ʼE Tala Te Tokalelei ʼi Te ʼu Kolo Moʼugaʼia ʼo Chiapas
“ ʼI te mātea fakamataku ʼaē ʼe kei manatuʼi e te hahaʼi fuli pe ʼi Chiapas, ko hahaʼi māsisiva e toko 45, ʼo kau ai mo te toko 13 tamaliki, neʼe fakapogi nātou e te ʼu tagata mo tanatou ʼu fana . . . ” Neʼe fakamatala te faʼahi ʼaia e te sulunale “El Universal,” neʼe hoko ʼi Acteal, ʼi Chiapas, ʼi te ʼaho 22 ʼo Tesepeli 1997.
KO CHIAPAS ʼe ko te fenua ʼe tuʼu ʼi te potu taupotu ʼo te potu saute ʼo Mekesike, pea ʼe feōvi mo Guatemala. ʼUhi ko te kua fualoa ʼo te maʼuli masiva ʼa te hahaʼi pea mo te mole feʼauga ʼo tanatou ʼu meʼa maʼuli, ko te kūtuga Initia Mayas ʼo te fenua, neʼe nātou fakatuʼutuʼu te foʼi kautau neʼe faʼu ʼi Sanualio 1994, ʼe higoa ko te Ejército Zapatista de Liberación Nacional (EZLN, ko te Kautau Zapatiste ki te Faka ʼĀteaina ʼo te Fenua). Neʼe mole he fua ʼo te ʼu fai talaga moʼo fakatokatoka te tau. ʼUhi ko te ʼu ʼohofi pea mo te ʼu tau mai te faʼahi ʼa te kau agatuʼu pea mo te ʼu foʼi solia ʼo te puleʼaga, neʼe hoko ai te ligi toto pea mo te ʼu mate. ʼUhi ko te ʼu maveuveu ʼaia, ko te hahaʼi tokolahi neʼe nātou feholaki mai ai moʼo hāofaki tonatou maʼuli.
ʼI te ʼu maveuveu ʼaia, ʼe ʼi ai te ʼu hahaʼi ʼe ʼoʼofa ki te tokalelei, neʼe mole nātou kau ki te ʼu tau faka politike ʼaia. ʼAki he faʼafai, ʼe nātou fakahā ko te Puleʼaga ʼo te ʼAtua ʼe ko te ʼamanaki pe ʼaia e tahi moʼo fakatokatoka te ʼu fihifihia ʼaē ʼe tauʼi e te hahaʼi, ʼi te fenua ʼaia pea mo te kele katoa. (Taniela 2:44) Ko ai koa ia nātou ʼaia? Ko te kau Fakamoʼoni ʼa Sehova. ʼO mulimuli ki te fakatotonu ʼa Sesu, ʼe nātou faiga ke nātou ʼave te logo lelei ʼo te Puleʼaga ʼo te ʼAtua ki te ʼu potu mamaʼo ʼo te ʼu kolo moʼugaʼia ʼo Chiapas. (Mateo 24:14) Neʼe feafeaʼi koa te fai faka mafola ʼi te ʼu ʼaluʼaga ʼaia, pea neʼe koteā tona ʼu fua?
“Ko ʼAu Ko Te Fakamoʼoni ʼa Sehova”
Neʼe mole heʼeki faʼa fualoa te liliu ʼa te tūpulaga ko Adolfo ko he kaugā fagona ʼo te Puleʼaga, pea ʼi te tahi ʼaho neʼe gāue ʼi te fale lātio ʼi Ocosingo. Fokifā pe neʼe tāʼi mālohi tona matapā. Ko te ʼu tagata neʼe pūlouʼi ʼonatou ʼulu neʼe nātou hūfi ki loto pea mo hili tanatou ʼu fana ki tona ʼulu. Neʼe nātou ʼolo ki te faʼahi ʼaē ʼe feala ai ke nātou palalau ai ʼi te lātio mo nātou faʼao te ʼu meʼa gāue fuli, pea mo nātou tala ʼi te lātio ʼe nātou laga tau ki te puleʼaga.
Ko te ʼu tagata ʼaia mo tanatou ʼu fana, neʼe nātou haga kia Adolfo pea mo fakatotonu age ke kau ki tonatou faʼahi. Logola neʼe mole heʼeki papitema, kae neʼe tali fēnei e Adolfo: “Ko ʼau ko te Fakamoʼoni ʼa Sehova.” Neʼe ina fakamahino age ko te Puleʼaga ʼo te ʼAtua ʼe ko te ʼamanaki pe ʼaia e tahi ki te tokalelei, pea neʼe ina fakafisi mālohi ki te teu pea mo te fana ʼaē neʼe nātou ʼavage. ʼI tanatou sio ki te pipiki mālohi ʼaia ʼa te tūpulaga, neʼe nātou tuku ai ke ʼalu. ʼI tana manatuʼi te meʼa ʼaia neʼe hoko, ʼe ʼui fēnei e Adolfo: “Ko te meʼa ʼaia neʼe ina fakaloto mālohi moʼoni taku tui.”
Ki muli age, neʼe maʼu te temi fīmālie, kae neʼe kei puleʼi pe te koga meʼa e te ʼu foʼi solia. Logope la te faʼahi ʼaia, kae neʼe tali fakafiafia e Adolfo te fakaafe ʼa te kau tagata ʼāfea ʼo tana kokelekasio ke ʼalu ʼo gāue mo te kūtuga ʼo te kau Kilisitiano ʼo te koga meʼa ʼaia. ʼI tana fakalaka ʼi te ʼu koga meʼa ʼaē ʼe vakaʼi ai te ʼu pepa, neʼe fakaʼapaʼapa te kau solia kia ia ʼi tana fakahā age ko ia ko te Fakamoʼoni ʼa Sehova. Neʼe papitema ki muli age, pea neʼe ina maʼu te fiafia ʼi tana tokoni ki te kūtuga ʼaia ʼaē ʼe tuʼu mamaʼo, ke liliu ko he kokelekasio ʼa te kau Fakamoʼoni ʼa Sehova. Neʼe tala fēnei e Adolfo: “ ʼI te temi nei ʼaē kua ʼau papitema ai, ʼe feala ke ʼau tala ʼaki he lotomālohi ko ʼau ko te Fakamoʼoni ʼa Sehova!”
“Neʼe Foaki Mai e Sehova Te Mālohi”
ʼI te ʼosi tala pe ʼaē ʼi te lātio te tauʼi ʼo te puleʼaga e te kūtuga EZLN, neʼe feholaki te hahaʼi ʼo te kolo. Ko Francisco, ko te pionie katoa, neʼe ina fakamahino neʼe foaki age e Sehova te mālohi kia ia pea mo tona ʼohoana ʼi te faigataʼaʼia neʼe hoko kia nāua.
“Neʼe ma fakatotonu ke ma ʼolo lalo ki te koga meʼa neʼe vaha mamaʼo ia hola e tolu. Neʼe tuʼu ai te kokelekasio, ʼo feala ai ke ma fakatahi mo te ʼu tēhina. Mole fualoa, pea neʼe fai tamatou fakatahi faka silikosikilipisio ʼi Palenque. Ko ʼau mo toku ʼohoana neʼe mole ma fia tō ʼi te fono makehe ki te kau pionie, kae neʼe fakahā mai neʼe pupunu e te EZLN te ala ʼaē neʼe tonu ke ma ʼolo ai ki te fakatahi. Neʼe ma fakatotonu ai ke ma ʼolo ʼi te vao matuʼa, ʼo ma haʼele ai lolotoga hola e hiva. Neʼe ma tautonu ki te fono ʼa te kau pionie, pea neʼe ma leleiʼia ʼaupito ʼo feiā mo te polokalama katoa ʼo te fakatahi.
“ ʼI tamā liliu mai, neʼe ma maʼu atu tomā ʼapi kua tutu pea neʼe kaihaʼa mo tamā ʼu manu. Neʼe kei toe pe te kiʼi kato mutuʼi meʼa. Neʼe ma lotomamahi ʼi te puli ʼo tamā ʼu meʼa, kae neʼe agalelei te ʼu tēhina ʼo Ocosingo ʼo nātou tali māua kiō nātou. Neʼe nātou toe akoʼi mai kia māua te fai ʼo te tahi ʼu gāue neʼe mole ma ʼiloʼi, he neʼe ma ʼiloʼi pe te gāue kele. Neʼe akoʼi mai e te tēhina te toho paki, pea ko te tahi tēhina neʼe ina akoʼi mai te gaohi ʼo te ʼu sūlie. Pea neʼe feala ai kia ʼau pea mo toku ʼohoana ke ma taupau tomā maʼuli ʼo aʼu mai ki te temi nei, ʼo ma fai hoholo tamā selevisi pionie. ʼI tamā fakakaukauʼi te ʼu meʼa ʼaē neʼe hoko, ʼe ma mahino ai logola neʼe mole faigafua kia māua te kātakiʼi, kae neʼe fakaloto mālohiʼi māua e Sehova.”
Te Fua ʼo Te Gāue Fai Faka Mafola
Ko te kau Fakamoʼoni ʼo Chiapas, neʼe mole nātou lotovaivai ʼi tanatou faiga tāfito ʼaē ke nātou tala te logo lelei ki te hahaʼi ʼo te koga meʼa ʼaia, logola te ʼaluʼaga faigataʼa pea mo tuʼutāmakiʼia. Ohage la, ʼi ʼApelili pea mo Maio 1995, neʼe nātou fakatahi mo te kau Kilisitiano ʼo te malamanei katoa moʼo tufa te pepa lotu Te ʼu Logo ʼo Te Puleʼaga N° 34, ko tona kupu tāfito He Koʼe Koa ʼe Lahi Te ʼu Fihifihia ʼi Te Maʼuli?
Lolotoga te tufa ʼaia, ʼi te koga meʼa ʼe higoa ko Pueblo Nuevo, ko Ciro ʼaē ʼe pionie katoa, neʼe ina maʼu ai te famili neʼe ina fia ʼiloʼi te moʼoni. Hili ʼaho e tolu, neʼe toe liliu kiai ʼo ina kamata te ako Tohi-Tapu mo nātou. Kae ʼi te toe liliu age ʼa Ciro pea mo tana kaugā gāue moʼo hoko atu te ako ʼa te famili, neʼe puli te tagata ʼo te loto fale. Kae neʼe ʼi ai te ʼu tagata neʼe pūlou tonatou ʼu ʼulu neʼe nātou atalitali ki te tagata ke nātou tā ia ia. Neʼe nātou fehuʼi age kia Ciro pea mo tana kaugā gāue pe koteā ʼaē ʼe nā kumi pea mo nātou fakamatakuʼi nāua. ʼI tanā ʼosi faikole fakalogologo kia Sehova, neʼe lototoʼa te ʼu Kilisitiano toko lua ʼaia ʼo nā fakamahino age neʼe nā ʼōmai moʼo akoʼi te Tohi-Tapu ki te famili. Ko te ʼu tagata agakovi ʼaia neʼe nātou tuku ke nā ʼolo. Ko te tagata ʼo te loto fale neʼe mole liliu age ki tona ʼapi, pea neʼe mole ʼiloʼi tona tupuʼaga.
Hili teitei taʼu e tolu kiai, neʼe punamaʼuli ia Ciro ki te ʼasi age ʼi te tahi ʼaho ʼa te tagata ʼaia ki tona ʼapi. Neʼe fiafia ʼaupito ia Ciro ʼi tana fakahā age ʼaē kua papitema te famili katoa pea kua nātou kau ki te kokelekasio ʼi Guatemala! Ko te tahi ʼi tana ʼu ʼofafine neʼe pionie katoa.
Ko Te Loto Fakafetaʼi Ki Te Meʼa Kai Fakalaumālie
Logope la ʼe kei hoko atu te ʼu faigataʼaʼia ʼi Chiapas, kae ʼe ʼui e te tēhina taupau faka tisitilike, ʼe leleiʼia moʼoni e te kau Fakamoʼoni ʼo te fenua te maʼuhiga ʼo te ʼu fakatahi. (Hepeleo 10:24, 25) ʼE ina fakamatala mai te meʼa neʼe mole heʼeki faʼa fualoa tana hoko ʼi te fakatahi makehe ʼaho tahi, ʼaē neʼe fakatuʼutuʼu ke kamata fakatomuʼa ʼi te uhu, ke feala ai kia nātou ʼaē ʼe kau kiai ke nātou toe liliu haohaoa ki tonatou ʼu ʼapi ʼi te kei ʼaho. Logola ko te tokolahi ia nātou neʼe tonu ke nātou haʼele ia hola e tolu peʼe laka atu ʼi te vao matuʼa ke nātou aʼu ki te koga meʼa ʼo te fakatahi, kae ʼi te hola 7 uhu neʼe kua nātou tahi heka fuli. Neʼe kau ai mo te toko ono ʼo te kūtuga EZLN, ʼo nātou fakalogo pea mo pasipasi, ʼo hā ai tanatou leleiʼia te polokalama. Neʼe nātou toe haʼele foki mo nātou ia hola e tolu moʼo kau ki te fakatahi. Ko te toko ʼuafulu ia nātou neʼe nātou toe kau ki te Fakamanatu ʼo te mate ʼo Kilisito, ʼaē neʼe fai ʼi te Fale ʼo te Puleʼaga ʼo te kolo.
Ko te tahi tūpulaga ʼo te kūtuga agatuʼu ʼaia neʼe fekauʼi e tana ʼu pule ke ina leʼoleʼo te koga meʼa ʼi te vao matuʼa. ʼI tana tau atu kiai, neʼe ina fakatokagaʼi te kua feholaki ʼa te hahaʼi, pea tokolahi neʼe ko te kau Fakamoʼoni ʼa Sehova. Neʼe ʼalu ʼo nofo ʼi te ʼapi neʼe līʼakina. ʼI te mole hana meʼa ke ina fai, neʼe ina toʼo te ʼu tohi ʼaē neʼe ina maʼu ʼi te ʼapi pea neʼe ina kamata lau. Neʼe ko te ʼu Tule Leʼo neʼe tuku e te kau Fakamoʼoni. ʼI tana nofo tokotahi ʼaia, neʼe maʼu e te tūpulaga te temi ke metitasio ki te ʼu meʼa ʼaē neʼe ina lau. Neʼe ina fakatotonu ai ke ina fetogi tona maʼuli pea mo līaki tana ʼu mahafu. ʼI te temi ʼaē neʼe feala ai ke ina fai te faʼahi ʼaia, neʼe ina maʼu te kau Fakamoʼoni pea neʼe ina kamata ai tana ako Tohi-Tapu. Hili māhina e ono, neʼe ina tala te logo lelei ki te hahaʼi. Ko ia pea mo te toko tolu ʼo tona famili ʼaē neʼe fakatahi māhani mo te kūtuga agatuʼu, kua nātou papitema ʼi te temi nei.
Te ʼu Faʼahi ʼAē ʼe Lelei
Logola neʼe faigataʼa ʼaupito te ʼaluʼaga ʼaia, kae ʼi tona ʼuhiga moʼoni, ko te tau ʼaia neʼe malave lelei ki te manatu ʼa te hahaʼi ʼo ʼuhiga mo te gāue fai faka mafola. ʼE ʼui fēnei e te tagata ʼāfea ʼo te kolo neʼe kamata ai te tau: “Hili teitei ʼaho e nima ʼi te kua kamata ʼo te tau, neʼe mātou fakatuʼutuʼu te fai faka mafola ʼi te loto kolo pea mo tuʼa. Neʼe fia logo ʼaupito te hahaʼi kia mātou. Neʼe lahi te ʼu tohi faka Tohi-Tapu ʼaē neʼe mātou tufa pea mo kamata te ʼatu ʼu ako Tohi-Tapu. ʼI te tahi koga meʼa, ko te tokolahi neʼe nātou fakafeagai ki te moʼoni, kae ʼi te hoko ʼo te tau, kua nātou fakalogo ʼi te temi nei, mo nātou ako, pea mo nātou kau ki te ʼu fono pea mo te ʼu fakatahi.”
ʼE fiafia te ʼu tēhina heʼe nātou lava hoko atu tanatou ʼu gāue faka teokalatike logola te ʼu maveuveu. Kua fakagafua nātou e te ʼu foʼi solia ʼo te puleʼaga pea mo te EZLN, pea ʼe nātou haga fai tanatou ʼu fakatahi, ʼaē ʼe ina fakaloto mālohi ai nātou ʼi te faʼahi fakalaumālie. Ko te ʼu ʼaʼahi ʼa te ʼu tagata taupau feʼoloʼaki neʼe nātou toe uga nātou ke nātou haga fai te gāue fai faka mafola. ʼE lelei te fakatokagaʼi, ko te fakaloto mālohi ʼe toe haʼu mai ia nātou ʼaē neʼe fetauʼaki, heʼe nātou tau uga te kau Fakamoʼoni ke nātou haga fai tanatou fai faka mafola.
Logope la ʼaki te temi kua siʼisiʼi te ʼu maveuveu pea mo te ʼu faigataʼaʼia ʼaē neʼe tali e te hahaʼi ʼi Chiapas, kae mole heʼeki ʼosi. Tatau aipe pe koteā te ʼaluʼaga, kae ko te meʼa ʼaē ʼe ʼiloʼi papau, ʼe ko te fakatotonu mālohi ʼa te kau Fakamoʼoni ʼa Sehova ke nātou faiga tuʼumaʼu ke nātou haga tala ki te hahaʼi te logo lelei ʼo te tokalelei mai te Folafola ʼa te ʼAtua, te Tohi-Tapu. (Gaue 10:34-36; Efeso 6:15) ʼE nātou ʼiloʼi, ohage ko tona ʼui e te polofeta ko Selemia, “ko te tagata kelekele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.” (Selemia 10:23) ʼE gata pe ki te Puleʼaga ʼo te ʼAtua, ʼaē ʼe pule ai tona ʼAlo, ia Sesu Kilisito, ʼe feala ke ina maʼu he puleʼaki ki te heʼe faitotonu pea mo te masiva ʼo te malamanei.—Mateo 6:10.
[Mape ʼo te pasina 9]
Golfe du Mexique
CHIAPAS
GUATEMALA
Océan Pacifique
[Haʼuʼaga ʼo te pasina]
Mountain High Maps® Copyright © 1997 Digital Wisdom, Inc.
[Paki ʼo te pasina 9]
ʼE fai faka mafola te kau Fakamoʼoni ʼi te ʼu potu moʼugaʼia ʼo Chiapas