Ko Te Kau Fai Faka Mafola ʼo Te Puleʼaga

Kua Fakatonuhia Te Huafa ʼo Te ʼAtua

KO TE Folafola ʼa te ʼAtua, ia te Tohi-Tapu ʼe ina ʼui fēnei: “Koutou mau he aga taulekaleka i te lotolotoga o te hahai pagani, koteuhi ka natou fasituu o uhiga mo koutou, ko koutou ko he hahai agakovi, kae e natou mamata ki autou gaue lelei, pea e natou fakakololia ai ki te Atua i te aho o tana ahiahi mai.” (1 Petelo 2:12) Koia ko te kau Kilisitiano moʼoni ʼe nātou faiga ke nātou taupau he aga ʼe lelei ke ʼaua naʼa tukugakoviʼi te huafa ʼo Sehova.

ʼI te kolo mamaʼo ʼo Zambie ʼe higoa ko Senanga, neʼe kaihaʼa ai te lātio ʼa te tagata faiako. Neʼe tukugakoviʼi e te tagata te kau Fakamoʼoni ʼa Sehova ko ni ʼu hahaʼi kaihaʼa koteʼuhi neʼe nātou fai faka mafola ʼi te koga meʼa ʼaia. Neʼe ina tala ki te kau polisi, ʼe ko te kau Fakamoʼoni ʼaē neʼe nātou kaihaʼa tana lātio. Neʼe ina fakahā te kiʼi pepa lotu ʼaē neʼe ina maʼu ʼi tona lalo matapā moʼo fakamoʼoni ʼaki neʼe ʼolo age te kau Fakamoʼoni ʼa Sehova ki tona ʼapi. Kae neʼe mole tui te kau polisi ki tana ʼu talanoa ʼaia. Neʼe nātou ʼui age ke ʼalu kiō ia pea ke ina kumi fakalelei.

Neʼe ʼui age e te kau tagata ʼāfea ki te ʼu Fakamoʼoni ʼaē neʼe faka mafola ʼi te koga meʼa ʼi te ʼaho ʼaia, ke nā ʼolo ʼo palalau mo te tagata faiako ʼo ʼuhiga mo te meʼa ʼaē neʼe hoko. Neʼe ʼolo te ʼu tēhina ʼo palalau ki ai, ʼo nā fakamahino age ʼe nā ʼōmai heʼe mole nā tali ke tukugakoviʼi te huafa ʼo Sehova. ʼI tanatou fai palalau, neʼe fakahā age e te ʼu tēhina ʼi tanā ʼōmai ʼaē ki tona ʼapi, neʼe nā felāveʼi mo te tūpulaga ʼi ai pea neʼe nā foaki age tana kiʼi pepa lotu. ʼI tana fakalogologo ki tanā fakahā age te agaaga ʼo te tūpulaga, neʼe mahino ai ki te tagata faiako pe ko ai te tūpulaga ʼaia, he neʼe nā lotu tahi pe. Neʼe fakahā age e te tagata faiako te faʼahi ʼaia ki te tama kae neʼe fakafisi kiai. Pea neʼe palalau te tagata faiako ki te ʼu mātuʼa ʼa te tūpulaga pea neʼe nātou ʼolo ki te ʼapi ʼo te taumatuʼa. Mole tuai pea toe foaki age e te faʼe ʼa te kiʼi tama te lātio ʼaē neʼe ina kaihaʼa.

Neʼe ʼalu te tagata faiako ki te kau tagata ʼāfea ʼo fai fakalelei, heʼe kua fakahemala ki te ʼu tukugakoviʼi ʼaē neʼe ina fai ki te kau Fakamoʼoni ʼa Sehova. Neʼe tali e te kau tagata ʼāfea tana ʼu fakalelei, kae neʼe nātou kole age ke ina fakahā ʼi muʼa ʼo te kaugamālie te meʼa ʼaē neʼe hoko, ke mahino ki te hahaʼi fuli ʼe mole aga kaihaʼa te kau Fakamoʼoni. Neʼe fakahā te faʼahi ʼaia ʼi te faleako, pea neʼe fakatonuhia ai te huafa ʼo Sehova. Kua feala ki te kau Fakamoʼoni ʼa Sehova ke nātou hoko atu tanatou faka mafola ʼāteaina ʼi te koga meʼa ʼaia.

[Paki ʼo te pasina 19]

AFRIQUE

Zambie

[Haʼuʼaga ʼo te paki]

Mountain High Maps® Copyright © 1997 Digital Wisdom, Inc.