“Neʼe Agalelei ʼAupito Sehova Kia ʼAu!”
ʼI TE tahi po fakafiafia ʼi Malesio 1985, neʼe fai te meʼa maʼuhiga e te ʼu fafine pea mo te ʼu tagata ʼo te Komite Faitohi ʼo te nofoʼaga faka malamanei ʼa te kau Fakamoʼoni ʼa Sehova ʼi New York, ʼi Amelika. ʼI te temi ʼaia, neʼe kua taʼu 60 te gāue ʼa Karl F. Klein ʼi te minisitelio temi katoa. ʼAki he loto fiafia, neʼe ʼui fēnei e te Tēhina ko Klein: “Neʼe agalelei ʼaupito Sehova kia ʼau!” Neʼe ina ʼui ʼe ina leleiʼia ia te vaega faka Tohi-Tapu ʼo Pesalemo 37:4. Ki muli age, neʼe ina fakafiafia ia nātou fuli ʼaki tana violoncelle.
ʼI te ʼu taʼu e 15 ki muli age, neʼe hoko atu e te Tēhina ko Klein tana gāue ʼi te selevisi faitohi, pea mo kau ki te Kolesi Pule ʼa te kau Fakamoʼoni ʼa Sehova. Pea ʼi te ʼaho 3 ʼo Sanualio 2001, ʼi tona taʼu 95, neʼe mate agatonu ia Karl Klein.
Neʼe tupu ia Karl ʼi Siamani. Neʼe ʼalu tona famili ki Amelika, pea neʼe lahi ake ia Karl ʼi Illinois, ʼi te tuʼa kolo ʼo Chicago. ʼI tana kei tūpulaga, ko Karl pea mo tona tēhina veliveli ko Ted, neʼe nā fia logo ki te Tohi-Tapu. Neʼe papitema ia Karl ʼi te taʼu 1918, pea ko te ʼu meʼa fakafiafia ʼaē neʼe ina logo kiai ʼi te fakatahi ʼa te kau Ako ʼo te Tohi-Tapu ʼi te 1922, neʼe tupu ai tana ʼofa fualoa ki te gāue ʼo te minisitelio. Neʼe fia kau ʼi te vāhaʼa fuli ki te gāue fai faka mafola, ʼo ina fai feiā ʼo aʼu ki te ʼu vāhaʼa fakaʼosi ʼo tona maʼuli.
ʼI te 1925, neʼe kau ia Karl ia nātou ʼaē ʼe gāue ʼi Brooklyn, ʼo ʼuluaki gāue ʼi te selevisi tā tohi. Neʼe ina leleiʼia ʼaupito te musika, pea lolotoga ni ʼu taʼu neʼe gaoʼi violoncelle ʼi te foʼi mahōlō ʼaē neʼe kau ki te polokalama ʼo te lātio Kilisitiano. Ki muli age, neʼe gāue ʼi te Komite ʼo te Gāue, ʼo ina leleiʼia tāfito tana fakatahi mo te tēhina ʼaē ʼe tokaga ki te selevisi ʼaia, ko T. J. Sullivan. ʼI te temi ʼaia, neʼe ʼohoana ia Ted mo Doris, pea neʼe nā gāue misionea ʼi Puerto Rico.
Ia taʼu e nimagofulu, neʼe gāue ia Karl Klein ʼi te Komite Faitohi, ʼaē neʼe lagolago lahi kiai, he neʼe ina leleiʼia te fai ʼo he ʼu kumi pea neʼe ina maʼu te ʼatamai mālama loloto ʼo ʼuhiga mo te Tohi-Tapu. ʼI te 1963, neʼe ʼohoana ia Karl pea mo Margareta, te tuagaʼane misionea Siamani neʼe gāue ʼi Polivia. ʼAki tana tokoni ʼofa ʼaia, tāfito ʼi te temi ʼaē neʼe mahaki ai ia Karl, neʼe ina lava fai tana gāue logola tana kua matuʼa. ʼAki te aga fakamalotoloto ʼa Karl pea mo tona ʼuhiga tagata fai mahōlō fiafia, neʼe ina fai ʼi te ʼu kokelekasio pea mo te ʼu fakatahi, te ʼu akonaki ʼe mole galoʼi anai e he tahi. ʼI muʼa ʼo tana mate, neʼe pelesita ʼi te lau ʼo te koga tohi ʼo te ʼaho, ʼi te famili ʼo te Petele ʼi New York, ʼo nātou fiafia ai pea mo fua lelei kia nātou fuli.
ʼE manatuʼi anai e te tokolahi ʼaē ʼe nātou lau tuʼumaʼu Te Tule Leʼo, te hisitolia ʼo te maʼuli ʼo te Tēhina ko Klein, neʼe ko he fakamatala fakafiafia ʼo te ʼu meʼa neʼe hoko kia ia pea neʼe tā ʼi Te Tule Leʼo Fakafalani ʼo te ʼaho 1 ʼo Maio 1985. ʼE koutou fiafia anai ʼi te lau pea mo toe lau ia te fakamatala ʼaia, ʼo koutou manatuʼi ko te tēhina ʼaia neʼe gāue katoa pea mo agatonu ʼi te ʼu taʼu e hogofulu-ma-nima ʼaē neʼe hoa ki te taʼu ʼaia.
Neʼe fakanofo ia ia e te ʼAliki, pea neʼe loto moʼoni e te Tēhina ko Klein ke kaugā hau mo Kilisito ʼi selo. ʼE tou tui papau kua fakahoko e Sehova ʼi te temi nei tona holi ʼaia.—Luka 22:28-30.
[Paki ʼo te pasina 31]
Ko Karl ʼi te taʼu 1943 mo T. J. Sullivan pea mo Ted pea mo Doris
[Paki ʼo te pasina 31]
Ko Karl pea mo Margareta, ʼi ʼOketopeli 2000