ʼE Feala Koa Ke Koutou Fiafia Moʼoni?
NEʼE malimali ia George ʼi tana tauʼalofa ki te hahaʼi fuli. Maʼa ia, ko te maʼuli neʼe ko he meʼa ʼofa maʼuhiga ke tou fiafia ai. Neʼe ʼiloʼi ia ia ʼe ko he tahi ʼe fiafia pea mo loto falala—logope la tana logoʼi te ʼu mamahi ʼo te ʼuhiga matuʼa. ʼO aʼu ki te ʼaho ʼaē neʼe mate ai, neʼe ʼiloa ia George neʼe ko te tagata fiafia. ʼE koutou fiafia koa ohage ko George? ʼE koutou faka ʼuhiga koa te ʼaho foʼou fuli pe ʼe ko he meʼa ʼofa ke koutou fakafiafia ai? Peʼe mole koutou fiafia pea mo tuʼania mokā koutou talitali ki he ʼaho foʼou? ʼE ʼi ai koa he meʼa ʼe ina toʼo tokotou fiafia?
Ko te fiafia ʼe faka ʼuhiga ʼe ko he logo fīmālie ʼe teitei pe ke kita logoʼi tuʼumaʼu. ʼE ʼiloga ʼi te ʼu meʼa ʼaē ʼe kita logoʼi ʼi tokita loto ohage ko te maʼuli fakafeauga pe ki te ʼu meʼa ʼe maʼu ʼaki he fiafia lahi, pea mo kita loto ke hoholo atu te faʼahi ʼaia. ʼE maʼu moʼoni koa he fiafia feiā?
ʼI te temi nei, ʼe fakaneke e te mālama te manatu ʼaē ʼe hoki fiafia te hahaʼi mo kapau ʼe nātou falāʼia. Ko te lauʼi miliona hahaʼi ʼe nātou gāue kinakina heʼe nātou faiga ke nātou koloaʼia. ʼI tanatou faiga feiā, tokolahi ʼe nātou sakilifisioʼi tanatou ʼu felogoi mo te hahaʼi pea mo ʼihi meʼa maʼuhiga ʼo te maʼuli. Ohage ko he ʼu foʼi lō ʼi tonatou nofoʼaga, ʼe nātou feleleʼaki tuʼumaʼu pea ʼe mole lahi hanatou temi moʼo fakakaukau pea mo nātou fetokagaʼaki. ʼE ʼui fēnei e te sivi mai te nusipepa Los Angeles Times, “ ʼe ʼāsili kaugamālie te hahaʼi ʼaē ʼe lotomamahi ʼaupito, pea kua kaugamālie ʼaupito te kau tūpulaga ʼaē ʼe hoko kiai te faʼahi ʼaia. . . . ʼI te ʼu faitoʼo ʼaē ʼe lahi tona toʼo ʼi te ʼu falemasi, ʼe kau ai te ʼu ʼakau folo moʼo fakafimālieʼi ʼo te lotomamahi.” Ko te lauʼi miliona hahaʼi ʼe nātou fakaʼaogaʼi te toloke peʼe ko te kava moʼo galoʼi tonatou ʼu fihifihia. Ko ʼihi ʼe nātou hoko faifakatau mokā nātou lotomamahi. ʼE ʼui e te sivi mai te nusipepa Pilitania The Guardian, “ko te hahaʼi fafine ʼaē neʼe lahi tāfito tanatou hoko faifakatau moʼo maʼu honatou fīmālie. Neʼe tuʼa tolu te kaugamālie ʼo nātou fafine ia nātou tagata, ʼi te hoko faifakatau mokā nātou lotomamahi.”
Kae ʼe mole maʼu te fiafia moʼoni ʼi he fale koloā, peʼe ʼi he foʼi kava, peʼe ʼi he foʼi ʼakau folo, peʼe ʼi he foʼi huki, peʼe ʼi he falā ʼe tānaki ʼi he fale paʼaga. Ko te fiafia ʼe mole ko he meʼa ʼe fakatau; ʼe mole ʼi ai hona totogi. ʼE feala ke tou maʼu ʼifea he meʼa ʼofa maʼuhiga feiā? ʼE hoki tou palalau anai ki te faʼahi ʼaia ʼi te alatike ʼaē ʼe hoa mai.