Te Mālo ʼi Te Telepinale Faka Puleʼaga
ʼI SIAMANI neʼe mālo te kau Fakamoʼoni ʼa Sehova ʼi te Tribunal Constitutionnel Fédéral ʼi Karlsruhe. Koia neʼe ko he meʼa maʼuhiga kia nātou.
ʼI Siamani ko te kau Fakamoʼoni ʼa Sehova neʼe nātou faka mafola mālohi ia taʼu e 100. Neʼe nātou hāo mai te fakataga mālohi ʼa te kau Nasi pea mo te kau Komunisi, ʼaē neʼe ko te ʼu puleʼaga aga fefeka ʼaia e lua ʼo te 20 sēkulō. Talu mai te 1990, kua fakagafua e te puleʼaga te lotu ʼa te kau Fakamoʼoni. ʼAki te ʼu tonu lelei e lua ʼaē neʼe fai e te telepinale ʼo ʼuhiga mo te kau Fakamoʼoni, neʼe ʼi ai te tahi tonu neʼe molehi, koia neʼe toe tagi te kau Fakamoʼoni ki te Tribunal Constitutionnel Fédéral, ʼaē neʼe ina fai leva te tonu ʼi te ʼaho 19 ʼo Tesepeli 2000.
Neʼe Lagolago Te Telepinale Katoa Ki Te Kau Fakamoʼoni ʼa Sehova
ʼI te telepinale ko tuʼi fakamāu ʼe toko 7 neʼe nātou lagolago ki te kau Fakamoʼoni ʼa Sehova. Neʼe molehi e te kau tuʼi fakamāu ʼaia te tonu ʼaē neʼe fai e te tahi telepinale ʼi te 1997 pea mo fakahā ki te telepinale ʼaia ke ina toe fakagafua te gāue ʼa te kau Fakamoʼoni.
ʼI te moʼi temi ʼaia neʼe fakahā e te Tribunal Constitutionnel Fédéral ia te manatu tahi ʼo te ʼu Puleʼaga pea mo te ʼu lotu. Ko te tuʼulaga ʼo he lotu “ ʼe mole fakafuafua ki tana ʼu akonaki kae ki tona ʼu agaaga.”
Neʼe toe fakahā e te telepinale ko te kau Fakamoʼoni “ ʼe mole nātou kau ki te ʼu tau,” pea “ ʼe mole nātou fai he meʼa ʼe fakatupu kovi ki te temokalasia” pea “ ʼe mole nātou fia fetogi te temokalasia ʼaki he tahi puleʼaga.” Koia ko te mole kau ʼa te kau Fakamoʼoni ki te ʼu vote faka politike, ʼe mole ko he tupuʼaga ʼaia moʼo tapuʼi ʼo tanatou tauhi.—Soane 18:36; Loma 13:1.
Neʼe toe ʼui e te telepinale ko he tahi ʼe tui—peʼe ko he Fakamoʼoni peʼe ko he tahi age lotu—ʼe feala ʼi ʼihi temi ke hoko he ʼu faigataʼaʼia kia ia, heʼe mole ʼalutahi te ʼu lao ʼo te Puleʼaga pea mo te ʼu meʼa ʼaē ʼe tui kiai. Kapau ʼe fakalogo te hahaʼi ki tonatou leʼo loto, ʼo “lahi age tanatou fakalogo ki te ʼu akonaki faka lotu ʼi te lao,” pea ʼe lagi tali anai e te Puleʼaga pea mo ina fakapipiki ki te ʼāteaina faka lotu.—Gaue 5:29.
Neʼe lahi te palalau ʼa te ʼu sulunale ki te tonu ʼaē neʼe fai e te telepinale. Neʼe teitei tohi te tonu ʼaia ʼi te ʼu sulunale fuli ʼo Siamani. Neʼe fakahā ʼi te ʼu televisio pea mo te ʼu lātio te ʼu fakamatala pea mo te ʼu fakafehuʼi ʼo ʼuhiga mo te kau Fakamoʼoni. Ko te hoki hoko ʼaē ʼo te meʼa feiā, ko te huafa ʼo Sehova neʼe mafola lahi ʼi Siamani.
[Haʼuʼaga ʼo te paki pasina 8]
AP Photo/Daniel Maurer