Neʼe Fakafehuʼi e Te Kau Faliseo Ia Te Tagata ʼAe Neʼe Kivi

Neʼe mole tui te kau Faliseo neʼe fakamalolo e Sesu te tagata ʼae neʼe tupu kivi, koia neʼe natou pauʼi ai ʼana matuʼā. Neʼe iloʼi e ʼana matuʼā neʼe feala “ke fakamavae mai te sinakoka” ia naua. (Soane 9:22) Ka na pau la neʼe kapu naua, pea neʼe fua kovi ki tonā famili, he neʼe mole kei feala hanatou felogoʼi mo te tahi kau Sutea pea neʼe natou tau ai mo he ʼu fihifihia fakapaʼaga.

Pea neʼe fai e te kau Faliseo kia naua te ʼu fehuʼi ʼaeni ʼe lua: “ ʼE ko takolua tama koa la ʼaeni ʼe kolua ui neʼe tupu kivi? Pea neʼe feafeaʼi leva hana sio?” Neʼe nā tali fenei age: “ ʼE ma iloʼi ʼe ko tamā tama ʼaeni pea neʼe tupu kivi. Kaʼe ʼe mole ma iloʼi pe neʼe feafeaʼi leva tana kua sio, pea ʼe mole ma iloʼi pe ko ai ʼae neʼe ina fakamalolo ia ia.” Tatau aipe pe neʼe kua fakaha age e tanā tama te meʼa ʼae neʼe hoko, kaʼe neʼe nā tali fakaʼeteʼete fenei: “Kotou fehuʼi age ki ai, he ʼe kua lahi pea ʼe tonu ke palalau maʼa ia.”—Soane 9:19-21.

Koia, neʼe toe pauʼi age e te kau Faliseo ia te tagata pea natou fakamatakuʼi ia ia takua neʼe feala ke natou fakamoʼoni ko Sesu ʼe ko he tagata kaka. Neʼe natou ui fenei: “Fakakololia ki te ʼAtua. ʼE matou iloʼi ko te tagata ʼaia ʼe ko he tagata agahala.” Moʼo tali ki tanatou tukugakovi ʼaia, neʼe ui fenei e te tagata ʼae neʼe kivi: “Kapau ko he tagata agahala, ʼe mole au iloʼi au.” Kaʼe neʼe ina hoko atu fenei: “Ko te meʼa pe ʼe tahi ʼe au iloʼi, neʼe au kivi pea kua au sio leva.”—Soane 9:24, 25.

Neʼe mole loto te kau Faliseo ke gata feia tanatou faipalalau, koia neʼe natou fehuʼi fenei age: “Kotea ʼae neʼe ina fai kia koe? Neʼe feafeaʼi tana fakamalolo koe?” Neʼe lototoʼa te tagata, ʼo ina tali fenei: “Neʼe kua au ʼosi fakaha atu, kaʼe neʼe mole kotou fakalogo. He koʼe ʼe kotou toe fia logo ki ai? ʼE kotou fia liliu koa mo koutou ko ʼana tisipulo?” Neʼe iita te kau Faliseo, ʼo natou tukugakoviʼi fenei ia ia: “Ko koe ko he tisipulo ʼa te tagata ʼaia, kaʼe ko matou ko te ʼu tisipulo ʼa Moisese. ʼE matou iloʼi neʼe palalau ia te ʼAtua kia Moisese, kaʼe ʼo ʼuhiga mo te tagata ʼaia, ʼe mole matou iloʼi pe ʼe haʼu maifea.”—Soane 9:26-29.

ʼI tana logo ki tanatou tali ʼaia, neʼe fakaha fenei ai e te tagata tana manatu: “ ʼE fakapunamaʼuli foki takotou mole iloʼi pe ʼe haʼu maifea, kaʼe neʼe ina fakamalolo au.” Neʼe fai leva e te tagata he ʼu palalau poto moʼo fakamoʼoni pe ko ai ʼae ʼe fagono te ʼAtua ki ai pea mo ʼofa ai. Neʼe ina ui fenei: “ ʼE tou iloʼi ʼe mole fagono te ʼAtua ki te kau agahala, kaʼe ʼe fagono te ʼAtua ki ʼae ʼe manavasiʼi kia te ia pea mo ina fai tona finegalo. Talu mai te temi muʼa, neʼe heʼeki tou logo neʼe fakamalolo e he tahi he tagata neʼe tupu kivi.” Neʼe ina fakaʼosi fenei tana palalau: “Kapau neʼe mole haʼu te tagata ʼaia mai te ʼAtua, ʼe mole feala ia ke ina fai he meʼa.”—Soane 9:30-33.

Neʼe mole feala ke fakafeagai te kau Faliseo ki te ʼu palalau ʼaia ʼa te tagata, koia neʼe natou laukoviʼi fenei ai ia ia: “Neʼe ke tupu ʼi te agahala, pea ʼe ke akoʼi matou?” Neʼe natou fakamavae ai ia ia.—Soane 9:34.

ʼI te logo ʼa Sesu ki te meʼa ʼae neʼe hoko, neʼe ina maʼu ia te tagata pea neʼe ina fehuʼi fenei age: “ ʼE ke tui koa ki te Foha ʼo te tagata?” Neʼe tali fenei age e te tagata ʼae neʼe fakamalolo: “Ko ai ia ia, tagata, ke feala haku tui kia te ia?” Neʼe ui fakahagatonu fenei age e Sesu: “Kua ke sio ki ai pea ʼe ko ia ʼaeni ʼe palalau atu.”—Soane 9:35-37.

Neʼe tali fenei e te tagata: “ ʼE au tui kia te ia, ʼAliki.” Neʼe fakaha e te tagata tana tui pea mo tana fakaʼapaʼapa, ʼo tulolo ia muʼa ʼo Sesu. Pea neʼe fai e Sesu te ʼu palalau maʼuhiga ʼaeni: “Neʼe au haʼu ki te malamanei ki te fakamau ʼaeni, ke sisio ia natou ʼae ʼe mole sisio, pea ke liliu ʼo kivi ia natou ʼae ʼe sisio.”—Soane 9:38, 39.

Ko te kau Faliseo, ʼae neʼe ʼi ai, neʼe natou iloʼi neʼe mole natou kivi. Kaʼe neʼe natou fakahoko feafeaʼi tanatou gaue ʼae ko te takitaki ʼo te hahaʼi ʼi te faʼahi fakalaumalie? Neʼe natou fehuʼi fenei kia Sesu: “ ʼE matou toe kivi koa mo matou?” Neʼe tali fenei e Sesu kia natou: “Kapau neʼe kotou kivi, ʼe mole ʼi ai hakotou agahala. Kaʼe ʼi takotou ui fenei ‘ ʼE matou sisio,’ ʼe mole fakamolemole anai takotou agahala.” (Soane 9:40, 41) Ka na pau la neʼe mole ko natou ko he kau faiako ʼi Iselaele, neʼe feala pe ke mahino ki tanatou fakafisi ʼae ko Sesu ʼe ko te Mesia. Kaʼe ʼi tanatou iloʼi ia te Lao, ko tanatou fakafisi kia te ia neʼe ko he agahala mamafa.