, neʼe mole toe feala ke gū ai te kau Faliseo. Kae ʼi tanatou mole tali te moʼoni, neʼe nātou tauveleʼi te tagata: “Neʼe ke tupu katoa koe ʼi te ʼu agahala, pea koʼeni ia ʼe ke akonakiʼi koe ia mātou?” Neʼe nātou kapu ia ia ki tuʼa, ʼo lagi tapuʼi hana toe haʼu ki te sinakoka.

ʼI tana ʼiloʼi te meʼa ʼaē neʼe nātou fai, neʼe ʼalu ia Sesu ki te tagata ʼaē neʼe ina fakamālōlō pea ina ʼui age: “ ʼE ke tui ki te Foha ʼo te tagata?”

Moʼo tali kiai, neʼe fehuʼi age e te tagata masiva: “Ko ai ia ia, ʼaliki, ke feala ai haku tui kia te ia?”

“Ko ia ʼaē ʼe palalau atu kia te koe, ʼe ko ia ʼaia”, ko te tali age ʼaia ʼa Sesu.

ʼI te temi pe ʼaia neʼe tulolo ai te tagata ia muʼa ʼo Sesu mo ʼui maʼana: “ ʼE ʼau tui kia te ia, ʼAliki!”

Pea neʼe fakamahino age e Sesu ki ai: “Neʼe ʼau haʼu ki te malamanei ʼo ʼuhiga mo te fakamāu ʼaenī: ke faka fealagia te sio ʼanatou ʼaē ʼe mole sio, pea ke liliu ia nātou ʼaē ʼe sisio ʼo kivi.”

Ko te kau Faliseo, ʼaē neʼe fakalogo ki te palalau ʼaia, neʼe nātou fehuʼi age: “Pea ʼe toe kivi koa la ia mo mātou?” Ka na neʼe nātou ʼiloʼi la tonatou kivi fakalaumālie, neʼe feala ke maʼu hanatou takuʼaga ki tanatou fakafeagai kia Sesu. Ko te meʼa ʼaia neʼe ʼui age e Sesu kia nātou: “Ka na pau la neʼe koutou kivi, ʼe mole hakotou agahala.” Kae, fakakinau age pe nātou ʼe mole nātou kivi pea ʼe mole ʼaoga ia kia nātou te mālama fakalaumālie. ʼO fai ai e Sesu te fakatokaga ʼaenī: “ ʼI te temi nei ʼe koutou ʼui mai: ‘ ʼE mātou sisio.’ Ko takotou agahala ʼe tuʼu maʼu.” Soane 9:19-41.

▪ He koʼe neʼe tuʼania e te ʼu mātuʼa ʼa te tagata ʼaē neʼe kivi, tonā pāuiʼi kia muʼa ʼo te kau Faliseo, pea, ʼi te faʼahi ʼaia, neʼe feafeaʼi tanā tokaga lelei ki tanā ʼu palalau?

▪ Neʼe feafeaʼi te fakamatakuʼi e te kau Faliseo te tagata ʼaē kua feala tana sio?

▪ Koteā te manatu fakapotopoto neʼe fai e te tagata ʼaia, ʼo tupu ai te ʼiʼita ʼo te kau Faliseo?

▪ He koʼe neʼe mole maʼu he takuʼaga ʼo te kau Faliseo ke tupu ʼaki ai he faka lākatonuʼi ʼo tanatou fakafeagai kia Sesu?