Kapite 70
Te Fakamālōlō ʼo Te Tagata Neʼe Kivi Talu Tana Tupu
LOGOPE te faiga ʼaē ʼa te kau Sutea ke tuki makaʼi ia Sesu, neʼe mole mavae ia ʼi Selusalemi. Ki muli age ʼi te ʼaho pe ʼaia, ko te ʼaho ʼo te sapato, ʼi tana haʼele mo tana kau tisipulo ʼi te loto kolo neʼe nātou sisio ki te tagata kivi talu tana tupu. Neʼe fehuʼi age e te kau tisipulo kia Sesu: “Lapi, ko ai ʼaē neʼe agahala, ko te tagata ʼaenī peʼe ko tana ʼu mātuʼa, ke tupu kivi ai?”
E lagi ʼe nātou tui, ohage ko ʼihi Lapi, ʼe feala te agahala ʼa he tagata ʼi te temi ʼaē kei nofo ai ʼi te fatu ʼo tana faʼe. Kae neʼe tali fēnei age e Sesu kia nātou: “ ʼE mole ko te tagata ʼaenī peʼe ko tana ʼu mātuʼa ʼaē neʼe agahala, kae ko he meʼa ia ke hā ai te ʼu gāue ʼa te ʼAtua.” Ko te kivi ʼo te tagata ʼaia neʼe mole ko he fua ia ʼo he agahala neʼe ina fai pe ko ʼana mātuʼa. Ko te agahala ia ʼa te ʼuluaki tagata ko Atama ʼaē neʼe ina fakaliliu ai te hahaʼi katoa ʼo heʼe haohaoa pea tupu mai ai te ʼu mahaki mo te ʼu māʼimoa, ohage la ko te kivi ʼaenī talu tana tupu, ʼaē ka fakaʼaogaʼi e Sesu moʼo fakahā ʼaki ai te ʼu gāue ʼa te ʼAtua.
Neʼe fakahā ai e Sesu te maʼuhiga ʼo te fai fakatavili ʼo te ʼu gāue ʼaia. “ ʼE tonu ke tou fai, ʼi te kei ʼaho, te ʼu gāue ʼa ia ʼaē neʼe ina fekauʼi mai ʼau, ko tana ʼui age ʼaia; ʼe haʼu te pōʼuli, ʼaia ʼe mole feala ai ke gāue he tahi. ʼI te temi ʼaē kei ʼau nofo ai ʼi te malamanei, ko ʼau ko te mālama ʼo te malamanei.” Kua vave pe te mate ʼo Sesu pea ʼe ʼave anai ʼo tuku ʼi he falemaka fakapōʼuli ʼo mole toe feala ai anai hana fai he meʼa. Kae, ʼi te temi nei, ʼe kei ina fakamālamaʼi pe te malamanei.
ʼI te ʼosi pe ʼo tana fai te ʼu palalau ʼaia, neʼe ʼaʼanu ia Sesu ki te kele pea neʼe ina gaohi te moʼi pela ʼaki tona sāvai. ʼOsi ʼaia pea ina ʼai ki te ʼu mata ʼo te kivi pea ʼui maʼana: “ ʼAlu ʼo maʼanu ʼi te maʼanuʼaga ʼo Siloame.” Neʼe fakalogo te tagata ki tana fakatotonu pea neʼe hoki sio ai talu tana tupu. ʼI fiafia lahi leva neʼe ina maʼu ʼi tana liliu ki tona ʼapi!
Ko tona ʼu vāhaʼa fale pea mo nātou ʼaē neʼe nātou ʼiloʼi ia ia neʼe nātou ōfo ai. “ ʼE mole koa la ko te tagata ʼaenā neʼe heka ʼo kole meʼa ki te hahaʼi?” ko tanatou feʼekeʼaki ʼaia. “Ko ia”, ko te tali age ʼaia ʼa ʼihi. Ko ʼihi, neʼe mole nātou tui ki te faʼahi ʼaia. “ ʼE mole ko ia, kae ʼe hoko ki ai”, ko tanatou ʼui ʼaia. Kae neʼe tala age e te tagata kia nātou: “Ko ʼau te tagata ʼaia.”
Neʼe fehuʼi age e te hahaʼi ki ai: “Neʼe feafeaʼi koa te ava ʼo tou ʼu mata?”
“Ko te tagata ʼaē ʼe higoa ko Sesu neʼe ina gaohi te moʼi pela pea neʼe ina ʼai ki ʼoku mata, pea neʼe ina ʼui mai: ‘ ʼAlu ki Siloame pea ke maʼanu ai.’ Neʼe ʼau ʼalu kiai, pea neʼe ʼau maʼanu pea neʼe feala ai leva taku sio.”
Neʼe nātou fehuʼi age ki ai: “E ʼifea te tagata ʼaia?”
“ ʼE mole ʼau ʼiloʼi”, ko tana tali age ʼaia.
Neʼe taki e te hahaʼi te tagata ʼaia ʼaē neʼe kivi ki tonatou ʼu takitaki lotu, te kau Faliseo, pea neʼe nātou toe fehuʼi age mo nātou ki ai pe neʼe feafeaʼi te ava ʼo tona ʼu mata. Neʼe fakamahino age e te tagata: “Neʼe ina ʼai te moʼi pela ki ʼoku mata pea neʼe ʼau ʼalu ʼo maʼanu pea neʼe ʼau sio ai.”
ʼE moʼoni, neʼe tonu ke fiafia te kau takitaki lotu mo te tagata kainono ʼaia kua fakamālōlō! Neʼe mole nātou fai te faʼahi ʼaia, ka neʼe nātou faka lākahalaʼi ia Sesu. “ ʼE mole ko he tagata ʼe haʼu mai te ʼAtua”, ko tanatou ʼui ʼaia. He koʼe neʼe nātou palalau feiā? “Koteʼuhi ʼe mole ina tauhi te sapato.” Kae, ko ʼihi ʼi te kau Faliseo neʼe nātou feʼuiʼaki: “E feafeaʼi ki he tagata ʼe agahala tana lavaʼi te fai ʼo te ʼu taʼi fakaʼiloga ʼaia?” Pea neʼe hoko ai te felogo kehekehe ʼaki ia nātou.
Pea neʼe nātou fehuʼi age ai ki te tagata: “Kia koe, koteā tau ʼui ʼo ʼuhiga mo ia, ʼi tana avahi tou ʼu mata?”
Neʼe ina tali age: “ ʼE ko te polofeta ia.”
Neʼe fakafisi te kau Faliseo ʼo mole nātou faka tui ki ai. Maʼa nātou neʼe talaga fakafūfū ia Sesu pea mo te tagata ʼaia ke nā kākāʼi te hahaʼi. ʼI tanatou fia ʼiloʼi lelei te faʼahi ʼaia, neʼe nātou pāuiʼi ai te ʼu mātuʼa ʼa te tagata kivi ke nātou fai fehuʼi kia nāua. Soane 8:59; 9:1-18.
▪ Koteā te fakamatala ki te kivi ʼo te tagata, ʼo pulihi ʼaki ai te tahi fakamatala fea?
▪ Koteā te pōʼuli ʼaē ʼe mole feala ai te gāue ʼa he tahi?
▪ Neʼe feafeaʼi te aga ʼanatou ʼaē ʼe nātou ʼiloʼi te tagata ʼaia ʼi tanatou sisio ʼaē kua ʼala ʼona mata?
▪ He koʼe neʼe felogo kehekehe ʼaki te kau Faliseo ʼuhi ko te fakamālōlō ʼo te tagata ʼaia?