Te Kumi ʼo Te Maʼuli Fiafia

ʼE KE FIAFIA KOA? Kapau koia, kotea la ʼae ʼe tupu ai tau fiafia? ʼE lagi ko tou famili, peʼe ko tau gaue, peʼe ko tau lotu? Peʼe ko he aluʼaga pe ʼe tupu ai hau fiafia. Ohage la, ko te kua ʼosi ʼo tou temi ako, peʼe ko tau maʼu he gaue lelei, peʼe ko tau toʼo he motoka foʼou.

Tokolahi ʼe natou ui ko te fiafia ʼe maʼu moka kua natou kakusia he fakatuʼutuʼu neʼe natou fakaʼamu ki ai, peʼe ʼi tanatou kua maʼu te meʼa ʼae ʼe natou fiafia ai. Kae ʼe tologa koa te fiafia ʼaia? ʼE fakatemi pe ia, ʼo fakatupu ʼaki ai he lotomamahi.

Ko te fiafia ʼe ko he loto fimalie ʼe logoʼi e he tahi ʼi tona maʼuli. Pea ʼe feala ke ha ʼi he kiʼi fiafia noa pe, ʼo kaku ai ki he toe fiafia lahi ʼe fakaʼamu ke tologa.

Ke feala hatatou maʼuʼuli fiafia, ʼe mole maʼua ke tou maʼu ia meʼa fuli. Kae ʼe tonu ke tou ako te maʼuli fakafeʼauga. Koia ka tou ui, “ ʼE hoki au fiafia anai moka au maʼu te meʼa ʼaeni peʼe au fai te meʼa ʼae,” ʼe mole feala anai ke tou maʼuli fiafia.

Tou toʼo he faʼifaʼitaki. ʼE fakatatau te maʼuli fiafia ki he malolo fakasino ʼe lelei. ʼE feafeaʼi hakita logoʼi te fimalie ʼaia ʼi tokita sino? Moka kita tokaga lelei ki takita meʼa kai, pe ko hakita faigaoʼi pea mo maʼuli fakapotopoto. ʼO toe feia pe, ko te maʼuli fiafia ʼe ko te ikuʼaga ʼaia ʼo te mulimuli ki he faʼahiga maʼuli ʼe fakatafito ki he ʼu pelesepeto ʼe lelei.

Ko te ʼu pelesepeto peʼe ko te ʼu kalitate fea ʼae ʼe iku ki te maʼuli fiafia? Ko ʼihi ʼe maʼuhiga age pea koʼeni te ʼu kalitate ʼaia:

• TE MAʼULI FAKAFEʼAUGA MO TE LOTOFOAKI

• TE MALOLO FAKASINO MO TE FAʼA KATAKI

• TE ʼOFA

• TE LOTOFAKAMOLEMOLE

• TE ʼUHIGA ʼO TE MAʼULI

• TE ʼAMANAKI

ʼE ui fenei ʼi te tohi ʼae ʼe maʼu ai te poto: “Manuia natou ae e haohaoa i onatou ala.” (Pesalemo 119:1) Tou vakaʼi te ala ʼaia.